༢༠༡༥ ཟླ་ ༦ ཚེས་ ༢༤ རེས་གཟའ་ལྷག་པ།
༄༅། །འདི་གར་ཤེས་རིག་ལས་ཁུངས་ནས་བཏང་གནས་ནང་འཁོད་དོན། ཤེས་རིག་ལས་ཁུངས་ནས་འདི་ལོ་ཡང་དབུས་བོད་མིའི་སྒྲིག་འཛུགས་ཁྱབ་ཁོངས་དགེ་རྒན་རྣམ་པ་དང༌། བོད་མིའི་སྒྲིག་འཛུགས་ཀྱི་སྲི་ཞུ་ལས་བྱེད་རྣམ་པ། དེ་བཞིན་འཛིན་རིམ་བཅུ་གཉིས་ཐོན་རྗེས་མུ་མཐུད་མཐོ་སློབ་ཏུ་བསྐྱོད་རྒྱུའི་གོ་སྐབས་མ་ཐོབ་པའི་རང་རིགས་ན་གཞོན་བོུ་དང་བུ་བཅས་ལ་སོ་སོའི་ཤེས་ཚད་གོང་མཐོར་གཏོང་ཐབས་ཆེད་དམིགས་ཡིག་འགྲུལ་ལམ་ནས་སློབ་གཉེར་བྱ་འདུན་ཡོད་རིགས་ལ་གཤམ་གསལ་སློབ་ཡོན་གྲངས་ ༥༥ ཐམ་པ་གསར་དུ་གནང་གཏན་འཁེལ་སོང་བའི་འདོད་མོས་ཡོད་རིགས་ནས་འདི་ལས་སུ་འཚང་སྙན་དུས་ཐོག་འབུལ་དགོས་པའི་གསལ་བསྒྲགས་ཞུ་རྒྱུ་ཡིན།
སློབ་ཡོན་གྱི་ཆ་བགོས་གཤམ་གསལ་ལྟར་དང་སློབ་ཡོན་དངུལ་འབབ་མི་རེར་སྒོར་ ༡༠༠༠༠ རེ་གནང་རྒྱུ་ཡིན།
སྡེ་ཚན། ཀ༽ དབུས་བོད་མིའི་སྒྲིག་འཛུགས་ཀྱི་ཁྱབ་ཁོངས་སློབ་གྲྭའི་བོད་རིགས་དགེ་རྒན་རྣམ་པའི་ཆེད་སློབ་ཡོན་གྲངས་ ༢༥ ཡོད། སློབ་གཉེར་བྱ་བློ་ཡོད་རིགས་ནས་སོ་སོའི་འབྲེལ་ཆགས་སློབ་གྲྭའི་འཛིན་སྐྱོང་ནས་དགག་ཆ་མེད་པའི་ངོས་སྦྱོར་ཞུ་འབུལ་དགོས་རྒྱུ། ངོས་སྦྱོར་ནང་ཞབས་ལོའི་དུས་ཡུན་གསལ་འཁོད་ཐོག་དོ་བདག་གི་དང་བླངས་དཔྱ་ཁྲལ་ཕོགས་འབབ་ ༢༠༡༤ ཟླ་ ༡༢ བར་ཕུལ་ཟིན་པའི་འབྲེལ་ཡོད་རང་བདེན་ཚོགས་ཆུང་ནས་དེ་འབྲེལ་ངོས་སྦྱོར་ཞུ་འབུལ་དགོས་རྒྱུ།
ཁ༽ དབུས་བོད་མིའི་སྒྲིག་འཛུགས་ཁྱབ་ཁོངས་ལས་བྱེད་འདེམས་ལྷན་གྱི་བསྐོ་བཞག་བྱས་པའི་ལས་བྱེད་ངོ་མ་དང་ཟུར་འཇོག་ས་མིག་ཐོག་ཡོད་པའི་རང་ཁོངས་ལས་བྱེད་རྣམས་ནས་ཉེ་བའི་གཙུག་ལག་རབ་འབྱམས་པ་དང་གཙུག་ལག་རབ་འབྱམས་པའི་(Bachelor/Master degree) སློབ་ཚན་ཆེད་སློབ་ཡོན་གྲངས་ ༡༠ ཡོད། སློབ་གཉེར་བྱ་བློ་ཡོད་རིགས་ནས་སོ་སོའི་ལས་ཁུངས་ནས་དགག་ཆ་མེད་པའི་ངོས་སྦྱོར་ཞུ་འབུལ་དགོས། ངོས་སྦྱོར་ནང་ཞབས་ལོ་དུས་ཡུན་གསལ་འཁོད་དགོས་རྒྱུ།
ག༽ ད་བར་འཛིན་རིམ་བཅུ་གཉིས་ཐོན་ཡང་མཐོ་སློབ་ཏུ་བསྐྱོད་མ་ཐུབ་པར་བར་ལྡིང་དུ་ལུས་པའི་སློབ་ཕྲུག་བུ་མོ་ ༡༠ དང་བུ་ ༡༠ བཅས་ལ་ཉེ་བའི་གཙུག་ལག་རབ་འབྱམས་པའི་སློབ་ཚན་ཆེད་སློབ་ཡོན་གྲངས་བསྡོམས་ ༢༠ ཡོད། སྡེ་ཚན་འདི་ཐོག་ཞུགས་བློ་ཡོད་རིགས་ནས་གཤམ་གསལ་ཡིག་ཆ་ཁག་སྙན་ཞུའི་མཉམ་འབུལ་དགོས་རྒྱུ།
༡། འཛིན་རིམ་བཅུ་པ་དང༌། བཅུ་གཉིས་བཅས་ཀྱི་ཡིག་རྒྱུགས་གྲུབ་འབྲས་ཨང་ཤོག་ (Marks card) ངོ་བཤུས། ༢། དོ་བདག་ནས་དང་བླངས་དཔྱ་དངུལ་ཕྱི་ལོ་ ༢༠༡༤ ཟླ་ ༡༢ བར་གཙང་ཕུལ་ཟིན་པའི་ལག་དེབ་ ཀྱི་ངོ་བཤུས། ༣། རྒྱ་གར་སྐྱབས་བཅོལ་ལག་དེབ་ཐོག་ཁྲིམས་མཐུན་དུས་འགྱངས་བཀའ་འཁྲོལ་ཞུས་པའི་ངོ་བཤུས། གལ་ཏེ་ ལག་དེབ་དུས་འགྱངས་ཞུ་ཆེད་བཏང་ཟིན་པ་ཡིན་ཚེ་འབྲེལ་ཡོད་ལས་ཁུངས་ནས་བྱུང་འཛིན་ངོ་བཤུས་སམ་ གནས་ཡུལ་ས་གནས་འགོ་འཛིན་གྱི་ངོས་སྦྱོར་གང་རུང་དགོས། ༤། བལ་ཡུལ་དང་འབྲུག་ཁུལ་ནས་འཚང་སྙན་འབུལ་མི་དང༌། ཀ་རྡོར་སྒང་གསུམ། རྒྱ་གར་བྱང་ཤར་མཐའ་མཚམས་ས་ཁུལ་ཁག་ཅིག་ཏུ་ཡོད་པའི་བོད་རིགས་འཁྲུལ་མེད་ཡིན་པ་གང་ཞིག་ལ་སྐྱབས་བཅོལ་ལག་དེབ་མེད་པའི་སྡེ་ཁག་ཅིག་ལ་དམིགས་བསལ་གཏོང་རྒྱུ་ཡིན་པའི་བོད་མི་སྐྱབས་བཅོལ་བའི་སྒྲིག་ཁོངས་ཡིན་པ་འབྲེལ་ཡོད་ས་གནས་འགོ་འཛིན་ནས་ངོས་སྦྱོར་འབུལ་དགོས།
ཐུགས་སྣང་དགོས་པའི་གནད་དོན་གཞན་ཁག
༡། དགོས་མཁོའི་ཡིག་ཆ་ཁག་གི་ངོ་བཤུས་སྟེང་ས་གནས་འགོ་འཛིན་ནམ་དབུས་བོད་མིའི་སྒྲིག་འཛུགས་ཀྱི་ཟུང དྲུང་ཡན་གྱི་སྲི་ཞུ་ལས་བྱེད་ནས་ཞིབ་གཤེར་དག་མཆན་བཀོད་དགོས།
༢། སོ་སོའི་འཚང་སྙན་དང་ཡིག་ཆ་ཁག ༢༠༡༥ ཟླ་ ༩ ཚེས་ ༡༥ འགྱངས་མེད་འདི་གར་འབུལ་འབྱོར་ཐུབ་དགོས།
༣།སྡེ་ཚན་ཀ༽ དང་ཁ༽གཉིས་ཀྱི་འཚང་སྙན་འབུལ་མཁན་གྱི་ཞབས་ལོ་མཐོ་རིམ་གཞིར་བཟུང་འདེམས་སྒྲུག་གནང་རྒྱུ།
༤། སྡེ་ཚན་ག༽པའི་སློབ་ཕྲུག་སོ་སོའི་ཡིག་རྒྱུགས་གྲུབ་འབྲས་ལྟར་བརྒྱ་ཆ་རྩེ་བཏོག་གིས་འདེམས་སྒྲུག་གནང་རྒྱུ།
༥། འཚང་སྙན་དུས་ཐོག་མ་འབྱོར་བ་དང༌། ཆ་རྐྱེན་མ་ཚང་བའི་རིགས་ལ་ངོས་བཞེས་གནང་རྒྱུ་མིན།
༦། འདི་ནས་དོ་བདག་སོ་སོར་དུས་ཐོག་གནས་འབྲེལ་ཐུབ་རྒྱུའི་སླད་ཞུ་སྙན་ནང་གནས་འབྲེལ་བྱ་ཡུལ་ཁ་བྱང་དང༌། གློག་འཕྲིན། ཁ་པར་ཨང་སོགས་ཁ་གསལ་འགོད་དགོས་པ་བཅས། ཤེས་རིག་ལས་ཁུངས་ནས་ཕྱི་ལོ་ ༢༠༡༥ ཟླ་ ༦ ཚེས་ ༢༣ ལ།།
འབྲེལ་གཏུག་བྱ་ཡུལ་ཁ་བྱང༌།
Secretary
Department of Education
Central Tibetan Administration
Gangchen Kyishong
Dharamsala – 176 215
Dist. Kangra
Himachal Pradesh, India Ph: 01892 – 226695, 222572, 222721
Email: [email protected]
Website: www.sherig.org/www.lamton.org
