ཕྱི་ལོ་ ༢༠༡༥ ཟླ་ ༩ ཚེས་ ༢༤ རེས་གཟའ་ཕུར་བུ།

༄༅། །ཕྱི་ལོ་ ༢༠༡༥ ཟླ་ ༩ ཚེས་ ༢༡ ཉིན་༸གོང་ས་༸སྐྱབས་མགོན་ཆེན་པོ་མཆོག་ལོན་ཊོན་ནང་རྟེན་གཞི་བྱས་པའི་ House of Lords ཞེས་པའི་ཚོགས་ཁང་ནང་དུ་ནང་པའི་སྤྱི་ཚོགས་ཀྱིས་གོ་སྒྲིག་འོག་ཆོས་ལུགས་མཐུན་ལམ་དང་། བདེ་སྐྱིད་བསྐྲུན་ཐབས་ཞེས་པའི་བརྗོད་གཞིའི་ཐོག་བཀའ་སློབ་སྩལ་གནང་ཡོད།

དེ་ཡང་གོང་ཚེས་ཉིན་གྱི་ཐོག་མར་སི་ཨན་ཨན་ CNN གསར་འགྱུར་ལས་ཁང་གི་གསར་འགོད་པ་ཀི་རི་ཊེན་ནི་ཨཱ་མཎ་པུར། Christiane Amanpour ལགས་ཀྱིས་༸གོང་ས་༸སྐྱབས་མགོན་ཆེན་པོ་མཆོག་ལ་བོད་རྒྱའི་གནད་དོན་དང་། དེ་བཞིན་ཐེངས་འདིའི་མཛད་འཕྲིན། དེ་བཞིན་འབར་མའི་ནང་པ་ཚོས་འཚེ་བའི་བྱ་བ་བྱས་པ་སོགས་ཀྱི་སྐོར་དགོངས་ཚུལ་ཇི་ཡོད་སྐོར་བཅར་འདྲི་ཞུས་སྐབས་མགོན་པོ་གང་ཉིད་མཆོག་གིས་བཀའ་ལན་རྒྱས་པར་སྩལ།

དེ་རྗེས་༸གོང་ས་༸སྐྱབས་མགོན་ཆེན་པོ་མཆོག་ House of Lords ཚོགས་ཁང་ནང་ཞབས་སོར་འཁོད་མཚམས། ནང་པའི་སྤྱི་ཚོགས་ཀྱི་ཚོགས་གཙོ་བཱ་རོ་ནེས་ཁེ་རོ་ལན་ཀོག་སེ་ལགས་དང་། Baroness Caroline Cox ཌེས་མོན་བྷིཊ་ཌུལ་ཕི་ Desmond Biddulph ལགས་རྣམ་གཉིས་ཀྱིས་གཙོས་ཁ་ཆེ་དང་། ནང་པ། ཡི་ཤུ། སིག ཡེ་ཤུ། སོགས་ཆོས་ལུགས་འདྲ་མིན་ནས་འདུས་པའི་མི་སྣ་མང་པོས་མགོན་པོ་གང་ཉིད་མཆོག་ལ་ཕེབས་བསུ་གཟབ་རྒྱས་ཞུས་འདུག

དེ་ནས་ནང་ཚོགས་ཀྱི་ཚོགས་གཙོ་རྣམ་གཉིས་ཀྱིས་འཚམས་འདྲི་ཞུས་པ་དང་སྦྲགས། ཌེས་མོན་བྷིཊ་ཌུལ་ཕི་ལགས་ཀྱིས་ངོ་སྤྲོད་དང་སྦྲགས་གསུང་བཤད་གནང་དོན། འདི་ལོ་བོད་ཀྱི་སྐྱབས་མགོན་ཏཱ་ལའི་བླ་མ་མཆོག་དགུང་གྲངས་བརྒྱད་ཅུར་ཕེབས་པའི་༸སྐུའི་གྱ་སྟོན་དང་། ང་ཚོ་ནང་པའི་ཚོགས་པ་འདི་བཞིན་དབུ་བརྙེས་ནས་ལོ་ངོ་དགུ་བཅུ་འཁོར་བའི་དུས་ཆེན་གཉིས་སྲུང་བརྩི་ཞུ་རྒྱུའི་གོ་སྐབས་བྱུང་ཞེས་༸གོང་ས་༸སྐྱབས་མགོན་ཆེན་པོ་མཆོག་ལ་སྙན་སྒྲོན་ཞུས་ཡོད། དེ་རྗེས་༸གོང་ས་༸སྐྱབས་མགོན་ཆེན་པོས་བཀའ་སློབ་སྩལ་དོན། ཆོས་ལུགས་འདྲ་མིན་ནས་འདུས་པའི་ཆོས་གྲོགས་ཕོ་མོ་རྣམ་པ་ཚོ། དེ་རིང་ངོས་རང་འདིར་བཅར་རྒྱུ་བྱུང་བ་ཧ་ཅང་དགའ་པོ་བྱུང་།

དེང་སྐབས་འཛམ་གླིང་འདིའི་ས་ཕྱོགས་མང་པོ་ཞིག་གི་ནང་ཆོས་ལུགས་དང་རྒྱལ་ཁབ་སོ་སོས་ཕྱོགས་རིས་དབང་གིས་དཀའ་རྙོག་དུ་མ་ཞིག་ཡོང་གི་འདུག རྩོད་རྙོག་དེ་དག་ཞི་འཇམ་དུ་གཏོང་རྒྱུར་ང་ཚོས་ཐབས་ཤེས་འཚོལ་དགོས། འདི་ནི་ང་ཚོ་ཆོས་ལུགས་མི་སྣ་ཚོས་བྱེད་ཐུབ་པ་ཞིག་ཆགས་ཡོད། དེ་རིང་གི་ཚོགས་འདུ་འདི་ལྟ་བུ་ཆོས་ལུགས་འདྲ་མིན་ནས་མི་སྣ་མང་པོ་ཞིག་མཉམ་འཛོམས་གནང་པ་འདི་ཆོས་ལུགས་ཕན་ཚུན་གྲོགས་འདྲིས་དང་ཡིད་ཆེས་གོང་མཐོར་གཏོང་རྒྱུའི་གོ་སྐབས་ཡག་ཤོས་ཤིག་ཆགས་ཡོད། དེང་སྐབས་མི་མང་པོ་ཞིག་གི་བསམ་བློའི་ནང་ཁ་ཆེ་ནི་དྲག་རྩུབ་ཅན་ཞིག་ཡིན་པའི་མཐོང་སྣང་ཡོང་གི་ཡོད། དེ་འདྲ་ཡིན་ན་ནང་པ་དང་ཡི་ཤུ སོགས་ཆོས་ལུགས་ཚང་མ་དེ་འདྲ་ཡིན་དགོས་པ་རེད། དེ་འདྲ་རྩ་ནས་མིན། དེ་སྔོན་བོད་ནང་ཁ་ཆེའི་སྤྱི་ཚོགས་ཤིག་ཡོད་པ་དེ་ནི་ཧ་ཅང་གི་ཞི་འཇམ་ལྡན་པའི་སྤྱི་ཚོགས་ཤིག་ཡོད།

ཁ་ཆེའི་ཆོས་གྲོགས་ཚོས་ངོས་ལ་དེ་འདྲ་ཞིག་བཤད་བྱུང་། མི་གསོད་ཁྲག་སྦྱོར་གྱི་སྦྱོར་བ་རྩོམ་མཁན་ཞིག་ཡིན་ཕྱིན་མི་དེ་ཁ་ཆེའི་ཆོས་པ་རྣམ་དག་ཞིག་མིན། ཁ་ཆེའི་ཆོས་པ་ཡང་དག་པ་ཞིག་ཡིན་ན་འགྲོ་བ་ཚང་མར་གུས་བརྩི་བྱེད་ཀྱི་རེད་ཅེས་གསུངས་བྱུང་། མ་ཟད་ཇི་ཧད་ jihad ཞེས་པ་དེ་གོ་བ་ལོག་ཕྱོགས་སུ་འཛིན་ཡོད། སྤྱིར་ཇི་ཧད་ཀྱི་གོ་དོན་ངོ་མ་ནི་འཚེ་བ་ལས་ལྡོག་ཏེ་རང་རྒྱུད་མ་དུལ་བར་བྱེད་པའི་རྒྱུ་དེར་གཉེན་པོ་བསྟེན་ཐབས་བྱ་རྒྱུ་དེ་ཡིན་ཞེས་གསུང་གི་འདུག ངོས་ཀྱི་རྒྱུན་དུ་བཤད་ཀྱི་ཡོད། བྱམས་པ་དང་བརྩེ་བས་མི་ཕན་ཚུན་བློ་ཐག་ཉེ་རུ་གཏོང་གི་ཡོད། བློ་དོགས་དང་ཁོང་ཁྲོས་མི་ཕན་ཚུན་བློ་ཐག་ཉེ་རུ་གཏོང་རྒྱུའི་ཚབ་ལ་རྒྱང་ཐག་རིང་དུ་གཏོང་གི་ཡོད། སྤྱིར་ཆོས་ལུགས་སོ་སོར་ཆོས་གནང་ཕྱོགས་མི་འདྲ་བ་ཡོད་པ་དང་། དེ་ཚོར་གུས་བརྩི་བྱ་དགོས་པ་ཞིག་རེད།

ཆོས་ལུགས་ཚང་མས་ལག་ལེན་ཁྲོད་གཅིག་འགྱུར་ཡིན་པ་བྱམས་བརྩེ་དང་། བཟོད་བསྲན། ཚུལ་ཁྲིམས་བཅས་ཡིན། ལྟ་གྲུབ་ཐོག་ནས་འགྲེལ་བཤད་རྒྱག་སྟངས་མི་འདྲ་བ་ཡོད། གང་ལྟར་ཆོས་ལུགས་ཚང་མས་བྱམས་བརྩེའི་ཐོག་ལག་ལེན་གནང་བ་བསྔགས་འོས་ཤིག་རེད། རིག་གཞུང་གི་ལྟ་ཚུལ་ཐོག་ནས་ཆོས་ལུགས་ཁག་གཅིག་གི་ནང་། རིགས་རུས་དབྱེ་འབྱེད་ཡོད་པ་དེ་དག་ནི་དུས་ཚོད་ཡོལ་བའི་གནས་སྟངས་ཆགས་ཡོད། དེ་ཚོར་དུས་དང་མཐུན་པའི་འགྱུར་བཅོས་གཏོང་དགོས་པ་རེད། ངོས་ཀྱི་རྒྱུན་དུ་ཆོས་ལུགས་མི་སྣ་ཚོ་ས་གནས་གང་དུ་ཕེབས་ཀྱང་འདིར་སྐད་ཆ་དེ་བཤད་དགོས་རེད་ཅེས་ཤོད་ཀྱི་ཡོད། ཅེས་བཀའ་སློབ་སྩལ།

ཉིན་རྒྱབ་༸གོང་ས་༸སྐྱབས་མགོན་ཆེན་པོ་མཆོག་གིས་ལེ་སིམ་ཚོགས་ཁང་ Lyceum theatre ནང་མི་གྲངས་ ༢༠༠༠ ཙམ་ལ་འཛམ་གླིང་ཞི་བདེ་དང་སེམས་ཀྱི་བདེ་སྐྱིད་སྐོར་བཀའ་སློབ་སྩལ་དོན། ཞི་བདེའི་གོ་དོན་ནི། དཀྲོག་རྐྱེན་མེད་པ། ཉེན་ཁ་མེད་པ་ཞིག་ལ་གོ་བ་ཡིན། དེ་ནི་ང་ཚོའི་སེམས་ཁམས་འཁྱེར་ཕྱོགས་དང་འབྲེལ་བ་ཡོད། གལ་སྲིད་ང་ཚོའི་སེམས་འདི་བག་ཕེབ་པོ་ཞིག་གི་སྒང་ལ་ཡོད་ཚེ། སེམས་ནང་བར་ཆད་བྱེད་མཁན་གྱི་ཉོན་མོངས་དེ་དག་ཉུང་དུ་གཏོང་ཐུབ་ཀྱི་ཡོད། ཞི་བདེ་ཞེས་པ་ཕྱི་ནས་བརྙེད་རྒྱུ་ཡོད་པ་ཞིག་མིན། ཞི་བདེ་ངོ་མ་དེ་ང་རང་ཚོའི་རྒྱུད་ལ་ཡོད་པ་ཚོར་ཐུབ་དགོས་པ་ཧ་ཅང་གལ་ཆེན་པོ་ཡིན། མི་འགའ་ཞིག་གིས་འགྲོ་བ་མི་ལ་ཕན་སེམས་དང་། བྱམས་བརྩེ། སྙིང་རྗེ། བཅས་ནི་ཆོས་ཕྱོགས་ཀྱི་སྐད་ཆ་ཡིན་ལུགས་བསམ་སྲིད་ཀྱང་། དེ་ནི་དེ་འདྲ་རྩ་ནས་མིན། དེ་དག་ནི་འགྲོ་བ་མི་རིགས་ལ་ཕན་པའི་ཆ་རྐྱེན་གཙོ་བོ་ཞིག་ཆགས་ཡོད། གལ་སྲིད་ང་ཚོས་འགྲོ་བ་མིའི་རིགས་ལ་ཕན་པའི་ཆ་རྐྱེན་དེ་དག་ལ་རིན་ཐང་ཆེན་པོ་ཡོད་པ་མ་ཚོར་བ་དང་མ་ཤེས་པ་ཡིན་ན་དུས་རབས་ཉི་ཤུ་ལྟར་དྲག་པོའི་དུས་རབས་ལྟ་བུ་ཞིག་འཆར་ངེས་པ་རེད། དེར་བརྟེན་ང་རང་ཚོས་ནུས་ཤུགས་འདོན་དགོས་པ་ཡིན། ང་ཚོ་མིས་བཟོས་པའི་དཀའ་ངལ་དེ་དག་ང་རང་ཚོ་མི་རང་གིས་རྣམ་དཔྱོད་བཏོན་ནས་སེལ་དགོས་པ་ཞིག་ཡིན་པ་ལས་སྨོན་ལམ་བརྒྱབ་པ་ཙམ་གྱི་སེལ་མི་ནུས། ཅེས་སོགས་ཀྱི་བཀའ་སློབ་སྩལ་ཡོད། །