༢༠༡༥ ཟླ་ ༧ ཚེས་ ༡༥ རེས་གཟའ་ལྷག་པ།
༄༅། །དེ་རིང་འདི་གར་དགེ་བཤེས་འཇམ་དབྱངས་ཉི་མ་ལགས་ཀྱི་གནས་ཚུལ་བཏང་འབྱོར་བྱུང་བར་གཞིག་ན། ཕྱི་ལོ་ ༢༠༡༥ ཟླ་ ༧ ཚེས་ ༡༢ ཉིན་ལི་ཐང་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་རྒྱའི་བཙོན་ཁང་ནང་དགོངས་པ་རྫོགས་པའི་གནས་ཚུལ་ཐོན་སྟབས་ཁ་ཉིན་ཕྱི་ཚེས་ ༡༣ ཉིན་ལི་ཐང་ཉག་ཆུ་རྫོང་ཁོངས་སུ་ཡོད་པའི་ཨོ་ཐོག་ཧོ་ལུང་ཤང་གི་ལས་ཁུངས་ཡོད་སར་མི་དམངས་ཀྱིས་རིན་པོ་ཆེ་མཆོག་གི་སྐུ་ཕུང་རྩིས་སྤྲོད་དགོས་པའི་ཞུ་འབོད་བྱས་ཀྱང་ཉན་འཇོག་མ་བྱས་ཁར་མི་མང་ལ་ཉེན་རྟོག་པས་རྡུང་རྡེག་དྲག་པོ་བཏང་སྟེ་མི་མང་མང་པོ་ཞིག་རྨས་སྐྱོན་བཟོས་ཡོད། ད་ལྟའི་ཆར་མི་གྲངས་ ༡༥ ཙམ་ཧ་ཅང་ཛ་དྲག་ངང་སྨན་ཁང་དུ་ལུས་ཡོད་འདུག སྐབས་དེའི་འདྲ་པར་ཁག་གཅིག་འདི་མཉམ་འདོན་སྤེལ་ཞུས་ཡོད།
དེ་ལྟར་མི་མང་གིས་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་གི་སྐུ་ཕུང་རྩིས་སྤྲོད་དགོས་པའི་དགོས་འདུན་ཤུགས་ཆེ་བཏོན་ཡང་ད་དུང་སྩིས་སྤྲོད་བྱས་མེད་སྟབས་དེ་རིང་ལི་ཐང་དང་ཉག་ཆུ་རྫོང་ཁོངས་ཀྱི་མི་མང་བརྒྱ་ཕྲག་གཅིག་ལྷག་སི་ཁྲོན་ཞིང་ཆེན་གྱི་ཏ་ཀྲའུ་ཁྲོན་ཏུང་བཙོན་ཁང་སྒོ་འགྲམ་དུ་ཞུ་འབོད་བྱེད་བཞིན་ཡོད་པ་ཁོང་རྣམས་ལ་དྲག་ཆས་ཉེན་རྟོག་རུ་ཁག་སླེབས་ཏེ་དོ་དམ་མམ་ཡང་ན་རྡུང་རྡེག་གཏོང་རྒྱུའི་ཉེན་ཁའི་ནང་ལྷུང་ཡོད་པའི་གནས་ཚུལ་ཐོན་འདུག
ད་ལྟའི་ཆར་ལི་ཐང་དང་ཉག་ཆུ་རྫོང་གཉིས་དབར་མི་མང་ཕར་ཚུར་འགྲོ་སྐྱོད་བཀག་འགོག་དང་། ལི་ཐང་རྫོང་ཐོག་ཏུ་དྲག་ཆས་དམག་མི་འགྲེམས་འཇོག་གིས་མི་མང་ལ་གནོན་ཤུགས་སྤྲད་ པ། འགའ་རེར་ཉེས་བརྡུང་བཏང་ནས་སྨན་ཁང་དུ་བསྐྱལ་དགོས་བྱུང་བའི་གནས་ཚུལ་གཅིག་ མཇུག་གཉིས་མཐུད་ཀྱིས་ཡོང་བཞིན་ཡོད་འདུག
