༢༠༡༥ ཟླ་ ༧ ཚེས་ ༧ རེས་གཟའ་མིག་དམར།
ཨེ་ན་ཧིམ་གྲོང་སྡེའི་སྤྱི་ཁྱབ་ཊོམ་ཀྲེག་མཆོག་དང་ལྷན།
༄༅། །འཛམ་གླིང་ཡུལ་གྲུ་གང་སར་གནས་པའི་བོད་མི་སྤྱི་དང་། བོད་དོན་རྒྱབ་སྐྱོར་བ་རྣམས་ཀྱིས་དགའ་དད་སྤྲོ་གསུམ་དང་བཅས་ཏེ་རྣམ་པ་འདྲ་མིན་ཐོག་འདི་ལོ་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་བརྒྱད་ཅུར་ཕེབས་པའི་༸སྐུའི་འཁྲུངས་སྐར་དུས་ཆེན་སྲུང་བརྩི་གཟབ་རྒྱས་ཞུས་ཡོད། དེ་ཡང་ཕྱི་ལོ ༢༠༡༥ ཟླ་ ༧ ཚེས་ ༥ ཉིན་ཨ་རིའི་ཁེ་ལི་ཕོན་ནི་ཡའི་ California མངའ་སྡེའི་གྲོང་ཁྱེར་ཨེན་ན་ཧིམ་ Anaheim ནང་དུ་རྒྱལ་སྤྱིའི་ཐོག་སྙན་གྲགས་ཡོད་པའི་གནད་ཡོད་མི་སྣ་དང་མང་ཚོགས་ཆིག་ཁྲི་བརྒྱད་སྟོང་ལྷག་ལྷན་འཛོམས་ཐོག་བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་འཁྲུངས་སྐར་དུས་ཆེན་སྲུང་བརྩི་གཟབ་རྒྱས་ཞུས་འདུག
དུས་སྟོན་མཛད་སྒོའི་ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དབུ་བཞུགས་ཐོག སྐུ་མགྲོན་དུ་ཆེད་བཅར་ནོ་བེལ་ཞི་བདེའི་གཟེངས་རྟགས་བཞེས་མྱོང་མཁན་ལྕམ་ཤི་རིན་ཨི་བྷ་ཌི་ Shirin Ebadi མཆོག་དང། ལྕམ་ཇོ་ཌི་ཝིལ་ཡེམ་སི་ Jody Williams མཆོག དེ་བཞིན་ཨེ་ན་ཧིམ་གྲོང་སྡེའི་སྤྱི་ཁྱབ་ཊོམ་ཀྲེག Tom Tait ལགས་བཅས་དང་། ཨ་རིའི་གློག་བརྙན་འཁྲབ་སྟོན་པ་དང་གཞས་པ་གྲགས་ཅན། གཞན་ཡང་ཚན་རིག་པ་དང། སྤྱི་ཚོགས་ལས་འགུལ་བ། ཚོང་པ་གྲགས་ཅན་སོགས་སྤྱི་ཚོགས་ནང་གི་ལས་རིགས་འདྲ་མིན་གཉེར་བཞིན་པའི་ཆེད་ལས་མཁས་པ་ཉི་ཤུ་ལྷག་ཆེད་ཕེབས་གནང་འདུག
ལྷག་པར་སྐབས་དེར་ཨ་རིའི་གཞས་པ་གྲགས་ཅན་དང་སྤྱི་ཚོགས་ལས་འགུལ་བ་མ་ཧེ་ཀལ་ཕེ་རེན་ཌི་ Michael Franti ལགས་ཀྱིས་༸གོང་ས་མཆོག་ལ་ཆེ་བསྟོད་འཚམས་འདྲིའི་བསྟོད་དབྱངས་ཕུལ་བ་དང་དུས་མཉམ་དེ་གར་འདུས་པའི་མང་ཚོགས་རྣམས་ནས་ཀྱང་དགའ་དད་སྤྲོ་གསུམ་ངང་འཚམས་འདྲི་ཞུས་འདུག སྐབས་དེར་༸གོང་ས་༸སྐྱབས་མགོན་ཆེན་པོ་མཆོག་གིས་ཐུགས་དགྱེས་ཚོར་ཆེན་པོས་མང་ཚོགས་རྣམས་ལ་ཐུགས་རྗེ་ཆེ་ཞུས་པ་དང་སྦྲགས། བཀའ་སློབ་སྩལ་དོན། འཛམ་གླིང་ནང་དོན་དམ་པའི་ནང་སེམས་ཀྱི་ཞི་བདེ་དང་དེའི་རིན་ཐང་ལ་དགའ་མོས་དང་དོ་སྣང་བྱེད་མཁན་ཇེ་མང་དུ་འགྲོ་བཞིིན་ཡོད་སྟབས། ངོས་ཀྱི་མི་ཚེ་འདིའི་རིང་ཞི་བདེ་ལྡན་པའི་འཛམ་གླིང་ཞིག་ཡོང་སྲིད་པ་འདུག
ཨ་རིའི་གཞས་པ་གྲགས་ཅན་དང་སྤྱི་ཚོགས་ལས་འགུལ་བ་མ་ཧེ་ཀལ་ཕེ་རེན་ཌི་ལགས་ཀྱིས་འཚམས་འདྲིའི་བསྟོད་དབྱངས་འབུལ་བཞིན་པ།
དེ་ལྟར་ཞི་བདེ་ལྡན་པའི་འཛམ་གླིང་ཞིག་བསྐྲུན་རྒྱུ་ནི། ལས་སླ་པོ་ཞིག་མིན་པར་དེའི་སླད་སྒོ་གང་ས་ནས་ཤུགས་རྒྱག་དགོས་པ་ཡིན། ངོས་ཀྱི་ཉམས་མྱོང་ཐོག་ནས་ཞུ་རྒྱུར་དྲང་བདེན་གྱི་ལམ་བུ་དེར་དུས་ཚོད་རིང་མིན་ལ་མ་ལྟོས་པར་རྒྱལ་ཁ་ཐོབ་ངེས་ཡིན་པ་དང་། དྲག་པོའི་བྱ་སྤྱོད་ལ་ལམ་སེང་ནུས་པ་ཞིག་ཐོན་ནའང་ཕུགས་རྒྱང་རིང་པོའི་དགེ་ཕན་མེད། བྱམས་བརྩེ་ལྡན་པའི་འཛམ་གླིང་ཞིག་བསྐྲུན་རྒྱུ་དེ་ནི་རླབས་ཆེན་གྱི་དམིགས་ཡུལ་ཞིག་ཡིན། གང་ཡིན་ཟེར་ན། འཛམ་གླིང་འདིའི་སྟེང་གནས་པའི་འགྲོ་བ་མི་ཙམ་མ་ཟད་མཐའ་ཡས་པའི་འགྲོ་བ་སེམས་ཅན་ཡོངས་ཀྱི་མཚོན་པའི་རང་བྱུང་ཁོར་ཡུག་ལའང་ཕན་ཐོགས་ཡོད་པ་ཞིག་རེད། བྱམས་བརྩེ་ངོ་མ་དེ་ཕྱོགས་ལྷུང་དང་ཆགས་ཞེན་མེད་པའི་ཐོག་ནས་ཡོང་དགོས་པ་དང་། དེ་འདྲ་བྱུང་ཚེ་རང་ཉིད་ཀྱི་དགྲ་བོ་དང་བློ་ཐག་ཉེ་རུ་གཏོང་རྒྱུ་ཙམ་མ་ཟད། བྱམས་བརྩེ་དེ་ཉིད་སོ་སོའི་དགྲ་བོ་ལའང་ཁྱབ་ཐུབ་ཀྱི་ཡོད། དེ་ལྟ་བུའི་ཕྱོགས་ལྷུང་མེད་པའི་བྱམས་བརྩེ་དེ་ནི་འཇིག་རྟེན་ཀུན་ཁྱབ་ཀྱི་བྱམས་བརྩེ་ཞིག་རེད། གོ་ལ་གཅིག་གྱུར། ཆོས་ལུགས་མཐུན་སྒྲིལ། བོད་ཀྱི་ཆོས་དང་རིག་གཞུང་། ཁོར་ཡུག་སྲུང་སྐྱོབ་བཅས་ནི་ངོས་ཀྱི་མི་ཚེའི་ནང་དམ་བཅས་པའི་འགན་ཁུར་གསུམ་པོ་དེ་ཡིན། ངོས་རང་འཇིག་རྟེན་འདིར་འཚོ་བའི་རིང་ལུས་ངག་ཡིད་གསུམ་གྱི་བྱ་བ་མཐའ་དག་འགྲོ་བ་མིའི་བདེ་དོན་གྱི་ཆེད་དུ་བློས་བཏང་བྱ་རྒྱུ་ཡིན། ཆོས་གྲོགས་ཕོ་མོ་ཁྱེད་རང་ཚོ་ཡང་དེ་རིང་ནས་བཟུང་མི་ཚེ་ལྷག་འཕྲོ་དེའི་ནང་འགྲོ་བ་མི་གཅིག་གྱུར་གྱི་འདུ་ཤེས་འཛིན་ཏེ་བྱམས་བརྩེ་ལྡན་པའི་སྤྱི་ཚོགས་ཤིག་བསྐྲུན་རྒྱུར་འབད་བརྩོན་གནང་རྒྱུའི་དམ་བཅའ་ཞིག་འཇོག་དགོས་པ་རེད། ཅེས་བཀའ་སློབ་དོན་སྙིང་ལྡན་པ་ཞིག་མང་ཚོགས་ལ་སྩལ་གནང་གྲུབ་བསྟུན། ཨ་རིའི་དོན་གཅོད་གསར་ཁང་གི་གསར་འགོད་པ་ཟུར་པ་ལྕམ་ཨེན་ནི་ཀ་རི་ལགས་ཀྱིས་ལས་རིམ་གཙོ་སྐྱོང་ཐོག་༸གོང་ས་༸སྐྱབས་མགོན་ཆེན་པོ་མཆོག་དབུ་བཞུགས་ཀྱིས་ལས་རིགས་འདྲ་མིན་གྱི་སྒྱུ་རྩལ་བ་དང་། གྲགས་ཅན་མི་སྣ་དང་ལྷན་དུ་བྱམས་བརྩེ་གོང་འཕེལ་གཏོང་ཐབས་དང་འབྲེལ་བའི་སྐོར་བགྲོ་གླེང་གི་ལས་རིམ་ཞིག་ཀྱང་འཚོགས་འདུག དེ་ཡང་ཏཱ་ལའི་བླ་མའི་གྲོགས་པོ་ཚོགས་པ་དང་། ཞི་བའི་བསྟི་གནས། ཨར་ཝིན་ཁེ་ལི་ཕོན་ནི་ཡའི་གཙུག་ལག་སློབ་གཉེར་ཁང་བཅས་ཀྱི་གོ་སྒྲིག་ཐོག་ཉིན་གྲངས་གསུམ་རིང་༸གོང་ས་༸སྐྱབས་མགོན་ཆེན་པོ་མཆོག་དབུ་བཞུགས་ཐོག་གོ་ལའི་བྱམས་བརྩེ་ལྷན་ཚོགས་ཤིག་བསྟུད་མར་ཚོགས་འཆར་ཡོད་པ་དང་། ཐེངས་འདིའི་༸སྐུའི་འཁྲུངས་སྐར་གྱི་ལས་རིམ་བཀོད་བསྒྲིགས་རྐང་འཛིན་པ་༸གོང་ས་༸སྐྱབས་མགོན་ཆེན་པོ་མཆོག་གི་ཞི་བའི་སྐུ་ཚབ་བླ་མ་བསྟན་འཛིན་དོན་ལྡན་ལགས་ཡིན་འདུག་པ་བཅས། །
