༢༠༡༥ ཟླ་ ༤ ཚེས་ ༡༣ རེས་གཟའ་ཟླ་བ།
༄༅། །ཕྱི་ལོ་ ༢༠༡༥ ཟླ་ ༤ ཚེས་ ༡༠ ཉིན་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་སུ་ཇཱ་བོད་ཁྱིམ་ནས་སྒྱུ་རྩལ་སློབ་ཚན་ཐོག་འཛིན་རིམ་བཅུ་གཉིས་སློབ་ཐོན་ཐེངས་དང་པོའི་སློབ་མ་རྣམས་ལ་གསུང་བཤད་གནང་འདུག
དེ་ཡང་དཔལ་ལྡན་སྲིད་སྐྱོང་མཆོག་སུ་ཇཱ་བོད་ཁྱིམ་དུ་ཕེབས་འབྱོར་སྐབས་སུ་ཇཱ་བོད་ཁྱིམ་གྱི་སློབ་སྤྱིས་གཙོས་སྦིར་དང་ཅོན་ཏ་ར། སྡེ་དགེ་བཅས་ཀྱི་ས་གནས་འགོ་འཛིན་རྣམ་པ། གཞུང་འབྲེལ་དང་གཞུང་འབྲེལ་མིན་པའི་སྐུ་ཚབ་བཅས་ཀྱིས་ཕེབས་བསུ་གཟབ་རྒྱས་ཞུས་འདུག དེ་ནས་སྲིད་སྐྱོང་མཆོག་སློབ་གྲྭའི་ཚོགས་ཁང་ནང་སུ་ཇཱ་བོད་ཁྱིམ་གྱི་སློབ་མ་རྣམས་ལ་འཚམས་འདྲི་ཞུས་པ་དང་ཆབས་ཅིག་གསུང་བཤད་གནང་སྐབས། ཐེངས་འདིའི་འཛིན་རིམ་བཅུ་གཉིས་སློབ་གྲྭ་ཐོན་མཁན་ཕལ་ཆེ་བ་བོད་ནས་བསླེབས་པ་ཡིན་སྟབས།
སློབ་ཐོན་མཛད་སྒོ་འདི་བཞིན་དམིགས་བསལ་གལ་ཆེན་པོ་ཞིག་ལ་ངོས་འཛིན་ཞུ་བཞིན་ཡོད་སྐོར་གསུང་དོན། ཁྱེད་ཚོ་མང་ཆེ་བ་བོད་ནས་ཡིན་འདུག ཁྱེད་ཚོའི་ཕ་མ་དང་ནང་མི་ཚོའི་ངོས་ནས་ཤེས་ཡོན་ཐོག་རེ་བ་ཆེན་པོ་བརྒྱབ་སྟེ་ཁྱེད་ཚོ་འདིར་བཏང་བ་རེད། དེ་བཞིན་བོད་མིའི་སྒྲིག་འཛུགས་ཀྱི་ངོས་ནས་ཁྱེད་ཚོར་ལྟ་སྐྱོང་བྱེད་མཁན་ལྟ་བུ་བྱས་ཏེ། ཁྱེད་ཚོའི་ཤེས་ཡོན་ཐོག་གྲུབ་འབྲས་ཡག་པོ་ཐོན་ཐབས་བྱེད་རྒྱུ་ང་ཚོའི་ལས་འགན་གལ་ཆེན་པོ་ཞིག་ལ་ངོས་འཛིན་ཞུ་བཞིན་ཡོད། ང་ཚོས་སོ་སོའི་འཚོ་བ་ཡག་པོ་ཞིག་སྐྱེལ་རྒྱུ་ཁོ་ནའི་ཆེད་སློབ་སྦྱོང་བྱས་པ་ཞིག་མིན་པར་བོད་ཀྱི་རྩ་དོན་ཆེད་སློབ་སྦྱོང་བྱེད་བཞིན་ཡོད། དེར་བརྟེན་བོད་རིགས་སློབ་ཕྲུག་རྣམས་ཀྱི་དུས་དང་རྣམ་པ་ཀུན་དུ་སློབ་སྦྱོང་ཡག་པོ་བྱེད་དགོས་རྒྱུར་དམིགས་བསལ་འགན་ཞིག་ཡོད།
ད་ལྟའི་བཀའ་ཤག་གིས་ཤེས་ཡོན་འདི་བཞིན་ལས་དོན་ཚང་མའི་ནང་ནས་གལ་ཆེ་ཤོས་ཤིག་ལ་ངོས་འཛིན་ཞུ་བཞིན་ཡོད་པར་བརྟེན་དེའི་ཐོག་གང་ཐུབ་འགྲོ་གྲོན་གཏོང་བཞིན་ཡོད། ཤེས་ཡོན་དང་སྤྱི་ཚོགས་ཡར་རྒྱས་གཉིས་དབར་འབྲེལ་བ་ཧ་ཅང་ཆེན་པོ་ཡོད། ང་ཚོའི་ཕྲག་པར་བོད་ནང་གི་བོད་མི་རྣམས་ཀྱི་རེ་བ་དང་མངོན་འདོད་སྒྲུབ་རྒྱུའི་འགན་ཁུར་ཡོད། ཁོང་རྣམ་པའི་མངོན་འདོད་དང་རེ་བ་བསྐོང་ཆེད་ཤེས་ཡོན་ཧ་ཅང་གལ་ཆེན་པོ་ཆགས་ཡོད། དེར་བརྟེན་ཁྱེད་ཚོས་སློབ་སྦྱོང་ཐོག་གྲུབ་འབྲས་ལེགས་པོ་སོན་པར་ཉུང་མཐར་ཉིན་ལྟར་ཆུ་ཚོད་ ༡༠ སློབ་སྦྱོང་ཆེད་གཏོང་དགོས། ཞེས་སོགས་ཀྱི་གསུང་བཤད་གནང་ཡོད།
དེ་རྗེས་སྲིད་སྐྱོང་མཆོག་གིས་སློབ་ཐོན་སློབ་མ་གྲངས་ ༡༢༨ རྣམས་ལ་མཇལ་དར་དང་སློབ་སྦྱོང་ཐོག་བྱ་བ་ལམ་ལྷོང་ཡོང་བའི་འཚམས་འདྲི་ཡང་གནང་འདུག
དེ་བཞིན་གོང་ཚེས་ཉིན་སྲིད་སྐྱོང་མཆོག་གིས་ཅོན་ཏ་ར་བོད་ཁྱིམ་དང་སཾམ་བྷོ་ཊ་སློབ་གྲྭའི་སློབ་མ་རྣམས་དང་ཐུག་འཕྲད་ཀྱིས་ཤེས་ཡོན་གྱི་གལ་གནད་དང་འགོ་ཁྲིད་ཀྱི་ལམ་སྟོན་སྐོར་གསུང་བཤད་གནང་། སྐབས་དེར་སློབ་ཕྲུག་རྣམས་ཀྱིས་ཤེས་ཡོན་དང་དབུ་མའི་ལམ་གྱི་སྲིད་བྱུས་སོགས་ཀྱི་སྐོར་དྲི་བ་འདོན་སྐབས་སྲིད་སྐྱོང་མཆོག་གིས་ལན་འདེབས་ཞིབ་ཕྲ་གནང་འདུག
དེ་རྗེས་སྲིད་སྐྱོང་མཆོག་གིས་སྦིར་བོད་ཚོགས་ཀྱི་སྤྱི་ཁང་ནང་དུ་ས་གནས་འགོ་འཛིན་རྣམས་དང་ལྷན་ཞུགས་མོལ་ཚོགས་འདུའི་དབུ་བཞུགས་སྐྱོང་གནང་འདུག སྐབས་དེར་འབྲེལ་ཡོད་ས་གནས་སོ་སོའི་ནང་འཕྲད་བཞིན་པའི་དཀའ་ངལ་སེལ་ཐབས་སྐོར་གོ་བསྡུར་གནང་འདུག དེ་ཉིན་གྱི་ལས་རིམ་མཐའ་མར་སྲིད་སྐྱོང་མཆོག་གིས་སྦིར་ཁུལ་དུ་བོད་ནས་གསར་དུ་འབྱོར་བ་རྣམས་དང་ཐུག་འཕྲད་གནང་བ་མ་ཟད། ཁོང་རྣམས་ཀྱི་ཞུགས་གནས་ཆེད་བོད་མིའི་སྒྲིག་འཛུགས་ཀྱིས་ས་ཆ་ཉོས་ཡོད་པ་དེར་གཟིགས་ཞིབ་གནང་བ་དང་སྦྲགས། ས་གནས་བོད་མི་རྣམས་ཀྱི་དཀའ་ངལ་སྙན་སྒྲོན་ཞུས་པ་རྣམས་ཉན་ཞིབ་གནང་ནས་བོད་མིའི་སྒྲིག་འཛུགས་ཀྱིས་གང་ཐུབ་རོགས་རམ་གནང་རྒྱུའི་ཞལ་བཞེས་གནང་ཡོད་པ་བཅས།།
