༢༠༡༥ ཟླ་ ༧ ཚེས་ ༩ རེས་གཟའ་ཕུར་བུ།
༄༅། །བརྒྱུད་ལམ་ཁག་གི་ནང་གནས་ཚུལ་ཐོན་གསལ་ལྟར་ན། ཕྱི་ལོ་ ༢༠༡༥ ཟླ་ ༧ ཚེས་ ༨ ཉིན་ཨ་རིའི་གྲོས་ཚོགས་འོག་མའི་ནང་ཆབ་སྲིད་ཚོགས་པ་གཉིས་ཀས་མ་གྲོས་བསམ་པ་གཅིག་མཐུན་གྱིས་རྒྱ་ནག་གཞུང་ལ་བོད་ནང་གི་བོད་མི་ཚོའི་འགྲོ་བ་མིའི་ཐོབ་ཐང་གི་གནས་སྟངས་ཡར་རྒྱས་གཏོང་དགོས་པའི་རེ་འདུན་ཤུགས་ཆེ་བཏོན་འདུག རེ་འདུན་ལྟར་ན། སྔོན་འགྲོའི་ཆ་རྐྱེན་གང་ཡང་མེད་པར་དོན་སྙིང་ལྡན་པའི་བོད་རྒྱ་འབྲེལ་མོལ་བསྐྱར་མཐུད་གནང་དགོས་པ་མ་ཟད། འབྲེལ་མོལ་སྐབས་བོད་མི་ཚོའི་གནད་དོན་ཐོག་ཆབ་སྲིད་ཀྱི་ལངས་ཕྱོགས་ཇི་འདྲ་ཞིག་ལག་བསྟར་བྱ་རྒྱུ་ཡིན་པའི་ཡིག་ཆ་ཁ་གསལ་གཏན་འབེབས་འོག་ནས་བོད་མིའི་དཀའ་ངལ་སེལ་ཐབས་དགོས་པ་གསལ་བཏོན་གནང་འདུག སྐབས་དེར་ཆབ་སྲིད་ཚོགས་པ་གཉིས་ཀའི་གྲོས་ཚོགས་འཐུས་མི་རྣམས་ཚོགས་གཙོའི་མདུན་དུ་བཅར་ནས་༸གོང་ས་༸སྐྱབས་མགོན་ཆེན་པོ་མཆོག་གིས་འཛམ་གླིང་སྐྱེ་འགྲོ་ཀུན་གྱི་བདེ་ཐབས་སླད་ཐུགས་བརྩོན་མཛད་པའི་མཛད་རྗེས་ལ་ཡི་རང་སྔགས་བརྗོད་ཞུས་པ་དང་སྦྲགས།
མགོན་པོ་གང་ཉིད་མཆོག་དགུང་གྲངས་ ༨༠ ཕེབས་པའི་༸སྐུའི་གྱ་སྟོན་ལ་མཛའ་བརྩེའི་འཚམས་འདྲིའི་བཀྲ་ཤིས་བདེ་ལེགས་ཞུས་འདུག དེ་ཡང་སྐབས་དེར་ཨ་རིའི་གྲོས་ཚོགས་ཀྱི་གྲངས་ཉུང་མི་རིགས་སྲུང་སྐྱོབ་ཚན་པའི་འགན་འཛིན་མང་གཙོ་ཚོགས་པའི་དབུ་ཁྲིད་ལྕམ་སྐུ་ནེན་སི་པི་ལོ་སི་ Nancy Pelosi མཆོག་གིས་གསུང་དོན། མི་གྲངས་ས་ཡ་མང་པོས་བསྔགས་བརྗོད་དང་ཆེ་བསྟོད་ཞུ་ཡུལ་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་ནི་བྱམས་བརྩེ་དང་རིག་པའི་འབྱུང་གནས་ཤིག་ཡིན་པ་མ་ཟད། གཞོན་སྐྱེས་རྣམས་ལ་འབྱུང་འགྱུར་སྤྱི་ཚོགས་ཀྱི་གནས་སྟངས་ཇེ་བཟང་དུ་གཏོང་རྒྱུའི་མིག་དཔེ་ཞིག་ཆགས་ཡོད། བོད་ཀྱི་གནད་དོན་ལ་རྒྱབ་སྐྱོར་བྱ་རྒྱུ་འདི་འཛམ་གླིང་མི་མང་གི་རྣམ་དཔྱོད་ཇི་འདྲ་ཡོད་མེད་ཚོད་ལྟ་བྱས་པ་ཞིག་ཆགས་ཡོད། གལ་ཏེ་རང་དབང་ལ་དགའ་བའི་མི་མང་ཚོས་བོད་ནང་དྲག་གནོན་གྱི་སྲིད་བྱུས་ལག་བསྟར་བྱེད་བཞིན་པ་དེར་ངོ་རྒོལ་མ་བྱས་ཚེ་འཛམ་གླིང་ས་ཕྱོགས་གཞན་གང་དུའང་དྲག་གནོན་གྱི་བྱ་སྤྱོད་སྤེལ་བ་དེ་དག་ལ་ངོ་རྒོལ་བྱ་རྒྱུའི་བཟང་སྤྱོད་ཀྱི་ཐོབ་ཐང་བརླགས་པ་རེད། ཅེས་གསུངས།
གཞན་ཡང་སྐབས་དེར་གྲོས་ཚོགས་འཐུས་མི་ཁག་གཅིག་གིས་རྒྱ་ནག་གཞུང་ལ་བོད་མིའི་ཆོས་དང་རིག་གཞུང་ལ་བརྩི་བཀུར་ཞུ་དགོས་པ་དང་། བོད་མི་ཆབ་སྲིད་བཙོན་པ་ཡོངས་རྫོགས་གློད་བཀྲོལ་གཏོང་དགོས་པའི་རེ་འདུན་ཤུགས་ཆེ་བཏོན་འདུག གཞན་ཡང་སྐབས་དེར་མི་སེར་རྒྱལ་ཁབ་ཀྱི་ཆབ་སྲིད་ཚོགས་པའི་ Republican Congressman ཚོགས་མི་སྐུ་ཞབས་དཱ་ན་རོ་ར་བྷེ་ཆར་ Dana Rohrabacher ལགས་ཀྱིས་ད་ཆ་ཨ་རིའི་གཞུང་གིས་མང་གཙོ་དང་རང་དབང་ཆེད་འཐབ་རྩོད་བྱེད་བཞིན་པའི་མི་མང་རྣམས་ལ་རྒྱབ་སྐྱོར་གནང་རྒྱུའི་དུས་ལ་བབ་ཡོད་སྐོར་གསུང་དོན། ང་ཚོས་མང་གཙོ་དང་རང་དབང་ལ་རྒྱབ་སྐྱོར་བྱེད་ས་རན་ཤོས་དེ་བོད་ཆགས་ཡོད། བོད་མི་ཚོ་རྒྱ་མི་མ་རེད། བོད་རྒྱ་མི་རིགས་གཉིས་ཐ་དད་རེད། འོན་ཀྱང་ལོ་ཤས་སྔོན་ནས་རྒྱ་ནག་གུང་ཁྲན་ཏང་གིས་མེ་རྒྱལ་ཁྱིམ་ཚང་ནང་ལོག་ཁུལ་བྱས་པ་ཞིག་ཡིན་པ་ལས། དོན་དངོས་བོད་མི་ཚོར་ལོ་ངོ་བརྒྱ་ཕྲག་རིང་ནས་ཐུན་མིན་རིག་གཞུང་ཞིག་ཡོད། ཅེས་གསུངས། སྐབས་དེར་གྲོས་ཚོགས་འཐུས་མི་རྣམས་ཀྱིས་བོད་ཀྱི་རྒྱལ་ས་ལྷ་སའི་ནང་དུ་ཨ་རིའི་གཞུང་ཚབ་བཙུགས་ནས་བོད་མིའི་ཆབ་སྲིད་དང་ཆོས་དད་རང་དབང་། དེ་བཞིན་དཔལ་འབྱོར་དང་རིག་གཞུང་སོགས་ཡར་རྒྱས་ཇི་འདྲ་གཏོང་བཞིན་པ་རྟོགས་ཞིབ་གནང་དགོས། ཞེས་དང་། ཕྱོགས་མཚུངས་གྲོས་ཚོགས་འཐུས་མི་རྣམས་ཀྱིས་ཨར་རྒྱ་གཉིས་དཔལ་འབྱོར་དང་དམག་བྱུས་སྐོར་གྱི་ལྷན་ཚོགས་ནམ་བྱུང་སྐབས་ཨ་རིའི་གཞུང་གིས་རྒྱ་ནག་འགོ་ཁྲིད་ཚོར་བོད་ནང་གི་བོད་མིའི་འགྲོ་བ་མིའི་ཐོབ་ཐང་དང་ཆབ་སྲིད། ཆོས་དད་རང་དབང་སྐོར་གླེང་སློང་གནང་དགོས་པའི་རེ་འདུན་བཏོན་འདུག
