༢༠༡༥ ཟླ་ ༦ ཚེས་ ༡༦ རེས་གཟའ་མིག་དམར།

༄༅། །ཕྱི་ལོ་ ༢༠༡༥ ཟླ་ ༦ ཚེས་ ༡༥ ཉིན་སུད་སིའི་རྒྱལ་ས་ཇི་ནི་ཝར་རྟེན་གཞི་བྱས་པའི་མཉམ་འབྲེལ་རྒྱལ་ཚོགས་ཀྱི་ཚོགས་ཁང་ཨང་དགུ་པའི་ནང་ཧིལ་སིན་ཀིན་བདེ་རྩ་ཚོགས་པ་ ( Helsinkin Foundation )དང་རྒྱལ་སྤྱིའི་བོད་དོན་ལས་འགུལ་ཁང་གིས་གོ་སྒྲིག་འོག་མནའ་མཐུན་རྒྱལ་ཁབ་ཁག་གི་སྐུ་ཚབ་དང་། རྒྱ་ནག་ཐེ་བའི་རྒྱལ་ཁབ་ཁག  ༡༣ གྱི་སྐུ་ཚབ། གཞུང་འབྲེལ་མིན་པའི་སྐུ་ཚབ་བཅས་ཁྱོན་མི་གྲངས་ ༥༠ ལྷག་ཙམ་ལྷན་འཛོམས་གནང་ཡོད།

དེ་ཡང་ཐེངས་འདིའི་ལྷན་ཚོགས་དེ་ནི་རྒྱལ་སྤྱིའི་འགྲོ་བ་མིའི་ཐོབ་ཐང་གི་ལྷན་ཚོགས་ཐེངས་ཉི་ཤུ་རྩ་དགུ་པ་དེ་ཡིན་ཞིང་། ལྷན་ཚོགས་དེའི་ཐོག་ཨ་རི་གཞུང་གི་བོད་དོན་དམིགས་བསལ་འབྲེལ་མཐུད་ལྕམ་སྐུ་ས་རཱ་སི་ཝལ་ (Sarah Sewall) མཆོག་དང་། སུད་སིར་བཅར་བཞུགས་ཨ་རི་གཞུང་གི་འགྲོ་བ་མིའི་ཐོབ་ཐང་གི་ཆེས་མཐོའི་སྐུ་ཚབ་ཆེན་མོ་དབུ་བཞུགས་ཀྱིས་བོད་དོན་དམ་བསྒྲགས་ཀྱི་གླེང་སྟེགས་ཞེས་པའི་ལྷན་ཚོགས་ཤིག་ཚོགས་པ་དང་བསྟུན། ཨ་རིའི་བོད་དོན་དམིགས་བསལ་འབྲེལ་འཐུད་མ་ལྕམ་སྐུ་ས་རཱ་སི་ཝལ་མཆོག་གིས་གསུང་བཤད་གནང་དོན། ཨ་མི་རི་ཀའི་གཞུང་ནས་སའི་གོ་ལའི་སྟེང་མང་གཙོ་དར་སྤེལ་དང་འགྲོ་བ་མིའི་ཐོབ་ཐང་སྲུང་སྐྱོབ་བྱེད་རྒྱུ་དེ་ནི་མདུན་དུ་ལྷག་པའི་ལས་འགན་ཞིག་ལ་ངོས་འཛིན་བྱེད་ཀྱི་ཡོད་ལ། དེ་བཞིན་བོད་དོན་འཐབ་བརྩོད་དེ་བཞིན་རྒྱ་ནག་གཞུང་གིས་དབང་བསྒྱུར་འོག་གདོད་མའི་མི་རིགས་ཤིག་གི་ངོ་བོའི་འཚོ་གནས་ཐུབ་མིན་ལ་ཐུག་པར་སོང་བློ་འཚབ་བྱ་དགོས་པའི་རང་བཞིན་ཞིག་ལ་ངོས་འཛིན་བྱེད་བཞིན་ཡོད། དཀའ་ངལ་དེ་དག་སེལ་ཐབས་ཆེད་༸གོང་ས་ཏཱ་ལའི་བླ་མ་མཆོག་གི་སྐུ་ཚབ་དང་ལྷན་དུ་གྲོས་མོལ་གྱིས་ལམ་ནས་བོད་ཀྱི་དཀའ་ངལ་སེལ་རྒྱུ་དེ་ནི་རྒྱ་ནག་གཞུང་གིས་གཡོལ་ཐབས་མེད་པ་ཞིག་ལ་ངོས་འཛིན་གྱིས་ཏེ་གོམ་པ་མདུན་སྤོས་བྱེད་དགོས་ཞེས་འགྲེལ་བརྗོད་གནང་བའི་རྗེས།

ཆབ་སྲིད་བཙོན་ཟུར་མགོ་ལོག་འཇིགས་མེད་ལགས་ཀྱིས་རྒྱ་ནག་གི་དབང་བསྒྱུར་འོག་རང་གི་ལུས་ཐོག་ཏུ་དཀའ་སྡུག་མྱངས་པའི་གནད་ལུགས་རྣམས་ངོ་སྤྲོད་གནང་བ་དང་སྦྲགས། རྒྱ་ནག་གཞུང་གིས་དུས་དང་རྣམ་པ་ཀུན་ཏུ་བོད་མིའི་ཐོག་སྡིག་པ་མིག་བཙུམ་གྱིས་་སྲིད་བྱུས་ལག་བསྟར་བྱས་ཀྱང་། བོད་མིའི་ངོས་ནས་འཚེ་བ་མེད་པའི་ལམ་ལ་གཞི་བཅོལ་ནས་རྒྱ་མི་གཅིག་ལའང་གནོད་འཚེ་བྱེད་མྱོང་མེད། དཔེར་ན་གཞི་ལུས་བོད་མིའི་ཁྲོད་ནས་ད་བར་མི་གྲངས་ ༡༤༠ ཡིས་རང་ལུས་མེར་སྲེག་བཏང་ནས་བོད་མིར་རང་དབང་དགོས་ཞེས་རྩོད་ལེན་བྱས་པ་དེ་ནི་གཞན་ལ་འཚེ་བ་མི་བྱེད་པའི་དཔང་རྟགས་གསལ་ཤོས་དེ་ཡིན་ཞེས་གསུངས་པ་དང་། རྒྱ་ནག་གི་སྐུ་ཚབ་པས་བརྗོད་དོན། རྒྱ་ནག་གཞུང་གིས་ཡང་དག་པའི་དབུ་ཁྲིད་འོག་བོད་མི་རྣམས་བདེ་སྐྱིད་ཡོད་ལུགས་འགྲེལ་བརྗོད་བྱས་པ་དང་། དེ་རྗེས་རྒྱ་ནག་གི་གནས་སྟངས་ཆ་རྒྱུས་ཡག་པོ་ཡོད་པའི་སི་རིན་རྒྱལ་ཁབ་ཀྱི་གསར་འགོད་པ་ཞིག་གིས་ངོས་རང་དེ་སྔོན་རྒྱ་ནག་ནང་གསར་འགྱུར་མཁོ་སྒྲུབ་ཆེད་ཐེངས་མང་ཕྱིན་པ་ཡིན། རྒྱ་ནག་གཞུང་གིས་སྲིད་བྱུས་ཐད་མྱོང་ཚོར་གཏིང་ཟབ་ཡོད། བོད་ནང་སྔར་མེད་ཀྱི་བདེ་སྐྱིད་ཕུན་སུམ་ཚོགས་པོ་དེ་འདྲ་ཡོད་ན་གསར་འགོད་པ་རྣམས་རང་དབང་ངང་ནས་བཏང་ན་བཤད་པ་བརྒྱ་ལས་མཐོང་བ་གཅིག་ལྷག་གི་རེད། ཅེས་འགྲེལ་བརྗོད་གནང་བ་དང། མཇུག་ཏུ་ཡུ་རོབ་མནའ་མཐུན་རྒྱལ་ཁབ་ཀྱི་སྐུ་ཚབ་པས་རྒྱ་ནག་གཞུང་གིས་བོད་ནང་འགྲོ་བ་མིའི་ཐོབ་ཐང་མུ་མཐུད་རྡོག་རོལ་གཏོང་བཞིན་པའི་བྱ་སྤྱོད་དེར་ང་ཚོ་བློ་འཚབ་ཡོད། ཅེས་གསུངས་པ་དང་། ཐེངས་དེའི་ལྷན་ཚོགས་སྐབས་འཐུས་མི་མང་ཆེ་བས་གཅིག་མཇུག་གཉིས་མཐུད་ཀྱིས་འགྲོ་བ་མིའི་ཐོབ་ཐང་གི་ཐོག་ལ་ཐུགས་འཚབ་ཡོད། ཅེས་སོགས་གླེང་སློང་ཚ་ཚ་འུར་འུར་དང་བཅས་ཐེངས་དེའི་ལྷན་ཚོགས་མཇུག་སྒྲིལ་གནང་ཡོད་འདུག །