༢༠༡༥ ཟླ་ ༨ ཚེས་ ༢༦ རེས་གཟའ་ལྷག་པ།

ᨌ། །ཕྱི་ལོ་ ༢༠༡༥ ཟླ་ ༨ ཚེས་ ༣༡ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་རྒྱ་གར་ Maharashtra མ་ཧཱ་རཤ་ཊ་མངའ་སྡེའི་ནཱ་སིག་ཅེས་པའི་གྲོང་ཁྱེར་ནང་ཧིན་དུའི་ཆོས་ལུགས་ཀྱི་འདུ་འཛོམས་ཆེན་མོ་ཏེ་ནཱ་སིག་ཀུམ་བྷ་ Nasik kumbh དུས་ཆེན་ཐོག་ཆིབས་སྒྱུར་བསྐྱང་གཏན་འཁེལ་ཡོད་འདུག

དེ་ཡང་རྒྱ་གར་གྱི་གྲོང་ཁྱེར་ཨི་ལཱ་བཱཌ་དང་། Allahabad ཨུཇ་འཇེན། Ujjain དེ་བཞིན་ཧཱ་རི་ཌ་ཝར། Haridwar ནཱ་སིག Nasik བཅས་སུ་ལོ་གསུམ་རེའི་མཚམས་གྲོང་ཁྱེར་དེ་གསུམ་ནང་ལོ་ལྟར་འཚོགས་བཞིན་པའི་ཧིན་དུའི་ཆོས་ལུགས་ཀྱི་དུས་ཆེན་ཀུམ་བྷ་མེ་ལ་ kumbh Mela ཞེས་པ་འདུ་འཛོམས་ཆེན་པོ་རེ་ཚོགས་སྲོལ་ཡོད་པ་ལྟར། འདི་ལོའི་དུས་ཆེན་འདི་བཞིན་ཟླ་འདིའི་ཚེས་ ༡༤ ནས་འགོ་འཛུགས་ཀྱིས་ཕྱི་ཟླ་ ༩ ཟླ་དཀྱིལ་བར་ཚོགས་རྒྱུ་ཡིན་པ་དང་། དུས་ཆེན་འདིའི་ཐོག་ཧིན་དུའི་བླ་ཆེན་སོགས་ཆོས་ཕྱོགས་ཀྱི་མི་སྣ་སྟོང་ཕྲག་མང་པོ་དང་རྒྱ་གར་བ་དད་ལྡན་མང་ཚོགས་འབུམ་ཕྲག་མང་པོ་བཅར་གྱི་ཡོད་པ་མ་ཟད། རྒྱ་གར་དབུས་གཞུང་དང་མངའ་སྡེའི་དཔོན་རིགས་མཐོ་གྲས་མང་པོ་ཞིག་ཀྱང་དུས་ཆེན་འདིར་ཕེབས་སྲོལ་ཡོད་འདུག

དེ་བཞིན་ཐེངས་འདིའི་ནཱ་སིག་ཀུམ་བྷ Nasik Kumbh དུས་ཆེན་གྱི་གོ་སྒྲིག་ཚོགས་ཆུང་ནས་མགོན་པོ་གང་ཉིད་མཆོག་ལ་ཇི་ལྟར་གསོལ་འདེབས་ཞུས་དོན་ལྟར་བཀའ་བཞེས་བཟང་པོ་སྨིན་སྩལ་ཐོབ་ནས་༸གོང་ས་༸སྐྱབས་མགོན་ཆེན་པོ་མཆོག་ཕྱི་ཟླ་ ༨ ཚེས་ ༣༡ ཉིན་དུས་ཆེན་དེའི་ཐོག་ཆིབས་སྒྱུར་བསྐྱང་གནང་མཛད་དེ་ཧིན་དུའི་བླ་ཆེན་ཁག་དང་། མཁས་དབང་ཁག་གཅིག་དང་ལྷན་མཇལ་འཕྲད་མཛད་རྒྱུ་ཡིན་འདུག་པ་བཅས། །