༢༠༡༥ ཟླ་ ༤ ཚེས་ ༡༠ རེས་གཟའ་པ་སངས།
༄༅། །འདི་གར་ཁུངས་ལྡན་གནས་ཚུལ་འབྱོར་གསལ་ལྟར་ན། ཕྱི་ལོ་ ༢༠༡༥ ཟླ་ ༤ ཚེས་ ༨ རེས་གཟའ་ལྷག་པའི་སྔ་དྲོ་ཆུ་ཚོད་ ༩ ཙམ་ལ་ཁམས་བྲག་འགོ་རྫོང་བྲག་ཟུར་གྲོང་ཚོའི་བྲག་ཟུར་ཚང་གི་ཕ་ཤེས་རབ་དང༌། མ་བསོད་ནམས་སྒྲོལ་མ་གཉིས་ཀྱི་བུ་མོ། ངང་སྒང་བཙུན་དགོན་གྱི་བཙུན་མ་རང་ལོ་ ༤༧ དུ་སོན་པ་ཡེ་ཤེས་མཁའ་འགྲོ་ལགས་ཀྱིས་དཀར་མཛེས་རྫོང་སྐུ་འབུམ་ཞབས་ཀྱི་ཉེན་རྟོག་ཁང་གི་ཉེ་འགྲམ་ཞིག་ཏུ། ྋགོང་ས་མཆོག་བོད་དུ་གདན་འདྲེན་ཞུ་དགོས། བོད་ལ་རང་དབང་དགོས། ྋགོང་ས་མཆོག་སྐུ་ཚེ་ཁྲི་ལོར་བརྟན་པར་ཤོག ཅེས་སྐད་འབོད་གནང་བཞིན་དུ་རང་ལུས་མེར་སྲེག་གནང་ཡོད་འདུག སྐབས་དེར་དེ་གའི་ཉེན་རྟོག་པས་མེ་གསོད་ཡོ་བྱད་ཀྱིས་མེ་བསད་དེ་ཁོང་མཉམ་འཁྲིད་བྱས་ཡོད་འདུག ད་ལྟའི་ཆར་ཁོང་འདས་གསོན་ཇི་ཡིན་ཁ་གསལ་གནས་ཚུལ་མི་འདུག་ཀྱང་ཁོང་གིས་རང་ལུས་མེར་སྲེག་གནང་སྐབས་དེ་གའི་ཡུལ་མི་དངོས་སུ་མཐོང་མཁན་རྣམས་ཀྱིས་ཁོང་འདས་གྲོངས་སུ་གྱུར་ཡོད་པའི་ཚོད་དཔག་གནང་བཞིན་ཡོད་འདུག
ཕྱི་ལོ་ ༢༠༡༥ ཟླ་ ༤ ཚེས་ ༩ ཉིན་བཙུན་མ་ཡེ་ཤེས་མཁའ་འགྲོ་ལགས་ཀྱི་ནང་མི་རྣམས་དེ་ག་ས་གནས་ཉེན་རྟོག་ཁང་དུ་སྐད་བཏང་ཐོག་ཁོང་འདས་གྲོངས་སུ་གྱུར་ཡོད་པ་བཤད་ཡོད་འདུག་ཀྱང༌། བཙུན་མ་ཡེ་ཤེས་མཁའ་འགྲོ་ལགས་ཀྱི་སྐུ་ཕུང་ནང་མིར་ཕྱིར་སྤྲོད་བྱས་མི་འདུག་སྟབས་ཁོང་ད་ལྟའི་ཆར་འདས་གསོན་ཇི་ཡིན་ཐད་ཞུ་དཀའ་བའི་གནས་སུ་གྱུར་འདུག
