༢༠༡༥ ཟླ་ ༧ ཚེས་ ༢༡ རེས་གཟའ་མིག་དམར།

༄༅། །ཕྱི་ལོ་ ༢༠༡༥ ཟླ་ ༧ ཚེས་ ༡༩ ཉིན་ཉི་ཧོང་སྐུ་ཚབ་དོན་གཅོད་ལུང་རྟོགས་ལགས་ཀྱིས་ཉི་ཧོང་གི་རྒྱལ་ས་ཊོག་ཁྱོའི་ Tokyo ནང་རྟེན་གཞི་བྱས་པའི་ཛོ་ཇོ་ཇི་ Zojoji དགོན་པར་ད་ལྟའི་བོད་ནང་གི་ཛ་དྲག་གནས་སྟངས་དང་དབུ་མའི་ལམ་གྱི་སྲིད་བྱུས་སྐོར་གོ་རྟོགས་སྤེལ་འདུག

དེ་ཡང་གོང་ཚེས་ཉིན་ཁུལ་དེར་ Earth Caravan 2015 ཞེས་པའི་མིང་བྱང་གི་དུས་སྟོན་ཐོག་སྐུ་ཚབ་དོན་གཅོད་ཀྱིས་དེ་སྔ་བོད་རང་བཙན་ཡིན་པའི་དུས་སྐབས་དང་། དེ་ནས་ཕྱི་ལོ་ ༡༩༥༩ ལོར་རྒྱ་ནག་གཞུང་གིས་བོད་བཙན་བཟུང་བྱས་ཚུལ། མཐར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དབུ་ཁྲིད་པའི་བོད་མི་སྟོང་ཕྲག་མང་པོ་རྒྱ་གར་ལ་སྐྱབས་བཅོལ་དུ་ཆིབས་སྒྱུར་བསྐྱངས་དགོས་བྱུང་བ།

དེ་བཞིན་དབུ་མའི་ལམ་གྱི་སྲིད་བྱུས་ཐོག་ནས་བོད་རྒྱ་འབྲེལ་མོལ་བྱེད་རྒྱུ་དེ་བོད་རྒྱ་གཉིས་སྨན་ཡིན་ཚུལ་སྐོར་སོགས་ཀྱི་ཐོག་ཆུ་ཚོད་གཅིག་རིང་གོ་རྟོགས་སྤེལ་གྲུབ་རྗེས་མང་ཚོགས་ཀྱི་དྲི་བར་ལན་འདེབས་ཀྱང་གནང་འདུག