༄༅།། བདག་ཅག་གི་སྟོན་པ་མཉམ་མེད་ཤཱཀྱའི་རྒྱལ་པོ་མངོན་པར་རྫོགས་པ་བྱང་ཆུབ་པའི་གནས་མཆོག་རྡོ་རྗེ་གདན་དུ་ཕྱི་ལོ་ ༢༠༡༦ ཟླ་ ༡ ཚེས་ ༡༠ ནས་ ༡༩ བར་དང། བོད་ཟླ་ ༡༢ ཚེས་ ༡ ནས་ ༡༠ བར་ལོ་ལྟར་རྒྱ་བལ་འབྲུག་གསུམ་གྱི་རྙིང་མའི་དགོན་སྡེ་ཁག་གིས་གཙོས་དད་ལྡན་པ་ཡོངས་ཀྱི་སྔ་འགྱུར་རྙིང་མའི་སྨོན་ལམ་ཆེན་མོ་ཚོགས་བཞིན་ཡོད་པ་དང། ཕྱི་ལོ་ ༢༠༡༦ ཟླ་ ༡ ཚེས་ ༡༤ ནས་ཚེས་ ༢༥ བར་བོད་མིའི་སྒྲིག་འཛུགས་བཀའ་ཤག་ནས་ཇི་ལྟར་གསོལ་འདེབས་ཞུས་པ་བཞིན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་བཅོམ་ལྡན་འདས་དཔལ་དུས་ཀྱི་འཁོར་ལོའི་དབང་ཆེན་ཐེངས་ ༣༤ གནང་རྒྱུའི་ཞལ་བཞེས་སྐལ་བཟང་སྤྱི་བོར་སྨིན་ཡོད་པ། དེ་ཡང་ཕྱི་ཚེས་ ༡༤ ནས་ ༡༦ བར་ཉིན་གསུམ་རིང་༸གོང་ས་༸སྐྱབས་མགོན་ཆེན་པོ་མཆོག་ཚོགས་མགོན་དབུ་བཞུགས་ཐོག་རྣམ་རྒྱལ་གྲྭ་ཚང་གི་མཁན་གྲྭ་རྣམས་ནས་ས་ཆོག་དང་རྡུལ་མཚོན་གྱི་དཀྱིལ་འཁོར་འབྲི་བཞེངས་སོགས་གནང་རྒྱུ། ཕྱི་ཚེས་ ༡༧ ནས་ ༡༩ བར་ཉིན་གསུམ་རིང་སྔ་དྲོར་སྔོན་འགྲོའི་གསུང་ཆོས་སུ་རྒྱལ་སྲས་ཞི་བ་ལྷས་མཛད་པའི་བྱང་ཆུབ་སེམས་པའི་སྤྱོད་པ་ལ་འཇུག་པའི་བཀའ་ཆོས་སྩལ་རྒྱུ།
ཕྱི་ཚེས་ ༢༠ ཉིན་རྣམ་རྒྱལ་གྲྭ་ཚང་གིས་དུས་འཁོར་མཆོད་གར། ཕྱི་ཚེས་ ༢༡ ནས་ ༢༤ བར་ཉིན་རྒྱབ་དུས་འཁོར་དབང་ཆེན་གྱི་སྟ་གོན་དང། དངོས་གཞི་བཅས་རིམ་བཞིན་བཀྲིན་བསྐྱང་རྒྱུ། ཕྱི་ཚེས་ ༢༥ ཞོགས་པ་ཚེ་དབང་དང་བརྟན་བཞུགས་བསྟར་འབུལ་ཞུ་རྒྱུ་བཅས་ཀྱི་མཛད་རིམ་དེ་ལྟར་ཡང། སྔ་འགྱུར་རྙིང་མའི་སྨོན་ལམ་དང་ཕྱི་ཚེས་ ༡༧།༡༨།༡༩ བཅས་ཉིན་གསུམ་རིང་སྔོན་འགྲོའི་བཀའ་ཆོས་དང་དུས་ཚོད་སྟབས་འཁེལ་བ་ལས་དུས་དབང་དངོས་གཞི་དང་དུས་ཚོད་སྟབས་འཁེལ་མེད་པས། དཔལ་ལྡན་སྲིད་སྐྱོང་མཆོག་གི་ལམ་སྟོན་བཞིན་སྔ་འགྱུར་རྙིང་མའི་སྨོན་ལམ་ཚོགས་པའི་འབྲེལ་ཡོད་བླ་ཆེན་རྣམ་པ་དང། ཆོས་རིག་བཀའ་བློན། རྙིང་མའི་སྤྱི་འཐུས་བོད་མི་མང་སྤྱི་འཐུས་ཚོགས་གཙོ་སྐུ་གཞོན་བཅས་གོ་བསྡུར་ཞིབ་ཕྲ་ཞུས་འབྲས། རྙིང་མའི་སྨོན་ལམ་ཕྱི་ཚེས་ ༡༠ ནས་ ༡༦ དང་། བོད་ཚེས་ ༡ ནས་ ༧ བར་ནམ་རྒྱུན་བཞིན་ཉིན་འཁྱོངས་འཚོག་གནང་རྒྱུ་དང། ཕྱི་ཚེས་ ༡༧ ནས་༡༩ བར་ཉིན་གསུམ་རིང་སྔ་དྲོར་༸གོང་ས་༸སྐྱབས་མགོན་ཆེན་པོ་མཆོག་གི་སྔོན་འགྲོའི་གསུང་ཆོས་སུ་བཅར་གནང་རྒྱུ་དང་ཉིན་རྒྱབ་རྙིང་མའི་སྨོན་ལམ་འཚོག་གནང་རྒྱུ་ཐུགས་གཏན་འཁེལ་བ་ལགས་ན། ཆོས་ཕྱོགས་ཀྱི་བྱ་བ་རླབས་པོ་ཆེ་གཉིས་དུས་གཅིག་ཏུ་མཛད་སྟབས་མི་བདེ་བ་མེད་པར་བདེ་བླག་ངང་བསྟན་འགྲོར་ཕན་པའི་ཆོས་ཕྱོགས་ཀྱི་མཛད་འཕྲིན་མཐའ་རྒྱས་ཡོང་རྒྱུ་ལགས་ན་འབྲེལ་ཡོད་ཚང་མས་དེ་དོན་དགོངས་ཆུབ་ཡོང་བ་ཞུ། ཆོས་རིག་ལས་ཁུངས་ནས་ཕྱི་ལོ་ ༢༠༡༥ ཟླ་ ༥ ཚེས་ ༢༧ ལ་ཕུལ།
