༢༠༡༥ ཟླ་ ༨ ཚེས་ ༡༠ རེས་གཟའ་ཟླ་བ།
༄༅། །འདི་གར་ཁུངས་ལྡན་གནས་ཚུལ་འབྱོར་གསལ་ལྟར་ན། ཁམས་ནང་ཆེན་ཁུལ་གྱི་བོད་མི་རྣམས་ལ་རྒྱ་ནག་གཞུང་གི་ཉེན་རྟོག་པས་གང་བྱུང་ཉེས་བརྡུང་བཏང་བའི་རྐྱེན་གྱིས་བོད་མི་མི་ཉུང་བ་ཞིག་ལ་རྨས་སྐྱོན་ཚབས་ཆེ་ཕོགས་ནས་སྨན་ཁང་དུ་དབོར་དགོས་བྱུང་པའི་གནས་ཚུལ་ཐོན་འདུག
དེ་ཡང་ཁམས་ནང་ཆེན་ཁུལ་དུ་འབྲེལ་བ་དམ་ཟབ་ཡོད་པའི་བོད་མི་ཞིག་གིས་གནས་ཚུལ་འགྲེལ་བརྗོད་གནང་བར་གཞིགས་ན། རྒྱ་ནག་གཞུང་གིས། ཕྱི་ཟླ་ ༨ ཚེས་ ༡ ལ་བརྒྱད་གཅིག་དམག་མིའི་དུས་ཆེན་ཞེས་ལོ་ལྟར་སྲུང་བརྩི་བྱེད་ཀྱི་ཡོད་པ་དང་། རྣམ་ཀུན་ཡིན་ན། བརྒྱད་གཅིག་དམག་མིའི་དུས་ཆེན་གྱི་སྔ་ནུབ་ཏུ། ནང་ཆེན་རྫོང་སློབ་འབྲིང་ཨང་དང་པོའི་སྒོ་རྭའི་ནང་། གཞུང་གི་ལས་ཁུངས་ཁག་དང་། སློབ་གྲྭ་ཁག་ནས་གཞས་སྣ་འཁྲབ་སྟོན་བྱེད་པ་སོགས་ཀྱི་མཛད་སྒོ་ཚོགས་ནས་དུས་སྟོན་རྣམ་པ་ཡོད་པའི་བྱེད་སྒོ་ཞིག་གོ་སྒྲིག་བྱེད་ཀྱི་ཡོད། འདི་ལོ་ནང་ཆེན་རྫོང་ཁོངས་སུ་ཤང་ཆེ་ཆུང་བཅུ་ཡོད་
པའི་ནང་ནས། ཀ་གཞུང་ཤང་དུ་དུས་སྟོན་ཚོགས་དགོས་པའི་བཀའ་བཏང་ཡོད་པ་དང་། ས་གནས་རྒྱ་ནག་གཞུང་གིས་འགྲེལ་བརྗོད་བྱེད་སྟངས་ལ་གཞིགས་ན། དུས་སྟོན་གྱི་ངོ་བོ་ནི་བོད་མི་རིགས་ཀྱི་རིག་གནས་དར་སྤེལ་ཡིན་ཚུལ་བཤད་ནས། དེ་ཉིན་ཁྱིམ་ཚང་སོ་སོའི་རྒྱན་ཆ་དང་། གྱོན་གོས་མཆོར་པོ་མངོན་གསལ་གྱིས་སྟོན་དགོས་པ་དང་། ཆབས་ཅིག་སྲོལ་རྒྱུན་ལག་རྩལ་ཡང་འགྲེམས་སྟོན་བྱེད་དགོས་ཀྱི་ཡོད་པ་རེད་འདུག
དེ་ལྟར་ཉེ་ཆར་ཕྱི་ཟླ་ ༨ པའི་ནང་། ས་གནས་གཞུང་ནས་འབྲི་སྟོད་རྫོང་དང་། རྫ་སྟོད་རྫོང་དུ་དུས་སྟོན་ཚོགས་ནས་རྙོག་གྲ་བྱུང་མེད་པ་དང་། ཟླ་བ་བརྒྱད་པའི་ཚེས་གཅིག་ནས་གསུམ་བར་ནང་ཆེན་རྫོང་ཁྱབ་ཁོངས་ཀ་གཞུང་ཤང་དུ་དུས་སྟོན་ཚོགས་སྐབས། ཕྱི་ཚེས་ ༣ དགོང་མོ་ཉེན་རྟོག་པ་ཡོང་ནས་བོད་མི་རྣམས་ལ་ཉེས་བརྡུང་ཚབས་ཆེན་བཏང་བར་བརྟེན། ནང་ཆེན་རྫོང་ཁོང
ས་ས་གནས་འདྲ་མིན་གྱི་བོད་མི་ ༣༠ ཙམ་ལ་རྨས་སྐྱོན་ཚབས་ཆེ་ཕོགས་ཏེ། སྨན་ཁང་དུ་སྐྱེལ་དགོས་པའི་གནས་ཚུལ་བྱུང་འདུག
ཉེན་རྟོག་པས་ས་གནས་བོད་མི་རྣམས་ལ། དེ་འདྲའི་སྙིང་རྗེ་མེད་པའི་ཉེས་བརྡུང་དྲག་པོ་གཏོང་དགོས་པའི་རྒྱུ་མཚན་གཙོ་བོ་ག་རེ་ཡིན་མིན་ཁ་གསལ་ཞིག་ཤེས་རྟོགས་དཀའ་ཡང་། འདི་གའི་གནས་ཚུལ་འབྱུང་ཁུངས་བརྒྱུད་ཤེས་རྟོགས་བྱུང་བར་གཞིགས་ན། ནང་ཆེན་རྫོང་དུ་ཚེས་གཅིག་ནས་གསུམ་བར་རིག་གནས་དར་སྤེལ་ཟེར་བའི་དུས་སྟོན་ཚོགས་བཞིན་པའི་མུར། ས་གནས་བོད་མི་ཚོས་སྤྱིར་བཏང་གི་བོད་མིའི་གྱོན་གོས་མ་གཏོགས། སྟག་སྤགས་དང་གཟིགས་པགས་ཀྱིས་བརྒྱན་པའི་གྱོན་གོས་རིགས་གྱོན་མེད་ལ། མགོ་དང་། སྐེ། ལག་པ་སོགས་ལུས་པོ་ཡོངས་རྫོགས་གཟི་དང་བྱུ་རུ། སྤོས་ཤེལ་སོགས་ཀྱིས་འཁེངས་པའི་རྒྱན་ཆ་ཡང་བཏགས་མེད་པ་མ་ཟད། བོད་མི་བསམ་ཡོད་ཁ་ཤས་ཀྱིས། ད་རེས་ཀྱི་དུས་སྟོན་དེའི་དམིགས་ཡུལ་ཡག་པོ་ཡོད་ས་མ་རེད། ང་ཚོས་གཟབ་གཟབ་བྱེད་དགོས་འདུག་ཅེས་ཕན་ཚུལ་གླེང་རེས་བྱས་པའི་སྐད་ཆ་དེ་དག གཅིག་གིས་གཅིག་ལ་ཁྱབ་བཞིན་པའི་སྐབས་འདིར། ཚེས་གསུམ་ཉིན་གུང་ཙམ་ལ་མེ་མདའ་དང་། གློག་རྒྱུགས་སོགས་གོ་མཚོན་ཐོགས་པའི་ཉེན་རྟོག་རླངས་འཁོར་དུས་སྟོན་བྱེད་སར་སླེབས་ཏེ། གང་སར་སྐོར་གཡེང་བྱེད་པ་དང་། མང་ཚོགས་ལ་མེ་མདའི་ཁ་གཏད་པ་སོགས་འཇིགས་སྐུལ་བྱས་པར་བརྟེན། དུས་སྟོན་ལ་ཞུགས་མཁན་ཉམ་ཆུང་མང་ཚོགས་མི་ཉུང་བ་ཞིག་གིས། ད་ཡག་པོ་མི་འདུག་བསམ་སྟེ། སྟབས་མཁས་ཀྱིས་ནང་ལ་ལོག་ཕྱིན་པའི་གནས་ཚུལ་བྱུང་འདུག དེ་རྗེས་ཕྱི་ཚེས་ ༤ མཚན་མོ། གློག་རྒྱུགས་སོགས་གོ་མཚོན་ཐོགས་པའི་ས་གནས་ཉེན་རྟོག་པ། དུས་སྟོན་ཚོགས་སའི་མང་ཚོགས་ཉལ་སའི་གུར་ནང་ཡོང་ནས་རྣམ་འགྱུར་ཡག་པོ་མེད་པའི་རྒྱུ་མཚན་བཤད་དེ་གང་བྱུང་ཉེས་བརྡུང་བཏང་བ་ཞིག་རེད་འདུག
གནས་ཚུལ་འབྱུང་ཁུངས་ཀྱིས་བཤད་པར་གཞིགས་ན། བོད་མི་འཛིན་བཟུང་བྱས་པའི་གནས་ཚུལ་ད་བར་བྱུང་མི་འདུག་ཀྱང་། རྨས་མ་རྣམས་ནང་ཆེན་རྫོང་སྨན་ཁང་དུ་དབོར་ཡོད་པ་དང་། ཁག་གཅིག་ལ་རྨས་སྐྱོན་ཆེན་པོ་ཕོགས་པར་བརྟེན། ཟི་ལིང་གྲོང་ཁྱེར་གྱི་སྨན་ཁང་དུ་དབོར་ཡོད་པ་རེད་འདུག
བོད་མིའི་གཞུང་འབྲེལ་མ་ཡིན་པའི་ཚགས་ཤོག་ཁ་ཤས་ནང་། ཉེས་བརྡུང་འོག་རྨས་སྐྱོན་ཕོགས་པའི་ས་གནས་བོད་མི་ཁག་གཅིག་གི་མིང་གསལ་སྟོན་བྱས་འདུག
ཡང་ས་གནས་བོད་མིས། ད་རེས་ཀྱི་དོན་རྐྱེན་དེའི་ཁྲོད་དུ། ས་གནས་བོད་མིའི་ངོས་ནས་ཁྲིམས་འགལ་གྱི་ནོར་འཁྲུལ་གཏན་ནས་བྱས་མེད་ན་ཡང་། ཉེས་བརྡུང་ཚབས་ཆེན་དེ་འདྲ་བཏང་བ་ནི། གཞུང་ནས་མང་ཚོགས་ལ་དོན་མེད་བརྙས་བཅོས་བྱས་པ་ཞིག་ཡིན་སྟབས། ལས་སླ་པོར་འཇོག་ཐབས་གཏན་ནས་མེད་ཅེས་ཡིག་ཐོག་ཏུ་བདེ་སྡུག་གླེང་པའི་གནས་ཚུལ་ཡང་སྤྱི་ཚོགས་དྲྭ་རྒྱའི་ནང་ཁྱབ་བཞིན་པ་རེད་འདུག །
