༢༠༡༥ ཟླ་ ༩ ཚེས་ ༢༢ རེས་གཟའ་མིག་དམར།

༄༅། །ཕྱི་ལོ་ ༢༠༡༥ ཟླ་ ༩ ཕྱི་ཚེས་ ༡༩ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བོད་རིགས་ཚོས་རྣམ་ཀུན་ཏུ་རང་གི་སྲོལ་རྒྱུན་རིག་གཞུང་བཟང་པོ་དེ་དག་ལ་ཁེངས་དྲེགས་མེད་པའི་ཐོག་ནས་སྤོབས་སེམས་ལྡན་དགོས་གལ་གྱི་བཀའ་སློབ་ཕེབས་འདུག

དེ་ཡང་གོང་ཚེས་ཉིན་གྱི་སྔ་དྲོ་མགོན་པོ་གང་ཉིད་མཆོག་གིས་དབྱིན་ཡུལ་གྱི་རྒྱལ་ས་ལོན་ཊོན་དུ་རྟེན་གཞི་བྱས་པའི་ O2 ཚོགས་ཁང་ཆེན་མོའི་ནང་དབྱིན་ཡུལ་དང་ཉེ་འཁོར་ཡུ་རོབ་ཁུལ་ནས་ཆེད་བཅར་ཞུས་པའི་བོད་རིགས་གྲངས་ ༧༠༠ བརྒལ་བར་༸གོང་ས་མཆོག་གིས་ཐོག་མར་འཚམས་འདྲི་དང་མཇལ་ཁ་སྩལ། དེ་རྗེས་བོད་རིགས་ཚོགས་པའི་ཚེ་རིང་པ་སངས་ལགས་ཀྱིས་བོད་རིགས་ཚོགས་པའི་ལས་བསྡོམས་སྙིང་བསྡུས་ཤིག་སྙན་སྒྲོན་ཞུས་ཡོད་པའི་ནང་། ང་ཚོ་བོད་རིགས་མི་མང་རྣམས་ནི་མགོན་པོ་གང་ཉིད་མཆོག་གི་དབུ་ཁྲིད་བཟང་པོའི་འོག་དམིགས་བསལ་ལས་དང་སྨོན་ལམ་གྱི་འབྲེལ་བ་ཆགས་ཡོད། དེར་བརྟེན་ང་ཚོ་ཆིག་སྒྲིལ་ཐོག་གནས་ཐུབ་པ་འདི་ཡང་མགོན་པོ་གང་ཉིད་མཆོག་གི་བཀའ་དྲིན་ཉག་ཅིག་ལ་བརྟེན་ནས་བྱུང་ཡོད། ང་ཚོ་བོད་རིགས་ཚོགས་པའི་ངོས་ནས་བོད་དོན་ཐབས་བརྩོད་ལ་སྨན་པའི་ལས་དོན་སྤེལ་དང་སྤེལ་མུས་ཡིན་ལ། དེ་བཞིན་བོད་མིའི་ཤེས་ཡོན་ཡར་རྒྱས་ཡོང་རྒྱུར་སློབ་ཡོན་རོགས་སྐྱོར་སོགས་ཞུས་དང་ཞུ་མུས་ཡིན། ཞེས་སོགས་ཀྱི་ལས་བསྡོམས་སྙན་སྒྲོན་ཞུས་ཡོད།

དེ་རྗེས་༸གོང་ས་མཆོག་གིས་འཛམ་གླིང་འདིའི་ཐོག་བོད་རྒྱལ་ཁབ་ཆེན་པོའི་མི་རིགས་དང་སྲོལ་རྒྱུན་རིག་གཞུང་རྣམས་དར་འཕེལ་བྱུང་སྟངས་ཐད་བཀའ་སློབ་ཕེབས་དོན། གནའ་བོའི་བོད་ཀྱི་དཔལ་ཡོན་སྐོར་ནས་བརྗོད་ན། བོད་རྗེ་སྲོང་བཙན་སྒམ་པོ་མཆོག་གིས་རྒྱ་ནག་དང་བལ་ཡུལ་ནས་བཙུན་མོ་རེ་བཞེས་ཡོད་པ་ཁོང་རྣམ་གཉིས་ཀྱིས་དུས་རབས་ ༧ པའི་ནང་ཇོ་བོ་རྣམ་གཉིས་བོད་དུ་གདན་འདྲེན་ཞུས་ཡོད་པ་དང་། དེ་བཞིན་བོད་རྗེ་ཁྲི་སྲོང་ལྡེ་བཙན་གྱིས་རྒྱ་ནག་དང་། དམིགས་བསལ་རྒྱ་གར་ལ་འབྲེལ་ལམ་དམ་ཟབ་གནང་སྟེ་དཔལ་ནཱ་ལེནྜའི་ནང་ཆོས་བོད་ནང་གདན་ཞུས་དང་རྒྱ་གར་མཁས་པའི་དབང་པོ་སློབ་དཔོན་ཞི་བ་འཚོ་བོད་ལ་གདན་ཞུས་ཀྱི་བསམ་ཡས་གཙུག་ལག་ཁང་གསར་བཞེངས་སོགས་ཀྱི་མཛད་རྗེས་ཆེན་པོ་བཞག་ཡོད་པ་སོགས་ཀྱི་བཀའ་སློབ་ཕེབས་ཡོད། གཞན་ཡང་ལྷག་པར་གྲྭ་བཙུན་རྣམས་ཀྱིས་བྱང་ཆུབ་ལམ་གྱི་རིམ་པར་སློབ་གཉེར་གནང་བ་གཅིག་པུས་མི་འགྲིག་པར་ངེས་པར་དུ་བདེན་པ་བཞི་དང་བདེན་པ་གཉིས་ཀྱི་ཐོག་སློབ་གཉེར་གནང་དགོས་རྒྱུ་གལ་ཆེ་ཡིན། ཞེས་བཀའ་སློབ་ཕེབས་ཡོད།

གཞན་ཡང་དེང་སྐབས་བོད་ཀྱི་ནང་ཆོས་གཙོ་བོར་གྱུར་པའི་སྲོལ་རྒྱུན་རིག་གཞུང་ཁག་རྒྱལ་སྤྱིའི་ཐོག་དར་སྤེལ་ཤུགས་ཆེ་འགྲོ་བཞིན་ཡོད་པ་མ་ཟད། འགྲོ་བ་མིའི་རིགས་ལ་ཕན་ཐོགས་རླབས་ཆེན་སྒྲུབ་བཞིན་པ་དེ་ནི་བོད་མི་རིགས་ཀྱི་སྤོབས་པ་བྱ་འོས་པ་ཞིག་ཡིན། འོན་ཀྱང་དུས་ནམ་ཡང་ཁེངས་དྲེགས་བྱེད་རྒྱུ་མེད་སྐོར་བཀའ་སློབ་ཕེབས་འདུག དེ་བཞིན་མགོན་པོ་གང་ཉིད་མཆོག་གིས་རྒྱ་ནག་གཞུང་ཕྱོགས་ནས་བོད་ནང་མུ་མཐུད་དྲག་གནོན་བྱེད་བཞིན་ཡོད་ཀྱང་། བོད་མི་རིགས་ཀྱི་ཞུམ་པ་མེད་པའི་སྙིང་སྟོབས་དང་ལྷག་བསམ་ལ་བརྟེན་ནས་རྒྱ་ནག་གིས་བསམ་པ་ཇི་བཞིན་དུས་ད་ལྟ་ཡང་བསྒྲུབ་ཐུབ་མེད་པ་མ་ཟད། མ་འོངས་པར་དེ་དག་རྒྱུན་གནས་ཐུབ་ཐབས་སུ་ང་ཚོ་བོད་རིགས་ཡོངས་ནས་ཤེས་ཡོན་གྱི་ཆུད་ཚད་གོང་མཐོར་གཏོང་དགོས་པའི་བཀའ་སློབ་ཕེབས་ཡོད། ལྷག་དོན་མགོན་པོ་གང་ཉིད་མཆོག་གིས་དོལ་རྒྱལ་གྱི་གནད་དོན་དང་འབྲེལ། དོལ་རྒྱལ་རྗེས་འབྲང་པ་རྣམས་ནས་དངོས་ཡོད་གནས་ཚུལ་མ་ཤེས་པའི་དབང་གིས་མུ་མཐུད་སྐད་འབོད་སོགས་བྱེད་བཞིན་ཡོད། བོད་མི་ཚོས་གནད་དོན་དེའི་ཐད་ལ་ཁོང་ཁྲོ་ལངས་པ་སོགས་ནམ་ཡང་བྱེད་རྒྱུ་མེད་པ་མ་ཟད། གོ་སྐབས་བྱུང་ན་དངོས་ཡོད་གནས་ཚུལ་ཁག་གསལ་བཤད་བྱེད་རྒྱུ་བྱུང་ན་ཡག་པོ་ཡོད་པ་རེད། ཁོ་པ་ཚོར་སྙིང་རྗེ་བསྒོམ་རྒྱུ་གལ་ཆེན་པོ་ཡིན་པའི་བཀའ་སློབ་ཕེབས་འདུག

དེ་རྗེས་མགོན་པོ་གང་ཉིད་མཆོག་གིས་ཚོགས་ཁང་གཞན་ཞིག་ནང་བོད་དོན་རྒྱབ་སྐྱོར་བ་རྣམས་ལ་འཚམས་འདྲི་དང་སྦྲགས། བོད་རྒྱལ་ཁབ་དེ་ནི་འཛམ་གླིང་གི་སྣེ་གསུམ་པ་ལྟ་བུ་ཆགས་ཡོད་པ་མ་ཟད། ཨེ་ཤི་ཡའི་མི་དམངས་དུང་ཕྱུར་བཅུ་ལྷག་གི་འཚོ་གནས་བོད་ཀྱི་རྒྱུག་ཆུ་ཁག་ལ་ཐུག་གི་ཡོད་སྟབས། རྒྱལ་སྤྱིའི་ཐོག་ནས་བོད་ཀྱི་ཁོར་ཡུག་ལ་དོ་སྣང་གནང་རྒྱུ་གལ་ཆེ་ཡིན་སྐོར་གཞེན་སྐུལ་དང། བོད་ནང་དུ་ནང་ཆོས་དར་ཁྱབ་བྱུང་རྗེས་བོད་ཀྱི་རིག་གཞུང་དེ་བཞིན་འཚེ་བ་མེད་པའི་རིག་གཞུང་ཞིག་ཏུ་འགྱུར་ཡོད་པ་འདི་ནི་དེང་སྐབས་འཛམ་གླིང་གི་གཅེས་ནོར་ཞིག་ཏུ་གྱུར་ཡོད། རྒྱ་ནག་ནི་ནང་པའི་ཡུལ་ལུང་ཞིག་ཡིན། དེང་སྐབས་རྒྱ་ནག་ནང་དུ་ནང་པ་ས་ཡ་ ༤༠༠ ཡོད་པའི་ནང་ནས་མང་པོ་ཞིག་གིས་བོད་བརྒྱུད་ནང་ཆོས་ལ་དོ་སྣང་བྱེད་བཞིན་ཡོད། དེའི་ནང་ནས་ངོས་དང་ཐུག་འཕྲད་བྱེད་མྱོང་བ་ཁོང་ཚོ་མང་པོ་ཞིག་ངོས་རང་རྒྱ་ནག་ཏུ་གདན་ཞུ་བྱེད་བཞིན་འདུག དེ་མིན་བོད་ནི་ཕྱི་དངོས་པོའི་ཐོག་ནས་རྗེས་ལུས་ཅན་ཞིག་ཡིན་པས་ཡར་རྒྱས་གཏོང་དགོས་ཀྱི་ཡོད། བོད་རིགས་མང་པོ་ཞིག་ཕྱིའི་ཡུལ་གྲུ་ཁག་ནང་བསྐྱོད་ཡོད་པ་དེ་དག་གིས་ཆོས་ཕྱོགས་ཙམ་མིན་པར་དངོས་པོའི་ཡར་རྒྱས་དགོས་འདོད་བྱེད་ཀྱི་ཡོད། དེར་བརྟེན་བོད་དེ་རྒྱ་ནག་དང་ལྷན་དུ་གནས་ཚེ་རྒྱ་བོད་གཉིས་ཀར་ཕན་ཐོགས་ཡོད་པ་ཞིག་ཡིན། བོད་རིགས་གཞོན་སྐྱེས་ཚོས་རང་བཙན་གཙང་མའི་འཐབ་རྩོད་བྱེད་བཞིན་ཡོད་པ་ནི་ཁོང་རྣམ་པའི་ཐོབ་ཐང་ཡིན། འོན་ཀྱང་དངོས་ཡོད་གནས་ཚུལ་ཤེས་དགོས་པ་ཡིན། དེ་མིན་དེ་རིང་འདིར་དུས་ཡུན་རིང་པོར་བོད་དོན་ཐོག་རྒྱབ་སྐྱོར་གནང་མཁན་གྱི་གྲོགས་པོ་ཁྱེད་རྣམ་པ་དང་ཐུག་རྒྱུ་བྱུང་བར་ངོས་རང་ཧ་ཅང་དགའ་པོ་བྱུང་། ཁྱེད་རྣམ་པས་མུ་མཐུད་ང་ཚོའི་རིན་ཐང་དང་ཆོས་ཕྱོགས། དེ་བཞིན་ཤེས་ཡོན་བཅས་ལ་རོགས་སྐྱོར་གནང་རོགས་ཞུ་རྒྱུ་ཡིན། ཁྱེད་རྣམ་པའི་རོགས་སྐྱོར་དེ་དག་ང་ཚོར་ཕན་ཐོགས་ཧ་ཅང་ཆེན་པོ་འདུག་པ་མ་ཟད་རྒྱ་ནག་མི་མང་ལའང་ཕན་ཐོགས་ཡོང་གི་ཡོད། ཅེས་བཀའ་སློབ་ཕེབས་འདུག

ཕྱེད་ཡོལ་༸གོང་ས་༸སྐྱབས་མགོན་ཆེན་པོ་མཆོག་གིས་ཚོགས་ཁང་ཆེན་མོ་ O2 ནང་མང་ཚོགས་གྲངས་ ༡༠༠༠༠ བརྒལ་བར་བྱམས་བརྩེའི་སྐོར་བཀའ་སློབ་དང་དྲི་བ་ཁག་ལ་བཀའ་ལན་སྩལ་ཡོད། སྐབས་དེར་ཐོག་མར་༸གོང་ས་མཆོག་སྐུ་ཚེ་ཞབས་པད་བརྟན་པའི་གསོལ་འདེབས་སྨོན་ལམ་གསུང་འདོན་གནང་ཡོད་པ་དང་། དེ་བཞིན་བོད་རིགས་སློབ་ཕྲུག་གྲངས་ ༥༢ ནས་༸གོང་ས་མཆོག་ལ་བསྟོད་པའི་བོད་གཞས་འབུལ་ལམ་ཞུས་ཡོད། དེ་རྗེས་༸གོང་ས་མཆོག་གིས་བཀའ་སློབ་སྩལ་དོན། བརྩེ་བའི་གཅེན་གཅུང་རྣམ་པར་ཞུ་རྒྱུར། ངོས་རང་འདི་གར་ཁྱེད་རྣམ་པའི་ལྷན་དུ་བཅར་རྒྱུ་བྱུང་བར་དགའ་ཚོར་ཆེན་པོ་བྱུང་། དེ་བཞིན་ངོས་རང་ཉིད་ཀྱི་བསམ་ཚུལ་དང་ཉམས་མྱོང་རྣམས་ཁྱེད་རྣམ་པའི་ལྷན་དུ་ཕན་ཚུན་བརྗེ་ལེན་བྱེད་རྒྱུའི་གོ་སྐབས་ཐོབ་པར་ཧ་ཅང་དགའ་སྤྲོ་འཕེལ་བ་བྱུང་། དེ་བཞིན་དྲི་བ་དྲིས་ལན་སྐབས་ངོས་ནས་ཁྱེད་ཚོའི་ས་ནས་སློབ་སྦྱོང་བྱེད་དགོས་པ་དེ་འདྲ་ཡོང་རྒྱུའི་རེ་བ་ཡོད། ངོས་རང་འཛམ་གླིང་སྟེང་མི་འབོར་ཐེར་འབུམ་བདུན་ཡོད་པའི་ཁོངས་ནས་གཅིག་ཡིན། ང་ཚོ་ཚང་མ་སེམས་ཚོར་དང་གཟུགས་གཞིའི་ཆ་ནས་གཅིག་མཚུངས་ཡིན། ང་ཚོར་དཀའ་ངལ་ཡོད་ཀྱང་དེ་སེལ་བའི་ནུས་པ་ཚང་མར་ལྡན་ཡོད། ཚན་རིག་པ་ཚོས་འགྲེལ་བརྗོད་གནང་བ་ལྟར་ན་བྱིས་པ་ཚོས་གཞན་ལ་རོགས་རམ་བྱེད་རྒྱུའི་བཟང་ཕྱོགས་ཀྱིས་ལན་བརྡ་བྱེད་པ་ལས་གནོད་འཚེ་མི་བྱེད་པའི་རྣམ་པ་དེས་འགྲོ་བ་མིའི་གཞི་རྩའི་རང་བཞིན་ནི་སྙིང་རྗེ་ཡིན་པ་ར་སྤྲོད་བྱས་ཡོད། དེར་བརྟེན་ང་ཚོ་ཚང་མ་འགྲོ་བ་མིའི་རིགས་གཅིག་གྱུར་ཡིན་པ་དང་། རྣམ་ཀུན་ནས་མིའི་རིགས་ལ་ལྷན་སྐྱེས་སུ་ཡོད་པའི་བྱམས་བརྩེའི་བསམ་པ་དེ་གོང་མཐོར་གཏོང་དགོས་པ་དང་། དེ་ལྟར་བྱུང་ཚེ་རང་ཉིད་ཙམ་མ་ཟད་རང་ཉིད་ཀྱི་ཉེ་འཁོར་དུ་ཡོད་པའི་ཁྱིམ་མཚེས་དང་མི་མང་རྣམས་ཀྱི་འཚོ་བར་བདེ་སྐྱིད་བསྐྲུན་ཐུབ་རྒྱུ་ཡིན་པའི་བླང་དོར་གྱི་བཀའ་སློབ་ཟབ་མོ་སྩལ་འདུག

དེ་རྗེས་མི་མང་ནང་ནས་དྲི་བ་ཕུལ་རྒྱུའི་གོ་སྐབས་སྩལ་བ་བཞིན་དྲི་བ་ཁག་ལ་བཀའ་ལན་སྩལ་གྲུབ་རྗེས་ཨན་ཁུམ་མིང་ Ian Cumming ལགས་ཀྱིས་མངར་ཟས་འདེགས་འབུལ་ཞུས་ཏེ་༸གོང་ས་༸སྐྱབས་མགོན་ཆེན་པོ་མཆོག་འདི་ལོ་དགུང་ལོ་བརྒྱད་ཅུར་ཕེབས་པའི་སྐུའི་གྱ་སྟོན་ལ་རྟེན་འབྲེལ་ཞུས་ཡོད། སྐབས་དེར་ཚོགས་ཁང་དེའི་ནང་ཡོད་པའི་མི་མང་ཡོངས་ཀྱིས་དགའ་སྤྲོ་ཆེན་པོའི་ཐོག་ནས། སྐུ་ཉིད་ཀྱི་འཁྲུངས་སྐར་ལ་བཀྲ་ཤིས་བདེ་ལེགས། ཞེས་པའི་གཞས་མཉམ་དུ་བཏང་སྟེ་མངར་ཟས་འདེགས་འབུལ་ཞུས་ཡོད། སྐབས་དེར་༸གོང་ས་མཆོག་གིས་ཁོང་ལ་ཐུགས་རྗེ་ཆེ་ཞུ་དང་སྦྲགས་མི་དམངས་རྣམས་ལ། ཁྱེད་ཚོས་དེ་རིང་འདིར་ངོས་ནས་ག་རེ་བརྗོད་པར་བསམ་བློ་གཏོང་དགོས། གལ་ཏེ་ཕན་ཐོགས་ཡོད་ན་བསམ་བློ་མང་ཙམ་བཏང་། ཉམས་ཞིབ་བྱས་ཏེ་དོན་ཕན་ལྡན་པ་བྱེད་དགོས། ཉིན་རེའི་འཚོ་བ་དེ་དོན་དང་ལྡན་པ་ཞིག་བྱུང་བ་ཡིན་ན། དེ་ནི་སྐྱེས་སྐར་སྲུང་བརྩི་བྱས་པ་ལས་ལྷག་པ་ཡིན། ཞེས་བཀའ་སློབ་སྩལ་ཏེ་ཉིན་དེའི་མཛད་འཕྲིན་ཁག་ལེགས་པར་གྲུབ།།