ཕྱི་ལོ་ ༢༠༡༥ ཟླ་ ༦ ཚེས་ ༡༥ རེས་གཟའ་ཟླ་བ།

༄༅། །ཕྱི་ལོ་ ༢༠༡༥ ཟླ་ ༦ ཚེས་ ༡༢ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཨོ་སི་ཊོ་ལི་ཡའི་གྲོང་ཁྱེར་བྷི་རི་སི་སྦེན་གྱི་འགྲེམས་སྟོན་བསྟི་གནས་ཁང་ (Brisbane Convention and Exhibition Centre) ཞེས་པའི་ཚོགས་ཁང་ནང་དཔལ་མགོན་འཕགས་པ་ཀླུ་སྒྲུབ་ཀྱིས་མཛད་པའི་དབུ་མ་རིན་ཆེན་ཕྲེང་བའི་བཀའ་ཆོས་མཇུག་སྒྲིལ་མཛད་རྗེས་ཕྱེད་ཡོལ་ཚོགས་ཁང་དེ་གའི་ནང་༸གོང་ས་མཆོག་གིས་མང་ཚོགས་ ༤༠༠༠ བརྒལ་བར་བཀའ་སློབ་སྩལ་ཆེད་ཆིབས་སྒྱུར་བསྐྱངས་སྐབས་བཞད་གད་སློང་རྒྱུར་མཁས་པ་མི་ཤེལ་ལོ་རི་ Meshel Laurie ལགས་དང་། རྐྱལ་རྩེད་པ་ཨེ་ཡན་ཐོར་པི་ Ian Thorpe ལགས་རྣམ་གཉིས་ཀྱིས་མགོན་པོ་གང་ཉིད་མཆོག་མང་ཚོགས་ལ་ངོ་སྤྲོད་གནང་གྲུབ་བསྟུན། ༸གོང་ས་མཆོག་གིས་བཀའ་སློབ་སྩལ་དོན། སྤུན་ཟླ་ཕོ་མོ་རྣམ་པ། ངོས་ཀྱིས་དུས་རྟག་ཏུ་འདི་ལྟར་བཤད་དགོས་དོན་ནི། ང་ཚོ་ཚང་མ་དོན་དམ་གྱི་འགྲོ་བ་མི་རིགས་གཅིག་གི་སྤུན་ཟླ་ཆགས་ཡོད། ང་ཚོ་བྱིས་པ་ཆུང་ཆུང་ཡིན་དུས་ཆོས་ལུགས་དང་རིགས་རུས། རྒྱལ་ཁབ་གང་ནས་ཡིན་མིན་སོགས་ཀྱི་དབྱེ་འབྱེད་བྱེད་ཀྱི་མེད། འོན་ཀྱང་རིམ་བཞིན་ང་ཚོ་ཆེ་རུ་ཕྱིན་པ་དང་ལྷན་བསམ་བློ་གུ་ཡངས་པོ་ཡོད་པ་དེ་མེད་པར་འགྱུར་འགྲོ་གི་ཡོད།

དེང་སྐབས་ང་ཚོར་འཕྲད་བཞིན་པའི་དཀའ་ངལ་མང་དག་ཅིག་ང་ཚོ་རང་ཉིད་ཀྱིས་བཟོས་པ་ཤ་སྟག་ཡིན། ངོས་ཀྱིས་ད་ལྟར་ཉིན་ཟས་ཞིམ་པོ་ཞིག་བཟས་པ་ཡིན། ད་ལྟ་ང་ཚོ་ཚོགས་ཁང་ཆེན་པོ་འདིའི་ནང་མཉམ་དུ་ཡོད་ཀྱང་། འཛམ་གླིང་གི་ས་གནས་གཞན་དཔེར་ན། སྦར་མ་དང་། བྷངྒ་ལ་དེ་ཤི། བྱང་ཨ་ཕི་རི་ཁའི་ས་མཚམས་སུ་མང་པོ་ཞིག་ལ་སྐྱབས་བཅོལ་བ་བཀྲེས་སྐོམ་དང་སྡོད་གནས་ཀྱི་དཀའ་ངལ་འཕྲད་བཞིན་ཡོད། མི་ཚེ་འདི་ཧ་ཅང་རིན་ཐང་ཆེན་པོ་རེད། མི་ཚེ་འདི་དོན་མེད་པར་ཆགས་ན་ཧ་ཅང་ཕང་པོ་རེད། གཞི་རྩའི་ཆོས་ལུགས་ཚང་མས་བྱམས་བརྩེ་དང་བཟོད་བསྲན། སྡོམ་ཁྲིམས་སོགས་བཟང་པོའི་བསླབ་བྱ་སྤེལ་བཞིན་ཡོད། འོན་ཀྱང་མི་རེ་ཟུང་གིས་ཆོས་ལུགས་ཁ་ལ་འཁྱེར་ནས་མི་གཅིག་གིས་གཅིག་ལ་གསོད་རེས་བྱེད་རྒྱུ་ནི་བསམ་ཡུལ་ལས་འདས་པ་རེད། གནམ་གཤིས་འགྱུར་ལྡོག་དང་གོ་ལའི་དཔལ་འབྱོར་གནས་སྟངས་ཐོག་ང་ཚོ་ཚང་མས་འགྲོ་བ་མི་གཅིག་འགྱུར་གྱི་འདུ་ཤེས་འཛིན་ཏེ་བསམ་བློ་གཏོང་རྒྱུ་ཧ་ཅང་གལ་ཆེན་པོ་རེད། ང་ཚོས་མི་གཞན་པ་ཚོ་ཡང་སོ་སོ་དང་གཅིག་མཚུངས་ཡིན་པ་ཤེས་པར་བྱ་དགོས། ཁོང་ཚོར་ཡང་མི་ཚེ་བདེ་སྐྱིད་ལྡན་པ་ཞིག་གི་ཐོག་ནས་བསྐྱལ་རྒྱུའི་ཐོབ་ཐང་ཡོད། གལ་ཏེ་མི་ཚང་མས་ཕན་ཚུན་སྤུན་ཟླའི་འདུ་ཤེས་ཤུགས་ཆེ་ཙམ་འཛིན་ན་གཅིག་གིས་གཅིག་ལ་གསོད་རེས་བྱེད་ཀྱི་མ་རེད། གལ་སྲིད་ང་ཚོས་ད་ལྟ་ཉིད་ནས་འགྲོ་བ་མི་གཅིག་འགྱུར་ཡིན་པའི་ཚོར་ཤུགས་གོང་སྤེལ་བཏང་ཚེ་ད་ལྟ་འཕྲལ་དུ་ཁྱད་པར་འགྲོ་གི་མེད་ནའང། ལོ་ངོ་བཅུ་ཕྲག་གཅིག་གཉིས་ཀྱི་རྗེས་ཁྱད་པར་ཡོང་ངེས་ཡིན། གལ་ཏེ་འབྱུང་འགྱུར་མི་རབས་ཚོར་འདི་ལྟ་བུའི་སློབ་གསོ་ཡག་པོ་ཞིག་སྤྲད་ཐུབ་ན། ཁོང་ཚོས་འཛམ་གླིང་འདི་བཟང་ཕྱོགས་སུ་འགྱུར་ཐུབ་ངེས་རེད། ཅེས་སོགས་ཀྱི་བཀའ་སློབ་སྩལ་རྗེས་མང་ཚོགས་ཀྱི་དྲི་བར་བཀའ་ལན་སྩལ། དེ་ནས་མགོན་པོ་གང་ཉིད་མཆོག་བྷི་རེ་སི་སྦིན་ཁུལ་གྱི་མཛད་འཕྲིན་རྣམས་ལེགས་པར་གྲུབ་སྟེ་ཨོ་སི་ཊོ་ལི་ཡའི་གདོད་མའི་མི་རིགས་ཀྱི་ས་གནས་ཨུ་ལུ་རུར་ཆིབས་ཞལ་བསྒྱུར།།