༢༠༡༦ ཟླ་ ༦ ཚེས་ ༡༧ རེས་གཟའ་ལྷག་པ།
༄༅། །ཕྱི་ལོ་ ༢༠༡༥ ཟླ་ ༦ ཚེས་ ༡༧ ཉིན་བོད་མིའི་སྒྲིག་འཛུགས་ཕྱི་དྲིལ་ལྷག་པ་ཚེ་རིང་དྲན་རྟེན་ཚོགས་ཁང་ནང་བོད་མིའི་སྒྲིག་འཛུགས་ཀྱིས་ཆེད་བསྒྲིགས་ཞུས་པའི་༸གོང་ས་༸སྐྱབས་མགོན་ཆེན་པོ་མཆོག་འདི་ལོར་དགུང་གྲངས་བརྒྱད་ཅུར་ཕེབས་པའི་༸སྐུའི་གྱ་སྟོན་ལ་འཚམས་འདྲིའི་བརྙན་འཕྲིན་འགྲེམས་སྤེལ་ཞུ་བའི་གསར་འགོད་གསལ་བསྒྲགས་ཤིག་སྤེལ་གནང་ཡོད། དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༡༡ ཐོག་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེངྒེ་མཆོག་དབུ་བཞུགས་ཐོག་དྲིལ་བསྒྲགས་དྲུང་ཆེ་བཀྲ་ཤིས་ཕུན་ཚོགས་ལགས་ཀྱིས་ཕྱི་ནང་གི་གསར་འགོད་པ་སུམ་ཅུ་བརྒལ་བ་ལྷན་འཛོམས་ཀྱིས་ཐོག་མར་དྲིལ་བསྒྲགས་དྲུང་ཆེ་བཀྲ་ཤིས་ཕུན་ཚོགས་ལགས་ཀྱིས་ཐེངས་འདིའི་གསར་འགོད་གསལ་བསྒྲགས་སྐོར་ངོ་སྤྲོད་གནང་དོན། དེ་རིང་གསར་འགོད་ལྷན་ཚོགས་གནང་དགོས་དོན་ནི་དེ་སྔོན་རྣམ་པ་ཚོར་སྔོན་བརྡ་ཕུལ་བ་ཇི་བཞིན་འདི་ལོ་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་བརྒྱད་ཅུར་ཕེབས་པའི་སྐུའི་གྱ་སྟོན་ཐོག་བོད་མིའི་སྒྲིག་འཛུགས་ཀྱིས་ངོས་ནས་སྐུའི་འཁྲུངས་སྐར་ལ་བོད་རྒྱ་ཨིན་གསུམ་གྱི་སྐད་ཡིག་ཐོག་ནས་འཚམས་འདྲིའི་བརྙན་འཕྲིན་ཆེད་བསྒྲིགས་ཀྱིས་འགྲེམས་སྤེལ་གནང་རྒྱུ་ཡིན། དེར་བརྟེན་དེ་རིང་དཔལ་ལྡན་སྲིད་སྐྱོང་མཆོག་འདིར་ཆེད་ཕེབས་ཀྱིས་བརྙན་འཕྲིན་དེའི་སྐོར་ངོ་སྤྲོད་གནང་རྒྱུ་དང་། དེ་རྗེས་བརྙན་འཕྲིན་དེ་ཉིད་དབུ་འབྱེད་དང་འགྲེམས་སྤེལ་གནང་རྒྱུ་རེད། ཅེས་ངོ་སྤྲོད་གནང་བ་དང་
སྦྲགས།
སྲིད་སྐྱོང་བློ་བཟང་སེངྒེ་མཆོག་གིས་གསུང་བཤད་གནང་དོན། ཚང་མར་བཀྲ་ཤིས་བདེ་ལེགས་ཞུ་རྒྱུ་དང་། བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ནས་སྤྱི་ནོར་ྋགོང་ས་ྋསྐྱབས་མགོན་ཆེན་པོ་མཆོག་དགུང་གྲངས་བརྒྱད་ཅུར་ཕེབས་པར་འཚམས་འདྲིའི་བརྙན་འཕྲིན་ཞིག་ཆེད་བསྒྲིགས་ཞུས་ཡོད། ཆེད་བསྒྲིགས་ཞུས་པའི་བརྙན་འཕྲིན་འདི་ནི། ྋགོང་ས་ྋསྐྱབས་མགོན་ཆེན་པོ་མཆོག་གི་མཛད་འཕྲིན་ཧ་ཅང་ཆེན་པོ་ཡོད་པ་ཚང་མས་མཁྱེན་གསལ་རེད། སྤྱིར་ྋགོང་ས་ྋསྐྱབས་མགོན་ཆེན་པོ་མཆོག་གི་མཛད་འཕྲིན་སྐོར་བརྙན་འཕྲིན་དང་། ཕྱག་དེབ་སོགས་མང་པོ་ཡོད། འོན་ཀྱང་ཕྱི་དྲིལ་ལས་ཁུངས་ནས་བརྙན་འཕྲིན་སྐར་མ་གསུམ་ཅན་ཞིག་ཆེད་བསྒྲིགས་ཞུས་དགོས་དོན་ནི། སྤྱི་ཚོགས་དྲ་རྒྱ་བརྒྱུད་འཛམ་གླིང་སྤྱི་ཡོངས་ནང་ཁྱབ་ཐུབ་པ་དང་། ལྷག་པར་བོད་དང་རྒྱ་ནག་ནང་ྋགོང་ས་མཆོག་ལ་དད་གུས་ཞུ་མཁན་མང་པོ་ཡོད་པར་བརྟེན། སྤྱི་ཡོངས་ལ་ཁྱབ་པའི་དམིགས་པ་ཞིག་ཡིན། འཛམ་གླིང་སྤྱི་ཡོངས་ལ་ཁྱབ་དགོས་དོན་ནི། གཞི་རྩའི་ྋགོང་ས་མཆོག་དགུང་གྲངས་བརྒྱད་ཅུར་ཕེབས་པའི་འཁྲུངས་སྐར་བཞུགས་སྒར་རྡ་སར་སྲུང་བརྩི་ཞུ་གི་ཡོད་པ་བཞིན་ཨ་རིའི་གྲོང་ཁྱེར་ནིའུ་ཡོག་དང་། ཇར་མན་གྱི་གྲོང་ཁྱེར་སྦོན་གཙོས་པའི་ས་གནས་ཁག་གི་ནང་སྲུང་བརྩི་ཞུ་རྒྱུ་རེད། ྋགོང་ས་མཆོག་ལ་དད་གུས་བྱེད་མཁན་མི་གྲངས་ས་ཡ་མང་པོ་ཡོད་པར་བརྟེན། ཁོང་ཚོ་ཚང་མ་འཁྲུངས་སྐར་སྲུང་བརྩི་ཞུ་ཡུལ་དུ་དངོས་སུ་བཅར་ཐུབ་ཀྱི་མེད་སྟབས། ྋགོང་ས་མཆོག་གིས་མཛད་འཕྲིན་སྐོར་བརྙན་འཕྲིན་འདི་བརྒྱུད་མཇལ་རྒྱུ་བྱུང་བ་ཡིན་ན། དད་གུས་དང་སྤྱི་སེམས། སེམས་འགུལ་ཐེབས་ཆེད་བརྙན་འཕྲིན་འདི་ཆེད་བསྒྲིགས་བྱས་པ་རེད། དེར་བརྟེན་འཛམ་གླིང་ནང་བོད་མི་གཙོས་པས་ྋགོང་ས་མཆོག་ལ་དད་གུས་ཞུ་མཁན་མི་གྲངས་ས་ཡ་མང་པོ་ཡོད་པ་དེ་དག་ལ་བརྙན་འཕྲིན་འདི་བརྒྱུད་ནས་སྐུའི་འཁྲུངས་སྐར་ལ་མཉམ་ཞུགས་བྱས་པའི་མྱོང་ཚོར་ཡོང་རྒྱུའི་རེ་བ་ཞུ་བཞིན་ཡོད། བརྙན་འཕྲིན་ཐུང་ངུ་ལས་མེད་ནའང་རྣམ་པ་ཚོས་བརྙན་འཕྲིན་འདི་ཉིད་དངོས་སུ་མཇལ་སྐབས་སེམས་འགུལ་ཐེབས་པ་དང་། སྤྱི་སེམས་སྐྱེ་བའི་རེ་བ་ཞུ་གི་ཡོད། ཅེས་གསུངས། དེ་རྗེས་དྲུང་ཆེ་བཀྲ་ཤིས་ཕུན་ཚོགས་ལགས་ཀྱིས་བོད་ཨིན་གཉིས་ནང་ཡོད་པའི་གསར་འགོད་གསལ་བསྒྲགས་སྒྲོགས་སྦྱང་གནང་གྲུབ་མཚམས་སྲིད་སྐྱོང་མཆོག་གིས་རྙན་འཕྲིན་དབུ་འབྱེད་གནང་། དེ་རྗེས་ཕྱི་དྲིལ་དྲུང་ཆེས་གསར་འགོད་པ་ཁག་གཅིག་གིས་དྲི་བར་ལན་འདེབས་གནང་།
གསར་འགོད་གསལ་བསྒྲགས་གཤམ་གསལ།
༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་བརྒྱད་ཅུར་ཕེབས་པའི་༸སྐུའི་གྱ་སྟོན་ལ་འཚམས་འདྲི་ཞུ།བོད་མིའི་དབུ་ཁྲིད་ངོས་ནས་གཞིས་བྱེས་བོད་མིའི་ཚབ་ཞུས་ཏེ་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་ ༨༠ བཞེས་པའི་༸སྐུའི་གྱ་སྟོན་ལ་འཚམས་འདྲིའི་དམིགས་བསལ་བརྙན་འཕྲིན་ཞིག་འགྲེམས་སྤེལ་ཞུས་ཡོད་པ་འདིའི་ནང་ལྷོ་ཨ་ཕི་རི་ཀའི་ཡི་ཤུའི་ཆོས་དཔོན་ཊུ་ཊུ་མཆོག་གིས་དམིགས་བསལ་༸སྐུའི་གྱ་སྟོན་འཁྲུངས་སྐར་ལ་འཚམས་འདྲི་ཞུས་ཡོད།
དེ་རིང་བོད་མི་མང་གི་ཁྲིམས་མཐུན་སྐུ་ཚབ་དབུས་བོད་མིའི་སྒྲིག་འཛུགས་ངོས་ནས་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལོ་ ༢༠༡༥ ཟླ་ ༧ ཚེས་ ༦ ཉིན་དགུང་གྲངས་ ༨༠ ཕེབས་པའི་༸སྐུའི་གྱ་སྟོན་གྱི་རྟེན་འབྲེལ་ཉིན་མོར་འཚམས་འདྲི་ཞུ་བའི་བརྙན་འཕྲིན་ཞིག་འགྲེམས་སྤེལ་ཞུས་ཡོད།
བརྙན་འཕྲིན་འདིའི་ནང་དོན་གཙོ་བོ་ནི། ཆོས་དཔོན་ཊུ་ཊུ་མཆོག་གིས་༸གོང་ས་མཆོག་ལ་བཀའ་དྲིན་རྗེས་དྲན་དང་འཚམས་འདྲི་ཞུ་བ། ལྷག་པར་༸གོང་ས་༸སྐྱབས་མགོན་ཆེན་པོ་མཆོག་གིས་འགྲོ་བ་མིའི་རིགས་སྤྱི་ལ་བདེ་སྐྱིད་བསྐྲུན་ཐབས་མཛད་པ་དང་། འཛམ་གླིང་ཡོངས་ལ་ཆོས་ལུགས་མཐུན་སྒྲིལ། བོད་ཀྱི་ཆོས་དང་རིག་གཞུང་། ཁོར་ཡུག་ལ་སྲུང་སྐྱོབ་བཅས་ཀྱི་མཛད་འགན་བཞེས་ཡོད་པ་རྣམས་གསལ་འདོན་ཞུས་ཡོད།
བོད་མིའི་སྲོལ་རྒྱུན་ལྟར་ན་མི་ལོ་བརྒྱད་ཅུར་སོན་སྐབས་གྱ་སྟོན་ཞེས་ཧ་ཅང་གལ་གནད་ཅིག་ལ་ངོས་འཛིན་གྱིས་དུས་སྟོན་སྲུང་བརྩི་ཞུ་སྲོལ་ཡོད། དེར་བརྟེན་ཐེངས་འདིར་༸གོང་ས་མཆོག་གི་༸སྐུའི་གྱ་སྟོན་ལ་འཛམ་གླིང་ས་ཕྱོགས་གང་སར་གནས་པའི་དད་ལྡན་མི་དམངས་དང་རྒྱབ་སྐྱོར་བ་རྣམས་ནས་མགོན་པོ་གང་ཉིད་མཆོག་གིས་འཛམ་གླིང་ནང་ཞི་བདེ་དང་བཟང་སྤྱོད་གོང་སྤེལ་གྱི་མཛད་རྗེས་ལ་བཀའ་དྲིན་རྗེས་དྲན་ཞུ་སླད་བརྙན་འཕྲིན་འདི་རྒྱ་ཆེ་ཁྱབ་སྤེལ་བྱེད་རྒྱུའི་རེ་བ་ཞུ་བཞིན་ཡོད། འཛམ་གླིང་ཁྱོན་ཡོངས་སུ་གནས་པའི་མི་མང་ས་ཡ་མང་པོས་གཙོས་བོད་ནང་གི་བོད་མི་རྣམས་ནས་ཀྱང་རྒྱ་ནག་གཞུང་གི་དམ་བསྒྲགས་བྱེད་མུས་ལ་མ་ལྟོས་པར་འདི་ལོར་༸སྐུའི་གྱ་སྟོན་སྲུང་བརྩི་ཞུ་འཆར་ཡོད་འདུག
ཕྱི་ལོ་ ༢༠༡༡ ལོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཆབ་སྲིད་ཀྱི་སྐུ་དབང་ཡོངས་རྫོགས་མང་གཙོའི་ལམ་ནས་མི་མང་གིས་འོས་འདེམས་བྱས་པའི་འགོ་ཁྲིད་ཚོར་རྩིས་སྤྲོད་མཛད་ཡོད། གཞིས་བྱེས་གཉིས་སུ་གནས་པའི་བོད་མི་རྣམས་ཀྱིས་༸གོང་ས་མཆོག་ལ་དུས་དང་རྣམ་པ་ཀུན་ཏུ་དད་གུས་ཧ་ཅང་ཆེན་པོ་ཞུ་བཞིན་ཡོད།
རིང་མིན་ཕྱི་ཟླ་ ༦ ཚེས་ ༢༡ དང་བོད་ཟླ་ ༥ ཚེས་ ༥ ཏེ་བོད་ལུགས་ཀྱི་འཁྲུངས་ཚེས་ཉིན་བཞུགས་སྒར་དུ་༸གོང་ས་མཆོག་ལ་དམིགས་བསལ་བརྟན་བཞུགས་བསྟར་འབུལ་ཞུ་རྒྱུ་ཡིན་པ་དང་། སྐབས་དེར་འཛམ་གླིང་གི་ས་ཕྱོགས་འདྲ་མིན་ནས་གནད་ཡོད་མི་སྣ་དང་སྐུ་མགྲོན་ཕེབས་རྒྱུ་ཡིན།
བརྙན་འཕྲིན་འདི་བཞིན་ཨིན་སྐད་དང་། བོད་སྐད། རྒྱ་སྐད་བཅས་ཀྱི་ནང་གཟིགས་རྒྱུ་ཡོད་པས།
ཕྱི་ལོ་ ༢༠༡༥ ཟླ་ ༦ ཚེས་ ༡༧ ལ། བརྙན་འཕྲིན་གྱི་འབྲེལ་ཐག་འདི་ཡིན་ཞུ་རྒྱུ་བཅས། །
