༢༠༡༥ ཟླ་ ༧ ཚེས་ ༧ རེས་གཟའ་མིག་དམར།

༄༅། །ཕྱི་ལོ་ ༢༠༡༥ ཟླ་ ༧ ཚེས་ ༤ ཉིན་སྔ་དྲོ་༸གོང་ས་༸སྐྱབས་མགོན་ཆེན་པོ་མཆོག་གི་ངོ་ཤེས་མྱོང་ཚོར་སྐོར་གྱི་ཚན་རིག་པ་གྲགས་ཅན་པོལ་ཨེག་མན་(Paul Ekman)ལགས་ལ་ཨ་རིའི་མངའ་སྡེ་ཀེ་ལི་ཕོར་ནི་ཡའི་གྲོང་ཁྱེར་ཨ་ན་ཧེམ་ཞེས་པར་མཇལ་འཕྲད་ཀྱིས་སེམས་ཁམས་དང་འབྲེལ་བའི་མྱོང་ཚོར་རིགས་ཆེ་བ་ཁག་ལྔའི་ངོ་བོ་དང་སྐྱེ་ཚུལ། རྒྱུ་རྐྱེན་སོགས་དང་། དེ་དག་ལ་གདོང་ལེན་བྱེད་ཚུལ་འགྲེལ་བཤད་དང་གཟིགས་འབུལ་གྱིས་བསམ་བློའི་ས་ཁྲའི་སྐོར་བགྲོ་གླེང་མཛད་ཡོད་པ་རེད།

དེ་ཡང་ཐོག་མར་ཚན་རིག་པ་ཁོང་གི་ཆུང་མ་དང་བུ་མོ་ཨེ་ཝ་ Eve བཅས་ཀྱིས་༸གོང་ས་མཆོག་མཇལ་ཁ་ཞུས་རྗེས་ཚན་རིག་པ་ཁོང་གིས་དེ་སྔ་བསམ་བློའི་ས་ཁྲ་ཞིག་བཟོ་དགོས་པ་༸གོང་ས་མཆོག་གི་བཀའ་སློབ་ལམ་སྟོན་ལྟར་པོལ་གྱིས་ལས་གཞི་དེའི་སྐོར་སྙན་སྒྲོན་གྱིས་མིའི་སེམས་ཁམས་དང་འབྲེལ་བའི་མྱོང་ཚོར་གྱི་རིགས་ཆེ་བ་ཁག་ལྔའི་ངོ་བོ་དང་སྐྱེ་ཚུལ། རྒྱུ་རྐྱེན་སོགས་གང་གིས་དབང་གིས་སྐྱེས་པ་དང་དེ་དག་ལ་གདོང་ལེན་བྱེད་ཚུལ་སོགས་འགྲེལ་བཤད་རེའུ་མིག་གི་ལམ་ནས་༧གོང་ས་མཆོག་ལ་གཟིགས་འབུལ་ཞིབ་མོ་ཞུས། སེམས་ཀྱི་ཚོར་བ་འཇིགས་སྣང་དང་ཁོང་ཁྲོ་སོགས་སོ་སོའི་ས་ཁྲ་ལྟ་བུ་དྲ་མིག་ཏུ་བཀོད་དེ་གློག་ཀླད་ནང་ཤར་དུ་འཇུག་པ་རྣམས་ལས་གང་ཡང་རུང་བ་གཅིག་ལ་ཙི་ཙིས་གཏུགས་སྐབས་ཚོར་བ་དེ་དང་དེའི་ནང་གསེས་ཀྱི་དབྱེ་བ་མི་འདྲ་གང་དང་གང་ཡོད་པ་གློག་ཀླད་ཀྱི་ངོས་སུ་ཤར་བ་དེ་དག་གཡོན་རྩིས་ཀྱིས་རིམ་བཞིན་ངར་ཤུགས་ཆེ་རུ་འགྲོ་བའི་རིམ་པ་རྣམས་སྤྱན་བསྟར་འགྲེལ་བརྗོད་དང་།

དེང་སྐབས་འཛམ་གླིང་ཁྱོན་ལ་པོལ་ལགས་ཁོ་རང་གི་དུས་སྐབས་དང་མི་འདྲ་བར་མྱོང་ཚོར་ཐོག་ཉམས་ཞིབ་པ་གྲགས་ཅན་ ༢༥༦ བརྒལ་བ་ཡོད་སྐོར་༧སྙན་གསན་འབྲེལ་མྱོང་ཚོར་ཁག་ལྔ་སྟེ། སེམས་སྐྱོ་སྣང་དང། ཁོང་ཁྲོ། ཞེད་སྣང། ཞེ་ལོག། དགའ་སྣང་བཅས་ལ་ཆེད་དམིགས་ཀྱི་རེའུ་མིག་མཛུབ་རིས་ཀྱིས་ཁྲིད་སྟོན་བྱ་ཕྱོགས་ཐད་གློག་ཀླད་ཀྱི་གཉན་ཆས་བཟོ་མཁན་པ་ཨེ་རིག་ལགས་ནས་ཙི་ཙིས་གནོན་བཞིན་དུ་པོལ་གྱི་བུ་མོ་འབུམ་རམས་པ་ཨིབ་ཨེག་མན་ལགས་ནས་འགྲེལ་བཤད་ཞུ་བཞིན་༧གོང་ས་མཆོག་ལ་སྤྱན་འབུལ་ཞུས་པ་དང་། 
༧གོང་ས་མཆོག་གིས་ཁོང་ཁྲོ་ལྟ་བུ་གཅིག་གི་རྒྱུ་ཡིད་མི་བདེ་བ་བྱུང་ཟིན་ཏེ་ཁོང་ཁྲོ་སྐྱེ་ལ་ཉེ་བའི་སྐབས་ལའང་གང་ཟག་སོ་སོའི་རྣམ་དཔྱོད་ཀྱི་ཁྱད་པར་དབང་གིས་འགོག་ཐུབ་མི་ཐུབ་ཡོད་པའི་སྐོར་བཀའ་གནང་བ་དང་། པོལ་དང་ཨིབ་ནས་ཀྱང་ཁོང་ཁྲོ་མཐའ་གཅིག་ཏུ་ཉེས་ཆར་མི་བརྩིས་བར་གནས་སྐབས་འགར་ཕན་ཐོགས་ཅན་དུ་འགྱུར་སྐོར་གསུང་། ༧གོང་མཆོག་གིས་ཀུན་སློང་དབང་གིས་བཟང་ངན་དུ་འགྲོ་བ་ཡོད་ཅེས་བཀའ་གནང་།

ཚན་རིག་པ་ཕ་བུ་གཉིས་ཀྱིས་ཁོང་ཁྲོ་སྐྱེས་རྗེས་སེམས་ཞི་བར་ཇི་ལྟར་སྒྱུར་ཚུལ་ཞིག་ཤེས་དཀའ་ཚུལ་ཞུས་སྐབས་༧གོང་ས་མཆོག་གིས་བཀའ་ལན་དུ། འགལ་རྐྱེན་འཕྲད་ཀྱང་དེའི་གཞན་དབང་དུ་མི་གཏོང་བ་བྱེད་རྒྱུ་དེས་སེམས་ཀྱི་ཞི་བདེ་སྐྱོང་ཐུབ་ཚུལ་གསུངས། ༧གོང་ས་མཆོག་གིས་ཚན་རིག་པ་རྣམས་ཀྱིས་བརྟག་དཔྱད་ལམ་ནས་བདེན་དོན་ར་མ་འཕྲོད་བར་དུ་ཡིད་ཆེས་མ་གནང་བ་དེར་རྗེས་སུ་ཡི་རངས་ཞུས་ཤིང་། འགྲོ་བ་ཀུན་བདེ་བ་འདོད་ལ་སྡུག་བསྔལ་མི་འདོད་པ་གཅིག་མཚུངས་ཡིན་ཡང་ད་ཡོད་དེང་རབས་ཀྱི་ཤེས་ཡོན་ལམ་ལུགས་འོག་ནས་འཚར་ལོངས་བྱུང་བའི་མི་མང་ཆེ་བས་བདེ་བ་ཕྱིའི་དངོས་པོའི་སྟེང་ནས་འཚོལ་རྒྱུ་ལས་ནང་སེམས་ཀྱི་སྟེང་ནས་འཚོལ་མི་ཤེས་ལ། བདེ་བའི་རྒྱུ་གཙོ་བོ་ནི་བྱམས་བརྩེ་ཡིན་པས་འཛམ་གླིང་ཀུན་གྱིས་དེ་ངོ་འཕྲོད་དགོས་གལ་དང་དེ་ལྟར་ཀུན་ལ་ཁྱབ་སྤེལ་གནང་དགོས་རྒྱུ་བཅས་བཀའ་སློབ་སྩལ།

པོལ་གྱིས་༧གོང་ས་མཆོག་གིས་སེམས་ཀྱི་ས་ཁྲའི་དགོངས་འཆར་དེ་གང་ལ་བརྟེན་ནས་རྙེད་བྱུང་ངམ་ཞེས་གསར་འགོད་པ་ཞིག་གིས་བཀོད་པའི་དྲི་བ་དེ་ཞུས་པར་བཀའ་ལན་དུ། ང་ཚོ་ས་ཆ་གཅིག་ནས་གཅིག་ཏུ་འགྲོ་སྐབས་ལམ་སྟོན་ས་ཁྲ་ཞིག་དགོས་ལ་དེ་ཡོད་ཚེ་ལམ་རྒྱུས་ཡོད་པ་ཆགས་ནས་འགྲོ་ཐུབ་པ་བཟོ་དགོས་པ་བཞིན། སེམས་ཀྱི་ས་ཁྲ་ཞིག་ཤེས་ན་སེམས་ལེགས་ཉེས་ཀྱི་རྣམ་གཞག་ཅིག་ཤེས་ཏེ་ཉེས་པའི་ཆར་གཉེན་པོ་བསྟེན་སྟངས་རྒྱུས་ཡོད་ཐོག་ནས་ཁ་གཏད་གཅོག་སྟངས་ཤེས་པའི་ཁེ་ཕན་ཡོད་པ་དང་། དེ་ལྟར་ཤེས་ཡོན་གྱི་ལམ་ནས་བྱིས་པ་ཆུང་ཆུང་ཡན་ཆོད་ལའང་ཕན་པ་དང་། གཞན་ཡང་དེང་སྐབས་མི་གསོད་ཁྲག་སྦྱོར་དར་བའི་སྐབས་འདིར་ང་ཚོས་དེ་དག་ཇི་མི་སྙམ་པར་བཏང་སྙོམས་སུ་འཇོག་མི་རིགས་པ་དང་། དེའི་ཐད་བསམ་བློའི་ས་ཁྲའི་ཤེས་ཡོན་སྤེལ་བའི་ཐོག་ནས་ལག་ལེན་བསྟར་དགོས་ཞེས་དང་། དེ་ཡང་དེང་རབས་འཕྲུལ་རིགས་བེད་སྤྱད་དེ་ཤེས་ཡོན་གྱི་ལམ་ནས་སློབ་གསོ་སྤེལ་རྒྱུ་དུས་ལ་བབས་ཡོད་ཅེས་བཀའ་གནང་།

ད་ཐེངས་པོལ་དང་ཨིབ། ཨེ་རིག་བཅས་ཀྱིས་སྤྱན་སྒྲོན་ཞུས་པ་དེ་བཞིན་མི་རྒན་པར་དམིགས་པ་དང་བྱིས་པ་ཆུང་ངུར་དམིགས་པ་མིན་ཅིང་། བྱིས་པར་དམིགས་པའི་རྩེད་རིགས་མཉེན་ཆས་འདི་འདྲ་བཟོ་རྒྱུར་མཁས་དབང་གཞན་གྱི་གནང་རྒྱུ་ཡང་། དེར་པོལ་ནས་སློབ་སྟོན་པ་ཞུ་ཐུབ་ཅེས་ཞུས། ༧གོང་ས་མཆོག་གིས་རྩེད་རིགས་མཉེན་ཆས་འདི་དག་ཐོག་ནས་གསན་གཟིགས་གནང་བར་ཐུགས་དགྱེས་ཚོར་ཆེན་པོས་ཐུགས་རྗེས་ཆེ་ཞུས་པ་དང་ཆབས་ཅིག་ལས་འཆར་འདིའི་ཐོག་ད་བར་ཕྱག་དངུལ་གསོལ་སྩལ་གནང་མུས་དང་ད་དུང་མུ་མཐུད་གནང་རྒྱུའི་ཞལ་བཞེས་བཀྲིན་བསྐྱངས་པ་དང་། གཞུང་ཁག་གིས་ཀྱང་ཤེས་ཡོན་གྱི་ཐབས་ལམ་ལས་འཆར་འདི་འདྲ་བ་རྣམས་ཀྱིས་ཐད་འགྲོ་གྲོན་རོགས་ཕན་ངེས་པར་གནང་གལ་རེད་ཅེས་ཀྱང་བཀའ་སྩལ། ཁོང་རྣམས་ཀྱིས་ཞུས་དོན་ལ་༧གོང་ས་མཆོག་འདི་ལོའི་ཕྱི་ཟླ་ ༡༠ ནང་སླར་ཨ་རིར་ཕེབས་སྐབས་རྩེད་མོའི་མཉེན་ཆས་ཀྱི་མྱོང་ཚོར་ས་ཁྲའི་ལས་འཆར་འདི་བཞིན་མཇུག་སྒྲིལ་གྱིས་མཐའ་མའི་གྲུབ་འབྲས་སྤྱན་སྒྲོན་ཞུས་ཏེ། དེ་རྗེས་ཟླ་གཅིག་ཙམ་གྱི་རྗེས་ཡོངས་ཁྱབ་རིན་མེད་འགྲེམས་སྤེལ་གནང་འཆར་བཅས་སྙན་འབུལ་ཞུས།

བགྲོ་གླེང་ལེགས་གྲུབ་རྗེས་༸གོང་ས་མཆོག་གིས་ཉིན་གུང་ལྗགས་སྨིན་ལྷན་རྒྱས་མཛད་རྗེས་ཉེ་འགྲམ་གྱི་གྲོང་གསེབ་ས་ཁུལ་རན་ཆོ་ལོ་སི་ལོ་མ་སི་ Rancho Los Lomas ཞེས་པ་དེར་ཆིབས་སྒྱུར་བསྐྱངས། མགྲོན་འབོད་ཞུ་མཁན་པིཀ་མ་ཡིན་ཌི་ Peak Mind project t ལྷན་ཁང་ཞེས་པ་དེ་ཡིན་འདུག སྐབས་དེར་༸གོང་ས་མཆོག་གིས་ཚོགས་བཅར་བ་མི་གྲངས་ ༤༠༠ བརྒལ་བར་སྒོམ་གྱི་སྐོར་བཀའ་སློབ་སྩལ། དེ་ཡང་ཐོག་མར་ཨ་རིའི་གློག་བརྙན་འཁྲབ་སྟོན་པ་དང་སྤྱི་ཚོགས་ཞབས་ཞུ་བ་གྲགས་ཅན་སྐུ་ཞབས་ཕོ་རེ་སི་ཊི་ཝི་ཊེ་ཀར་ Forest Whitaker ལགས་ཀྱིས་༸གོང་ས་མཆོག་ངོ་སྤྲོད་གནང་བ་དང་སྦྲགས། སྐུ་ཉིད་མཆོག་གི་སྐུའི་འཁྲུངས་སྐར་ལ་འཚམས་འདྲི་ཞུ། ཞེས་མང་ཚོགས་རྣམས་ཀྱིས་སྐུ་ཉིད་འཁྲུངས་སྐར་ལ་བཀྲ་ཤིས་བདེ་ལེགས་ཞེས་སྐུའི་འཁྲུངས་སྐར་གྱི་འཚམས་འདྲིའི་གླུ་གཞས་མགྲིན་གཅིག་ཏུ་དབྱངས་སུ་གྱེར།་བ་མ་ཟད ། མངར་ཟས་འདེགས་འབུལ་ཞུས།

དེ་ནས་སྐུ་ཞབས་ཕོ་རེ་སི་ཊི་ཝི་ཊེ་ཀར་ལགས་ཀྱིས་༸གོང་ས་མཆོག་གི་འགྲོ་བ་མི་རིགས་གཅིག་འགྱུར་གྱི་འདུ་ཤེས་གོང་མཐོར་གཏོང་གནང་མཛད་པའི་མཛད་རྗེས་ལ་བསྔགས་བརྗོད་ཞུས་པ་དང་སྦྲགས། ལྷོ་ཨ་ཕི་རི་ཁའི་རང་དབང་རྩོད་ལེན་པ་གྲགས་ཅན་སྐུ་ཞབས་ནེལ་སན་མན་ཌེ་ལ་ Nelson Mandela མཆོག་དང་ཡེ་ཤུའི་བླ་ཆེན་ཨ་མ་ཏེ་རེ་ས་ Mother Teresa མཆོག དེ་བཞིན་ཨ་རིའི་མི་རིགས་ནག་པོའི་སྤྱི་མང་ཐོབ་ཐང་རྩོད་ལེན་པ་མར་ཊིན་ལུ་ཐར་ཀིངྒ་ཇེ་ཨར་ Martin Luther King Jr སོགས་དང་༸གོང་ས་མཆོག་མཚུངས་པ་ཞིག་ལ་ངོས་འཛིན་ཞུས་ནས་ཆེ་བསྟོད་རྒྱ་ཆེ་ཞུས། དེ་རྗེས་མགོན་པོ་གང་ཉིད་མཆོག་གིས་སྒོམ་གྱི་སྐོར་བཀའ་སློབ་སྩལ།།