༢༠༡༥ ཟླ་ ༦ ཚེས་ ༢༣ རེས་གཟའ་མིག་དམར།
༸སྐུའི་གྱ་སྟོན་སྐབས་ཁེ་ན་ཌའི་གདོད་མའི་མི་རིགས་ཀྱི་སྐུ་ཚབ་ནས་འཚམས་འདྲིའི་གསུང་བཤད་གནང་བ།
༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་བརྒྱད་ཅུར་ཕེབས་པའི་༸སྐུའི་གྱ་སྟོན་གྱི་མཛད་སྒོ་ཉིན་གཉིས་པའི་སྐབས་ཏེ་ཕྱི་ལོ་ ༢༠༡༥ ཟླ་ ༦ ཚེས་ ༢༢ ཉིན་ཐེག་ཆེན་ཆོས་གླིང་གཙུག་ལག་ཁང་གི་གསུང་ཆོས་རྭ་བར་མདོ་སྨད་གྱ་སྟོན་ཚོགས་ཆུང་གིས་གོ་སྒྲིག་ཞུས་པའི་མཛད་སྒོའི་ཐོག ཁེ་ན་ཌའི་གདོད་མའི་མི་རིགས་ཀྱི་སྐུ་ཚབ་སྐུ་ཞབས་ཨེ་ཌི་ཝ་ཌི་ཇོན་ལགས་ཀྱིས་འཚམས་འདྲིའི་གསུང་བཤད་གནང་བའི་ནང་འཁོད་དོན། ཐོག་མར་ངས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་གཙོས་བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་དང་། བཀའ་བློན་རྣམ་པ། སྤྱི་འཐུས་ཚོགས་གཙོ་མཆོག་བཅས་མཛད་གཙོ་རྣམ་པ་ཚང་མར་འཚམས་འདྲི་ཞུ་རྒྱུ་དང་། ཉེ་ལམ་༸གོང་ས་མཆོག་ཨོ་གླིང་དུ་ཆིབས་སྒྱུར་སྐབས་ཁུལ་དེར་གདོད་མའི་མི་རིགས་རྣམས་ལ་བླང་དོར་བཀའ་སློབ་སྩལ་བ་རྣམས་ངས་དོ་སྣང་ཧ་ཅང་ཆེན་པོས་བཀླགས་རྒྱུ་བྱུང་། གདོད་མའི་མི་རིགས་ས་ཡ་ ༣༧༠ རྣམས་ལ་གདོད་མའི་མི་རིགས་ཀྱི་སྐད་ཡིག་དང་རིག་གཞུང་དེ་དག་འགྲོ་བ་མི་རིགས་སྤྱིའི་ཁྱིམ་ཚང་ནང་སྲུང་སྐྱོབ་བྱ་རྒྱུ་ཧ་ཅང་གལ་ཆེ་ཡིན་པའི་སྐོར་བཀའ་སློབ་སྩལ་ཡོད།
དེར་བརྟེན་དེ་རིང་ངས་གོ་སྐབས་འདི་བརྒྱུད་འབྱུང་འགྱུར་གདོད་མའི་མི་རིགས་ཀྱི་བུ་ཚ་དང་ཡང་ཚ་བཅས་ཀྱིས་ཚབ་ཞུས་ནས་༸གོང་ས་མཆོག་ལ་བཀའ་དྲིན་ཆེ་ཞུ་རྒྱུ་དང་འཛམ་གླིང་ནང་གདོད་མའི་མི་རིགས་ས་ཡ་ ༣༧༠ ཡོད་པ་རྣམས་ཀྱིས་༸གོང་ས་མཆོག་གི་བཀའ་སློབ་དེ་ཇི་ཙམ་གལ་ཆེན་པོ་ཡིན་པ་ཤེས་དགོས། ལོ་གཅིག་གི་གོང་དུ་འཛམ་གླིང་མཉམ་སྦྲེལ་རྒྱལ་ཚོགས་ཀྱི་དྲུང་ཆེ་མཆོག་གིས་བདུན་ཕྲག་རེ་རེའི་ནང་གདོད་མའི་མི་རིགས་ཀྱི་སྐད་ཡིག་གཅིག་རྩ་མེད་འགྲོ་བཞིན་ཡོད་པ་དང་རིམ་བཞིན་རྩ་རླག་ཏུ་འགྲོ་རྒྱུ་ཡིན་སྐོར་བརྗོད་ཡོད། དེར་བརྟེན་དེ་རིང་ངས་གདོད་མའི་མི་རིགས་ཀྱི་བཀའ་དྲིན་མཚོན་མཆེད་སྐུ་ཉིད་མཆོག་ལ་གདོད་མའི་མི་རིགས་ཀྱི་སྐད་ཐོག་ནས་འཚམས་འདྲི་ཞུ་རྒྱུ་ཡིན། ང་རང་བྱང་ཕྱོགས་ཁེ་ན་ཌ་ནས་ཡོང་བ་ཡིན། ང་རང་ཐེངས་འདིར་རྒྱ་གར་དུ་འབྱོར་བ་ཐོག་མ་ཆགས་ཡོད། རྒྱ་གར་ནང་སྐྱིད་པོ་འདུག ཅེས་གསུངས་རྗེས་ཁོང་ནས་གདོད་མའི་སྐད་ཐོག་༸གོང་ས་མཆོག་ལ་འཚམས་འདྲི་ཞུས་དོན། དེ་རིང་ང་རང་འདིར་༸གོང་ས་མཆོག་དགུང་གྲངས་བརྒྱད་ཅུར་ཕེབས་པའི་༸སྐུའི་གྱ་སྟོན་གྱི་མཛད་སྒོར་མཉམ་ཞུགས་ཆེད་བཅར་བ་ཡིན། ཁ་སེང་ངས་སྐུ་ཉིད་མཆོག་ཆུང་བྱིས་པའི་སྐབས་ཀྱི་སྐུ་པར་མཚར་སྡུག་ལྡན་པ་ཞིག་མཇལ་བྱུང་། བོད་མི་རྣམས་ཀྱིས་སྐུ་ཉིད་མཆོག་ལ་དད་གུས་ཞུ་སྟངས་མཐོང་སྐབས་ངའི་སེམས་ནང་སེམས་འགུལ་ཤུགས་ཆེ་ཞིག་ཐེབ་བྱུང་། སྐུ་ཉིད་མཆོག་གིས་འཛམ་གླིང་ཁྱོན་དུ་བྱམས་བརྩེ་དང་རེ་བའི་བཀའ་སློབ་སྩལ་བ་དེ་དག་གིས་ང་ཚོར་སྙིང་སྟོབས་ཧ་ཅང་སྤེལ་ཡོད། ཅེས་སོགས་ཀྱི་གསུང་བཤད་གནང་རྗེས་ཕྱག་རྟགས་གཉིས་འབུལ་ལམ་ཞུས། ཕྱག་རྟགས་གཉིས་ལས་གཅིག་ནི་གདོད་མའི་མི་རིགས་ལོ་ན་ ༩༤ སོན་པ་ཞིག་གིས་ལྷས་མ་སླས་པའི་ཞབས་ལྷམ་གཅིག་དང་ཁེ་ན་ཌའི་གདོད་མའི་མི་རིགས་ཀྱི་མཚོན་རྟགས་གཟན་གོས་ (Shawl) གཅིག་འབུལ་ལམ་ཞུས་ཏེ་གདོད་མའི་མི་རིགས་ཀྱི་གོམས་སྲོལ་དུ་སྐུ་མགྲོན་ནང་དུ་ཕེབས་སྐབས་ཁོང་ལ་ཆེ་བསྟོད་ཞུ་ཆེད་གཟན་གོས་དེ་གཡོག་སྲོལ་ཡོད་སྐོར་སྙན་སེང་ཞུས་པ་དང་སྦྲགས། ༸གོང་ས་མཆོག་ལ་གཟན་གོས་དེ་འབུལ་ལམ་ཞུས་རྗེས་མགོན་པོ་གང་ཉིད་མཆོག་གིས་ཐུགས་དགྱེས་ཚོར་ཆེན་པོས་མཛད་གོ་མ་གྲོལ་བར་གཟན་གོས་དེ་བསྣམས་ནས་བཞུགས།།
