༢༠༡༥ ཟླ་ ༥ ཚེས་ ༡ རེས་གཟའ་པ་སངས།
༄༅། །ཕྱི་ལོ་ ༢༠༡༥ ཟླ་ ༥ ཚེས་ ༡ ཉིན་རྡ་སར་རྟེན་གཞི་བྱས་པའི་ཤེས་རབ་དགའ་ཚལ་སློབ་གྲྭའི་བསླབ་པ་མཐར་སོན་གྱི་དགའ་སྟོན་མཛད་སྒོར་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བླ་བཟང་སེང་གེ་མཆོག་གིས་གསུང་བཤད་གནང་འདུག དེ་ཡང་གོང་ཚེས་ཉིན་གྱི་སྔ་དྲོ་ཐོག་མར་སམ་བྷོ་ཊའི་སྤྱི་ཁྱབ་འགན་འཛིན་ཀརྨ་ཆུང་དག་ལགས་དང་སློབ་སྤྱི། དེ་བཞིན་སློབ་གྲྭའི་འགན་བདག་བཅས་ཀྱིས་མཛད་སྒོའི་སྐུ་མགྲོན་གཙོ་བོ་དཔལ་ལྡན་སྲིད་སྐྱོང་མཆོག་ལ་སྣེ་ལེན་གྱི་ཕེབས་བསུ་གཟབ་རྒྱས་ཞུས། དེ་ནས་མཛད་སྒོ་དབུ་འཛུགས་སྐབས་ཐོག་མར་ཚང་མ་སྐུ་བཞེངས་ཐོག་བོད་ཀྱི་རྒྱལ་གླུ་ཕུལ་བ་དང་སྦྲགས། བོད་བསྟན་སྲིད་མི་རིགས་ཀྱི་ཆེད་དུ་ལུས་སྲོག་བློས་གཏོང་གནང་མཁན་རྒྱལ་གཅེས་པ་ཕོ་མོ་འདས་སོན་ཡོངས་ཀྱི་བློས་གཏོང་ལ་ཡི་རང་བསྔགས་བརྗོད་དང་སྦྲགས་མྱ་ངན་གུས་འདུད་སྐར་མ་གཅིག་རིང་གནང་།
དེ་ནས་བསླབ་པ་མཐར་སོན་གྱི་སློབ་མ་རྣམས་ལ་སྐུ་མགྲོན་གཙོ་བོ་མཆོག་གིས་གཙོས་སམ་བྷོ་ཊའི་སྤྱི་ཁྱབ་འགན་འཛིན་དང་སློབ་སྤྱི་བཅས་ཀྱིས་རྟེན་འབྲེལ་གྱི་མཇལ་དར་གཡོགས། དེ་རྗེས་སློབ་སྤྱིས་སློབ་གྲྭ་ངོ་སྤྲོད་དང་འབྲེལ་བའི་གསུང་བཤད་གནང་བསྟུན། སམ་བྷོ་ཊ་འི་སྤྱི་ཁྱ་འགན་འཛིན་ནས་གསུང་བཤད་གནང་འདུག དེ་ནས་སྐུ་མགྲོན་གཙོ་བོ་དཔལ་ལྡན་སྲིད་སྐྱོང་མཆོག་གིས་གསུང་བཤད་གནང་དོན། རྣམ་པ་ཚོས་བོད་མིའི་སྒྲིག་འཛུགས་ལ་ཕ་མ་ལྟ་བུར་བརྩིས་ཏེ་འདིར་ཕེབས་ཡོད་པར་སོང་། ལྟ་རྟོག་བྱེད་རྒྱུ་ང་ཚོའི་ལས་འགན་རེད། ཉེ་བའི་ཆར་བོད་ནས་ཡོང་མཁན་ཚོར་ང་ཚོའི་ངོས་ནས་སྦིར་ས་གནས་སུ་འབུམ་གཉིས་མན་ཙམ་གྱི་འགྲོ་སོང་བཏང་སྟེ་ཁང་པ་བརྒྱབ་སའི་ས་ཆ་ཞིག་ཉོས་པ་དང་མཉམ་དུ་ཆུ་འགྲོ་བཟོས་པ་སོགས་ཀྱི་ལས་གཞི་ཞིག་གྲུབ་ཡོད་ལ། དེ་ནས་མོན་གྷོཌ་དང་སྦེལ་ཀོབ་གཞིས་ཆགས་གཉིས་ནས་ཞུ་འབུལ་ཡི་གེ་འབྱོར་བ་བཞིན། ང་ཚོའི་ངོས་ནས་ཞིབ་འཇུག་བྱས་ཏེ་གཞིས་ཆགས་རེ་ལ་འབུམ་དྲུག་རེ་བྱས་ཏེ་ཁང་པ་བརྒྱབ་སའི་ས་ཆ་ཞིག་ཀྱང་བསྐྲུན་ཡོད།
ངོས་རང་ཤེས་རབ་དགའ་ཚལ་སློབ་གྲྭར་ཐེངས་འགའ་ཤས་བསླེབས་རྗེས་ཞིབ་འཇུག་བྱེད་སྐབས་མེག་ལོར་གྷན་ཇིར་བོད་ནས་ཡོང་མཁན་གྱི་ལས་མེད་མང་པོ་འདུག་ཅེས་དང་། དེའི་ནང་ནས་ཁྱམ་སྡོད་བྱེད་མཁན་མང་པོ་འདུག་ཅེས་དང། ཡ
ང་ཁ་ཤས་ལ་དཀའ་ངལ་ཆེན་པོ་འཕྲད་ཡོད་མཁན་ཡང་འདུག་ཅེས་བརྗོད་སྐབས་བོད་ནས་ཡོང་མཁན་མང་བ་དེ་ཤེས་རབ་དགའ་ཚལ་སློབ་གླིང་འདིར་ཡོད་ཙང་། ཐབས་ཤེས་བྱེད་རྒྱུ་ཞིག་མེད་དམ། ཞེས་བཀའ་ཤག་གིས་བཀའ་བསྡུར་མང་པོ་བྱས་རྗེས་ཕྱི་ལོ་ ༢༠༡༢ ལོར་འགོ་བཙུགས་པ་རེད། དེ་མིན་ཕྱི་ལོ་ ༢༠༠༠ སྔོན་གྱི་ལོའི་ནང་སློབ་གྲྭ་དེར་སུ་ཞིག་བསླེབས་ནའང་ཤེས་རབ་དགའ་ཚལ་སློབ་གྲྭའི་ནང་ལོ་གསུམ་རྨང་གཞིའི་སློབ་སྦྱོང་བྱས་ཏེ་སློབ་གྲྭ་འདི་ནས་ཐོན་དགོས་ཀྱིས་ཡོད། ཕྱི་ལོ་ ༢༠༠༠ རྗེས་སུ་ལོ་ལྔ་སློབ་སྦྱོང་བྱེད་རྒྱུའི་གོ་སྐབས་ཡོད་པ་བཟོས་ཡོད། དེ་ནས་ལོ་བརྒྱད་བཟོས་པ་རེད། གང་ལ་ཟེར་ན་རྨང་གཞིའི་སློབ་སྦྱོང་ལོ་གསུམ་རིང་དབྱིན་ཡིག བོད་ཡིག རྩིས། ཀམ་པུ་ཌར། དེ་ཚོ་བསླབས་ཚར་བའི་རྗེས། ལྷ་འབྲི་མཁན་ཚོ་ལོ་ག་ཚོད་འགོར་གྱི་ཡོད་རེད་དམ་ཞུས་ན།
དེ་སྔོན་ལྷ་འབྲི་ཐོན་པར་ལོ་ལྔ་འགོར་བ་དང་། དེའི་རྗེས་ལོ་ལྔའི་སྟེང་ལོ་གསུམ་ཁ་སྣོན་བྱས་པ་རེད། སློབ་གྲྭ་འདི་ནས་མར་ཐོན་སྐབས་ལག་འཁྱེར་ཡོད་པ། ཡང་ན་ལག་ཤེས་ཡོད་ན། མེག་ལོར་སོགས་ལ་བསླེབས་པ་ཡིན་ནའང་ལག་ཤེས་ཡོད་ན་ལས་ཀ་རག་གི་རེད། ལག་ཤེས་ཡོད་པའི་ཐོག་ནས་མུ་མཐུད་སློབ་སྦྱོང་བྱས་པ་ཡིན་ན་ལས་ཀ་ཡག་པོ་རག་རྒྱུར་ཕན་ཐོགས་ཡོད། བྱས་ཙང་ཤེས་རབ་དགའ་ཚལ་སློབ་གླིང་ནང་ལོ་བརྒྱད་འགོར་གྱིན་ཡོད་རུང་ང་ཚོའི་སྒྲིག་འཛུགས་ངོས་ནས་མཐུན་རྐྱེན་བསྐྲུན་རྒྱུ་དེ་རེད། དེ་བཞིན་འཛིན་གྲྭ་བཅུ་གཉིས་ཐོན་མཁན་ད་རེས་སློབ་མ་བཞི་འདུག འཛིན་གྲྭ་བཅུ་གཉིས་དེ་ལས་མང་བ་ཐོན་སྲིད་ཀྱི་རེད་ཟེར་བ་དེ་འགྲིག་གི་འདུག སློབ་སྦྱོང་བྱེད་མཁན་ཡོད་ན་སློབ་ཡོན་འདང་ངེས་ཞིག་སྤྲོད་རྒྱུ་ང་ཚོའི་ལས་འགན་རེད་ཅེས་ད་ཆ་སློབ་ཡོན་བཅུ་བཟོས་ཡོད། ང་ཚོའི་ངོས་ནས་གང་ཐུབ་ཅི་ཐུབ་ཀྱིས་སློབ་ཡོན་བསྐྲུན་རྒྱུར་འབད་བརྩོན་བྱེད་བཞིན་ཡོད།
ཁྱེད་རང་ཚོ་སློབ་ཁང་འདི་ནས་ལག་ཤེས་སམ་ལག་འཁྱེར་གང་རུང་མེད་པར་སློབ་ཁང་འདི་ནས་ཕྱིར་ཐོན་ཐབས་མ་བྱེད། སློབ་གྲྭ་འདི་ནས་ཐོན་ཏེ་འགྲོ་བར་ལག་ཤེས་སམ་ལག་ཁྱེར་གང་རུང་ཞིག་མེད་ན་མི་ཚེ་འཕྲོ་བརླག་རེད། ཁྱེད་རང་ཚོ་བོད་ལ་ཕྱིར་ལོག་ཕྱིན་པ་ཡིན་ནའང་ལག་ཤེས་དང་ལག་ཁྱེར་མེད་ན་འཚོ་བ་བསྐྱལ་ཐུབ་རྒྱུ་ཁག་པོ་རེད། དེ་བཞིན་ཕྱི་རྒྱལ་ལ་འགྲོ་བ་ཡིན་ནའང་དེ་གཉིས་མེད་པར་འཚོ་བ་བསྐྱལ་རྒྱུ་ཁག་པོ་རེད་ཅེས་དོ་ནན་པོས་སློབ་ཕྲུག་ཚོར་གསུངས་པ་དང་། སྐབས་དང་པོའི་འཛིན་རིམ་བཅུ་གཉིས་སློབ་མ་ཚོའི་ཤེས་ཡོན་གྱི་གནས་བབ་སྐོར་སྲིད་སྐྱོང་མཆོག་གིས་གསུང་དོན། གཞི་རྩའི་དབྱིན་ཡིག་དང་སློབ་ཚན་གཞན་རྣམས་བརྒྱ་ཆ་ཡག་པོ་ལོན་འདུག ཡིན་ནའང་སྤྱི་ཚོགས་རིག་གནས་སློབ་ཚན་དེའི་ནང་ནས་རྒྱ་གར་གྱི་གནད་དོན་རིགས་མང་པོ་གཅིག་ཡོད་པ་ལ་བརྟེན་ནས་སློབ་ཚན་དེ་བརྒྱ་ཆ་སྐྱོ་བའི་རྣམ་པ་ཞིག་ཐོན་འདུག་ཅེས་གསུངས། ཡང་དཔལ་ལྡན་སྲིད་སྐྱོང་མཆོག་གིས་ཐུགས་མཉེས་པོ་དང་སྐུ་ལྷོད་ལྷོད་ངང་སློབ་ཕྲུག་ཚོར་སྐུ་ཉིད་སློབ་ཆུང་ནས་ཧར་་ཝ་ཌི་གཙུག་ལག་སློབ་གཉེར་ཁང་དང་།ས།
དེ་ནས་སྲིད་སྐྱོང་གི་ཐུགས་འགན་བཞེས་པའི་བརྒྱུད་རིམ་དེ་དག་ནང་སྐུ་ངལ་ལ་གདོང་ལེན་ཇི་ལྟར་གནང་མིན་དང་། སྙིང་སྟོབས་ཀྱིས་དཀའ་སྤྱད་ཇི་ལྟར་གནང་མིན་སོགས་ཀྱི་སྐོར་སྐུ་རེ་དང་སྦྲགས་ཏེ་རྒྱས་པར་གསུང་བའི་ནང་། མི་ཚེའི་ནང་དཀའ་ངལ་མ་བརྒྱབ་པར་གྲུབ་འབྲས་སྨིན་རྒྱུ་མེད་པ་དང་། མི་ཚེའི་ནང་དཀའ་ལས་མ་བརྒྱབ་པར་མགྱོགས་ལམ་ཞིག་ལ་འགྲོ་རྒྱུ་གཏན་ནས་མེད། ང་ཚོས་དཀའ་ལས་བརྒྱབ་དགོས་པ་ལས་དཀའ་སྡུག་ལ་བརྒྱབ་གཤིག་གཏན་ནས་བརྒྱབ་མི་རུང་བ་ཡིན་པ་བཅས་སློབ་ཕྲུག་ཚོར་ཐུགས་བརྩེ་བ་ཆེན་པོས་ལམ་སྟོན་གསུང་བཤད་གནང་བ་དང་།
དེ་རྗེས་དྲི་བ་དྲིས་ལན་གྱི་ལས་རིམ་རྒྱས་པ་ཤིག་གནང་སྐབས་སྲིད་སྐྱོང་མཆོག་གིས་སློབ་ཕྲུག་ཚོའི་དྲི་བར་དམིགས་ཏེ་ཐད་ཀར་གསུང་དོན། རྒྱ་གར་ཡུལ་མི་དང་བོད་མིའི་དབར་མཐུན་ལམ་གོང་སྤེལ་གནང་དགོས་པ་ལས་འཁྲུག་རྩོད་རིགས་བྱ་མི་རུང་བ་དང་། ད་ལྟའི་ཆར་འབྲེལ་ལམ་བཟང་པོ་ཡོད་ཅེས་དང་། ཡ་རབས་བཟང་སྤྱོད་དེ་ཁ་ཞེ་གཉིས་མེད་ཀྱི་སྒོ་ནས་མི་དང་མིའི་དབར་མཐུན་ལམ་བརྟེན་དགོས་པ་སོགས་ཀྱིས་གསུང་བཤད་ཟབ་རྒྱས་གནང་ཡོད། དེ་རྗེས་སློབ་གྲྭའི་དགེ་ཆེ་ཟླ་བ་ཚེ་རིང་ལགས་ཀྱིས་ཐུགས་རྗེ་ཆེ་ཞུས་ཏེ་ཉིན་དེའི་མཛད་རིམ་ལེགས་པར་མཇུག་སྒྲིལ། སྤྱིར་ཐེངས་འདིར་བསླབ་པ་མཐར་སོན་པ་སློབ་མ་གྲངས་ ༨ བྱུང་བའི་ཁྲོད་བཞི་ས་རྭ་བོད་ཀྱི་མཐོ་སློབ་ཁང་ནང་འཛུལ་ཞུགས་གནང་རྒྱུ་དང་། གཞན་སློབ་མ་གྲངས་བཞི་རྒྱ་གར་མཐོ་སློབ་ཁག་ཏུ་བསྐྱོད་འཆར་ཡོད་འདུག
