༢༠༡༥ ཟླ་ ༤ ཚེས་ ༢༡ རེས་གཟའ་མིག་དམར།
༄༅། །ཕྱི་ལོ ༢༠༡༥ ཟླ ༤ ཚེས ༢༡ ཉིན་གྱི་སྔ་དྲོ་ཆུ་ཚོད་ ༡༠།༣༠ ཐོག་ཕྱི་དྲིལ་ལྷག་པ་ཚེ་རིང་དྲན་རྟེན་ཚོགས་ཁང་དུ་དྲིལ་བསྒྲགས་དྲུང་ཆེ་བཀྲ་ཤིས་ཕུན་ཚོགས་ལགས་ཀྱིས་ལྷོ་ཨ་ཕི་རི་ཀ་ནས་འདིར་ཕེབས་པའི་སློབ་མ་གྲངས་བཅུ་ཙམ་དང་ཐུག་འཕྲད་གནང་ནས་བོད་མིའི་སྒྲིག་འཛུགས་ཀྱི་ལྷན་ཁང་ཁག་གི་ངོ་སྤྲོད་དང་འབྲེལ་མང་གཙོའི་ཀ་བ་གསུམ་གྱི་འཕེལ་རིམ་དང་།
ལས་དོན་སྤེལ་ཕྱོགས་སྐོར་པར་རིས་ལམ་ནས་གསལ་བཤད་གནང་། ཕྱོགས་མཚུངས་སྐབས་དེར་དྲུང་ཆེས་བཙན་བྱོལ་བོད་མི་མི་མང་སྤྱི་འཐུས་ལྷན་ཚོགས་ཀྱིས་ལས་དོན་སྤེལ་ཕྱོགས་དང་། སྤྱི་འཐུས་ཀྱི་གྲངས་ཚད། དེ་བཞིན་ཉེ་ལམ་ཕྱི་ཟླ་ ༣ ནང་སྔོན་རྩིས་གཏན་འབེབས་སོགས་ངོ་སྤྲོད་གནང་།
སྐབས་དེར་དྲུང་ཆེས་བོད་མི་རྣམས་བཙན་བྱོལ་དུ་ཡོང་དགོས་དོན་ནི་བོད་ནང་རྒྱ་ནག་གཞུང་གིས་ཕྱི་ལོ་ ༡༩༥༩ ལོར་བཙན་འཛུལ་བྱས་པར་བརྟེན་༸གོང་ས་༸སྐྱབས་མགོན་ཆེན་པོ་མཆོག་རྒྱ་གར་དུ་བྲོས་བྱོལ་དུ་ཆིབས་སྒྱུར་བསྐྱངས་ཡོད། སྐབས་དེར་བོད་མི་སྟོང་ཕྲག་མང་པོ་༸གོང་ས་མཆོག་གི་༸ཞབས་རྗེས་སུ་འབྲང་ནས་རྒྱ་གར་དུ་བྲོས་བྱོལ་ལ་བསླེབས་ཡོད་སྐོར་སོགས་གསུངས་པ་མ་ཟད། ལྷག་པར་དུ་རྒྱ་གར་ནང་ བོད་མིའི་སྒྲིག་འཛུགས་དང་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེའི་བཀྲིན་ལ་བརྟེན་དེང་སྐབས་བོད་མི་བཙན་བྱོལ་བ་རྣམས་ཀྱིས་གནའ་དེང་ཟུང་འབྲེལ་ཐོག་ནས་མང་གཙོའི་ལམ་སྲོལ་ལོངས་སུ་སྤྱོད་བཞིན་པའི་གནས་སྟངས་སྐོར་འགྲེལ་བརྗོད་གནང་ཡོད། དེ་བཞིན་བཙན་བྱོལ་བོད་མིའི་མང་གཙོའི་འཕེལ་རིམ་སྐོར་ལ་གསུང་སྐབས་ཕྱི་ལོ་ ༢༠༡༡ ལོ་ནས་བཟུང་༸གོང་ས་མཆོག་གིས་བོད་མིའི་ཆབ་སྲིད་ཀྱི་སྐུ་དབང་ཡོངས་རྫོགས་མང་གཙོའི་ལམ་ནས་འོས་འདེམས་བྱུང་བའི་སྲིད་སྐྱོང་བློ་བཟང་སེང་གེ་མཆོག་ལ་རྩིས་སྤྲོད་མཛད་པ་ནས་བཟུང་ད་བར་ལས་དོན་གང་སྤྱིའི་ཐད་ལྷིང་འཇགས་སུ་གནས་མུར་ཡར་རྒྱས་ཀྱི་གོམས་སྟབས་སྤོ་བཞིན་ཡོད་སྐོར་གསུངས། མཐར་སློབ་ཕྲུག་གཉིས་ཀྱི་དྲི་བར་ལན་འདེབས་ཁ་གསལ་གནང་བསྟུན་ལས་རིམ་མཇུག་སྒྲིལ།
