༢༠༡༥ ཟླ་ ༥ ཚེས་ ༡༩ རེས་གཟའ་མིག་དམར།
༄༅། །འདི་གར་ཁུངས་ལྡན་གནས་ཚུལ་འབྱོར་དོན་ནང་གསལ། བོད་ནས་གསར་དུ་གནས་ཚུལ་ཐོན་པ་ལྟར་ན། མདོ་ཁམས་ནགས་ཤོད་འབྲི་རུའི་ནང་གྲགས་ཆེ་བའི་གཞས་པ་མགོན་པོ་བསྟན་འཛིན་ལགས་ཕྱི་ལོ་ ༢༠༡༣ ལོའི་ཟླ་བ་ ༡༡ པའི་ནང་རྒྱ་ནག་གཞུང་གིས་འཛིན་བཟུང་བྱས་ཏེ་ཕྱི་ལོ་ ༢༠༡༥ ལོའི་ཟླ་བ་ ༤ ཚེས་ ༡༥ ཉིན་ལོ་གསུམ་དང་ཟླ་བ་དྲུག་གི་ཁྲིམས་ཐག་བཅད་འདུག
གཞས་པ་མགོན་པོ་བསྟན་འཛིན་ལོ་གཅིག་ལྷག་ཙམ་རིང་རྒྱ་ནག་གཞུང་གིས་རྒྱག་རྡུང་མནར་གཅོད་འོག་བཀག་ཉར་བྱས་ཏེ། ཕྱི་ལོ་ ༢༠༡༥ ལོའི་ཟླ་བ་ ༤ པའི་ཚེས་ ༡༥ ཉིན་གཞི་ནས་ཁྲིམས་ཐག་བཅད་ནས་དེའི་རིང་ཆབ་སྲིད་ཁེ་དབང་འཕྲོག་རྒྱུ་ཟེར་ནས་ཡིག་ཆ་དོ་བདག་ལ་སྤྲད་ཡོད་འདུག
འབྲེལ་ཡོད་མི་སྣས་འགྲེལ་བརྗོད་བྱས་དུས། རྒྱ་ནག་གཞུང་གིས་གཞས་པ་མགོན་པོ་བསྟན་འཛིན་ལགས་འཇུ་བཟུང་བྱ་དགོས་པའི་རྒྱུ་མཚན་ནི་དེ་སྔོན་ཁོང་གི་ཆེད་སྒྲིག་གླུ་གཞས་སྤྱིན་ཤོག་ཅིག་གི་ནང་དུ། <<གངས་ཅན་བོད་ལ་ལོ་གསར་གང་ན་ཡོད>>ཟེར་བའི་གཞས་བཏང་བའི་ནག་ཉེས་རེད་ཟེར། སྤྱིར་ཁོང་སྤྱིན་ཤོག་གཞས་ཚིག་ནང་དོན་ཤས་ཆེ་བ་བོད་མིའི་ལས་དབང་དང་། བོད་ཀྱི་སྐད་ཡིག་དར་སྤེལ། མི་རིགས་སློབ་གསོའི་སྐོར་སོགས་ཡིན་པ་རེད།
<<གངས་ཅན་བོད་ལ་ལོ་གསར་གང་ན་ཡོད>>ཅེས་པའི་གཞས་ཚིག་འདི་ལྟར།
གངས་ཅན་བོད་ལ་ལོ་གསར་གང་ན་ཡོད།
གངས་སེང་དཀར་མོ་གངས་ལ་འགྱིང་ཐག་རིང༌།
གངས་རིའི་དཔའ་བོ་གངས་ཕྱིར་འཁོད་ཐབས་བྲལ།
གངས་བུ་རྒོད་པོ་གངས་སླད་སྐྱིད་ཐབས་དབེན།
གངས་ཅན་བོད་ལ་ལོ་གསར་གང་ན་ཡོད།
གངས་རིའི་རྩེ་ནས་ཁྱི་རྒན་ཀུ་ཅོ་འདོན།
གངས་རིའི་སྐེད་ནས་སྤྱང་མོས་ངུ་ཟུག་འཐེན།
གངས་རིའི་འདབས་ནས་ཝ་མོས་གཡོ་གར་འཁྲབ།
གངས་ཅན་བོད་ལ་ལོ་གསར་གང་ན་ཡོད།
གངས་རིའི་སྙིང་ཁྲག་དྲོན་མོ་ས་ལ་གཏོར།
གངས་རིའི་རླུང་རྟ་དཀར་པོ་ཆུ་ལ་བསྐྱུར།
གངས་རིའི་ཚེ་སྲོག་དམར་པོ་མེ་ལ་སྤར།
གངས་ཅན་བོད་ལ་ལོ་གསར་གང་ན་ཡོད།
གངས་རིའི་ངུ་སྐད་རྒྱལ་ཁམས་ཡོངས་ལ་ཁྱབ།
གངས་རིའི་མིག་ཆུས་འཛམ་གླིང་བསྐོར་བ་བརྒྱབ།
གངས་རིའི་ན་ཟུག་ས་སྟེང་སུ་ཡིས་ཚོར།
གངས་ཅན་བོད་ལ་ལོ་གསར་གང་ན་ཡོད།
གངས་རིའི་གཟི་བྱིན་སྨུག་སྤྲིན་ནག་པོ་བསྒྲིབས།
གངས་རིའི་ལང་ཚོ་དུས་ཀྱི་ཉི་མས་གཟས།
གངས་རིའི་འཇིག་རྟེན་ཕལ་ཆེར་འཇིག་ལ་ཉེ།
གངས་ཅན་བོད་ལ་ལོ་གསར་གང་ན་ཡོད།
གངས་རིའི་ཐོབ་ཐང་གཞན་དབང་འོག་ན་ཡོད།
གངས་རིའི་རང་དབང་མནར་གཅོད་ཁྲོད་ན་ལུས།
གངས་ཕྲུག་རྣལ་མའི་སེམས་ཤིག་ཡོད་རྒྱུ་ན།
གངས་ཅན་བོད་ལ་ལོ་གསར་གང་ན་ཡོད།
རྒྱ་གཞུང་གི་ཉེན་རྟོག་པས་འཛིན་བཟུང་བྱས་པའི་ཁམས་འབྲི་རུ་རྫོང་ཤག་ཆུ་གྲོང་རྡལ་སེབ་ཁྲ་གྲོང་ནས་ཡིན་པའི་གཞས་པ་མགོན་པོ་བསྟན་འཛིན་ད་ལྟ་རང་ལོ ༢༧ ཡིན་པ་དང་། ཁོང་གི་ཁྱིམ་དུ་ཕ་མ་རྒན་རྒོན་དང་བཟའ་མི་བུ་ཕྲུག་བཅས་ཡོད་འདུག
དེ་མིན། ད་ལྟའི་ཆར་ཁམས་ནགས་ཤོད་འབྲི་རུ་རྫོང་དུ་ས་གནས་བོད་མི་མང་པོ་ཞིག་ལ་ཕྱི་ཕྱོགས་ཁ་བྲལ་ཤོག་ཁག་དང་དང་འབྲེལ་བ་འདུག་ཟེར་ནས་དོན་མེད་འཇུ་བཟུང་བཙན་ཁྲིད་བྱེད་བཞིན་ཡོད། འབྲི་རུ་རྫོང་ཤག་ཆུ་གྲོང་རྡལ་ནས་ཡིན་པ་ཀྲེ་བོ་དར་བཟང་དང་མཁྱེན་རབ་སོགས་ཉེ་ཆར་འཇུ་བཟུང་བྱས་པའི་གནས་ཚུལ་འདུག ད་ལྟའི་ཆར་རེས་གཟའ་ལྷག་པ་དང་བོད་ཚེས་བཅོ་ལྔ། དེ་མིན་ཚེས་བཟང་བཅས་ལ་དཀར་ཟས་བསྟེན་པ་གཟབ་མཆོར་སྤྲས་པ་སོགས་ལ་རྒྱ་གཞུང་གིས་ཁག་དཀྲི་བཟོ་སའི་ཁ་གཏད་གཙོ་བོ་ཞིག་ཏུ་ཆགས་ཡོད་པ་རེད།
མགོན་པོ་བསྟན་འཛིན་ཁྲིམས་ཐག་བཅད་པའི་གནས་ཚུལ་ད་ལྟ་གཞི་ནས་རག་དོན་ནི། ནགས་ཤོད་འབྲི་རུ་ཁུལ་དུ་བོད་ཁུལ་ཡོངས་ལ་མེད་པའི་དམ་དྲག་བཙན་གནོན་ཚད་མེད་ཅིག་ཡོད་པ་དང་། ཉིས་སྟོང་བཅུ་གསུམ་ལོའི་ལོ་མཇུག་ཙམ་ནས་བཟུང་སྐད་འཕྲིན་ནམ we chat མུ་མཐུད་བཀག་སྡོམ་བྱས་པ། ཕྱི་ཕྱོགས་ནས་ཁ་པར་ཡང་ཧ་ཅང་འགྲོ་དཀའ་བ། མཚམས་རེ་ཁ་པར་འཕྲོད་ནའང་ས་གནས་ཡུལ་མི་ཉེན་ཁ་ཧ་ཅང་ཆེན་པོ་ཡོད་པ་རེད། ས་གནས་སེར་མོ་བ་སུ་གཅིག་བོད་ཀྱི་མདོ་སྨད་ས་ཁུལ་དང་ཁམས་སྨད་ཁུལ་སློབ་གཉེར་གཏོང་གི་མེད་ལ། སྔོན་ཆད་ས་ཆ་དེ་དག་ཏུ་སློབ་གཉེར་སོང་བ་ཚང་མ་ཕ་ཡུལ་བཀུགས་ཡོད་པ་མ་ཟད། ཟླ་བ་གསུམ་དང་ལོ་ཕྱེད་བཅས་དུས་ཚོད་མི་འདྲ་བར་ཆབ་སྲིད་སློབ་གསོ་དྲིལ་བརྒྱབ་ཡོད་ལ། ཡུལ་མི་སུ་གང་ལྗོངས་ཕྱི་ལོགས་སུ་འགྲོ་སྐྱོད་ཐུབ་ཀྱི་མེད་པ་རེད། ཁ་པར་སོགས་བརྡ་འཕྲིན་བརྒྱུད་ལམ་དག་ནས་ས་གནས་སུ་ཧ་ལམ་འབྲེལ་བ་བྱེད་ཐུབ་ཀྱི་མེད་སྟབས། ས་གནས་བོད་མི་མང་པོ་ཞིག་ཆབ་སྲིད་ཉེས་མིང་སྣ་ཚོགས་འོག་ཕོག་ཐུག་ཕྱིན་ཡོད་ལ། ད་ལྟའང་ཕོག་ཐུག་གཏོང་བཞིན་པའི་གནས་ཚུལ་མང་པོ་ཞིག་ཕྱི་ལོགས་སུ་ཐོན་གྱི་མེད་པ་རེད།
