༢༠༡༥ ཟླ་ ༧ ཚེས་ ༡༠ རེས་གཟའ་པ་སངས།
༄༅། །ཧར་པ་སྤུར་འདོད་རྒུ་གཡུལ་རྒྱལ་གླིང་ས་གནས་འགོ་འཛིན་ལས་ཁང་ནས་ཕྱི་ལོ་ ༢༠༡༥ ཟླ་ ༧ ཚེས་ ༩ ཉིན་བཏང་འབྱོར་བྱུང་བའི་གནས་ཚུལ་ནང་འཁོད་དོན། ཕྱི་ལོ་ ༢༠༡༥ ཟླ་ ༧ ཚེས་ ༦ སྤྱི་ནོར་ྋགོང་ས་ྋསྐྱབས་མགོན་ཆེན་པོ་མཆོག་ཕྱི་ལུགས་ལྟར་དགུང་གྲངས་ ༨༠ ཕེབས་པའི་ྋསྐུའི་གྱ་སྟོན་དང་འཁྲུངས་སྐར་དུས་ཆེན་ཉིན་གསུམ་རིང་འདོད་རྒུ་གཡུལ་རྒྱལ་གླིང་གཞིས་སྒར་དུ་སྲུང་བརྩི་ཞུས་ཡོད། དེ་ཡང་མཛད་སྒོ་ཉིན་དང་པོའི་སྔ་དྲོ་ཚོུད་ ༧།༠༠ ཐོག་ཕྱོགས་བཞུགས་སྤྱི་འཐུས་ཆོས་སྐྱོང་དབང་ཕྱུག་ལགས་དང༌། གོང་དཀར་དགོན་གྱི་སྐྱབས་གནས་མཁན་རིན་པོ་ཆེ་མཆོག ས་འཐུས་ཚོགས་གཙོ། ས་གནས་འགོ་འཛིན། ས་འཐུས་རྣམ་པ། རང་བདེན་ཚོགས་གཙོ་དང་ཚོགས་མི་རྣམ་པ། གོང་དཀར་དགོན་གྱི་འགན་འཛིན་དང་ཕྱག་མཛོད། སེ་ལ་ཀུའི་ལས་རིག་སློབ་གཉེར་ཁང་གི་འགན་འཛིན། གཞིས་འཕྲོད་གཉིས་ཀྱི་ལས་བྱེད་རྣམ་པ། དྭང་ཟུར་སྐྱིད་སྡུག་འགན་འཛིན། གཞིས་གྲོང་ཁག་གི་བཅུ་དཔོན་རྣམ་པ། རྒས་གསོའི་འགན་འཛིན། ས་གནས་གཉེར་པ་དང་མ་ཎི་ཚོགས་ཆུང༌། ས་གནས་གཞོན་ནུ་དང་བུད་མེད་གཉིས་ཀྱི་ཚོགས་གཙོ། སེར་སྐྱ་མི་མང་བཅས་པ་གཞིས་དགོན་དུ་འདུ་འཛོམས་ཀྱིས་བོད་སྐྱོང་ལྷ་སྲུང་རྣམས་ལ་འཕྲིན་བསྐུལ་དང་བསངས་གསོལ་ཟབ་རྒྱས་ཞུས།
དེ་རྗེས་ཆུ་ཚོད་ ༩།༡༥ ཐོག་གོང་དཀར་ཚེ་སྒྲུབ་ལྷ་ཁང་ནས་ྋརྒྱལ་བའི་སྐུ་དཔར་མཐོང་གྲོལ་རིན་པོ་ཆེ་དུང་རྒྱ་སྤོས་སྣེའི་སྔོན་བསུས་ཏེ་བཞུགས་ཁྲིའི་སྟེང་དུ་གདན་འདྲེན་ཞུས། དེ་ནས་སྐུ་མགྲོན་གཙོ་བོ། མངའ་སྡེའི་ནང་བསྟན་ཤེས་ཡོན་ལྷན་ཚོགས་ཀྱི་ཚོགས་གཙོ་དང་མངའ་སྡེའི་གྲངས་ཉུང་མི་རིགས་ཀྱི་ཚོགས་མི་སྐུ་ཞབས་ཨོ་ཌ་ནི་མཆོག་གིས་གཙོས་སྐུ་མགྲོན་རྣམ་པས་ྋརྒྱལ་བའི་སྐུ་དཔར་མཐོང་གྲོལ་རིན་པོ་ཆེར་མཎྜལ་རྟེན་གསུམ་འདེགས་འབུལ་ཞུས་རྗེས་སྐུ་མགྲོན་གཙོ་བོ་མཆོག་གིས་སྣང་གསལ་ཞལ་ཕྱེ་གནང༌རྗེས། བོད་བསྟན་སྲིད་མི་རིགས་ཀྱི་དོན་དུ་རང་སྲོག་བློས་གཏོང་གནང་མཁན་རྒྱལ་གཅེས་དཔའ་བོ་དཔའ་མོ་རྣམས་ཀྱི་ཆེད་དུ་སྐར་མ་གཅིག་རིང་མྱ་ངན་ངག་བཅད་གནང་། དེ་རྗེས་འཕགས་བོད་རྒྱལ་གླུ་དབྱངས་སུ་གྱེར། དེ་ནས་ས་གནས་འགོ་འཛིན་བསྟན་འཛིན་མཆོག་ལྡན་ལགས་ཀྱིས་འཛིན་སྐྱོང་བཀའ་ཤག་གི་གསུང་འཕྲིན་དང་ཕྱོགས་བཞུགས་བོད་མི་མང་སྤྱི་འཐུས་ཆོས་སྐྱོང་དབང་ཕྱུག་ལགས་ནས་དཔལ་ལྡན་བོད་མི་མང་སྤྱི་འཐུས་ལྷན་ཚོགས་ཀྱི་གསུང་འཕྲིན་སྒྲོགས་སྦྱང་གནང་བ་མ་ཟད། དུས་ཆེན་དང་འབྲེལ་བའི་གསུང་བཤད་གནང་། དེ་རྗེས་སྐུ་མགྲོན་གཙོ་བོ་མཆོག་ནས་དུས་ཆེན་དང་འབྲེལ་གསུང་བཤད་གནང་བའི་ནང་དོན། ྋགོང་ས་མཆོག་དགུང་གྲངས་ ༨༠ ཕེབས་པར་དམིགས་བསལ་གྱི་དགའ་དད་སྤྲོ་གསུམ་གྱི་ངང་འཚམས་འདྲི་ཞུས་པ་དང༌། མགོན་པོ་གང་ཉིད་མཆོག་སྐུ་ཚེ་༸ཞབས་པད་བསྐལ་བརྒྱར་བརྟན་པའི་སྨོན་ལམ་ཞུས་པ། དེ་བཞིན་ས་གནས་བོད་མི་རྣམས་ཀྱི་དཀའ་སེལ་སླད་ཁོང་གི་ཕྱག་རོགས་དགོས་གལ་བྱུང་ཚེ་དུས་ནམ་ཡིན་ལ་ཁོང་ལ་འབྲེལ་བ་ཞུས་ཚེ་གང་ཐུབ་རོགས་རམ་གནང་རྒྱུའི་གྲ་སྒྲིག་ཡོད་སྐོར་སོགས་ཀྱི་གསུང་བཤད་གནང༌། དེ་ནས་སྐུ་མགྲོན་གཙོ་བོ་མཆོག་དང༌། དམིགས་བསལ་སྐུ་མགྲོན། ཕྱོགས་བཞུགས་བོད་མིའི་སྤྱི་འཐུས་བཅས་ནས་ྋསྐུའི་འཁྲུངས་སྐར་གྱི་མངར་ཟས་ Birthday Cake དུམ་བུར་བགོས། མཐར་གོང་དཀར་དགོན་གྱི་དགེ་འདུན་པ་རྣམས་དང༌། སེ་ལ་ཀུའི་ལས་རིགས་སློབ་གཉེར་ཁང་གི་ལས་བྱེད་དང་སློབ་ཕྲུག ཧར་པ་སྤུར་གཏན་སློབ། ས་གནས་ལ་ཁན་དང་ཁེ་ར་སློབ་ཕྲུག་ཕོ་མོ་རྣམས་ཀྱིས་རིག་གཞུང་འཁྲབ་སྟོན་རྗེས། ས་གནས་རང་ཚོགས་ཀྱི་ཚོགས་གཙོ་དང་འཁྲུངས་སྐར་གོ་སྒྲིག་ཚོགས་ཆུང་གི་ཚོགས་མི་རྒྱལ་མཚན་ལགས་ནས་ཐུགས་རྗེ་ཆེ་ཞུས་པ་དང་སྦྲགས། ཉིན་དང་པོའི་མཛད་སྒོ་རྒྱལ་ཁའི་ངང་གྲོལ།
ཕྱི་ཉིན་ཏེ་ཕྱི་ལོ་ ༢༠༡༥།༠༧།༠༧ ཉིན་གྱི་སྔ་དྲོ་ ༩།༢༥ ཐོག་སྐུ་མགྲོན་གཙོ་བོ་དཔལ་ལྡན་བོད་མི་མང་སྤྱི་འཐུས་ཆོས་སྐྱོང་དབང་ཕྱུག་ལགས་ཀྱིས་གཙོས་ས་གནས་གནད་ཡོད་མི་སྣ་དང༌། དེ་བཞིན་སེར་སྐྱ་མང་ཚོགས་རྣམས་ཚོགས་ཁང་ནང་ཚང་འཛོམས་རྗེས། ས་གནས་འགོ་འཛིན་བསྟན་འཛིན་མཆོག་ལྡན་ལགས་ནས་ཉིན་གཉིས་པའི་ལས་རིམ་ ༼ྋགོང་ས་མཆོག་བོད་མི་ཡོངས་ལ་བཀའ་དྲིན་ཇི་ལྟར་ཆེའམ།༽ ཞེས་པའི་བརྗོད་གཞིའི་ཐོག་གཏམ་བཤད་འགྲན་བསྡུར་དང་འབྲེལ་མང་ཚོགས་ལ་གསུང་བཤད་གནང་རྗེས། གོང་དཀར་ཆོས་སྡེ་དགོན་དང༌། ཧར་པ་སྤུར་གཏན་སློབ། སེ་ལ་ཀུའི་ལས་རིགས་སློབ་གཉེར་ཁང་གི་སློབ་ཕྲུག་དབར་གཏམ་བཤད་འགྲན་བསྡུར་འགོ་འཛུགས་གནང་། གཏམ་བཤད་ནང་འགྲན་བསྡུར་གནང་མཁན་གྱི་སློབ་ཕྲུག་རྣམས་ལ་སྐུ་མགྲོན་གཙོ་བོས་ལེགས་གསོལ་བྱ་དགའ་གནང་རྗེས། སྐབས་དེའི་བརྗོད་གཞི་དང་འབྲེལ་བའི་གསུང་བཤད་གནང་སྐབས། ༸གོང་ས་མཆོག་ནི་ང་ཚོ་བོད་མི་ཙམ་མ་ཟད། འཛམ་གླིང་སྐྱེ་འགྲོ་སྤྱི་ལ་བཀའ་དྲིན་ཧ་ཅང་ཆེན་པོ་ཡིན་སྟབས། དེང་སྐབས་༸གོང་ས་མཆོག་དགུང་གྲངས་ ༨༠ ཕེབས་པའི་༸སྐུའི་གྱ་སྟོན་འཛམ་གླིང་ཡུལ་གྲུ་གང་སར་སྲུང་བརྩི་ཞུས་དང་ཞུ་མུས་ཡིན་སྐོར་དང་། ལྷག་པར་ང་ཚོ་བོད་མི་ཚོས་༸གོང་ས་མཆོག་གི་བཀའ་སློབ་རྣམས་གང་ཐུབ་ཅི་ཐུབ་ཉམས་ལེན་གནང་ཐབས་དགོས་པ་དང་། དེ་ལྟར་བྱུང་ཚེ་ྋརྒྱལ་བ་དགྱེས་པའི་མཆོད་སྤྲིན་དུ་གྱུར་རྒྱུ་ཡིན་སྐོར་གྱི་གསུང་བཤད་གྲུབ་རྗེས། ྋསྐུའི་འཁྲུངས་སྐར་གོ་སྒྲིག་ཚོགས་ཆུང་གི་སྐུ་ཚབ་ཚེ་སྒྲུབ་ལྷ་ཁང་གི་ཕྱག་མཛོད་རྒན་བསྟན་པ་རྒྱ་མཚོ་ལགས་ནས་ཐུགས་རྗེ་ཆེ་ཞུའི་གསུང་བཤད་གནང་རྗེས་མཛད་སྒོ་རྒྱལ་ཁའི་ངང་གྲོལ། ༸སྐུའི་གྱ་སྟོན་སྲུང་བརྩི་དང་འབྲེལ་འཁྲུངས་སྐར་གོ་སྒྲིག་ཚོགས་ཆུང་གི་ཚོགས་མི་སྡེ་ཚན་གཉིས་སུ་དབྱེ་སྟེ་གཡས་གཡོན་རྒྱ་གར་གཞུང་གི་སློབ་གྲྭ་ཁག་ཏུ་དེབ་དང་མྱུ་གུ་བགོ་འགྲེམས་བྱས།
དེ་རྗེས་ཕྱི་ལོ་ ༢༠༡༥།༠༧།༠༨ རེས་གཟའ་ལྷག་པ་ཉིན་༸སྐུའི་གྱ་སྟོན་གྱི་མཛད་སྒོ་ཉིན་གསུམ་པའི་སྐབས་ཁོར་ཡུག་གཙང་བཟོའི་ལས་འགུལ་སྤེལ་ཡོད། དེ་ཉིན་སྔ་དྲོ་ཚོུད་ ༧།༠༠ ཐོག་ས་འཐུས་ཚོགས་གཙོ་སོགས་གོང་གསལ་ཚོགས་པ་ཁག་དང་། སེར་སྐྱ་མི་མང་བཅས་པ་གཞིས་དགོན་དུ་འདུ་འཛོམས་ཀྱིས་བོད་སྐྱོང་ལྷ་སྲུང་འཕྲིན་བསྐུལ་དང་བསངས་གསོལ་ཟབ་རྒྱས་ཞུས་རྗེས་སེར་སྐྱ་མང་ཚོགས་རྣམས་གཞིས་སྤྱི་མི་མང་ཚོགས་ཁང་ནང་ཚང་འཛོམས་གནང༌། ྋགོང་ས་མཆོག་གི་བཀའ་སློབ་ནས་གཙོ་གལ་ཆེ་ཤོས་ཤིག་ནི་ཁོར་ཡུག་བདག་གཅེས་སྐོར་ཡིན་སྟབས། ས་གནས་ཀྱི་སེར་སྐྱ་མང་ཚོགས་རྣམས་ས་བགོས་ཀྱིས་གཞིས་སྒར་ནང་དང༌། རྒས་གསོའི་མདུན་ངོས་ཀྱི་གད་སྙིགས་འཇོག་ཡུལ། དེ་བཞིན་གྲོང་སྡེ་ག་པའི་གཞུང་ལམ་ཆེན་པོ་ནས་རྡོ་སྣུམ་བླུགས་ཁང་ Petrol Pump ས་ཐག་བར་ཁོར་ཡུག་གཙང་བཟོ་བྱས། དེ་ནས་ཉིན་རྒྱབ་ཏུ་གཡས་གཡོན་མངའ་གཞུང་གི་འབྲེལ་ཡོད་ལས་ཁུངས་ཁག་དང༌། བོད་མིར་རྒྱབ་བསྐྱོར་གནང་མཁན་ཚོར་མངར་ཟས་བགོ་འགྲེམས་ཞུས་པ་བཅས་ཀྱི་ཉིན་གསུམ་གྱི་ལས་རིམ་སྙིང་བསྡུས་སུ།།
