༢༠༡༥ ཟླ་ ༧ ཚེས་ ༣ རེས་གཟའ་པ་སངས།

༄༅།  །ཕྱི་ལོ་ ༢༠༡༥ ཟླ་ ༧ ཚེས་ ༡ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཨ་རིའི་ལྷོ་ཕྱོགས་ཀྱི་མངའ་སྡེ་ཊེཀ་ས་སིའི་ Texas ནང་གི་རྒྱལ་ས་ཌལ་ལ་སིར་ཆིབས་སྒྱུར་བསྐྱངས་འདུག དེ་ཡང་གོང་ཚེས་ཉིན་༸གོང་ས་མཆོག་བྷུ་ཤི་བསྟི་གནས་ཁང་གི་ (Bush Center) དཔེ་མཛོད་ཁང་དུ་༸ཞབས་སོར་འཁོད་སྐབས་བསྟི་གནས་ཁང་གི་འགྲོ་བ་མིའི་རང་དབང་སྲུང་སྐྱོབ་ཚན་པའི་འགན་འཛིན་ལྕམ་ཨེ་མན་ཌ་ཤི་ནེ་ཛར་ Amanda Shnetzer ལགས་ཀྱིས་ཕེབས་བསུའི་སྣེ་ལེན་གཟབ་རྒྱས་ཞུས།  དེ་རྗེས་ཨ་རིའི་སྲིད་འཛིན་ཟུར་པ་སྐུ་ཞབས་ཇོར་ཇི་ཌབ་ལུ་བྷུ་ཤི་ George W. Bush མཆོག་དང་ལྕམ་སྐུ་ལོ་ར་བྷུ་ཤི་མཆོག་རྣམ་གཉིས་ཀྱིས་༸གོང་ས་༸སྐྱབས་མགོན་ཆེན་པོ་མཆོག་བསྟི་གནས་ཁང་དེའི་དཔེ་མཛོད་ཁང་དུ་གདན་ཞུས་ཀྱིས་ཐུགས་ཞིབ་མཛད། སྲིད་འཛིན་ཟུར་པ་ཁོང་གིས་༸གོང་ས་མཆོག་གི་སྐུ་པར་རི་མོར་བཞེངས་ཡོད་པ་དེ་སྤྱན་བསྟར་ཞུས།  དེ་རྗེས་དཔེ་མཛོད་ཁང་དུ་རང་དབང་དང་འགོ་ཁྲིད་ཀྱི་ནུས་པ་སྐྱེས་སྲིང་གི་ཟབ་སྦྱོང་ནང་མཉམ་ཞུགས་བྱེད་བཞིན་པའི་སྦར་མའི་སློབ་ཕྲུག་ཁག་གཅིག་ལ་མཇལ་ཁ་དང་བཀའ་སློབ་སྩལ་དོན།

དེ་རིང་འདིར་ངོས་ཀྱི་གྲོགས་པོ་རྙིང་པ་དང་སླར་ཡང་མཇལ་འཕྲད་བྱུང་བ་མ་ཟད། འདིར་ཁོང་གི་བསྟི་གནས་ཁང་གསར་པ་འདིར་མང་གཙོ་དང་རང་དབང་གོང་སྤེལ་གཏོང་རྒྱུའི་ཐད་ལས་འཆར་དང་ཟབ་སྦྱོང་སོགས་གོ་སྒྲིག་གནང་བཞིན་པ་མཐོང་སྐབས་ངོས་རང་ཧ་ཅང་དགའ་པོ་བྱུང་། ཨ་རིའི་དམག་གི་སྟོབས་ཤུགས་ལ་ངོས་ཀྱིས་སྔགས་བརྗོད་ཞུ་མི་དགོས་ཀྱང་། མང་གཙོ་དང་རང་དབང་གི་ལྟ་གྲུབ་གཙིགས་ཆེར་འཛིན་ནས་གོང་སྤེལ་གཏོང་ཐབས་གནང་བཞིན་པ་དེར་སྔགས་བརྗོད་ཞུ་བཞིན་ཡོད།   འཛམ་གླིང་ནང་རང་དབང་གོང་སྤེལ་གཏོང་རྒྱུའི་འགན་གཙོ་བོ་དེ་ཨ་རིས་འཁྱེར་བཞིན་ཡོད། སྤྱིར་སྐུ་ཉིད་མཆོག་ད་ཆ་རྒས་ཡོལ་དུ་ཕེབས་ཟིན་ཡོད། འོན་ཀྱང་སྐུ་ཉིད་མཆོག་གིས་མུ་མཐུད་ནས་མང་གཙོ་དང་རང་དབང་གོང་སྤེལ་གཏོང་ཆེད་འབད་བརྩོན་གནང་བཞིན་པ་དེར་ངོས་རང་ཧ་ཅང་དགའ་པོ་བྱུང་། སྦར་མ་ཡང་བོད་དང་མཚུངས་པར་སྲོལ་རྒྱུན་ཐོག་ནང་པའི་རྒྱལ་ཁབ་གཅིག་ཆགས་ཡོད། ནང་ཆོས་དེ་ཡང་པཱ་ལི་དང་ལེགས་སྦྱར་གྱི་སྐད་ཡིག་གཉིས་ནས་དར་ཡོད། སྐད་ཡིག་དེ་གཉིས་ལས་པཱ་ལི་གཙོ་བོ་ཡིན། སངས་རྒྱས་བཅོམ་ལྡན་འདས་ཀྱིས་བདེན་བཞིའི་ཆོས་འཁོར་ཐོག་མ་པཱ་ལིའི་སྐད་ནང་གསུངས། བདག་མེད་ཀྱི་ལྟ་བ་སོགས་ལེགས་སྦྱར་གཞུང་ནས་གཙོ་བོ་གསུངས། འདུལ་བའི་ཉམས་བཞེས་ཀྱང་བོད་དང་གཅིག་མཚུངས་ཡིན།

སྤྱིར་ཐོབ་ཐང་རྩོད་རྒྱུར་ངེས་པར་དུ་ཤེས་ཡོན་དགོས། སྦར་མའི་གཞུང་དེ་གཞི་རྩའི་གཅིག་བསྡུས་དབང་འཛིན་པ་ཡིན་སྟབས། ཐེངས་འདིར་ཁྱེད་ཚོ་འདིར་སློབ་སྦྱོང་གི་གོ་སྐབས་ཆ་ཚང་བླངས་ནས་ཧུར་ཐག་བྱེད་དགོས་པ་ལས། འདིར་ཕྱི་དངོས་པོ་ཕྲ་ཕྲ་ཟིང་ཟིང་ཙམ་ལ་མགོ་འཁོར་ནས་སྡོད་མི་རུང་། མང་གཙོ་དང་རང་དབང་གི་ལྟ་གྲུབ་དེ་དག་ལ་ཞིབ་ཚགས་པོས་སློབ་སྦྱོང་གནང་གལ་ཆེ། སློབ་སྦྱོང་བྱས་ནས་དེང་རབས་ཀྱི་ལྟ་གྲུབ་དང་སྲོལ་རྒྱུན་གྱི་ལྟ་གྲུབ་གཉིས་ཀྱི་ཐོག་ནས་གོམ་པ་མདུན་སྤོས་བྱེད་ཐུབ་དགོས། ང་ཚོའི་འཐབ་རྩོད་ནི་མེ་མདའ་དང་བདེན་པའི་དབར་གྱི་འཐབ་རྩོད་རེད། འཕྲལ་དུ་མེ་མདའི་ནུས་པ་ཆེ་བ་ལྟ་བུར་མངོན་ཡང་། ཕུགས་སུ་དྲང་བདེན་གྱི་ནུས་པ་ཆེ་བ་ཡོང་རྒྱུ་ཡིན་པ་ངེས་ཡོད། དེར་བརྟེན་ཆོད་སེམས་བརྟན་པོ་དགོས། དབང་ཆ་ཡོད་མཁན་ཚོས་དྲག་ཤུགས་ཁོ་ནར་བསྐྱབས་བཅོལ་ནས་བསྡད་ཡོད། དེ་འདྲ་བྱས་ནས་ཁུངས་འཁྱོལ་ཐབས་མེད། སྔ་ཕྱི་མ་གཏོགས་དྲང་བདེན་ལ་རྒྱལ་ཁ་ཐོབ་རྒྱུ་ཡིན། དེར་བརྟེན་བོད་པའི་གཏམ་དཔེར་ལན་དགུ་ཆད་མཐུད། ཅེས་འབད་བརྩོན་མུ་མཐུད་བྱེད་དགོས། སྙིང་སྟོབས་ནམ་ཡང་ཞུམ་མི་རུང་། ཞེས་བཀའ་སློབ་སྩལ།

དེ་རྗེས་ཉིན་དགུང་ལྗགས་སྨིན་སྐབས་སྲིད་འཛིན་ཟུར་པ་མཆོག་དང་༸གོང་ས་མཆོག་གི་འཁྲུངས་ཚེས་གཅིག་པ་འཁེལ་ཡོད་ཀྱང་མགོན་པོ་གང་ཉིིད་མཆོག་འདི་ལོར་དགུང་གྲངས་ ༨༠ ཕེབས་པར་བརྟེན་འཛམ་གླིང་ཡུལ་གྲུ་གང་སར་༸སྐུའི་གྱ་སྟོན་སྲུང་བརྩི་ཞུ་བཞིན་པ་ལྟར་སྐབས་དེར་དབུ་ཁྲིད་རྣམ་གཉིས་ཀྱི་འཁྲུངས་སྐར་ཆེད་མངར་ཟས་འདེགས་འབུལ་ཞུས་པར་སྲིད་འཛིན་ཟུར་པ་བྷུ་ཤི་མཆོག་གིས་གསུང་དོན། དེ་རིང་འདིར་རྣམ་པ་ཚོ་ཚང་འཛོམས་གནང་ནས་འཁྲུངས་སྐར་མངར་ཟས་གོ་སྒྲིག་གནང་བར་ཐུགས་རྗེ་ཆེ་ཞུ་རྒྱུ་ཡིན། ཆབ་སྲིད་པ་འགའ་རེས་ཁ་ཞེ་གཉིས་མེད་བྱེད་ཀྱི་མེད། འོན་ཀྱང་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་གིས་ཁྱེད་ཀྱི་མིག་ལ་ཐད་ཀར་གཟིགས་ནས་ཞལ་ནས་གང་བཀའ་སྩལ་བ་དེར་གཡོ་ཟོལ་གང་ཡང་མེད་པར་ཕྱག་བསྟར་མཛད་མཁན་ཞིག་ཡིན། རྒྱ་མིས་ཁོང་ལ་དཀའ་སྡུག་ཇི་ཙམ་བཏང་ཡང་ཁོང་ནི་དུས་རྟག་ཏུ་ཐུགས་བདེ་ལྷོད་ངང་ཞུགས་བཞིན་ཡོད། དེ་ནི་ཁོང་གི་ཐུགས་བརྒྱུད་ལ་བྱམས་བརྩེའི་བསམ་པས་ཁེངས་ནས་ཡོད་པ་དེས་ཡིན། བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་ལ་མང་ཚོགས་མདུན་དུ་དངོས་སུ་རྒྱབ་སྐྱོར་ཞུ་མཁན་གྱི་ཨ་རིའི་སྲིད་འཛིན་ཐོག་མ་དེ་ངོས་རང་ཆགས་ཡོད། ཁོང་གིས་རང་དབང་དོན་དུ་ཐུགས་བརྩོན་མཛད་བཞིན་ཡོད། དེར་བརྟེན་སྐུ་ཉིད་མཆོག་དེ་རིང་འདིར་ཆིབས་སྒྱུར་བསྐྱངས་པ་དེས་ང་ཚོར་ཆེ་མཐོང་ཐུབ་པ་ཞིག་བྱུང་། ཞེས་གསུང་བཤད་གནང་ཡོད།

དེ་རྗེས་༸གོང་ས་མཆོག་གིས་བཀའ་སློབ་སྩལ་དོན། ངོས་ཀྱི་སྙིང་ཉེ་བའི་གྲོགས་པོ་སྐུ་ཞབས་བྷུ་ཤི་མཆོག་དང་ལྕམ་སྐུ་མཆོག ཐེངས་འདིར་ང་ཚོ་སླར་ཡང་འདུ་འཛོམས་བྱུང་བ་ནི་ངོས་ལ་དགའ་སྤྲོའི་མཇལ་འཛོམས་ཤིག་ཆགས་ཡོད། ངོས་རང་བོད་བྱང་ཤར་གྱི་ས་ཁུག་གཅིག་ཏུ་བསྐྱེས་ཤིང་སྐུ་ཉིད་མཆོག་འཛམ་གླིང་གི་ས་ཕྱོགས་གཞན་ཞིག་ཏུ་འཁྲུངས་ཡོད། འོན་ཀྱང་འཁྲུངས་པའི་ཟླ་ཚེས་གཅིག་པ་འཁེལ་ཡོད། ངོས་རང་ནང་པའི་ཡུལ་གྲུ་ཞིག་དང་སྐུ་ཉིད་མཆོག་ཡི་ཤུའུ་རྒྱལ་ཁབ་གཅིག་ནང་འཁྲུངས་ཡོད། འོན་ཀྱང་འགྲོ་བ་མི་ཞིག་ཡིན་པའི་ངོས་ནས་ངོས་གཉིས་གཅིག་པ་ཡིན། འདི་ཧ་ཅང་གལ་ཆེན་པོ་ཡིན། གང་ཡིན་བརྗོད་ན། དེང་སྐབས་འཛམ་གླིང་ནང་གི་རྙོག་གྲ་མང་ཆེ་བ་རིགས་རུས་དང་ཆོས་ལུགས་སོགས་མི་འདྲ་བའི་ཁྱད་པར་ལ་བརྟེན་ནས་ཡོང་བཞིན་ཡོད། དེ་ནི་གནད་དོན་གལ་ཆེ་ཤོས་གཉིས་པ་དེ་རེད། དང་པོ་དེ་ང་ཚོ་ཚང་མ་གཞི་རྩའི་ཆ་ནས་འགྲོ་བ་མི་རིགས་ཡིན།  ལུས་སེམས་དང་སེམས་ཚོར་སོགས་གང་གི་ཆ་ནས་ང་ཚོ་ཚང་མ་འགྲོ་བ་མི་རིགས་གཅིག་གྱུར་ཡིན། ཐོག་མར་མ་ལས་བསྐྱེས་སྟངས་དང་མཐར་འཆི་སྟངས་སོགས་གཅིག་མཚུངས་ཡིན། ཞེས་སོགས་ཀྱི་བཀའ་སློབ་སྩལ། དེ་རྗེས་དྲི་བ་ཁག་གཅིག་ལ་༸གོང་ས་མཆོག་གིས་བཀའ་ལན་སྩལ།

བསྟི་གནས་ཁང་ནས་ཆིབས་༸ཞལ་མ་འགྱུར་གོང་༸གོང་ས་མཆོག་གིས་ཨ་རིའི་གྲོས་ཚོགས་ཀྱི་འཐུས་མི་སྐུ་ཞབས་ཇོན་ར་ཌི་ཁི་ལིབ་ Congressman John Radcliffe མཆོག་དང་པི་ཊར་སེ་ཤན་ Congressman Peter Session མཆོག་གི་ནང་མི་ལྷན་རྒྱས་དང་མཇལ་འཕྲད་མཛད་ཡོད།།