༢༠༡༥ ཟླ་ ༦ ཚེས་ ༢༩ རེས་གཟའ་ཟླ་བ།
༄༅། །ཕྱི་ལོ་ ༢༠༡༥ ཟླ་ ༦ ཚེས་ ༢༨ ཉིན་༸གོང་ས་མཆོག་སྟོན་འཁོར་དང་བཅས་པ་ཐད་འཕུར་གནམ་གྲུ་བརྒྱུད་རྒྱལ་ས་ལོན་ཌོན་ནས་གྷ་ལ་སི་ཊོན་བྷུ་རི་ Glastonbury Festival རོལ་དབྱངས་འདུ་འཛོམས་ཚུགས་ཡུལ་པིལ་ཊོན། Pilton ཞེས་པའི་གྲོང་ཁྱེར་དུ་ཆིབས་སྒྱུར་བསྐྱངས་ནས་ཁུལ་དེར་༸ཞབས་སོར་འཁོད་བསྟུན། རོལ་དབྱངས་དུས་སྟོན་གོ་སྒྲིག་ཚོགས་ཆུང་གི་ཚོགས་གཙོ་སྐུ་ཞབས་མེ་ཀལ་ཨ་ཝ་སི་ Michael Eavis མཆོག་དང་ཁོང་གི་བཟའ་ཟླ་བཅས་ཀྱིས་ཕེབས་བསུའི་སྣེ་ལེན་གཟབ་རྒྱས་ཞུས། དེ་རྗེས་ཀིངྒ་སི་མི་ཌོ། King’s Meadow ཞེས་པའི་རྩེད་ཐང་ཆེན་པོ་དེར་ཆིབས་སྒྱུར་བསྐྱངས་ནས་བྷི་བྷི་སིའི་ BBC གསར་འགོད་པ་ཨེ་ལན་ཡེན་ཏོབ་ Alan Yentob ལགས་དང་མཇལ་འཕྲད་གནང་། ཁུལ་དེར་༸གོང་ས་མཆོག་གིས་མི་གྲངས་ ༨༥༠༠ བརྒལ་བར་བཀའ་སློབ་སྩལ་དོན། སྤུན་མཆེད་ཕོ་མོ་རྣམ་པ། ཁྱེད་ཚོས་རོལ་དབྱངས་དུས་སྟོན་འདི་དགའ་སྤྲོའི་ཐོག་ནས་ལོངས་སུ་སྤྱོད་བཞིན་པ་མཐོང་ཐུབ་པ་བྱུང་། ངོས་རང་འདིར་ཡོང་སྐབས་ལམ་བར་དུ་མི་རྣམས་དགའ་སྤྲོའི་རྣམ་པས་ཁེངས་འདུག དེར་བརྟེན་དེ་རིང་ངོས་རང་འདིར་མགྲོན་འབོད་གནང་བར་ཧ་ཅང་དགའ་པོ་བྱུང་། ངོས་ཀྱིས་རྒྱུན་ལྡན་བརྗོད་བཞིན་པ་ལྟར། མི་ཚེའི་དགོས་འདུན་གཙོ་བོ་བདེ་སྐྱིད་རེད། སང་ཉིན་གང་འདྲ་ཆགས་མིན་སུས་ཀྱང་དཔོག་མི་ཐུབ། དེར་བཟང་ཕྱོགས་ཀྱི་རེ་བ་རྒྱག་རྒྱུ་ཙམ་རེད། རེ་བ་མེད་ན་མི་ཚེའི་ཁ་ཕྱོགས་བརླག་པ་རེད། འཛམ་གླིང་ནང་གི་མི་འབོར་ཐེར་འབུམ་བདུན་ཡོད་པ་ཚང་མ་འགྲོ་བ་མིའི་རིགས་གཅིག་གྱུར་ཡིན། ཚང་མས་བདེ་བ་འདོད་པ་ལྟར་བདེ་བ་བསྒྲུབ་རྒྱུའི་ཐོབ་ཐང་ཡང་ཡོད། འོན་ཀྱང་བློ་ཕམ་པ་ཞིག་ལ་དེ་རིང་འདིར་ཁྱེད་ཚོས་དགའ་སྤྲོའི་ངང་རོལ་དབྱངས་དུས་སྟོན་ལ་རོལ་བཞིན་ཡོད་ཀྱང་། སི་རི་ཡ་དང་ཨི་རག ནེ་ཇེ་རི་ཡ་སོགས་ནང་མི་ཕན་ཚུན་གསོད་རེས་བྱེད་བཞིན་ཡོད། དེར་བརྟེན་ང་ཚོ་ཚང་མ་འགྲོ་བ་མིའི་ཁྱིམ་ཚང་ནང་འཚོ་བཞིན་པའི་སྤུན་མཆེད་ཕོ་མོ་ཆགས་ཡོད། ང་ཚོ་ཚང་མ་འགྲོ་བ་མིའི་ཁྱིམ་ཚང་གཅིག་གི་ནང་མི་ལྟ་བུ་ཡིན། ཞེས་སོགས་ཀྱི་བཀའ་སློབ་སྩལ།
དེ་རྗེས་གསར་འགོད་པ་ཨེ་ལན་ཡེན་ཏོབ་ལགས་ཀྱི་དྲི་བར་བཀའ་ལན་སྩལ། དེ་རྗེས་ཉིན་དགུང་ལྗགས་སྨིན་གྲུབ་རྗེས་ཝི་ཡེམ་སི་གྷི་རིན་ William’s Green དུ་ཨིན་ཇིའི་གསར་ཤོག་གྲགས་ཅན་གར་ཌེན་ Guardian ཞེས་པའི་གསར་འགོད་པའི་སྤྱི་ཁྱབ་རྩོམ་སྒྲིག་པ་ལྕམ་ཀེ་ཏི་རིན་ཝི་ནར་ Katharine Viner ལགས་དང་། གསར་ཤོག་དེའི་ནང་རྩོམ་ཡིག་འབྲི་མཁན་སྐུ་ཞབས་ཇོར་ཇི་མོན་བྷོཊ། George Monbiot དེ་བཞིན་ཁོར་ཡུག་སྲུང་སྐྱོབ་ཚོགས་པའི་ 350.org འགན་འཛིན་སྐུ་ཞབས་མེ་བྷོ་ཝེ་ May Boeve ལགས་བཅས་དང་ལྷན་ཁོར་ཡུག་སྲུང་སྐྱོབ་སྤྱི་དང་། ལྷག་པར་གོ་ལའི་ཚ་དྲོད་རྒྱས་བཞིན་པའི་དཀའ་ངལ་ལ་གདོང་ལེན་ཇི་ལྟར་དགོས་པའི་སྐོར་བགྲོ་གླེང་མཛད། བགྲོ་གླེང་གཙོ་སྐྱོང་གནང་མཁན་སྐུ་ཞབས་ཇེམ་སི་རེན་ཌར་སོན་ James Randerson ལགས་ཡིན་འདུག བགྲོ་གླེང་ལྷན་ཚོགས་གྲུབ་མཚམས་པི་ར་མིཌ་སྡིངས་ཆ་ Pyramid Stage ཞེས་རོལ་དབྱངས་དུས་སྟོན་ཚོགས་ཡུལ་ལྟེ་བ་དེར་ཆིབས་སྒྱུར་བསྐྱངས། སྐབས་དེར་རོལ་དབྱངས་དུས་སྟོན་གོ་སྒྲིག་ཚོགས་ཆུང་གིས་ལས་བྱེད་སྐུ་ཞབས་རོ་བྷར་ཊི་རི་ཆཌ་ Robert Richards ལགས་ཀྱིས་ཐེངས་འདིར་རོལ་དབྱངས་དུས་སྟོན་སྐབས་དངུལ་ཇི་ཙམ་བྱུང་བ་རྣམས་སྤྱི་ཚོགས་བདེ་རྩར་དམིགས་པའི་སྒྲིག་འཛུགས་ཆུའི་རོགས་རམ་ WaterAid དང་། ཨོག་སི་ཕམ་ Oxfam དེ་བཞིན་ཞི་བདེའི་ལྗང་ཁུ་ Greenpeace ཚོགས་པ་བཅས་ལ་གནང་རྒྱུ་ཡིན་སྐོར་སྙན་སྒྲོན་ཞུས།
དེ་རྗེས་གཞས་སྣ་འཁྲབ་སྟོན་པ་པ་ཊི་སི་མི་ཏི་ Patti Smith ལགས་ཀྱིས་༸གོང་ས་མཆོག་ལ་སྡིངས་ཆའི་སྟེང་སྣེ་ལེན་ཞུ་སྐབས་མང་ཚོགས་སྟོང་ཕྲག་མང་པོས་དགའ་བསུ་ཧ་ཅང་ཞུས་ནས་༸གོང་ས་མཆོག་གི་འཁྲུངས་སྐར་ཉིན་འཚམས་འདྲི་ཞུ། ཞེས་ཨིན་སྐད་ཐོག་མི་མང་ ༦༠༠༠༠ གིས་མགྲིན་གཅིག་ཏུ་དབྱངས་སུ་གྱེར་བ་མ་ཟད། འཁྲུངས་སྐར་མངར་ཟས་ (Birthday cake) འདེགས་འབུལ་ཞུས། དེ་རྗེས་པ་ཊི་སི་མི་ཏི་ལགས་ཀྱིས་༸གོང་ས་མཆོག་ལ་ཆེ་བསྟོད་ཀྱི་སྙན་ངག་སྒྲོགས་སྦྱང་ཞུས། དེ་རྗེས་༸གོང་ས་མཆོག་གིས་བཀའ་སློབ་སྩལ་དོན། སྤུན་ཟླ་ཕོ་མོ་རྣམ་པ། ཁྱེད་ཚོ་མི་གྲངས་ཧ་ཅང་མང་པོ་ཞིག་དེ་རིང་འདིར་འཛོམས་ནས་ངོས་ཀྱིས་མཛའ་བརྩེའི་རྣམ་འགྱུར་བསྟན་པ་དེར་ཚུར་དགའ་སྤྲོའི་རྣམ་འགྱུར་བསྟན་ནས་ཡར་ལན་གནང་བར་སྙིང་ཐག་པ་ནས་བསྔགས་བརྗོད་ཞུ་རྒྱུ་ཡིན། དུས་རྟག་ཏུ་ངོས་ཀྱི་ལུས་ངག་ཡིད་གསུམ་གཞན་གྱི་བདེ་དོན་ཆེད་བློས་གཏོང་བྱས་པ་ཡིན། ཁྱེད་ཚོས་ངོས་ལ་ཚུར་དགའ་མོས་དེ་ཙམ་གནང་དུས་ངོས་རང་སྙིང་སྟོབས་ཆེར་བསྐྱེད་ཡོང་བཞིན་འདུག ང་ཚོ་ཚང་མ་འགྲོ་བ་མིའི་རིགས་གཅིག་གྱུར་ཡིན། ཞེས་སོགས་ཀྱི་བཀའ་སློབ་སྩལ། དེ་རྗེས་སྡིངས་ཆ་ནས་རྒྱལ་ས་ལོན་ཌོན་གྱི་བཞུགས་གནས་མགྲོན་ཁང་དུ་ཆིབས་སྒྱུར་བསྐྱངས། སྤྱིར་ཐེངས་འདིར་གྷ་ལ་སི་ཊོན་བྷུ་རི་རོལ་དབྱངས་དུས་སྟོན་སྐབས་པི་ར་མིཌ་སྡིངས་ཆ་ Pyramid stage ཞེས་པ་དེར་མི་གྲངས་ ༢༠༣༠༠༠ འདུ་འཛོམས་གནང་རྒྱུ་ཡིན་འདུག །
