ཕྱི་ལོ་ ༢༠༡༥ ཟླ་ ༩ ཚེས་ ༡༨ རེས་གཟའ་པ་སངས།
༄༅། །བོད་མི་མང་སྤྱི་འཐུས་སྐབས་ ༡༥ པའི་སྔ་ལོ་གྲོས་ཚོགས་ཚོགས་དུས་ ༨ པའི་གྲོས་ཆོད་དགོངས་དོན་ལྟར། བཙན་བྱོལ་བོད་མིའི་གཞི་རིམ་ཤེས་ཡོན་སྲིད་བྱུས་གཏན་འབེབས་ཀྱིས་ལོ་མང་སོང་བས་སྲིད་བྱུས་འདི་བཞིན་བཙན་བྱོལ་བོད་མིའི་སྒྲིག་འཛུགས་ཀྱི་སློབ་གྲྭ་ཡོངས་ལ་ལག་བསྟར་ཇི་ཙམ་འཁེལ་ཐུབ་ཀྱི་ཡོད་མེད་དང་། སློབ་གྲྭ་ཁག་གི་སྤྱི་ཡོངས་ཀྱི་གནས་སྟངས་ལ་ཁྱོན་ཡོངས་ནས་བསྐྱར་ཞིབ་མཐིལ་ཕྱིན་དང་འབྲེལ། མ་འོངས་ཕུགས་རྒྱང་རིང་པོར་བཙན་བྱོལ་བོད་མིའི་ཤེས་ཡོན་སྡེ་ཚན་ཡོངས་རྫོགས་ཤེས་ཡོན་སྲིད་བྱུས་གཅིག་གི་འོག་འགྲོ་ཐུབ་ཐབས་ཀྱི་ལམ་སྟོན་ཚད་ལྡན་ཞིག་གཏན་འབེབས་དགོས་གལ་ཆེད་བོད་མི་མང་སྤྱི་འཐུས་ལྷན་ཚོགས་ཀྱི་ཤེས་ཡོན་ཚོགས་ཆུང་ཞིག་བསྐོ་འཛུགས་གནང་ཡོད་པས་ལོ་གཅིག་རིང་ཞིབ་འཇུག་དཔྱིས་ཕྱིན་པ་གནང་སྟེ་སྙན་ཐོ་ཕྱོགས་བསྒྲིགས་གནང་ཡོད་པ་དེ། ཐེངས་འདིའི་གྲོས་ཚོགས་སུ་ཤེས་ཡོན་ཚོགས་ཆུང་དེའི་ཚོགས་གཙོ་སྤྱི་འཐུས་པདྨ་འབྱུང་གནས་ལགས་ཀྱི་ཕྱི་ཚེས་ ༡༦ ཉིན་ཤོག་ངོས་གྲངས་ ༦༣ ཅན་དང་ཟུར་འཛར་བཅས་ཀྱི་སྙན་ཐོ་སྙན་སྒྲོན་ཞུས་རྗེས་གྲོས་ཚོགས་སུ་བགྲོ་གླེང་གནང་བ་མ་ཟད་དེ་བཞིན་དེ་རིང་ཕྱི་ཚེས་ ༡༨ ཉིན་ཤེས་ཡོན་ཚོགས་ཆུང་གིས་བཏོན་པའི་སྙན་ཐོའི་ཐོག་བགྲོ་གླེང་གནང་ཡོད།
དེ་ཡང་ཤེས་ཡོན་སྲིད་བྱུས་འདི་བཞིན་སློབ་གྲྭ་ཁག་གི་ནང་ལག་བསྟར་ཇི་ཙམ་གནང་ཡོད་མེད་དང་། དེ་བཞིན་བཙན་བྱོལ་བོད་མིའི་ཤེས་ཡོན་སྡེ་ཚན་ཡོངས་རྫོགས་སྲིད་བྱུས་གཅིག་གི་འོག་འགྲོ་ཐབས་ཀྱི་ལམ་སྟོན་ཚད་ལྡན་ཞིག་ཡོང་སླད་གཏན་འབེབས་དགོས་རྒྱུ་གལ་ཆེར་གཟིགས་ཏེ་བོད་མི་མང་སྤྱི་འཐུས་ལྷན་ཚོགས་ཀྱི་ཤེས་ཡོན་ཚོགས་ཆུང་འདིས་བཏོན་པའི་སྙན་ཐོའི་ནང་གཙོ་བོ་ཤེས་ཡོན་སྲིད་བྱུས་ལག་ལེན་ཇི་ཙམ་ལག་བསྟར་ཐུབ་ཡོད་མེད་དང། ལག་ལེན་སྐབས་དངོས་སུ་དཀའ་ངལ་གང་དང་གང་འཕྲད་བཞིན་ཡོད་སྐོར། མང་ཚོགས་ནང་ཤེས་ཡོན་སྲིད་བྱུས་ཐོག་གོ་རྟོགས་ག་ཚོད་ཡོད་མེད། ཤེས་རིག་ལས་ཁུངས་ནས་བཙན་བྱོལ་བོད་མིའི་ཤེས་ཡོན་གནས་ཚད་ཡར་རྒྱས་ཡོང་ཐབས་ལ་ཕྱག་ལས་གང་དང་གང་གནང་ཡོད་མེད་སོགས་བགྲོ་གླེང་གནང་ཡོད་པ་མ་ཟད་འབྲེལ་ཡོད་ཤེས་རིག་བཀའ་བློན་མཆོག་ལ་དྲི་བ་དྲིས་ལན་ཡང་གནང་ཡོད།
སྤྱིར་ཤེས་ཡོན་སྲིད་བྱུས་འདི་ལག་བསྟར་གནང་ནས་ལོ་ངོ་བཅུ་འགྲོ་བཞིན་ཡོད་པ་དང་། དུས་ཡུན་དེའི་རིང་ཤེས་ཡོན་སྲིད་བྱུས་འདི་བཞིན་རྡ་ས་མེས་དབོན་གཙུག་ལག་དཔེ་སྟོན་སློབ་གྲྭ་དང་། སཾ་བྷོ་ཊ་སློབ་གྲྭ་ཁག་ཡོངས། དེ་བཞིན་བོད་ཁྱིམ་གཉིས་ཀྱི་ཁྱབ་ཁོངས་སྔོན་སློབ་ཡོངས་དང་། ལྷག་པར་རྡ་ས་བོད་ཁྱིམ་ཁྱབ་ཁོངས་ལ་དྭགས་བྱང་ཐང་སློབ་གྲྭ་ཁག་ནང་འཛིན་རིམ་ཇི་ཡོད་བཅས་སུ་ལག་བསྟར་གནང་དང་གནང་མུས་ཡིན་འདུག །
