༢༠༡༥ ཟླ་ ༦ ཚེས་ ༢༢ རེས་གཟའ་ཟླ་བ།
༄༅། །བོད་རྒྱལ་ལོ་ ༢༡༤༢ བོད་ཟླ་ ༥ ཚེས་ ༥ ཕྱི་ལོ་ ༢༠༡༥ ཟླ་ ༦ ཚེས་ ༢༡ ཉིན་རྡ་ས་ཐེག་ཆེན་ཆོས་གླིང་གཙུག་
ལག་ཁང་གི་གསུང་ཆོས་རྭ་བར་དབུས་བོད་མིའི་སྒྲིག་འཛུགས་ཀྱི་གྱ་སྟོན་གོ་སྒྲིག་ཚོགས་ཆུང་གིས་གོ་སྒྲིག་གནང་ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་འདི་ལོ་བོད་ལུགས་ལྟར་དགུང་གྲངས་བརྒྱད་ཅུར་ཕེབས་པའི་༸སྐུའི་གྱ་སྟོན་གྱི་གཞུང་འབྲེལ་མཛད་སྒོ་གཟབ་རྒྱས་ངང་ཚོགས་ཡོད། དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༨ ཐོག་སྲིད་སྐྱོང་བློ་བཟང་སེངྒེ་མཆོག་དང་། དགའ་ལྡན་ཁྲི་པ་སྐྱབས་རྗེ་རི་རྫོང་རིན་པོ་ཆེ་མཆོག བཀའ་ཟུར་ཀིརྟི་རིན་པོ་ཆེ་མཆོག་བཅས་རྣམ་གསུམ་གྱིས་སྤོས་སྣེས་སྔོན་བསུས་ཏེ་གདན་ཞུས་ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བཞུགས་ཁྲི་རིན་པོ་ཆེར་༸ཞབས་སོར་འཁོད་པ་དང་། གཙུག་ལག་ཁང་གི་རྟེན་མཆོག་སྤྱན་སྔའི་དྲུང་དུ་ཆོས་བརྒྱུད་ཆེན་པོ་བཞི་དང་གཡུང་དྲུང་བོན་བཅས་པའི་བསྟན་བདག་བླ་ཆེན་རྣམ་པའི་དབུས་སུ་དབུས་བོད་མིའི་སྒྲིག་འཛུགས་དང་། རི་བོ་དགེ་ལྡན་པ། མདོ་སྨད་ཆོལ་ཁ་བཅས་ཀྱིས་བརྟན་བཞུགས་བསྟར་འབུལ་ཞུས་ཡོད།
དེ་ཡང་བརྟན་བཞུགས་ཀྱི་རྡོ་རྗེ་སློབ་དཔོན་འཁོན་རིགས་བསྟན་པའི་གཙུག་རྒྱན་དཔལ་ས་སྐྱ་གོང་མ་བདག་ཁྲི་རིན་པོ་ཆེ་མཆོག་གིས་༸གོང་ས་ལྔ་པ་ཆེན་པོས་དག་སྣང་གསང་བ་རྒྱ་ཅན་གྱི་ཆོ་གའི་སྒོ་ནས་མགོན་པོ་གང་ཉིད་མཆོག་ལ་བོད་ལྗོངས་ལྷ་སྡེ་མི་སྡེ་ཡོངས་ཀྱིས་དད་གདུང་དྲག་པོས་གང་ཉིད་སྐུ་ཚེ་མི་འཇིགས་རྡོ་རྗེའི་ཁམས་སུ་བརྟན་པའི་བརྟན་བཞུགས་བསྟར་འབུལ་ཞུས། ཐེངས་འདིའི་མཛད་སྒོའི་ཐོག་ས་དགེ་བཀའ་རྙིང་བོན་དང་བཅས་པའི་རིས་སུ་མ་ཆད་པའི་ཆོས་བརྒྱུད་ཁག་གི་དབུ་འཛིན་བླ་ཆེན་རྣམ་པས་གཙོས་མཁན་ལས་ཟུར་རྣམ་པ་དང་། ༸སྐུའི་གྱ་སྟོན་གྱི་སྐུ་མགྲོན་གཙོ་བོ་རྒྱ་གར་དབུས་གཞུང་གི་རིག་གཞུང་དང་ཡུལ་སྐོར་སྤྲོ་འཆམ་གྱི་བློན་ཆེན་སྐུ་ཞབས་མ་ཧེ་ཤི་ཤརྨ་མཆོག ཆེད་བསྟོད་སྐུ་མགྲོན་དུ་རྒྱ་གར་དབུས་གཞུང་གི་ནང་སྲིད་བློན་ཆེན་སྐུ་གཞོན་ཀི་རིན་རི་ཇུ་ཇི་མཆོག ཨ་རུ་ན་ཅལ་མངའ་སྡེའི་སྤྱི་ཁྱབ་བློན་ཆེན་མཆོག་དང་སྐུ་ཚབ། རྒྱ་གར་དབུས་གྲོས་ཚོགས་ཀྱི་འཐུས་མི། ཕྱི་རྒྱལ་ཡུལ་གྲུ་ཁག་ནས་ཆེད་དུ་བཅར་བའི་སྐུ་མགྲོན། ཁྲིམས་ཞིབ་པ་ཆེ་བས་གཙོས་ཁྲིམས་ཞིབ་པ་གཞན་གཉིས། བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེངྒེ་མཆོག་གིས་གཙོས་བཀའ་བློན་རྣམ་པ། སྤྱི་འཐུས་ཚོགས་གཙོ་སྦྲེལ་པོ་མཆོག་གིས་གཙོས་སྤྱི་འཐུས་རྣམ་པ། མང་གཙོའི་ཀ་བ་གསུམ་གྱི་མཛད་གཙོ་རྣམ་པ། ལྷན་ཁང་ཁག་གི་དྲུང་ཆེ་དང་སྲི་ཞུ་བ། ཁྱབ་ཁོངས་འབྲེལ་ཡོད་ཁག ཡབ་གཞིས་སྐུ་འཁོར་ལྷན་རྒྱས། དགོན་པ་གྲྭ་ཚང་ཁག་གི་མཁན་བླ་སྤྲུལ་གྲྭ་བཙུན་རྣམ་པ། གྲ་སྒྲིག་ཚོགས་ཆུང་གི་འབྲེ
ལ་ཡོད་ལས་ཁུངས་ཁག
དེ་བཞིན་ཕྱི་ནང་ཡུལ་གྲུ་གང་ས་ནས་བཅར་བའི་མི་མང་སྟོང་ཚོ་མང་པོའི་དབུས་༸སྐུའི་གྱ་སྟོན་གྱི་མཛད་སྒོ་དགའ་དགའ་སྤྲོ་སྤྲོའི་ངང་ནས་སྲུང་བརྩི་གཟབ་རྒྱས་ཞུས་ཡོད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༡༠།༣༠ ཐོག་མཛད་སྒོའི་ཐོག་མར་མ་སུ་རི་བོད་ཁྱིམ་སློབ་གྲྭའི་རོལ་ཆའི་རུ་ཁག་ནས་རོལ་དབྱངས་གཟིགས་འབུལ་ཞུས་པ་དང་སྦྲགས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དབུས་པའི་བླ་ཆེན་རྣམ་པ་དང་མཛད་གཙོ་རྣམ་པ། སྐུ་མགྲོན་རྣམ་པ་བཞུགས་གྲལ་དུ་འཁོད་མཚམས། བོད་ཀྱི་ཟློས་གར་ཚོགས་པས་གངས་རི་ར་བས་བསྐོར་བའི་གསོལ་འདེབས་དབྱངས་སྙན་དང་བཅས་ཏེ་གསུང་འདོན་གནང་། དེ་ནས་ཨ་རུ་ན་ཅལ་མངའ་གཞུང་གིས་༸གོང་ས་མཆོག་གི་རླབས་ཆེན་མཛད་འཕྲིན་ལ་ཆེ་བསྟོད་ཚུལ་དུ་སྟོན་པ་ཤཱཀྱ་ཐུབ་པའི་སྐུ་བརྙན་དང་། ཆེད་བསྟོད་ཀྱིས་གཟེངས་རྟགས་འབུལ་ལམ་ཞུས། སྐུ་མགྲོན་རྣམ་པས་༸གོང་ས་མཆོག་དགུང་གྲངས་བརྒྱད་ཅུར་ཕེབས་པའི་༸སྐུའི་འཁྲུངས་སྐར་ལ་འཚམས་འདྲི་ཞུ་བ་དང་སྦྲགས་གང་ཉིད་ཀྱི་རླབས
་ཆེན་གྱི་མཛད་འཕྲིན་ཁག་ལ་བསྔགས་བརྗོད་ཀྱི་ཤིས་ཚིག་མེ་ཏོག་ལན་བརྒྱར་ཕུལ་བ་དང་། མདོ་སྟོད། མདོ་སྨད་དབུས་གཙང་བཅས་ཆོལ་ཁ་གསུམ་གྱི་གཞས་སྣ་གཟིགས་འབུལ་ཞུས་པ་དང་། བོད་ཀྱི་ཟློས་གར་ཚོགས་པས་གྱ་སྟོན་ལ་བསྟོད་པའི་གླུ་དབྱངས་ཕུལ།
དེ་རྗེས་སྐུ་མགྲོན་གཙོ་བོ་མཆོག་གིས་གསུང་བཤད་གནང་བ་དང་། སྲིད་སྐྱོང་མཆོག་གིས་༸རྒྱལ་བའི་བཀའ་དྲིན་རྗེས་དྲན་དང་འབྲེལ་བའི་འཚམས་འདྲིའི་གསུང་བཤད་གནང་གྲུབ་མཚམས། ༸གོང་ས་༸སྐྱབས་མགོན་ཆེན་པོ་མཆོག་གིས་མང་ཚོགས་ལ་བཀའ་སློབ་བཀའ་དྲིན་སྩལ། མཐར་དབུས་བོད་མིའི་སྒྲིག་འཛུགས་གོ་སྒྲིག་ཚོགས་ཆུང་གི་ཚོགས་གཙོ་དྲིལ་བསྒྲགས་དྲུང་ཆེ་བཀྲ་ཤིས་ཕུན་ཚོགས་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་གྲུབ་བསྟུན་ཉིན་དགུང་ལྗགས་སྨིན་འདེགས་འབུལ་ཞུས་ཏེ་༸གོང་ས་མཆོག་གིས་དབུས་པའི་སྐུ་མགྲོན་དང་མི་མང་བཅས་གསོལ་ཚིག་ལྷན་དུ་དགྱེས་བཞེས་ཀྱི་སྐལ་བཟང་གི་དགའ་སྟོན་ལ་རོལ་པ་བཅས་ཉིན་དེའི་ལོ་རྒྱུས་རང་བཞིན་གྱི་མཛད་སྒོ་རྒྱས་པར་གྲུབ།
གཞན་ཡང་དཔལ་ལྡན་སྲིད་སྐྱོང་མཆོག་གིས་བཀོ
ད་མངགས་དང་ལམ་སྟོན་འོག་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་ ༨༠ ཕེབས་པའི་༸སྐུའི་འཁྲུངས་སྐར་གྱ་སྟོན་གྱི་དམིགས་བསལ་མཛད་སྒོ་གོ་སྒྲིག་ཚོགས་ཆུང་ཟུར་འཛུགས་ཀྱི་ཚོགས་གཙོ་དྲིལ་བསྒྲགས་དྲུང་ཆེ་བཀྲ་ཤིས་ཕུན་ཚོགས་ལགས་དང་། ཚོགས་མི་བདེ་སྲུང་དྲུང་ཆེ་བླ་བྲང་འཕགས་པ་ཚེ་རིང་ལགས། ཆོས་རིག་དྲུང་འཕར་བསྟན་འཛིན་ལུང་རྟོགས་ལགས་བཅས་ནས་འགན་ཁུར་གཙོ་བཞེས་ཐོག་ཐེངས་འདིའི་གཞུང་འབྲེལ་གྱ་སྟོན་མཛད་སྒོ་གོ་སྒྲིག་འཐུས་གཙང་གཟབ་རྒྱས་ཞུས་ཡོད། དེ་བཞིན་ཐེངས་འདིའི་ཕྱི་རྒྱལ་སྐུ་མགྲོན་རྣམས་པར་འབྲེལ་ལམ་གནང་མཁན་སྲིད་སྐྱོང་ལས་ཁུངས་ཀྱི་དྲུང་འཕར་བསོད་ནམས་བསྟན་འཛིན་ལགས་ནས་ཀྱང་ལས་དོན་འཐུས་གཙང་ཞུས་འདུག་པ་བཅས། །
