༢༠༡༥ ཟླ་ ༨ ཚེས་ ༡༠ རེས་གཟའ་ཟླ་བ།

༄༅། །བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་ཕྱི་ལོ་ ༢༠༡༥ ཟླ་ ༧ ཚེས་ ༦ ནས་ཚེས་ ༣༠ བར་ཨ་རི་ཁུལ་དུ་གཞུང་འབྲེལ་ཕྱོགས་ཕེབས་གནང་ཡོད།

དེ་ཡང་ཕྱི་ལོ་ ༢༠༡༥ ཟླ་ ༧ ཚེས་ ༦ ཉིན་༸སྐུའི་འཁྲུངས་སྐར་གྱི་མཛད་སྒོ་གྲུབ་འཕྲལ་རྡ་ས་ནས་ཕེབས་ཐོན་གྱིས་ཕྱི་ཚེས་ ༨ ནས་ ༡༠ བར་ཨ་རིའི་རྒྱལ་ས་ནིའུ་ཡོཀ་དང་ནིའུ་ཇར་སི་བཅས་སུ་ཕྱོགས་ཕེབས་ཀྱིས་༸སྐུའི་འཁྲུངས་སྐར་དང་སྟབས་བསྟུན་བྱང་ཨ་མི་རི་ཁའི་བོད་རིགས་སྤྱི་མཐུན་ཚོགས་པ་ཁག་ ༣༠ ནས་༸གོང་ས་༸སྐྱབས་མགོན་ཆེན་པོ་མཆོག་ལ་བཀའ་དྲིན་རྗེས་དྲན་སྲུང་བརྩིའི་བརྟན་བཞུགས་རྒྱས་པ་བསྟར་འབུལ་གྱི་མཛད་སྒོའི་ཐོག་མཉམ་ཞུགས་སོགས་གནང་ཡོད། དེ་བཞིན་ཕྱི་ཚེས་་༡༡ ནས་ ༢༥ བར་བོད་དོན་རྒྱབ་སྐྱོར་བ་དང་། བོད་ཀྱི་ཐེབས་རྩ། ཆོས་ཚོགས། བོད་རིགས་སྤྱི་མཐུན་ཚོགས་པ། རླུང་འཕྲིན་ཁང་། གྲོས་ཚོགས་འཐུས་མི་སོགས་དང་ཐུག་འཕྲད་དང་གསུང་བཤད་གནང་ཡོད།

ཕྱི་ཚེས་ ༢༧ ཉིན་རྒྱལ་སྤྱིའི་བོད་དོན་ལས་འགུལ་ཁང་གི་གཙོ་འཛིན་སྐུ་ཞབས་ Richard Gere ལགས་དང་འགན་འཛིན་ Matteo Meccaci ལགས་ལྷན་དུ་བོད་མི་མང་སྤྱི་འཐུས་ལྷན་ཚོགས་དང་རྒྱལ་སྤྱིའི་བོད་དོན་ལས་འགུལ་ཁང་དབར་བོད་དོན་ལས་འགུལ་ཤུགས་ཇི་ཆེ་དང་ཚགས་ཚུད་གཏོང་རྒྱུའི་སྐོར་གོ་བསྡུར་གནང་ཡོད།

དཔལ་ལྡན་ཚོགས་གཙོ་མཆོག་ཨ་རིར་གཞུང་འབྲེལ་ཕྱོགས་ཕེབས་ཀྱི་ལས་དོན་ལེགས་པར་གྲུབ་མཚམས། ཕྱི་ཚེས་ ༢༨ ཉིན་རྒྱ་གར་ལྡི་ལིར་ཕྱིར་ཕེབས་གནང་ནས་ཚེས་ ༢༩ ཉིན་ལྡི་ལི་འཕགས་བོད་འབྲེལ་མཐུད་ལས་ཁང་གི་ལས་བྱེད་བསྟན་འཛིན་དཔལ་འབྱོར་ལགས་དང་ཐུག་འཕྲད་ཀྱིས་ཕྱི་ཟླ་ ༨ ཚེས་ ༡༡ ཉིན་རྒྱ་གར་གྲོས་ཚོགས་འཐུས་མིའི་བོད་དོན་རྒྱབ་སྐྱོར་འཐུས་མི་སྐུ་ཞབས་ Shanta Kumar མཆོག་གི་གྲ་སྒྲིག་འོག་འབྲེལ་མཐུད་པ་རྣམས་ཚོགས་འདུ་ཚོགས་རྒྱུའི་སྐོར་བཀོད་མངགས་གནང་དགོས་གནང་། ཕྱི་ཚེས་ ༣༡ ཉིན་གྱི་ཞོགས་པ་རྡ་སར་ཕྱིར་ཕེབས་གནང་ཡོད་བཅས།།