༢༠༡༥ ཟླ་ ༧ ཚེས་ ༡ རེས་གཟའ་ལྷག་པ།
༄༅། །འདི་གར་ཁུངས་ལྡན་གནས་ཚུལ་འབྱོར་དོན་ལྟར་ན། ལོ་འགའི་སྔོན་དུ། བོད་ཤར་ཕྱོགས་ཁམས་འབྲི་རུ་རྫོང་བརླན་ཆུ་ཤང་ཁུལ་གྱི་ཚོང་པ་འགས་རྒྱ་མིའི་ཚོང་པའི་ཅ་ལག་རིན་གོང་མཐོན་པོ་ལ་ཁ་གཏད་གཅོག་ཆེད། ས་གནས་བོད་མི་ཚོང་པ་ཁ་ཤས་མཐུན་སྡེབ་བྱས་ནས་ཆེད་དུ་ཚོང་ཁང་ཁ་ཤས་གཉེར་བ་དང་། ས་གནས་བོད་མིར་རིན་གོང་ཆུང་བའི་སྒོ་ནས་རྒྱུན་མཁོའི་ཅ་ལག་ཉོ་ས་ཡོད་པའི་ཚོང་ཁང་བཙུགས་པ་རེད།
ས་གནས་བོད་མིའི་ཚོང་པ་བསོད་ནམས་དར་དབང་དང་། ལྷ་རྣམ། ཚེ་རིང་དོན་གྲུབ་སོགས་ནས་རྒྱུན་མཁོའི་ཅ་ལག་ཉོ་ཚོང་ཁང་དེ་དག་ལས་ཅ་ལག་རིན་གོང་ཁེ་ཚོང་བྱས་ནས་ས་གནས་སུ་བཙན་འཛུལ་བྱས་ནས་ཡོང་བའི་རྒྱ་རྒན་དེ་དག་ལ་རྣོ་ངར་ལྡན་པའི་འགྲན་རྩོད་བྱས་སྟབས། རྒྱ་མི་ཚོང་པ་དེ་དག་གི་ཡོང་འབབ་ལ་གྱོན་གུན་དཔེ་མི་སྲིད་པ་ཕོག་རྐྱེན་རྒྱ་མི་དེ་དག་གིས་མི་དགའ་བ་ཆེན་པོ་བྱས་ཡོད།
ལོ་ངོ་མང་པོའི་རིང་། རྒྱ་ནག་གཞུང་གིས་བོད་དུ་མི་སེར་སྤོ་བའི་སྲིད་བྱུས་ལ་བརྟེན་ནས་རྒྱ་མི་འབོར་ཆེན་ཞིག་ལོ་ལྟར་བོད་ཀྱི་ས་ཁུལ་གང་སར་འཚང་ཡོང་གི་ཡོད་པ་ལྟར། འབྲི་རུ་རྫོང་དུའང་ལོ་ཤས་ནང་རྒྱ་མི་ཧ་ཅང་མང་དུ་ཕྱིན་ཡོད། དེ་ཙམ་དུ་མ་ཟད། རྒྱ་མི་ཚོང་པ་དེ་ཚོས་རྒྱ་མི་ནང་ཕན་ཚུན་ཁ་དན་བྱས་ནས་ཅ་ལག་གོང་ཚད་ཆེན་པོ་སྤར་ནས་ས་གནས་བོད་མི་དམངས་ལ་མགོ་སྐོར་དང་གྱོན་གུན་ཚབས་ཆེན་བཟོ་བཞིན་ཡོད།
གནས་སྟངས་འདི་དག་གདོང་ལེན་ཆེད་དུ། ས་གནས་བོད་མི་ཚོང་པ་མང་པོས་མཐུན་སྡེབ་བྱས་ནས་རིན་གོང་ཁེ་ཚོང་ཅན་གྱི་རྒྱུན་མཁོའི་ཚོང་ཁང་བཙུགས་སྟབས་རྒྱ་མི་དེ་དག་གིས་ས་གནས་སྲིད་གཞུང་དཔོན་ངན་དང་འགབ་མཐུན་བྱས་ནས་ན་ནིང་ལོར་གོང་གི་ས་གནས་བོད་མིའི་ཚོང་པ་དེ་དག་གིས་གཉེར་བའི་ཚོང་ཁང་བཙན་ཤེད་ངང་སྒོ་བརྒྱབ་པ་མ་ཟད། ཉེས་མེད་འཛིན་བཟུང་བྱས་ནས་འདི་ལོའི་ཟླ་བ ༥ པའི་ནང་ཁྲིམས་ར་སོགས་ལུགས་མཐུན་ཅི་གང་མ་བརྒྱུད་པའི་སྒོ་ནས་མི་ལོ ༨ ཀྱི་ཁྲིམས་ཐག་ནན་མོ་བཅད་ཡོད་པ་རེད།
ཕྱི་ལོ་ ༢༠༡༣ ལོའི་ལོ་སྨད་ནས་བཟུང་། ཁམས་འབྲི་རུའི་ཁུལ་དུ་ངོ་རྒོལ་དང་དམ་དྲག་ཧ་ཅང་ཆེ་སྟབས། ལོ་གཉིས་ཙམ་རིང་སྐད་འཕྲིན་བེད་སྤྱོད་གཏོང་ས་མེད་ལ། ཁ་པར་སོགས་དམ་དྲག་ཤིན་ཏུ་ཆེ་རྐྱེན་གནས་ཚུལ་ཐད་ཀར་འབྱོར་རྒྱུར་ཧ་ཅང་ཁག་པོ་ཡིན་པ་རེད།།
