༢༠༡༥ ཟླ་ ༩ ཚེས་ ༡༨ རེས་གཟའ་པ་སངས།

༄༅། །འདི་གར་ཆེས་མཐོའི་ཁྲིམས་ཞིབ་ཁང་ནས་བཏང་གནས་ནང་འཁོད་དོན། ཆེས་མཐོའི་ཁྲིམས་ཞིབ་ཁང་གི་དཔལ་ལྡན་ཁྲིམས་ཞིབ་པ་ཆེ་བ་བཀའ་བརྒྱུད་དོན་གྲུབ་མཆོག་ཕྱི་ལོ་ ༢༠༡༥ ཟླ་ ༩ ཚེས་ ༤ ཚེས་ ༨ བར་བདེ་སྐྱིད་གླིང་གཞིས་ཆགས་སུ་རྟེན་གཞི་བྱས་པའི་བྱང་ཕྱོགས་བོད་མིའི་ས་གནས་ཁྲིམས་ཁང་དུ་འཚམས་གཟིགས་དང་ལས་དོན་རྟོག་ཞིབ་ཆེད་གཞུང་འབྲེལ་ཕྱོགས་ཕེབས་གནང་ཡོད།

དེ་ཡང་ཕྱི་ཚེས་ ༥ ཉིན་ས་གནས་ཁྲིམས་ཞིབ་ཁང་དུ་ཁྲིམས་ཞིབ་ལྷན་ཚོགས་ནས་གཏན་འབེབས་གནང་བའི་ས་གནས་ཁྲིམས་ཞིབ་ཁང་ཁག་གི་ལས་དོན་བྱེད་ཕྱོགས་ཀྱི་རྩ་འཛིན་ལམ་སྟོན་ངོ་སྤྲོད་འགྲེལ་བཤད་དང་། བྱང་ཕྱོགས་ས་གནས་ཁྲིམས་ཞིབ་ཁང་གི་ཁྲིམས་དོན་དང་འཛིན་སྐྱོང་བྱེད་སྒོར་ཉིན་འཁྱོངས་ཞིབ་འཇུག་གནང་སྟེ། སྐབས་མཚམས་སོ་སོར་བྱེད་སྒོའི་ལམ་སྟོན་གནང་ཡོད་པ་དང་།

ཕྱི་ཚེས་ ༦ སྔ་དྲོ་ཆུ་ཚོད་ ༡༠༌༡༥ ཐོག་མཛད་རིམ་གཏན་འབེབས་ལྟར་བདེ་སྐྱིད་གླིང་མི་མང་ཚོགས་ཁང་དུ་མང་ཚོགས་ལ་བཙན་བྱོལ་བོད་མིའི་མང་གཙོའི་འཕེལ་རིམ་ནས་འགོ་བཙུགས་ཀྱིས་ཁྲིམས་ལུགས་དབང་འཛིན་དང་། སྤྱི་མང་གཏུག་བཤེར་ངོ་སྤྲོད་དང་། ཚོགས་བཅར་བས་དྲི་བ་ཁག་ལ་གསལ་བཤད་ལན་འདེབས་གནང་ཡོད་པ་དང་། ཉིན་རྒྱབ་ཚོུད་ ༢༌༣༠ ཐོག་ས་གནས་ཁྲིམས་ཞིབ་ཁང་གི་གཏུག་བཤེར་ཁང་དུ་ལྡེ་ར་ལྡུན་ཁུལ་གྱི་ཁྲིམས་རྩོད་པ་བརྒྱད་དང་མཉམ་བཞུགས་མོལ་ཚོགས་འདུ་སྐོང་ཚོགས་གནང་།

ཕྱི་ཚེས་ ༧ ཉིན་གྱི་སྔ་དྲོར་ས་གནས་ཁྲིམས་ཞིབ་ཁང་གི་རྩིས་དེབ་ཁག་དང་། ལས་བྱེད་རྣམས་ཀྱིས་ལས་བགོས་དང་། ལས་ཁུངས་དང་ལས་ཤག་ཕྱི་ནང་བཅས་ལ་ཞིབ་འཇུག་གིས་སྐབས་མཚམས་ལམ་སྟོན་དང་། ཉིན་རྒྱབ་ཆེས་མཐོའི་ཁྲིམས་ཞིབ་ཁང་ནས་གནང་བའི་རྩ་འཛིན་ལམ་སྟོན་ཁག་དང་། ལས་བྱེད་བླང་དོར་སྒྲིག་གཞིའི་འབྲེལ་ཆགས་དོན་གནད་གལ་ཆེན་ངོ་སྤྲོད་འགྲེལ་བརྗོད་གནང་བ་དང་། འཛིན་སྐྱོང་བཞུགས་མོལ་ཚོགས་འདུའི་ཐོག་དགོངས་འཆར་ཕེབས་རིགས་གསན་བཞེས་དང་། གསལ་བཤད་ལམ་སྟོན་གནང་འོས་གནང་སྟེ། ཕྱི་ཚེས་ ༨ ཉིན་སྔ་དྲོ་ཚོུད་ ༦༌༢༠ ཙམ་ས་གནས་ནས་ཕེབས་ཐོན་གྱིས་དགོང་དྲོ་ཚོུད་ ༥༌༣༠ ཐོག་བཞུགས་སྒར་དུ་བདེ་འབྱོར་བྱུང་འདུག་པ་དང་། འདི་ནི་ཁྲིམས་ཞིབ་ཆེ་བས་མཛད་ཁུར་བཞེས་རྗེས་ཀྱི་འཚམས་གཟིགས་ཕྱོགས་ཕེབས་ཐོག་མ་དེ་ཡིན་འདུག །