༢༠༡༥ ཟླ་ ༧ ཚེས་ ༢༨ རེས་གཟའ་མིག་དམར།
༄༅། །བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཞོན་མཁན་པོ་བསོད་ནམས་བསྟན་འཕེལ་མཆོག་གིས་རྒྱ་གར་གྱི་སྲིད་འཛིན་ཟུར་པ་སྐུ་ཞབས་ཨབ་དུལ་ཀ་ལམ་མཆོག་འདས་གྲོངས་སུ་གྱུར་བར་ཁོང་གི་གཅེན་པོར་ཐུགས་གསོའི་འཕྲིན་ཡིག་ཅིག་སྤེལ་བའི་ནང་འཁོད་དོན། རྒྱ་གར་གི་མེ་ཤུགས་འཕུར་མདའ། ཞེས་ཡོངས་སུ་གྲགས་པའི་རྒྱ་གར་གྱི་སྲིད་འཛིན་ཟུར་པ་སྐུ་ཞབས་ཨབ་དུལ་ཀ་ལམ་མཆོག་གློ་བུར་འདས་གྲོངས་སུ་གྱུར་བར་བོད་མི་མང་གི་ཚབ་ཞུས་ནས་བཙན་བྱོལ་བོད་མི་མང་སྤྱི་འཐུས་ལྷན་ཚོགས་ཀྱིས་སྐུ་ཉིད་མཆོག་ལ་བློ་ཕམ་ཧ་ཅང་ཆེན་པོའི་སེམས་གསོ་ཞུ་བཞིན་ཡོད། དམ་པ་ཁོང་ནི་ཚན་རིག་གི་ཤེས་བྱ་ཡར་རྒྱས་ཤུགས་ཆེ་གཏོང་གནང་མཁན་གྱི་ཚན་རིག་པ་གྲགས་ཅན་ཞིག་ཡིན་པ་མ་ཟད། སྲིད་འཛིན་གྱི་ཐུགས་འགན་བཞེས་རིང་ཕྱག་ལས་གཟེངས་སུ་ཐོན་པ་གནང་ཡོད། གཞན་ཡང་དམ་པ་ཁོང་ནི་སྐྱེ་བུ་རྣམ་སྤྱོད་ལྡན་ཞིང་ཁེངས་སེམས་སྤང་པའི་ཞི་དུལ་གྱི་བཟང་སྤྱོད་ལྡན་མཁན་ཞིག་ཀྱང་ཡིན། སྐུ་ཚེ་ཧྲིལ་པོའི་རིང་དམ་པ་ཁོང་གིས་རྒྱལ་ཁབ་ཀྱི་དོན་དུ་ཕྱག་ལས་གནང་ཡོད་པ་དང་། ལས་རིགས་འདྲ་མིན་གྱི་མི་མང་ས་ཡ་མང་པོར་སྙིང་སྟོབས་སྤེལ་ཡོད། སྤྱིར་དམ་པ་ཁོང་ནི་རྒྱ་གར་ལྷོ་ཕྱོགས་ཊ་མིལ་ན་དུའི་ཁྱིམ་ཚང་དབུལ་པོ་ཞིག་ཏུ་འཁྲུངས་ཡང་ཤེས་ཡོན་ཐོག་ཧུར་བརྩོན་ཧ་ཅང་གནང་འབྲས་སུ་རང་ཉིད་ཀྱི་དམིགས་ཡུལ་ལྟར་ཚན་རིག་པ་གྲགས་ཅན་ཞིག་ཆགས་ཐུབ་ཡོད། དེར་བརྟེན་སློབ་ཕྲུག་རྣམས་ཀྱི་མིག་དཔེ་ལྟ་ས་ཚད་ལྡན་ཞིག་ལ་ངོས་འཛིན་ཞུ་བཞིན་ཡོད། དམ་པ་ཁོང་གིས་བོད་མིའི་ཆོས་ཕྱོགས་ཀྱི་དབུ་ཁྲིད་༸གོང་ས་༸སྐྱབས་མགོན་ཆེན་པོ་མཆོག་དང་ཐེངས་མང་མཇལ་འཕྲད་མཛད་མྱོང་ཡོད། སྐབས་དེ་དག་ཏུ་དབུ་ཁྲིད་རྣམ་གཉིས་ཀྱིས་ཚན་རིག་དང་ནང་ཆོས་དབར་གྱི་འབྲེལ་ལམ་སྐོར་སོགས་བགྲོ་གླེང་མཛད་ཡོད་པ་མ་ཟད། ནང་པའི་ལྟ་གྲུབ་ཀྱི་རྣམ་གཞག་ཐོག་དོ་སྣང་ཧ་ཅང་ཆེན་པོ་གནང་ཡོད། མདོར་ན་ཐེངས་འདིར་དམ་པ་ཁོང་འདས་གྲོངས་སུ་གྱུར་བ་དེ་རྒྱ་གར་ཙམ་མ་ཟད། འཛམ་གླིང་ཡོངས་ལ་གྱོང་གུན་ཆེན་པོ་ཕོག་པ་ཞིག་ཆགས་ཡོད། དེར་བརྟེན་ང་ཚོས་སྐུ་ཉིད་མཆོག་དང་རྒྱ་གར་མི་མང་རྣམས་ལ་སྙིང་ཐག་པ་ནས་སེམས་གསོ་དང་སྦྲགས་གདུང་སེམས་མཉམ་སྐྱེ་ཞུ་རྒྱུ་ཡིན། ཞེས་འཁོད་འདུག
༼མ་ཡིག་ངོ་མ་དབྱིན་ཡིག་ཐོག་ཡོད་པས་དེར་རྩ་འཛིན་ཡོང་བ་ཞུ།༽
