༢༠༡༥ ཟླ་ ༨ ཚེས་ ༡༨ རེས་གཟའ་མིག་དམར།
༄༅། །འདི་གར་ནང་སྲིད་ལས་ཁུངས་ནས་ཕྱི་ལོ་ ༢༠༡༥ ཟླ་ ༨ ཚེས་ ༡༧ ཉིན་བཏང་གནས་ནང་འཁོད་དོན། བཙན་བྱོལ་བོད་མིའི་གཞིས་ཆགས་ཁག་གི་ས་ཁང་བདག་འཛིན་དང་བེད་སྤྱོད་བྱེད་ཕྱོགས་ཀྱི་སྒྲིག་གཞི་བསྐྱར་བཅོས་ཕྱིན་པ་གཞིར་བཟུང་མོན་གྷོ་འདོད་རྒུ་གླིང་གཞིས་ཆགས་ཁོངས་གྲོང་སྡེ་ ༣ པའི་ཁང་ཨང་ ༣༦ ནང་སྡོད་བདེ་ཆེན་སྒྲོལ་མ་ལགས་དང་། ཁང་ཨང་ ༨ ནང་སྡོད་དཀོན་མཆོག་མཚོ་མོ་ལགས་གཉིས་ནས་ཞིང་ས་བསྡོམས་ཨེ་ཀར་ ༥ དང་གུན་ཀྲ་ ༣༢ དང་ཡང་གྲོང་སྡེ་ ༣ པའི་ཁང་ཨང་ ༡ ནང་སྡོད་པ་རྒྱལ་ལགས་དང་། ཁང་ཨང་ ༢ པའི་ནང་སྡོད་ཆུང་ཆུང་ལགས་གཉིས་ནས་ཞིང་ས་བསྡོམས་ཨེ་ཀར་ ༣ དང་གུན་ཀྲ་ ༢༨ བཅས་ཁྱོན་བསྡོམས་ཞིང་ས་ཨེ་ཀར་ ༩ དང་ཕྱེད་ཀ་ས་གནས་སུ་བོད་ནས་རྗེས་སུ་འབྱོར་བའི་རང་རིགས་རྣམས་ལ་མཐུན་འགྱུར་སྐྲུན་རྒྱུའི་ལས་གཞིའི་ཆེད་མོན་གྷོ་ས་གནས་འགོ་འཛིན་ལས་ཁུངས་སུ་ས་ཆ་གཞུང་ཕུལ་གནང་བར་དཔལ་ལྡན་ནང་སྲིད་བཀའ་བློན་མཆོག་གིས་བོད་མིའི་སྒྲིག་འཛུགས་ཀྱི་ཚབ་ཞུས་ཏེ་འབྲེལ་ཡོད་རྣམས་ལ་སྙིང་ཐག་པ་ནས་ཐུགས་རྗེ་ཆེ་ཞུའི་ཡིག་ཆུང་གནང་བ་དང་སྦྲགས།
གོང་གསལ་གཞུང་ཕུལ་བྱུང་བའི་ས་ཆའི་སྟེང་ལས་གཞི་གང་མགྱོགས་འགོ་འཛུགས་ཞུ་རྒྱུ་ཡིན་སྐོར་གསུངས་ཡོད། ལས་གཞི་འདིའི་ཐོག་ནས་རང་རིགས་དཀའ་ངལ་ཅན་རྣམས་ལ་དངོས་ཡོད་ཕན་ཐོགས་འབྱུང་བའི་རེ་བ་ཞུ་བཞིན་ཡོད། ལྷག་དོན་རང་རེའི་བཙན་བྱོལ་སྤྱི་ཚོགས་ནང་ལ་གཞིས་ཆགས་ཀྱི་ཐོབ་ཐང་མེད་པ་མང་དག་ཅིག་ཡོད་པ་དེ་དག་ལ་དངོས་ཡོད་ཕན་ཐོགས་ཆེན་པོ་ཡོང་ངེས་ལ་བརྟེན་རང་རིགས་གཞན་རྣམས་ནས་ཀྱང་དེ་འབྲེལ་ས་ཆ་གཞུང་འབུལ་གནང་མཁན་ཡོད་ན་གནང་རོགས་འབོད་བསྐུལ་ཞུ་རྒྱུ་བཅས། །
