༢༠༡༥ ཟླ་ ༦ ཚེས་ ༢༣ རེས་གཟའ་མིག་དམར།

༄༅། །ཕྱི་ལོ་ ༢༠༡༥ ཟླ་ ༦ ཚེས་ ༢༢ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་གྱ་སྟོན་གྱི་མཛད་སྒོ་ཉིན་གཉིས་པར་ཆེད་དུ་ཆིབས་སྒྱུར་བསྐྱངས་པའི་ཆོས་བརྒྱུད་ཆེན་པོ་བཞི་དང་གཡུང་དྲུང་བོན། ཇོ་ནང་བཅས་ཀྱི་བླ་ཆེན་བསྟན་བདག་རྣམ་པ་དང་། སྐུ་ཚབ་རྣམ་པ་བཅས་ཀྱིས་༸གོང་ས་མཆོག་གི་༸སྐུའི་གྱ་སྟོན་ལ་འཚམས་འདྲིའི་གསུང་བཤད་ཁག་སོ་སོར་གནང་བའི་ནང་དཔལ་སྔ་འགྱུར་རྙིང་མའི་མངའ་བདག་སྟག་ལུང་རྩེ་སྤྲུལ་རིན་པོ་མཆོག་གི་སྐུ་ཚབ་སྐྱབས་རྗེ་ཀཿ་་ཐོག་དགེ་རྩེ་རིན་པོ་ཆེ་མཆོག་གིས་གསུང་བཤད་གནང་བའི་ནང་། ༸གོང་ས་མཆོག་གི་རླབས་ཆེན་མཛད་འཕྲིན་ལ་བཀའ་དྲིན་རྗེས་དྲན་དང་ཆེ་བསྟོད་ཞུས་པ་དང་དུས་མཚུངས། སྟོན་པ་སངས་རྒྱས་བཅོམ་ལྡན་འདས་ཀྱི་བསྟན་པ་གཅིག་ལ་བྱེ་བྲག་བསྒྲུབ་བརྒྱུད་ཤིང་རྟ་བརྒྱད་ལས། སྔ་འགྱུར་རྙིང་མའི་ཆོས་བརྒྱུད་ནས་བཟུང་སྟེ་སྤྱིར་ནང་པ་སངས་རྒྱས་པའི་ཆོས་བོད་དུ་དར་ཚུལ་དང་། བྱེ་བྲག་སྔ་འགྱུར་རྙིང་མའི་བླ་མ་དམ་པ་གོང་མ་རྣམས་ཀྱི་བསྟན་དང་འགྲོ་བའི་ཆེད་དུ་རླབས་ཆེན་གྱི་མཛད་འཕྲིན་ཇི་ལྟར་བསྐྱངས་པ། ཡང་སྒོས་བོད་གཞུང་དགའ་ལྡན་ཕོ་བྲང་སྐབས་ཀྱི་༸རྒྱལ་དབང་ལྔ་པ་ཆེན་པོ་མཆོག་དང་སྔ་འགྱུར་རྙིང་མའི་བར་གྱི་བླ་སློབ་ཀྱི་འབྲེལ་བ་ནས་བརྩམས་ཏེ་ལོ་རྒྱུས་རིམ་བྱོན་སོགས་གསུངས་པ་མ་ཟད། ཁོང་རང་ཉིད་བོད་ནང་དུ་ཡོད་སྐབས་རྒྱ་ནག་གཞུང་གིས་གདུག་རྩུབ་འོག་དཀའ་སྡུག་ཅི་མྱོང་གསུངས་པ་དང་སྦྲགས། གཞིས་བཞུགས་བོད་མིའི་དཀའ་སྡུག་དུས་ནམ་ཡང་བརྗེད་མི་ཉན་པའི་དྲན་སྐུལ་གནང་སོང་ལ། མཐར་ཁོང་གིས་༸གོང་ས་མཆོག་སྐུ་ཚེ་བསྐལ་བརྒྱར་བརྟན་པའི་གསོལ་འདེབས་དང་རྟེན་འབྲེལ་སྨོན་ཚིག་ཞུ་རྒྱུ་ཡིན་སོགས་ཀྱི་གསུང་བཤད་གནང་ཡོད། །