༢༠༡༥ ཟླ་ ༧ ཚེས་ ༣ རེས་གཟའ་པ་སངས།
༄༅། །༸སྐུའི་གྱ་སྟོན་ལ་ཆེ་བསྟོད་ཞུ་སླད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་བརྙན་གསལ་བའི་སྦྲགས་རྟགས་གསར་པ་ཞིག་འདོན་སྤེལ་གནང་འདུག དེ་ཡང་རྒྱལ་སྤྱིའི་བོད་དོན་ལས་འགུལ་ཁང་གི་དྲ་རྒྱའི་ཐོག་གནས་ཚུལ་བཀོད་པ་ལྟར་ན། ཇར་མན་ཌོ་ཆི་ཡིག་ཟམ་ (Deutsche Post) ལས་ཁུངས་ཀྱིས། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྣང་བརྙན་གསལ་བའི་སྦྲག་རྟགས་ཤིག་ངོས་འཛིན་དང་འདོན་སྤེལ་གནང་འདུག ཌོ་ཆི་ཡིག་ཟམ་ཁང་འདི་ནི་འཛམ་གླིང་གི་ཡིག་ཟམ་མ་ལག་ཆེ་ཤོས་དེ་ཡིན་ཞིང་། དེའི་ཁོངས་སུ་ལས་ཀ་བྱེད་མཁན་མི་བཞི་འབུམ་དྲུག་ཁྲི་ལྷག་ཙམ་ཡོད། ད་རེས་ཀྱི་སྦྲག་རྟགས་འདི་རྒྱལ་སྤྱིའི་བོད་དོན་ལས་འགུལ་ཁང་གིས་༸གོང་ས་མཆོག་གི་མཛད་བཟང་ལ་ཆེ་བསྟོད་ཞུ་སླད་ངོས་འཛིན་གྱི་འཆར་འགོད་དང་གྲོས་འདོན་གནང་བ་ལྟར། གོང་གསལ་སྦྲག་ཁང་གིས་ངོས་བཞེས་དང་འགྲེམས་སྤེལ་གནང་འདུག སྦྲག་རྟགས་འདི་ལ་རིགས་མི་འདྲ་བ་གཉིས་ཡོད་འདུག སྦྲག་རྟགས་འདི་ནི་ཇར་མན་བོད་ཀྱི་ཚོང་ཁང་ནས་ཉོ་ཐུབ། ཅེས་འཁོད་འདུག
