༢༠༡༥ ཟླ་ ༨ ཚེས་ ༣༡ རེས་གཟའ་ཟླ་བ།
༄༅། །འདི་གར་ཁུངས་ལྡན་གནས་ཚུལ་འབྱོར་གསལ་ལྟར་ན། ཕྱི་ལོ་ ༢༠༡༥ ཟླ་ ༨ ཚེས་ ༢༧ ཉིན་གྱི་དགོངས་མོ་ཀན་ལྷོ་ཁུལ་བླ་བྲང་བསང་ཆུ་རྫོང་བསང་ཁོག་དངུལ་རྭ་སྡེ་པ་ནས་ཡིན་པ་ཕྲུ་གུ་ལྔའི་ཨ་མ་བཀྲ་ཤིས་སྐྱིད་ཞུ་བ་ཞིག་གིས་བསང་ཁོག་ཡུལ་ཚོའི་འགྲམ་དུ་ཡོད་པའི་ཁང་དམར་ཞེས་པའི་བསང་ཁོག་དམངས་ཚོགས་སྡོད་གནས་ཤིག་ཡོད་པ་དེར་རང་ལུས་མེར་བསྲེགས་ཀྱིས་རྒྱ་ནག་གཞུང་ལ་ཞི་རྒོལ་བྱས་ཡོད། ཕྱི་ཚེས་ ༢༨ ཉིན་གྱི་ཐོ་རངས་ཚུ་ཚོད་ ༣ པ་ཙམ་ལ་ཁོང་འདས་གྲོངས་སུ་ཕྱིན་ཡོད་པ་དང་ཞོགས་པ་ཉེན་རྟོག་པ་དང་དམག་མི་ཡོང་ནས་སྐུ་ཕུང་བཙན་འཕྲོག་བྱས་ཡོད་འདུག
ཁོང་རང་ལོ་ ༥༥ ཡིན་པ་དང་བཟའ་ཟླའི་མཚན་ལ་སངས་རྒྱས་དང༌། ཁོང་གཉིས་ལ་ཤུལ་ལུས་བུ་བཞི་ཡོད་པ་ནི་བུ་བཙོན་འགྲུས་རྒྱ་མཚོ་དང༌། སངས་རྒྱས་རྒྱ་མཚོ། སྐལ་བཟང་རྒྱ་མཚོ། ཡོན་ཏན་རྒྱ་མཚོ་བཅས་དང་བུ་མོ་གཅིག་ཡོད་པ་དེའི་མིང་ལ་ ཀུན་བཟང་སྐྱིད་ཞུ་ཡི་ཡོད་འདུག དེ་བཞིན་དགུང་ལོ་ ༨༠ ནང་སོན་པའི་ཕ་རྒན་མཚན་ལ་བླ་མའམ་རིས་བླ་ཞུ་བ་ཞིག་ལས་ཨ་མ་འདས་གྲོངས་སུ་ཕྱིན་ཚར་ཡོད་འདུག ཁོ་མོ་ཕྱི་ལོ་ ༢༠༡༠ ཟླ་ ༡ ཟླ་མཇུག་ལ་རྒྱ་གར་དུ་གནས་སྐོར་དང་གཉེན་འཕྲད་དུ་ཕེབས་ཡོད་པ་དང་། དེ་རྗེས་ཕྱི་ལོ་ ༢༠༡༢ ལོར་རྒྱ་གར་དུ་དཔལ་དུས་དབང་ཞུ་བར་ཕེབས་རྗེས་ཕྱིར་ལོག་གནང་འདུག ཁོང་ནི་རྒྱུན་ལྡན་གཤིས་རྒྱུད་དྲང་ཞིང་ཀུན་ལ་སེམས་པ་བཟང་བ། ལྷག་པར་དགེ་སྒྲུབ་ལ་བརྩོན་པ་ཆེ་བ་གནང་མཁན་ཞིག་རེད་འདུག
བསང་ཆུ་རྫོང་ནང་དེ་སྔ་ཕྱི་ལོ་ ༢༠༡༢ ལོར་རང་ལོ་ ༡༨ ལ་སོན་པའི་རྒྱལ་གཅེས་པ་སངས་རྒྱས་བཀྲ་ཤིས་ལགས་ཀྱིས་རང་ལུས་མེར་སྲེག་བཏང་རྗེས་འདས་གྲོངས་སུ་གྱུར་ཡོད་པའི་གནས་ཚུལ་ཡང་ཐོན་ཡོད།།
