༢༠༡༥ ཟླ་ ༨ ཚེས་ ༡ རེས་གཟའ་སྤེན་པ།
༄༅། །ཕྱི་ལོ་ ༢༠༡༥ ཟླ་ ༧ ཚེས་ ༢༢ ཉིན་སྲིད་སྐྱོང་འོས་ལངས་པ་བཀྲིས་དབང་འདུས་ལགས་ནས་རྡ་ས་མེ་གྷན་ Club House ནང་མང་ཚོགས་འདུ་འཛོམས་སྐབས་གཞིས་ཆགས་ཁག་གཅིག་ནང་སྨན་ཁང་ཡོད་ན་ཨེམ་ཆི་ཡོད་མ་རེེད། ཨེམ་ཆི་ཡོད་ན་སྨན་ཞབས་ཡོད་མ་རེད། སྨན་ཞབས་ཡོད་ན་སྨན་རྫུན་མ་སྤྲོད་ཀྱི་ཡོད་རེད་གསུངས་པ་ལ་གསལ་བཤད་ཁག་གཤམ་གསལ།
༡། ཕྱི་ལོ་ ༢༠༡༢ ལོར་འཕྲོད་བསྟེན་ཁྱབ་ཁོངས་ཀྱི་སྨན་ཁང་ཁག་ནང་སྨན་པ་གྲངས་ ༧ ཙམ་ཡོད། ད་ལྟའི་འཆར་ལྡབ་འཕར་བྱས་ཏེ་སྨན་པ་གྲངས་ ༡༦ ཙམ་ཡོད།
༢། འདི་གའི་ཁྱབ་ཁོངས་སྨན་ཁང་ཁག་ནང་སྨན་ཞབས་སམ་འཕྲོད་ལས་པ་གྲངས་བརྒྱ་ལྷག་ཡོད། སྨན་ཞབས་མེད་པའི་དཀའ་ངལ་མེད།
༣། སྨན་ཞབས་ཡོད་ན་སྨན་རྫུན་མ་སྤྲོད་ཀྱི་ཡོད་རེད་གསུངས་པ་དེ་ཁུངས་ལྡན་རྩ་བ་ནས་མིན། ཁུངས་ལྡན་མིན་པའི་བཀའ་མོལ་འདི་རིགས་ཀྱི་འཕྲོད་བསྟེན་ཁྱབ་ཁོངས་སུ་ཡོད་པའི་ལྷག་བསམ་ཅན་གྱི་ལས་བྱེད་རྣམ་པར་ཤིན་ཏུ་བློ་ཕམ་ཡོང་རྒྱུ་ལས་མ་འདས་པར་སོང་མང་ཚོགས་ཀྱི་མཁྱེན་རྟོགས་སླད་དངོས་ཡོད་གནས་སྟངས་གསལ་བཤད་དུ། བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ནས།།
ཁོང་གི་གསུངས་པ་དེ་ནོར་ཝེ་རླུང་འཕྲིན་ཁང་གི་དྲ་རྒྱ་འདིའི་ནང་ཡོད།
