༢༠༡༥ ཟླ་ ༧ ཚེས་ ༡༣ རེས་གཟའ་ཟླ་བ།
༄༅། །༸གོང་ས་༸སྐྱབས་མགོན་ཆེ
ན་པོ་མཆོག་ཨ་རིའི་ནིའུ་ཡོཀ་གནམ་ཐང་ནས་ཆིབས་ཞལ་བསྒྱུར་རྗེས་ཕྱི་ལོ་ ༢༠༡༥ ཟླ་ ༧ ཚེས་ ༡༢ སྔ་དྲོ་ཇར་མན་གྲོང་ཁྱེར་ཕེ་རེངྐ་ཕོཌ་གནམ་ཐང་དུ་༸ཞབས་སོར་བདེ་བར་འཁོད་མཚམས། རྒྱ་གར་གཞུང་ཚབ་ལས་ཁུངས་ཀྱི་སྐུ་ཚབ་འཐུས་མི་མཆོག་སོགས་ཀྱིས་ཕེབས་བསུའི་སྣེ་ལེན་གཟབ་རྒྱས་ཞུས། དེ་རྗེས་གནམ་ཐང་ནས་གྲོང་ཁྱེར་ཝེ་སེ་བྷེ་དེན་ནང་དུ་ཆིབས་སྒྱུ
ར་བསྐྱངས་ནས་བཞུགས་གནས་མགྲོན་ཁང་དུ་༸ཞབས་སོར་བདེ་བར་འཁོད་རྗེས་ཁྱུག་ཙམ་རིང་སྐུ་ངལ་གསོ་གནང་མཛད་རྗེས། དེ་སྔའི་ཇར་མན་གྱི་སྲིད་བློན་ཟུར་པ་སྐུ་ཞབས་རོ་ལནྜ་ཀོ་ཆི་ Prime Minister Roland Koch མཆོག་དང་ཁོང་གི་སྐུ་ཟླ་བཅས་དང་ལྷན་ཉིན་གུང་ལྗགས་སྨིན་ལྷན་བཞེས་མཛད།
དེ་རྗེས་གསར་འགོད་པར་མགོན་པོ་གང་ཉིད་མཆོག་གི་རླབས་ཆེན་གྱི་མཛད་ཁུར་གཙོ་བོ་གསུམ་གྱི་སྐོར་བཀའ་སློབ་སྩལ། སྐབས་དེར་ཚོགས་ཁང་གི་ཕྱི་ལ་དོལ་རྒྱལ་རྗེས་འབྲང་པ་ཚོས་སྐད་ཅོར་ཆེན་པོས་༸གོང་ས་མཆོག་ལ་སྐྱོན་འཛུགས་བྱེད་བཞིན་པ་དེར་དགོངས་ཚུལ་ཇི་ཡོད་བཅས་དྲི་བ་ཞུ་སྐབས་༸གོང་ས་མཆོག་གིས་བཀའ་ལན་སྩལ་དོན། ཁོ་པ་ཚོས་སྨྲ་བརྗོད་རང་དབང་ལོངས་སུ་སྤྱོད་བཞིན་པ་མཐོང་སྐབས་ངོས་རང་དགའ་ཚོར་སྐྱེ་བཞིན་འདུག ཁོ་པ་ཚོས་ཤོད་བཞིན་པའི་དམ་སྲི་འབྱུང་པོ་དེ་ལོ་ངོ་ ༤༠༠ མ་ཟིན་ཙམ་གྱི་རིང་གླེང་གཞི་ཅན་ཞིག་བྱས་ནས་གནས་ཡོད། ལྷག་པར་འདས་པའི་ལོ་ ༨༠ ལྷག་གི་རིང་དམ་སྲི་འདིས་ཆོས་ལུགས་འཐེན་འཁྱེར་ཚབས་ཆེ་བཟོས་ཡོད། དེར་བརྟེན་བརྟག་དཔྱད་ཞིབ་ཚགས་པོ་བྱེད་དགོས་པའི་གནད་དོན་ཞིག་ཆགས་ཡོད། ཅེས་བཀའ་ལན་སྩལ། གསར་འགོད་པ་དང་ལྷན་མཇལ་འཕྲད་ལེགས་གྲུབ་མཚམས་༸གོང་ས་མཆོག་སྟོན་འཁོར་དང་བཅས་གྲོང་ཁྱེར་དེའི་ཀུ་པག་ Wiesbaden Kurpark ས་ཁུལ་དུ་ཆིབས་སྒྱུར་བསྐྱངས་ནས་མི་གྲངས་ ༡༢༠༠༠ བརྒལ་བར་བཀའ་སློབ་སྩལ།
སྐབས་དེར་འཇར་མན་བོད་ཀྱི་གྲོགས་པོ་ཚོགས་པའི་ཚོགས་གཙོ་སྐུ་ཞབས་ཕེརེངྐ་ཨོ་ཐི་ Frank Auth ལགས་ཀྱིས་༸གོང་ས་མཆོག་ལ་ཕེབས་བསུ་དང་སྦྲགས་ངོ་སྤྲོད་ཀྱི་གསུང་བཤད་གནང་བ་མ་ཟད། ཝེ་སེ་བྷེ་དེན་གྲོང་སྡེའི་སྤྱི་ཁྱབ་པ་མཆོག་དང་། སྐུ་ཞབས་རོ་ལནྜ་ཀོ་ཆི་ Roland Koch མཆོག ཇར་མན་གྲོས་ཚོགས་ཀྱི་ཚོགས་གཞོན་དང་ཇར་མན་ལྗང་ཁུ་ཚོགས་པའི་གྲོས་ཚོགས་འཐུས་མི་ལྕམ་སྐུ་ཀ་ལོའི་ཌི་ཡ་རོ་ཏི་ Claudia Roth མཆོག དེ་བཞིན་གྲོང་ཁྱེར་གྱི་མང་ཚོགས་རྣམས་དང་ལྷག་པར་མཛད་སྒོའི་སྐུ་མགྲོན་གཙོ་བོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཕེབས་བསུ་གཟབ་རྒྱས་ཞུས།
ཇར་མན་གྲོས་ཚོགས་ཀྱི་ཚོགས་གཙོ་ལྕམ་སྐུ་ཀ་ལོའི་ཌི་ཡ་རོ་ཏི་མཆོག
དེ་ཡང་མཛད་སྒོའི་ཐོག་མར་བོད་ཀྱི་བུད་མེད་གཞས་མ་བདེ་ཆེན་ལགས་ཀྱིས་བོད་གཞས་གཟིགས་འབུལ་ཞུས། དེ་ནས་གྲོང་སྡེའི་སྤྱི་ཁྱབ་པ་མཆོག་གིས་ཐེངས་འདིར་བོད་ཀྱི་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་སླར་ཡང་ཝེ་སི་བྷེ་དེན་གྲོང་ཁྱེར་ནང་ཆིབས་སྒྱུར་བསྐྱངས་པ་ནི་མང་ཚོགས་རྣམས་ཀྱི་བསོད་ནམས་ཀྱི་བགོ་སྐལ་ཡིན་སྟབས་མི་མང་ཚང་མས་དགའ་སྤོབས་བྱ་ཡུལ་ཞིག་ཡིན་ཚུལ་སོགས་ཀྱི་གསུང་བཤད་གནང། དེ་རྗེས་ཇར་མན་ལྗང་ཁུ་ཚོགས་པའི་གྲོས་ཚོགས་འཐུས་མི་ལྕམ་སྐུ་ཀ་ལའོ་ཌི་ཡ་རོ་ཏི་ Claudia Roth མཆོག་གིས་གསུང་དོན། དེ་རིང་མིག་དཔེར་འོས་པའི་སྐྱེ་བུ་ཞིག་ང་ཚོའི་ཁྲོད་ཕེབས་ཐུབ་པར་ཧ་ཅང་དགའ་པོ་བྱུང་། དེར་བརྟེན་སྐུ་ཉིད་མཆོག་གིས་སྐུ་ངལ་འཛེམས་མེད་ཐོག་ད་བར་རང་དབང་དོན་དུ་ཐུགས་བརྩོན་མཛད་པའི་མཛད་རྗེས་ལ་ང་ཚོས་སྙིང་ཐག་པ་ནས་བཀའ་དྲིན་ཆེ་ཞུ་རྒྱུ་མ་ཟད། དམག་འཁྲུག་མེད་པའི་འཛམ་གླིང་ཞི་བདེ་ལྡན་པ་ཞིག་སྐྲུན་རྒྱུའི་མཛད་རྗེས་ལའང་སྙིང་ཐག་པ་ནས་བཀའ་དྲིན་རྗེས་དྲན་ཞུ་རྒྱུ་ཡིན། སྐུ་ཉིད་མཆོག་གིས་ང་ཚོའི་སེམས་ལ་རེ་བའི་འོད་སྣང་གསར་པ་ཞིག་སྦྱིན་སོང་། ང་ཚོས་སྐུ་ཉིད་མཆོག་ལ་རྒྱབ་སྐྱོར་ཞུ་རྒྱུ་མ་ཟད། སྐུ་ཚེ་ཡུན་རིང་བརྟན་པའི་རེ་འདུན་ཞུ་རྒྱུ་ཡིན། ཞེས་གསུངས། གཞན་ཡང་སྐབས་དེར་སྐུ་ཞབས་རོ་ལནྜ་ཀོ་ཆི་མཆོག་གིས་གསུང་དོན། ང་ཚོས་སྐུ་ཉིད་མཆོག་དགུང་གྲངས་ ༨༠ ཕེབས་པའི་སྐུའི་འཁྲུངས་སྐར་ཉིན་གྱི་ལེགས་སྐྱེས་ཕྱག་རྟགས་ཡག་ཤོས་གང་ཡིན་བརྗོད་ན། བོད་དོན་ཆེད་མུ་མཐུད་ནས་གདུང་སེམས་མཉམ་སྐྱེའི་རྒྱབ་སྐྱོར་ཞུ་རྒྱུའི་ཆོད་སེམས་སླར་གསོ་བྱ་རྒྱུ་དེ་ཡིན། ང་ཚོས་བོད་ནང་གི་གནས་སྟངས་ལ་འགྱུར་བ་ཇི་ལྟར་འགྲོ་བཞིན་པ་དེར་དོ་སྣང་ཆེན་པོས་ལྟ་བཞིན་ཡོད། སྐུ་ཉིད་མཆོག་ལ་ང་ཚོས་དུས་ནམ་ཡིན་ཡང་དགའ་སྤྲོའི་ཐོག་ནས་ཕེབས་བསུ་ཞུ་རྒྱུ་ཡིན། སྤྱིར་དེང་རྒྱལ་ཁབ་མང་པོས་རྒྱ་ནག་དང་ལྷན་གྲོགས་པོ་བཟོ་འདོད་ཡོད་པ་ལྟར་ང་ཚོ་ལའང་ཡོད།
འོན་ཀྱང་ང་ཚོས་བོད་ནང་དུ་བོད་མིའི་འགྲོ་བ་མིའི་ཐོབ་ཐང་ལ་སྲུང་སྐྱོབ་དགོས་པའི་རྒྱབ་སྐྱོར་ཞུ་བཞིན་ཡོད། ཅེས་སོགས་ཀྱི་གསུང་བཤད་གྲུབ་བསྟུན་༸གོང་ས་མཆོག་གིས་བཀའ་སློབ་སྩལ་དོན། ཧེ་སེན་མངའ་སྡེའི་གྲོང་ཁྱེར་ཝེ་སེ་བྷེ
་དེན་ལ་ངོས་རང་ཧ་ཅང་སེམས་ཐག་ཉེ་པོ་ཡོད། གང་ཡིན་བརྗོད་ན་ཁྱེད་རྣམ་པས་ད་བར་བོད་མི་དང་བོད་དོན་ཆེད་ལྷག་བསམ་ཟོལ་མེད་ཀྱི་རྒྱབ་སྐྱོར་ཤུགས་ཆེ་གནང་དང་གནང་མུས་ཡིན། དེར་བརྟེན་ཧ་ཅང་བཀའ་དྲིན་ཆེན་པོ་ཡིན། ངོས་ཀྱིས་ཁྱེད་རྣམ་པ་ཚང་མར་བཀའ་དྲིན་ཆེ་ཞུ་རྒྱུ་ཡིན། ལྷག་པར་དེ་རིང་དང་བླངས་ཞབས་ཞུ་བ་རྣམས་ལའང་བཀའ་དྲིན་ཆེ་ཞུ་རྒྱུ་ཡིན། ལྕམ་སྐུ་ཀ་ལོའི་ཌི་ཡ་རོ་ཏི་མཆོག་དང་སྐུ་ཞབས་རོ་ལནྜ་ཀོ་ཆི་མཆོག་རྣམ་གཉིས་ངོས་ཀྱི་ངོ་ཤེས་གྲོགས་པོ་རྙིང་པ་དང་གྲོགས་པོ་བློས་ཐུབ་ཡིན། ངོས་རང་མ་འཆི་བར་དུ་འབྲེལ་བ་དེ་མུར་གནས་རྒྱུ་རེད། འོན་ཀྱང་སུ་སྔོན་ལ་འཆི་མིན་ངོས་ཀྱིས་མི་ཤེས། ཞེས་ཞལ་ཤོབ་མཛད། དེ་རྗེས་༸གོང་ས་མཆོག་གིས་འགྲོ་བ་མིའི་ནང་གི་བཟང་པོའི་རིང་ཐང་བྱམས་བརྩེ་དང་མཛའ་བརྩེའི་འདུ་ཤེས། འདོད་ཆུང་ཆོག་ཤེས། བཟོད་སྲན་སོགས་དང་། ཆོས་ལུགས་མཐུན་སྒྲིལ། དེ་བཞིན་བོད་ཀྱི་ཁོར་ཡུག་དང་རིག་གཞུང་སྲུང་སྐྱོབ་སྐོར་བཀའ་སློབ་སྩལ་རྗེས་རྒྱ་ནག་ནས་རྒྱ་རིགས་ཤིག་གིས་ཨིན་སྐད་ཐོག ༸གོང་ས་མཆོག་མཇལ་ཆེད་དུ་ཆེད་མངགས་རྒྱ་ནག་ནས་བཅར་བ་དང་༸གོང་ས་མཆོག་གི་སྐུ་དྲུང་ནས་མི་སེམས་པ་བཟང་པོ་ཞིག་ཇི་འདྲ་བཟོ་དགོས་པའི་ལམ་སྟོན་ཞུ་ཆེད་བཅར་བ་ཡིན་ཚུལ་དང་། ༸གོང་ས་མཆོག་རྒྱ་ནག་ཏུ་ནམ་ཆིབས་སྒྱུར་བསྐྱངས་འཆར་ཡོད་མེད་སྐོར་གྱི་དྲི་བར་༸གོང་ས་མཆོག་གིས་བཀའ་ལན་སྩལ་དོན། ངོས་རང་རྒྱ་ནག་ཏུ་ནམ་འགྲོ་ཐུབ་མིན་དེ་རྒྱ་ནག་འགོ་ཁྲིད་ཚོར་དྲིས་ན་འགྲིག ཁོ་པ་ཚོས་བཟང་ཕྱོགས་ཀྱི་རྣམ་འགྱུར་ཞིག་ནམ་བསྟན་པ་ཡིན་ན། ངོས་རང་རྒྱ་ནག་ཏུ་འགྲོ་རྒྱུའི་གྲ་སྒྲིག་ཡོད། ཅེས་བཀའ་ལན་སྩལ།།
