༢༠༡༥ ཟླ་ ༧ ཚེས་ ༡༣ རེས་གཟའ་ཟླ་བ།
༄༅། །ཕྱི་ལོ་ ༢༠༡༥ ཟླ་ ༧ ཚེས་ ༡༣ ནས་ཚེས་ ༡༦ བར་ཉིན་གྲངས་བཞིའི་རིང་རྡ་ས་དབུས་སྣེ་ལེན་འབྲེལ་མཐུད་ལས་ཁང་དུ་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱིས་གོ་སྒྲིག་འོག་རྒྱ་བལ་འབྲུག་གསུམ་གྱི་བོད་མིའི་ས་གནས་འགོ་འཛིན་རྣམ་པའི་འཛིན་སྐྱོང་ཚོགས་ཆེན་ཐེངས་བཅུ་པ་ཚོགས་གནང་སོང་།
ཐེངས་འདིའི་ཚོགས་འདུ་ཉིན་གྲངས་བཞིའི་རིང་ས་གནས་འགོ་འཛིན་རྣམས་ཀྱི་འཛིན་སྐྱོང་དང་འབྲེལ་བའི་གྲོས་གཞི་ཁག་གཅིག་གི་ཐོག་གྲོས་བསྡུར་གནང་རྒྱུ་ཡིན་འདུག དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩ ཐོག་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་སྲིད་ཚབ་ནང་སྲིད་བཀའ་བློན་རྒྱ་རི་སྒྲོལ་མ་མཆོག་དང་། དམིགས་བསལ་སྐུ་མགྲོན་ལྡི་ལི་དོན་གཅོད་བཀའ་ཟུར་བསྟན་པ་ཚེ་རིང་མཆོག ཤེས་རིག་དང་འཕྲོད་བསྟེན་ལས་ཁུངས་ཀྱི་བཀའ་བློན། ལྷན་ཁང་ཁག་གི་དྲུང་ཆེ་རྣམ་པ། དེ་བཞིན་ས་གནས་ཁག་ ༤༤ ནས་ཚོགས་བཅར་བ་ས་གནས་འགོ་འཛིན་རྣམ་པ་བཅས་ལྷན་འཛོམས་གནང་འདུག མཛད་སྒོའི་ཐོག་མར་སྲིད་ཚབ་ནང་སྲིད་བཀའ་བློན་རྒྱ་རི་སྒྲོལ་མ་མཆོག་གིས་ཚོགས་འདུ་དབུ་འབྱེད་ཀྱི་སྣང་གསལ་ཞལ་ཕྱེ་གནང་བ་དང་། བཀའ་བློན་རྣམ་པས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་པར་མཐོང་གྲོལ་རིན་པོ་ཆེར་མཇལ་དར་སྒྲོན་འབུལ་ཞུས་པ་དང་སྦྲགས། ཚང་མ་སྐུ་བཞེངས་ཀྱིས་བོད་རྒྱལ་ཁབ་ཆེན་པོའི་རྒྱལ་གླུ་བཏང་བ་དང་ལྷན་བོད་བསྟན་སྲིད་མི་རིགས་ཀྱི་དོན་དུ་རང་སྲོག་བློས་བཏང་མཁན་རྒྱལ་གཅེས་པ་རྣམས་དང་ཁོང་རྣམ་པའི་རྗེས་ཤུལ་ཉེ་འབྲེལ་ནང་མི་རྣམས་ལ་གདུང་སེམས་མཉམ་སྐྱེ་མཚོན་བྱེད་སྐར་མ་གཅིག་རིང་མྱ་ངན་གུས་འདུད་ཞུས།
དེ་རྗེས་རྟེན་འབྱུང་གསོལ་ཇ་འབྲས་སིལ་འདེགས་འབུལ་ཞུས་གྲུབ་མཚམས། སྲིད་ཚབ་ནང་སྲིད་བཀའ་བློན་མཆོག་གིས་ཐེངས་འདིའི་ཚོགས་འདུ་ངོ་སྤྲོད་ཀྱི་གསུང་བཤད་གནང་དོན། བོད་རྒྱལ་ཁབ་དང་མི་རིགས་ཀྱི་ཆེད་དུ་འཚེ་མེད་ཞི་བའི་ལམ་ནས་རྩ་ཆེ་བའི་རང་སྲོག་བློས་གཏོང་གནང་མཁན་རྒྱལ་གཅེས་པ་གྲངས་ ༡༤༡ ཆགས་ཡོད། འཛམ་གླིང་སྤྱི་ཡོངས་ཀྱི་ཐོག་ནས་བོད་ཀྱི་གནས་སྟངས་ཧ་ཅང་ཛ་དྲག་པོ་ཡོད་པ་དང་། རྒྱ་ནག་དམར་པོས་བོད་བཙན་བཟུང་བྱས་པ་ནས་བཟུང་ད་བར་བོད་ཐོག་བཟང་ཕྱོགས་ཀྱི་རྣམ་པ་གང་ཡང་བསྟན་མེད་པ་ཞིག་ལ་ངོས་འཛིན་ཆོག་པ་རེད། དེར་བརྟེན་བོད་མིའི་སྒྲིག་འཛུགས་ནང་ཕྱག་ལས་གནང་མཁན་ང་རང་ཚོས་ཀྱང་ཛ་དྲག་གི་དུས་ཚོད་ཞིག་ལ་བརྩིས་ནས་ལས་འགན་ཧུར་ཐག་བྱ་དགོས་པའི་དུས་ལ་བབ་ཡོད། ༸གོང་ས་༸སྐྱབས་མགོན་ཆེན་པོ་མཆོག་གིས་དུས་དང་རྣམ་པ་ཀུན་ཏུ་བཀའ་སློབ་ལམ་སྟོན་ནང་། རེ་བ་བཟང་ས་ནས་བརྒྱབ། །གྲ་སྒྲིག་སྡུག་ས་ནས་བྱ་དགོས་པ་རེད། ཅེས་བཀའ་སློབ་སྩལ་བ་བཞིན་བོད་ནང་བོད་མི་ཚོས་བློས་གཏོང་གིས་བོད་བསྟན་སྲིད་མི་རིགས་ཀྱི་ཆེད་དུ་དཀའ་ལས་ཆེན་པོས་འབད་བརྩོན་གནང་གི་ཡོད་པ་དེར་བསམ་གཞིགས་བྱས་ཏེ་ང་རང་ཚོ་བཙན་བྱོལ་ནང་ཡོད་པའི་བོད་མིའི་སྒྲིག་འཛུགས་ཀྱི་ལས་འགན་ནུས་པ་ལྡན་པ་ཞིག་ཡོང་བར་འབད་བརྩོན་བྱ་དགོས་པ་ཧ་ཅང་གལ་ཆེན་པོ་ཆགས་ཡོད། ང་ཚོས་༸སྐྱབས་མགོན་རིན་པོ་ཆེ་མཆོག་གིས་དགོངས་གཞི་དང་ལམ་སྟོན་གནང་བ་དེའི་རྗེས་སུ་ཤར་བསྐྱོད་ཐུབ་པ་ཞིག་གནང་དགོས་པ་དེ་ལས་ལྷག་པ་ཞིག་གང་ཡང་མེད།
སྐབས་བཅུ་བཞི་པའི་བཀའ་ཤག་གི་འཛིན་སྐྱོང་རིང་ས་གནས་འགོ་འཛིན་ཚོགས་འདུ་ཐེངས་གསུམ་པ་དེ་ཆགས་ཡོད། ས་གནས་འགོ་འཛིན་ཚོས་རྩིས་ལེན་རྩིས་སྤྲོད་བྱེད་ཐུབ་པ་ཙམ་མ་ཡིན་པར་འགྲེལ་བརྗོད་དང་རྒྱུ་མཚན་ལྡན་པའི་ཐོག་ནས་རྩིས་སྤྲོད་བྱེད་ཐུབ་མཁན་གྱི་ས་གནས་འགོ་འཛིན་ཞིག་བྱ་དགོས། ས་གནས་འགོ་འཛིན་ཚོས་གཞིས་ཆགས་ཁག་གི་ནང་དཀའ་ངལ་ཆེ་ཕྲ་གང་ཞིག་ཡིན་རུང་ཐོག་མར་གཞི་འགོས་གང་ཐུབ་ཀྱིས་ས་གནས་རང་དུ་དཀའ་ངལ་དེ་ཉིད་སེལ་ཐུབ་མིན་འབད་བརྩོན་བྱ་དགོས་པ་འདུག གང་ལྟར་ང་ཚོ་ཚང་མ་མཉམ་རུབ་ཐོག་འབད་བརྩོན་བྱ་དགོས་པ་ཧ་ཅང་གལ་ཆེ་ཡིན་ལུགས་སོགས་ཀྱི་གསུང་བཤད་གནང་།
དེ་ནས་དམིགས་བསལ་སྐུ་མགྲོན་བཀའ་ཟུར་བསྟན་པ་ཚེ་རིང་མཆོག་གིས་གསུང་བཤད་གནང་དོན། དེ་རིང་འདིར་ས་གནས་འགོ་འཛིན་རྣམ་པ་ཚོ་དང་ལྷན་མཇལ་འཕྲད་བྱུང་བ་དགའ་པོ་བྱུང་། གཙོ་བོ་ངོས་རང་འདིར་ཡོང་དགོས་དོན་ཡང་ས་གནས་འགོ་འཛིན་རྣམ་པ་ཚོ་དང་ཐུག་ན་བསམས་ཏེ་ཡོང་བ་ཞིག་ཡིན། སྤྱིར་དབུས་བོད་མིའི་སྒྲིག་འཛུགས་དེ་བཞིན་གལ་ཆེན་ཡིན་པ་ལྟར། ས་གནས་སུ་གནས་པའི་གཞི་རིམ་མང་ཚོགས་རྣམས་དེ་བས་ཀྱང་གལ་ཆེ་བ་ཆགས་ཡོད། ས་གནས་གཞི་རིམ་མང་ཚོགས་ལ་དབུས་བོད་མིའི་སྒྲིག་འཛུགས་ཀྱི་འགྲོ་སྟངས་དང་། ཁྲིམས་ལུགས། ཆིག་སྒྲིལ། ཡུལ་མི་ཁྱིམ་མཚེས་དང་མཐུན་ལམ་གནང་ཕྱོགས། སོགས་ཉིན་རེ་ཉིན་རེའི་གནས་སྟངས་ཐོག་ལ་ས་གནས་འགོ་འཛིན་ཚོས་རང་ཉིད་ནས་ནུས་སྟོབས་ལྡན་པའི་ཐོག་ནས་མི་མང་ཚོར་གནས་ལུགས་འགྲེལ་བཤད་རྒྱུ་མཚན་ལྡན་པ་བཤད་ཐུབ་མཁན་དང་། གཞི་རིམ་མང་ཚོགས་ལ་ལམ་སྟོན་གནང་ཐུབ་མཁན་ཞིག་བྱ་དགོས་པ་ཧ་ཅང་གལ་ཆེན་པོ་རེད། ༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེའི་བཀའ་དྲིན་འོག་བཙན་བྱོལ་ནང་གི་གཞིས་ཆགས་ཁག་བཟོ་ཞིང་འབྲོག་གསུམ་ཞེས་ཡར་རྒྱས་གང་ཙམ་ཕྱིན་ཡོད་པ་དང་། ས་གནས་འགོ་འཛིན་རྣམ་པས་གཞི་རིམ་མང་ཚོགས་ཀྱི་མགོ་སྟོན་འཚོ་སྐྱོང་བྱེད་མཁན་ཞིག་ཡིན་སྟབས་དེང་སྐབས་དེ་སྔོན་གཞི་རིམ་མང་ཚོགས་དང་མ་འདྲ་བ་ཤེས་ཡོན་ལྡན་པ་མང་བས་དེ་ལུགས་མང་གཙོའི་བཅའ་ཁྲིམས་ཀྱི་དགོངས་དོན་གཞིར་བཞག་ཐོག་མང་ཚོགས་ལ་འགྲེལ་བཤད་ལམ་སྟོན་གནང་ཐུབ་མཁན་ཞིག་བྱ་དགོས།
དེ་བཞིན་ས་གནས་འགོ་འཛིན་རྣམ་པ་ཚོ་དབུས་བོད་མིའི་སྒྲིག་འཛུགས་ཀྱི་མགྲིན་ཚབ་པ་ཆགས་ཡོད་སྟབས་མི་མང་གི་ཁམས་དང་མོས་པ་དང་མཐུན་པའི་སྒོ་ནས་གཞིས་ཆགས་སྲ་བརྟན་གཏོང་ཐབས་སོགས་ཀྱི་ཐད་གྲོས་བསྡུར་གནང་དགོས་པ་ཡིན། སྤྱིར་དབུས་བོད་མིའི་སྒྲིག་འཛུགས་ཀྱི་མཐར་ཐུག་གི་དམིགས་ཡུལ་གཙོ་བོ་ནི་བོད་དོན་བདེན་མཐའ་གསལ་ཐབས་བྱ་རྒྱུ་དེ་ཡིན་པར་བརྟེན། གཞིས་ཆགས་སྲ་བརྟན་ཙམ་མ་ཡིན་པར་འཛམ་གླིང་སྤྱི་དང་རྒྱ་གར་སོགས་དང་ལྷན་བོད་དོན་འབྲེལ་མཐུད་བྱ་དགོས་པ་དེ་ཡིན་སྟབས། ལྡི་ལི་དོན་གཅོད་ནང་འཕགས་བོད་འབྲེལ་མཐུད་ལས་ཁུངས་ཤིག་ཡོད་པ་དེས་འབད་བརྩོན་བྱས་དང་བྱེད་མུས་ཡིན་རུང་། ས་གནས་འགོ་འཛིན་རྣམ་པ་ཚོས་དེའི་ཐོག་རྒྱབ་སྐྱོར་གནང་རོགས་ཞེས་འབོད་སྐུལ་ཞུ་རྒྱུ་དང་། དེ་བཞིན་ས་གནས་འགོ་འཛིན་རྣམ་པ་ཚོས་གཞི་རིམ་མང་ཚོགས་ནང་ཕྱི་བསྐྱོད་ལག་དེབ་སེར་པོ་བཟོ་ཕྱོགས་ཀྱི་ལམ་སྟོན་གནང་དགོས་པའི་འབོད་སྐུལ་ཞུ་རྒྱུ་ཡིན། ཞེས་གསུང་བཤད་གནང་། དེ་རྗེས་ནང་སྲིད་དྲུང་ཆེ་འཁོར་ལྷ་ཚང་བསོད་ནམས་སྟོབས་རྒྱལ་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་སྟེ་ཚོགས་འདུ་ཉིན་དང་པོའི་དབུ་འབྱེད་མཛད་སྒོ་ལེགས་པར་མཇུག་སྒྲིལ། །
