༢༠༡༥ ཟླ་ ༨ ཚེས་ ༥ རེས་གཟའ་ལྷག་པ།
༄༅། །བོད་མིའི་སྒྲིག་འཛུགས་ཀྱི་འཕྲོད་བསྟེན་ལས་ཁུངས་ཀྱི་ཁྱབ་ཁོངས་སྦེལ་ཀོབ་འཚོ་བྱེད་ཁང་གསར་སྨན་ཁང་གི་འགན་འཛིན་ཟུར་པ་ལྷག་པ་ཚེ་རིང་ལ་ལྐོག་ཟ་རུལ་སུངས་དང་འབྲེལ་བའི་ཉེས་འཛུགས་ཁག་ཅིག་བྱུང་ཡོད་པར། བཀའ་ཤག་ནས་ཞིབ་འཇུག་ཚོགས་ཆུང་ཟུར་འཛུགས་བརྒྱུད་ཐག་གཅོད་བཅད་ཁྲ་བསྩལ་དོན། འགན་འཛིན་ཟུར་པ་ལྷག་པ་ཚེ་རིང་ནས་གློག་ཆས་ཉོ་སྒྲུབ་སོགས་ཀྱི་ཐོག་ནས་སྤྱི་གུན་བཏང་བ་བསྡོམས་ཧིན་སྒོར་ ༣༠༤༨༣༠སུམ་འབུམ་ཁྲི་མེད་བཞི་སྟོང་བརྒྱད་བརྒྱ་སུམ་ཅུ་ཐམ་པ་བྱས་ཡོད་པ་དུས་བཀག་ནང་ཚུད་སྨན་ཁང་ལ་ཕྱིར་སློག་མ་བྱུང་ཚེ་སྤྱི་དངུལ་སྒེར་ཟས་དང་འབྲེལ་བའི་གསལ་བསྒྲགས་བྱ་རྒྱུ་དང༌། བོད་མིའི་སྒྲིག་འཛུགས་ནས་བོད་མི་སྤྱི་འགྲེ་ལྟར་ཕན་གྲོགས་ལྟ་སྐྱོང་བྱ་སྒོ་ཡོངས་རྫོགས་བཀག་བསྐྱིལ་བྱ་རྒྱུ་ཡིན་ཞེས་གསལ་པོར་བཀོད་ཡོད་ཀྱང༌། དུས་བཀག་ནང་ཚུད་ལྟ་ཅི་དུས་ཚོད་ཕྱིར་འགྱངས་བྱས་པའི་ནང་ཚུད་དུའང་ཕྱིར་སློག་མ་བྱུང་ཁར། འདི་ག་ནས་དྲན་བསྐུལ་བརྡ་འདེད་རིམ་པ་བྱས་ཀྱང་ད་བར་ཡ་ལན་གཏན་ནས་མེད་པར་བཞག་སོང་བར་བརྟེན། བཅད་ཁྲ་ལག་བསྟར་བྱ་རྒྱུར།
ལྷག་པ་ཚེ་རིང་རང་ཉིད་ཀྱི་གཞུང་འབབ་གསོག་དངུལ་ཇི་ཡོད་བཅད་ཁྲའི་དགོངས་དོན་ལྟར་གཞུང་བཞེས་གནང་ཟིན་པའི་ཁར། རང་འབབ་གསོག་དངུལ་དང༌། གཞུང་སྒེར་གསོག་དངུལ་གྱི་སྐྱེད་འབབ་བཅས་བསྡོམས་སྒོར་ ༧༣༡༢༧བདུན་ཁྲི་སུམ་སྟོང་བརྒྱ་དང་ཉི་ཤུ་རྩ་བདུན་བྱེད་འདུག་པ་གཞུང་བཞེས་ཀྱིས་གོང་གསལ་སྤྱི་གུན་ཕྱིར་སློག་ལ་ཕན་པ་བྱ་རྒྱུ་དང༌། སྤྱི་གུན་ཕྱིར་གསབ་མ་བྱུང་བ་འཕྲོས་ཧིན་སྒོར་ ༢༣༡༧༠༣ཉིས་འབུམ་སུམ་ཁྲི་ཆིག་སྟོང་བདུན་བརྒྱ་བཅུ་མེད་གསུམ་བྱེད་པ་ལྷག་པ་ཚེ་རིང་ནས་དུས་བཀག་ནང་ཚུད་ཕྱིར་སློག་བྱ་ཐབས་གཏན་ནས་བྱས་མེད་པ་ནི། བཙན་བྱོལ་བོད་མིའི་བཅའ་ཁྲིམས་དང༌། བོད་མིའི་སྒྲིག་འཛུགས་ཀྱི་སྒྲིག་གཞི་ཁག་ལ་སྣང་ཆུང་བརྩི་མེད་བཏང་བ་ཡིན་པས། བཅད་ཁྲའི་ནང་ཉེན་བརྡ་སྤྲད་ཟིན་པ་ལྟར་སྤྱི་དངུལ་སྒེར་ཟས་བྱས་པར་ངོས་འཛིན་དང་འབྲེལ། ཕྱི་ལོ་ ༢༠༡༥ ཟླ་ ༨ ཚེས་ ༥ ནས་བཟུང་སྦེལ་ཀོབ་འཚོ་བྱེད་སྨན་ཁང་གི་འགན་འཛིན་ཟུར་པ་ལྷག་པ་ཚེ་རིང་ལ་བོད་མིའི་སྒྲིག་འཛུགས་ནས་བོད་མི་སྤྱི་འགྲེ་ལྟར་ཕན་གྲོགས་ལྟ་སྐྱོང་བྱ་སྒོ་ཡོངས་རྫོགས་བཀག་བསྐྱིལ་བྱས་པའི་གསལ་བསྒྲགས་སུ། བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ནས། ཕྱི་ལོ་ ༢༠༡༥ ཟླ་ ༨ ཚེས་ ༥ ལ།། །།
