ཕྱི་ལོ་ ༢༠༡༥ ཟླ་ ༩ ཚེས་ ༡༧ རེས་གཟའ་ཕུར་བུ།

༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དབྱིན་ཡུལ་མེག་དཱ་ལེན་ (Magdalen College) མཐོ་སློབ་ནང་ཕྱི་ཚེས་ ༡༦ དང་ ༡༧ བཅས་ཉིན་གཉིས་རིང་ (Inspire Dialogue Foundation) ཐེབས་རྩས་གོ་སྒྲིག་གནང་ཐོག་རྣམ་དཔྱོད་གོང་སྤེལ་དང་། མི་གཤིས་འགྱུར་བཅོས་གཏོང་ཐབས་ཅེས་པའི་བརྗོད་གཞིའི་ཐོག་བཀའ་སློབ་ལམ་སྟོན་དང་། ཕྱོགས་མཚུངས་ཐེངས་འདིའི་བགྲོ་གླེང་ནང་གདན་ཞུས་གནང་བའི་ལྕམ་ཧི་ལི་རི་ཝི་ལམ་ (Hillary Williams-Papworth) ལགས་དང་། དེ་བཞིན་རོ་ཝན་ཝི་ལམ (Lord Rowan Williams) མཆོག་བཅས་ལྷན་ཞུགས་མཛད་དེ་བགྲོ་གླེང་མཛད་དང་མཛད་མུས་ཡིན་འདུག

དེ་ཡང་བོད་རིགས་གཙོས་པའི་ཕྱི་ནང་གི་མི་སྣ་མང་པོས་༸གོང་ས་༸སྐྱབས་མགོན་ཆེན་པོ་མཆོག་ལ་ཕེབས་བསུའི་སྣེ་ལེན་གཟབ་རྒྱས་ཞུས་པ་དང་། (Sir Humphrey Cripps theatre) ཞེས་པའི་ཚོགས་ཁང་ནང་ཆིབས་སྒྱུར་བསྐྱངས་སྐབས་ལས་རིམ་གཙོ་སྐྱོང་གནང་མཁན་བོ་རོ་ནེས་པེ་ཊི་རེ་ཁེ་ཡཱ་ (Baroness Patricia Scotland) ལགས་དང་། རོ་ཝན་ཝི་ལམ་ (Lord Rowan Williams) ལགས་བཅས་ལ་མཇལ་ཁ་སྩལ་ཏེ་ཚོགས་ཁང་ནང་༸ཞབས་སོར་འཁོད་བསྟུན། ཀེམ་རོན་ཝེ་ལོར་ (Cameron Taylor) ལགས་ཀྱིས་ངོ་སྤྲོད་ཀྱི་འཚམས་འདྲི་ཞུས་ཡོད།

དེ་ནས་ལས་རིམ་གཙོ་སྐྱོང་གནང་མཁན་བོ་རོ་ནེས་པེ་ཊི་རེ་ཁེ་ཡཱ་ (Baroness Patricia Scotland) ལགས་ཀྱིས་༸གོང་ས་༸སྐྱབས་མགོན་ཆེན་པོ་མཆོག་དང་ (Hillary Williams-Papworth) ཧི་ལི་རི་ཝི་ལམ་མཆོག་རྣམ་གཉིས་ལ་ཆེ་བསྟོད་ཀྱི་ངོ་སྤྲོད་དང་སྦྲགས་ཉིན་དང་པོའི་བགྲོ་གླེང་དངོས་གཞི་དབུ་འཛུགས་གནང་ཡོད། བགྲོ་གླེང་གི་ཐོག་མར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་སྩལ་དོན། སྤུན་ཟླ་རྒན་གཞོན་ཕོ་མོ་ཡོངས་ལ་འཚམས་འདྲི་ཞུ་རྒྱུ་དང་། ངོས་རང་ནང་པ་ཞིག་དང་ཨེ་ཤི་ཡ་ནས་ཡིན་ཞེས་བརྗོད་ནས་འདིར་ཡོང་བ་ཞིག་མ་ཡིན་པར་འགྲོ་བ་མི་ཞིག་ཡིན་པའི་ཆ་ནས་འདིར་བཅར་བ་ཞིག་ཡིན། ངོས་རང་འཛམ་གླིང་འདིའི་སྟེང་འགྲོ་བ་མི་སུ་འདྲ་ཞིག་ཐུག་ཀྱང་ངོས་རང་འགྲོ་བ་མི་ཞིག་ཡིན་པ་ལས་ངོས་རང་ལ་དམིགས་བསལ་གྱི་ཁྱད་ཆོས་གང་ཡང་མེད། ཅེས་ཞུ་གི་ཡོད། ང་ཚོ་ཚང་མ་འཛམ་གླིང་འདིའི་སྟེང་གནས་སྡོད་བྱེད་མཁན་གཅིག་མཚུངས་ཡིན། དངོས་ཡོད་གནས་ཚུལ་ཐོག་ནས་ང་ཚོ་ཚང་མ་གཅིག་ལ་གཅིག་རྟེན་གྱི་གནས་སྟངས་ཐོག་འཚོ་བཞིན་པར་བརྟེན་གོ་ལ་གཅིག་འགྱུར་ཡིན་བསམ་པའི་བསམ་བློ་གཏོང་དགོས་པ་ལས། ངའི་རྒྱལ་ཁབ་དང་ངའི་སྤྱི་ཚོགས་ཞེས་དུས་ཚོད་ཡོལ་ཟིན་པའི་སྐད་ཆ་དེ་དག་བཤད་ན་ཕན་ཐོགས་གང་ཡང་མེད།

དུས་ཚོད་ནི་འགྲོ་བཞིན་ཡོད། ང་ཚོས་འདས་ཟིན་པའི་དུས་ཚོད་ལ་བཟོ་བཅོས་བརྒྱབ་མི་ཐུབ། མ་འོངས་པ་གང་འདྲ་ཞིག་ཡོང་དང་མི་ཡོང་ཟེར་བ་དེ་ད་ལྟ་ང་རང་ཚོས་ག་རེ་བྱེད་དང་མ་བྱས་ལ་རག་ལུས་ཡོད། དུས་ཚོད་འགྱུར་བ་འགྲོ་གི་ཡོད་རུང་། ང་ཚོ་མིའི་བསམ་བློ་གཏོང་སྟངས་དེ་རྙིང་པ་རང་འཇག་བསྡད་པ་ལ་བརྟེན་ནས་ང་རང་ཚོ་མིས་བཟོས་པའི་དཀའ་ངལ་མང་པོ་ཞིག་ལྷག་གི་ཡོད། དཀའ་ངལ་དེ་དག་སེལ་བར་ཕྱོགས་ཡོངས་ཀྱི་གནས་སྟངས་ཤེས་པའི་བསམ་རྒྱ་ཆེ་ཙམ་གནང་དགོས་པ་ཡིན། དེར་བརྟེན་ངོས་རང་དེ་རིང་འདིར་རྣམ་པ་ཚོ་དང་ལྷན་འཛོམས་ཐོག་བསམ་ཚུལ་བརྗེ་ལེན་བྱེད་རྒྱུའི་གོ་སྐབས་དེ་དང་ལེན་བྱེད་དུ་ཡོང་བ་ཡིན།

དེ་རྗེས་ཝི་ལམ་ (Lord Williams) མཆོག་གིས་ང་ཚོ་འགྲོ་བ་མིའི་རིགས་ལ་དཀའ་ངལ་འཕྲད་བཞིན་པ་ནི་མི་སྒེར་དང་སྤྱི་ཚོགས་སྒེར་གཅིག་གི་དཀའ་ངལ་མིན་པར་འགྲོ་བ་སྤྱིའི་དཀའ་ངལ་ཞིག་ཆགས་ཡོད། དེ་ཡང་དཔེར་ན་གྷི་རིག་ནང་འཕྲད་པའི་དཔལ་འབྱོར་གྱི་དཀའ་ངལ་དེ་བཞིན་རྒྱལ་ཁབ་གཅིག་གི་དཀའ་ངལ་གཅིག་པུ་མིན་པར་གོ་ལ་སྤྱིའི་དཀའ་ངལ་ལ་འགྱུར་ཡོད། དེ་བཞིན་བྷང་ལ་དེཤ་ནང་འཕྲད་པའི་གནམ་གཤིས་འགྱུར་ལྡོག་གི་དཀའ་ངལ་དང་གྷ་ན་དང་སིར་ར་ལི་ཨོན་ (Ghana and Sierra Leone) ནང་ནད་ཡམས་བྱུང་བའི་དཀའ་ངལ་དེ་དག་ཚང་མ་རྒྱལ་ཁབ་གཅིག་གི་དཀའ་ངལ་ཙམ་མིན་པར་གོ་ལ་སྤྱི་ལ་འཕྲད་པའི་དཀའ་ངལ་ཞིག་ཏུ་འགྱུར་ཡོད།

དེར་བརྟེན་དཀའ་ངལ་དེ་དག་སེལ་བར་དཀའ་ངལ་གང་འདྲ་བྱས་ནས་ཡོང་གི་ཡོད་མེད་ཐད་རྟགས་དཔྱད་ཀྱིས་དཀའ་ངལ་འབྱུང་བའི་རྒྱུ་ངོས་འཛིན་ཐུབ་དགོས་པ་ཡིན་ཞེས་གསུང་བཤད་གནང་། དེ་རྗེས་བགྲོ་གླེང་བཀོད་སྒྲིག་པ་བཱ་རོ་ནེས་སི་ཀོ་ཊི་ལཎྜི་ལགས་ཀྱིས་འགྲེལ་བརྗོད་གནང་དོན། དེ་སྔོན་ཨ་ཕི་རི་ཀའི་ནང་ཞི་བདེའི་ཐོག་གླེང་སྟེགས་བྱེད་མཁན་བུད་མེད་སུ་ཞིག་ཀྱང་མཉམ་ཞུགས་བྱེད་ཐུབ་མེད། དེར་བརྟེན་མང་ཚོགས་ནས་གླེང་སློང་ཤུགས་ཆེ་བྱུང་སྐབས། མི་ཞིག་གིས་དེ་ནི་བུ་མོ་རྣམས་ལ་དམིགས་བསལ་གྱི་ཆག་ཡང་བཏང་བ་རེད་ཅེས་ཀྱང་བཤད་ཡོད། ངས་བལྟས་ན་གནས་སྟངས་འདི་འདྲ་རྩ་ནས་རེད་མི་འདུག བུད་མེད་རྣམས་ཀྱི་བྱེད་ཐུབ་པའི་གནས་སྟངས་མང་པོ་བྱུང་ཡོད། དཔེར་ན་ནུབ་ཨར་ལན་ཌི་ (Northern Ireland) ནང་ཞི་བདེའི་ཐོག་གྲོས་མོལ་གླེང་སྟེགས་བྱེད་མཁན་གྱི་བུད་མེད་བྱུང་ཐུབ་ཡོད། ཅེས་གསུང་། དེ་རྗེས་མུ་མཐུད་༸གོང་ས་༸སྐྱབས་མགོན་ཆེན་པོ་མཆོག་དང་། ཝི་ལམ་མཆོག་རྣམ་གཉིས་ཀྱིས་གཙོས་པའི་ཤེས་ལྡན་མི་སྣ་ཁག་ལྷན་ཞུགས་ཀྱིས་ཉིན་དང་པོའི་བགྲོ་གླེང་གི་བརྗོད་གཞིའི་ཐོག་བཀའ་བསྡུར་ལྷུག་པོར་མཛད་ཡོད་འདུག །