༢༠༡༥ ཟླ་ ༦ ཚེས་ ༢༣ རེས་གཟའ་མིག་དམར།
༄༅། །ཕྱི་ལོ་ ༢༠༡༥ ཟླ་ ༦ ཚེས་ ༢༢ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་གྱ་སྟོན་གྱི་མཛད་སྒོ་ཉིན་གཉིས་པར་ཆེད་དུ་ཆིབས་སྒྱུར་སྐྱངས་པའི་ཆོས་བརྒྱུད་ཆེན་པོ་བཞི་དང་གཡུང་དྲུང་བོན། ཇོ་ནང་བཅས་ཀྱི་བླ་ཆེན་བསྟན་བདག་རྣམ་པ་དང་། སྐུ་ཚབ་རྣམ་པ་བཅས་ཀྱིས་༸གོང་ས་མཆོག་གི་༸སྐུའི་གྱ་སྟོན་ལ་འཚམས་འདྲིའི་གསུང་བཤད་ཁག་སོ་སོར་གནང་བའི་ནང་སྒྲུབ་བརྒྱུད་བསྟན་པའི་མངའ་བདག་དཔལ་རྒྱལ་བ་ཀརྨ་པ་མཆོག་གིས་༸སྐུའི་གྱ་སྟོན་མཛད་སྒོའི་སྟེང་གསུང་བཤད་གནང་དོན། ༸གོང་ས་མཆོག་གི་༸སྐུའི་གྱ་སྟོན་གྱི་མཛད་སྒོར་ཆེད་དུ་ཆིབས་སྒྱུར་བསྐྱངས་པའི་༸གོང་ས་མཆོག་གི་དབུས་པའི་སྐུ་མགྲོན་དང་མི་མང་ཡོངས་རྫོགས་ལ་འཚམས་འདྲི་ཞུས་པ་དང་སྦྲགས་གསུང་དོན། ནམ་རྒྱུན་སྐུ་མདུན་དབུ་བཞུགས་སྐབས་ངོས་རང་སྐད་ཆ་ཤོད་རྒྱུར་འཚེར་ཏེ་སྐད་ཆ་ཁ་ནས་ཐོན་ཁག་པོ་བྱེད་ཀྱི་འདུག དེ་རིང་སྐུ་མདུན་གྱི་བྱིན་རླབས་ཞུས་ཏེ་བློ་ཁོག་ཕྲན་བུ་སྐྱེས་ནས་ཞུ་རྒྱུ་ཡིན། ཞེས་དང་། ༸གོང་ས་༸སྐྱབས་མགོན་ཆེན་པོ་མཆོག་གིས་དགུང་ལོ་ཆུང་ངུའི་དུས་ནས་བསྟན་པ་དང་འགྲོ་བའི་དོན་དུ་འགན་ཁུར་བཞེས་གནང་མཛད་པ་དང་། ལྷག་པར་དགུང་ལོ་བཅུ་དྲུག་ནས་བཟུང་སྟེ་བོད་ཀྱི་རྒྱལ་སྲིད་ཆོས་སྲིད་ཀྱི་འགན་ཁུར་ཆ་ཚང་མཛད་ཐོག ཉིན་མཚན་དབྱེར་མེད་སྐུ་ངལ་ཧ་ཅང་ཆེན་པོ་ཞིག་བསྐྱོན་ཡོད་པ་དེ་ང་ཚོ་ཚང་མས་མཁྱེན་གསལ་རེད། སྤྱིར་རྒྱལ་སྲིད་ཆོས་སྲིད་ཀྱི་འགན་བཞེས་ཞེས་བཤད་སྐབས་མཚན་རྫིག་པོ་འདྲ་ཞིག་ཡོད་རེད་དེ། སྐབས་དེ་དུས་བོད་ཀྱི་གནས་སྟངས་དེ་ཧ་ཅང་ཛ་དྲག་ཞིག་དང་། མགོན་པོ་གང་ཉིད་མཆོག་སྐུ་ལས་ཧ་ཅང་ཁག་པོ་ཞིག་ཆགས་ཡོད་པའི་གནས་སྐབས་དེར། ༸རྒྱལ་བ་རིན་པོ་ཆེ་མཆོག་གིས་དགུང་ལོ་གཞོན་གཞོན་དེ་འདྲ་ཞིག་གི་ཐོག་ནས་ཐུགས་འགན་དེ་འདྲ་ཞིག་བཞེས་དགོས་པ་ཆགས་པ་རེད།
སྐབས་དེ་དུས་ཐུགས་འཚབ་དང་སྐུ་ངལ་ག་ཚོད་ཅིག་ཡོད་པ་དེ་ང་ཚོ་སྤྱིར་བཏང་གི་མི་ཚོས་བཤད་ཐུབ་རྒྱུར་དཀའ་ལས་ཁག་པོ་རེད། དེ་ཡང་བོད་དུ་སྔར་ལོ་རྒྱུས་ཐོག་བྱུང་མྱོང་མེད་པའི་འགྱུར་ལྡོག་ཆེན་པོ་ཞིག་བྱུང་ནས། བོད་མི་ཚང་མ་གཞིས་བྱེས་གཉིས་སུ་གྱར། ལྷག་པར་༸སྐུ་མདུན་མཆོག་བོད་དུ་བཞུགས་མ་ཐུབ་པར་བཙན་བྱོལ་དུ་ཕེབས་དགོས་པའི་གནས་སྟངས་ཆགས་པ་རེད། གང་ལྟར་སྐུ་ངལ་ཆེན་པོ་ཞིག་གི་འོག་ད་ལྟའི་བར་དུ་སྐུ་ངལ་འཛེམས་མེད་ཀྱི་ཐོག་ནས་ཕྱག་ལས་མཛད་པ་ཡིན་དུས། ཐུགས་རྗེ་ཆེ་ཞེས་ཞུས་པ་ཙམ་གྱིས་མཚོན་ཐུབ་རྒྱུ་ཞིག་གང་ཡང་མེད་པའི་བཟོ་འདྲ་བོ་ཞིག་རེད། ཡིན་ནའང་དེ་རིང་གི་གོ་སྐབས་འདི་དང་བསྟུན་ནས་ད་ལྟའི་བར་དུ་སྤྱིར་འཛམ་གླིང་དང་ཡང་སྒོས་བོད་གངས་ཅན་ལྗོངས་ཀྱི་བསྟན་པ་དང་འགྲོ་བའི་དོན་དུ། སྐུ་གསུང་ཐུགས་ཀྱི་ངལ་བ་ཁྱད་གསོད་མཛད་པ་དེ་ལ་སྙིང་ཐག་པ་ནས་བཀའ་དྲིན་ཆེ་ཐུགས་རྗེ་ཆེ་ཞུ་རྒྱུ་ཡིན། ༸སྐུ་མདུན་མཆོག་གི་སྐུ་གསུང་ཐུགས་ཀྱི་མཛད་འཕྲིན་དང་སྐུ་ཆེ་བའི་ཡོན་ཏན་དེ་ཚོ་བཤད་དགོས་རྒྱུ་མེད་པ་གསལ་པོ་གསལ་རྐྱང་ཆགས་ཡོད་པ་ཡིན་སྟབས། ངས་མང་པོ་ཞིག་ཞུས་པ་ཡིན་ནའང་ཆོ་གང་ཡང་མཐོང་གི་མི་འདུག གལ་ཆེ་ཤོས་དེ་༸གོང་ས་མཆོག་དགུང་ལོ་བརྒྱད་ཅུར་ཕེབས་ཀྱི་ཡོད་པ་དང་། སྐབས་འདིར་གྱ་སྟོན་འདི་འདྲ་ཞིག་གོ་སྒྲིག་བྱས་ཐུབ་པ་དེ་ལ་མདོ་སྨད་གོ་སྒྲིག་ཚོགས་ཆུང་ལ་ཐུགས་རྗེ་ཆེ་ཞུ་རྒྱུ་ཡིན། ༸གོང་ས་མཆོག་ལ་མཆོད་པ་ཕུལ་རྒྱུ་ཡག་ཤོས་དེ་མགོན་པོ་གང་ཉིད་ཐུགས་དགྱེས་རྒྱུ་དེ་རེད། དེ་འདྲ་ཡིན་དུས་མགོན་པོ་གང་ཉིད་མཆོག་གིས་གང་གསུངས་པའི་དགོངས་གཞི་དེ་ང་རང་ངོས་ནས་གང་ཐུབ་ཅི་ཐུབ་དང་། ནུས་པས་གང་ལྕོགས་ཀྱིས་དགོངས་བཞེས་གང་ཡོད་པ་དེ་འགྲུབ་ཐུབ་པ་དེ་འདྲ་ཞིག་བྱུང་པ་ཡིན་ན། ༸སྐུ་མདུན་ཐུགས་དགྱེས་རྒྱུའི་རྒྱུ་ཡག་པོ་ཡོང་གི་རེད་བསམ་གྱི་འདུག ང་རང་ངོས་ནས་ཡིན་ནའང་༸སྐུ་མདུན་ཐུགས་དགྱེས་རྒྱུ་མ་གཏོགས། ཐུགས་མི་དགྱེས་པའི་ལས་ཀ་ཕྲ་མོ་ཙམ་ཡང་མི་ཡོང་བའི་སྨོན་འདུན་ཞུ་གི་ཡོད། མ་འོངས་པར་༸གོང་ས་མཆོག་དགུང་གྲངས་དགུ་ཅུར་ཕེབས་སྐབས། ༸སྐུའི་དགུ་སྟོན་བོད་གངས་ཅན་ལྗོངས་སུ་བརྩི་སྲུང་བྱ་ཐུབ་པའི་རེ་བ་དང་སྨོན་འདུན་ཞུ་གི་ཡོད་པ་མ་ཟད། ད་ལྟ་༸གོང་ས་མཆོག་ཉིད་དགུང་གྲངས་མཐོ་བོར་ཕེབས་ཡོད་པར་བརྟེན། སྐུ་གསུང་ཐུགས་གསུམ་ལ་འཕྲོད་བཞེས་མཛད་ནས་ཐུགས་ལྷོད་ལྷོད་མཛད་ནས་བཞུགས་རོགས་གནང་སོགས་ཀྱི་གསོལ་འདེབས་དང་འཚམས་འདྲིའི་གསུང་བཤད་གནང་ཡོད། །
