༢༠༡༥ ཟླ་ ༨ ཚེས་ ༢༠ རེས་གཟའ་ཕུར་བུ།
༄༅། །བོད་མིའི་སྒྲིག་འཛུགས་དཔལ་འབྱོར་ལས་ཁུངས་ཀྱི་ཚོང་ལས་ཡར་རྒྱས་རམ་འདེགས་ Tibetan Entrepreneurship Development ཚན་པས་ཚོང་ལས་ཡར་རྒྱས་རམ་འདེགས་ཀྱི་ལས་གཞིའི་འོག རྡ་སྟེང་བོད་ཁྱིམ་གྱི་སློབ་མ་གཉིས་ལྷོ་ཨ་ཕི་རི་ཁའི་གོ་ལའི་ཚོང་ལས་ལས་གཞིའི་ Global Scholars Program (GSP) ཟབ་སྦྱོང་ཐོག་མཉམ་ཞུགས་གནང་སྟེ་ད་ཆ་ཟབ་སྦྱོང་ལེགས་གྲུབ་ཀྱིས་ཕྱིར་ལོག་བྱས་འདུག
དེ་ཡང་ཕྱི་ལོ་ ༢༠༡༥ ཟླ་ ༧ ཚེས་ ༢༥ ནས་ཕྱི་ཟླ་ ༨ ཚེས་ ༡༢ བར་ཉིན་གྲངས་ ༡༩ རིང་གི་གོ་ལའི་ཚོང་ལས་ལས་གཞིའི་ཟབ་སྦྱོང་སྐབས་རྒྱལ་ཁབ་འདྲ་མིན་ནས་སློབ་ཕྲུག་དྲག་འདེམས་བྱས་པ་རྣམས་ལ་མ་འོངས་པར་སྤྱི་ཚོགས་ནང་འགོ་ཁྲིད་བྱེད་ཐུབ་པ་དང་ཁེ་ལས་པ་ཚད་ལྡན་ཞིག་བཟོ་རྒྱུའི་འབད་བརྩོན་གནང་བཞིན་ཡོད་འདུག
སློབ་མ་འཕྲིན་ལས་དབང་མོ་ལགས་ཀྱིས་བརྗོད་དོན། ང་རང་ཟབ་སྦྱོང་འདི་ལྟ་བུའི་ནང་མཉམ་ཞུགས་བྱེད་རྒྱུའི་གོ་སྐབས་ཐོབ་པར་ཧ་ཅང་དགའ་པོ་བྱུང་། ཟབ་སྦྱོང་སྐབས་ང་ཚོས་ཡུལ་གྲུ་འདྲ་མིན་གྱི་མི་སྣ་དང་སློབ་ཕྲུག་དོ་དབྱིངས་ཅན་མང་པོ་ཐུག་རྒྱུའི་གོ་སྐབས་བྱུང་། ཞེས་གསུངས། རིང་མིན་སློབ་མ་འཕྲིན་ལས་དབང་མོ་ལགས་དང་བསྟན་འཛིན་རབ་དགའ་ལགས་གཉིས་ནས་རྡ་སྟེང་བོད་ཁྱིམ་དུ་རང་ཉིད་ཟབ་སྦྱོང་སྐབས་ཀྱི་མྱོང་ཚོར་དེ་དག་སློབ་ཕྲུག་གཞན་ཚོར་ངོ་སྤྲོད་དང་ཉམས་མྱོང་བརྗེ་ལེན་བྱེད་རྒྱུ་ཡིན་འདུག
དེ་རིང་སློབ་མ་གཉིས་ཀྱིས་བོད་མིའི་སྒྲིག་འཛུགས་ཀྱི་དཔལ་འབྱོར་བཀའ་བློན་ཚེ་རིང་དོན་གྲུབ་མཆོག་མཇལ་འཕྲད་ཞུས་ཏེ། ལས་གཞི་དང་ཟབ་སྦྱོང་སྐབས་ཀྱི་སོ་སོའི་མྱོང་ཚོར་ཞུས་ཡོད་འདུག ཐེངས་འདིའི་ཟབ་སྦྱོང་ནི་ཨ་རིའི་ནང་རྟེན་གཞི་བྱས་པའི་ཨོ་མི་ཌི་ཡར་ནེཊ་ཝོར་ཀ་ Omidyar Network ཞེས་པའི་ཚོང་ལས་སྒྲིག་འཛུགས་ཀྱིས་མཐུན་འགྱུར་གནང་བ་ཞིག་ཡིན་འདུག
