༢༠༡༥ ཟླ་ ༦ ཚེས་ ༦ རེས་གཟའ་སྤེན་པ།
༄༅། །འདི་གར་བོད་མིའི་སྒྲི
ག་འཛུགས་ཀྱི་ཆེས་མཐོའི་ཁྲིམས་ཞིབ་ཁང་ནས་ཕྱི་ལོ་ ༢༠༡༥ ཟླ་ ༦ ཚེས་ ༦ ཉིན་བཏང་གནས་ནང་འཁོད་དོན།
བྱང་ཕྱོགས་ས་གནས་ཁྲིམས་ཞིབ་པ་རྣམ་རྒྱལ་ཚེ་སྐྱིད་ལགས་ཀྱིས། ཕྱི་ལོ་ ༢༠༡༥ ཟླ་ ༥ ཚེས་ ༢༧ རེས་གཟའ་ལྷག་པའི་ཉིན་བོན་གཞིས་ཌོ་ལན་ཇི་ས་གནས་འཐུས་ཚོགས་སྐབས་བརྒྱད་པའི་འཐུས་མི་ ༡༡ དང། དེ་དག་གི་ཁོངས་ནས་བདམས་ཐོན་བྱུང་བའི་ཚོགས་གཙོ། ཚོགས་གཞོན་བཅས་ཀྱི་ལས་འཁུར་དམ་བཅའ་འབུལ་བཞེས་ཀྱི་གནང་སྒོ་ཁག་ལེགས་གྲུབ་བྱུང་འདུག
དེ་སྔོན་དབུས་འོས་བསྡུ་ལས་ཁང་བརྒྱུད་ཞུ་སྐུལ་བྱུང་བ་བཞིན་འཐུས་མི་རྣམ་པའི་ལས་ཁུར་དམ་འབུལ་མཛད་སྒོ་ཕྱི་ལོ་ ༢༠༡༥ ཟླ་ ༥ ཚེས་ ༡༤ ཉིན་གནང་རྒྱུར་བྱང་ཕྱོགས་ས་གནས་ཁྲིམས་ཞིབ་པ་རྣམ་རྒྱལ་ཚེ་སྐྱིད་ལགས་ས་གནས་སུ་ངོ་བསྐྱོད་བྱས་ཡོད་ཀྱང་། འཐུས་མི་ངོ་འཛོམས་བྱུང་མིན་དབང་གིས་དམ་འབུལ་དུས་འགྱངས་བྱེད་དགོས་བྱུང་འདུག་པ་དང་།
སྐབས་དེར་བྱང་ཕྱོགས་ས་གནས་ཁྲིམས་ཞིབ་པས་ཕྱོགས་བསྐྱོད་དང་སྟབས་བསྟུན་ཕྱི་ཚེས་ ༡༤ ཉིན་རྒྱབ་ཆུ་ཚོད་ ༢།༠༠ ནས་ ༣།༠༠ བར་ཌོ་ལན་ཇི་སེར་སྐྱ་མི་མང་ ༣༥ ཙམ་ལ་བཙན་བྱོལ་བོད་མིའི་ཁྲིམས་ལུགས་དབང་འཛིན་ངོ་སྤྲོད་དང་སྦྲགས། ཁྲིམས་ལུགས་དབང་འཛིན་གྱི་ངོ་བོ་དང། འགན་དབང། གྲུབ་ཆ། ཁྲིམས་ཁོངས་ཁྱབ་ཚད། གྱོད་ཡའི་མོས་མཐུན་ཆོད་ཡིག ལག་བསྟར་དམ་ཡིག གཞི་རྩའི་ཆ་རྐྱེན། བྱེད་ཐབས་ཇི་ཡོད། གྱོད་ཡ་ཉམས་ཐག་ལ་མཐུན་རྐྱེན། ཞུ་རྩ་དང་ཞུ་ལན་བཟོ་ཕྱོགས། ཁྲིམས་རྩོད་པའི་སྦྱོང་བརྡར་དང་བསྐྱར་སྦྱོང་བཅས་ཀྱི་སྐོར་ངོ་སྤྲོད་གསུང་བཤད་དང། དྲི་བ་ཁག་ལ་ལན་འདེབས་གནང་ཡོད་པ་བཅས།།
