༢༠༡༥ ཟླ་ ༧ ཚེས་ ༡༣ རེས་གཟའ་ཟླ་བ།
༄༅། །བོད་མིའི་སྒྲིག་འཛུགས་ནས་ཇི་ལྟར་གསོལ་འདེབས་ཞུས་དོན་བཞིན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཞལ་སྔ་ནས་གནས་མཆོག་རྡོ་རྗེ་གདན་དུ། བོད་རྒྱལ་ལོ་ ༢༡༤༢ ཟླ་བ་ ༡༢ ཚེས་ ༥ ནས་ཚེས་ ༡༧ སྟེ། ཕྱི་ལོ་ ༢༠༡༦ ཟླ་བ་ ༡ ཚེས་ ༡༤ ནས་ཕྱི་ཚེས་ ༢༥ བར་བཅོམ་ལྡན་འདས་དཔལ་དུས་ཀྱི་འཁོར་ལོའི་དབང་ཆེན་ཐེངས་ ༣༤ བཀྲིན་བསྐྱང་རྒྱུའི་བཀའ་བཟང་སྤྱི་སྨིན་ལྟར། བོད་མིའི་སྒྲིག་འཛུགས་དཔལ་ལྡན་བཀའ་ཤག་ནས་ཐེངས་འདིའི་དུས་དབང་གི་གྲ་སྒྲིག་ཞུ་སྒོའི་ལས་འགན་གཙོ་བོ་བོད་མིའི་སྒྲིག་འཛུགས་ཆོས་རིག་ལས་ཁུངས་ལ་བསྐུར་གནང་ཡོད་པ་དང་བསྟུན། དུས་དབང་གྲ་སྒྲིག་ཚོགས་ཆུང་ཟུར་འཛུགས་ཀྱིས་ཚོགས་ཆུང་གི་ཚོགས་གཙོ་དཔལ་ལྡན་ཆོས་རིག་བཀའ་བློན་མཆོག་དང། ཚོགས་གཞོན་དཔལ་ལྡན་བདེ་སྲུང་བཀའ་བློན་མཆོག དཔལ་ལྡན་དགའ་ལྡན་ཕོ་བྲང་གི་སྐུ་ཚབ། རྣམ་རྒྱལ་གྲྭ་ཚང་གི་མཁན་རིན་པོ་ཆེ། ཚོགས་མི་རྡོར་གདན་མཆོད་རྟེན་འཛིན་སྐྱོང་ཚོགས་ཆུང་གི་དྲུང་ཆེ། ཆོས་རིག་དྲུང་ཆེ། དཔལ་འབྱོར་དྲུང་ཆེ། བདེ་སྲུང་དྲུང་ཆེ། ཆོས་རིག་དྲུང་འཕར་བཅས་ལ་གཏན་འབེབས་ཀྱིས་སྟ་གོན་བགྱི་སྒོ་ཞུ་མུས་སུ་མཆིས།
དཔལ་དུས་ཀྱི་འཁོར་ལོའི་དབང་ཆེན་ཐེངས ༣༤ དང་འབྲེལ་བའི་གནས་ཚུལ་ཆ་ཚང་གྲ་སྒྲིག་ཚོགས་ཆུང་གི་གཞུང་འབྲེལ་དྲ་རྒྱ་ www.kalachakra2016.net ཐོག་འདོན་བཤམས་བྱས་ཡོད་པར་གཟིགས་གནང་ཡོང་བ་ཞུ་རྒྱུའི་གསལ་བསྒྲགས་སུ།
དཔལ་དུས་ཀྱི་འཁོར་ལོའི་དབང་ཆེན་ཐེངས་ ༣༤ པའི་གྲ་སྒྲིག་ཚོགས་ཆུང་ནས་ཕྱི་ལོ་ ༢༠༡༦ ཟླ་ ༧ ཚེས་ ༡༣ ལ་སྤེལ།། །།
