༢༠༡༥ ཟླ་ ༤ ཚེས་ ༢༣ རེས་གཟའ་ཕུར་བུ།
༄༅། །ཕྱི་ལོ་ ༢༠༡༥ ཟླ་ ༤ ཚེས་ ༢༣ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་ལྷོ་ཨ་ཕི་རི་ཁའི་ཡི་ཤུའི་ཆོས་དཔོན་ཌེ་སི་མོན་ཊུ་ཊུ་མཆོག་ལྷན་རྒྱས་རྡ་ས་བོད་ཁྱིམ་སློབ་གྲྭར་ཆིབས་སྒྱུར་གྱིས་སློབ་གྲྭའི་ཐང་ཆེན་དུ་༸ཞབས་སོར་འཁོད་མཚམས་ཐོག་མར་ཉེ་འདབས་སུ་སློབ་གྲྭའི་དཔེ་མཛོད་ནང་ཆིབས་སྒྱུར་བསྐྱངས་ནས་སློབ་ཕྲུག་ཁག་གཅིག་གིས་སྤྲོ་སྣང་སྐོར་ལ་རྩོམ་ཡིག་བྲིས་པ་གྱང་ངོས་སུ་སྦྱར་ཡོད་པ་རྣམས་ལ་ཐུགས་ཞིབ་མཛད་པ་མ་ཟད།
སློབ་མ་ཁག་གཅིག་གིས་བོད་ནས་རྒྱ་གར་དུ་བྲོས་བྱོལ་ཡོང་སྐབས་དཀའ་སྡུག་ཇི་ལྟར་མྱངས་པའི་སྐོར་སྙན་སེང་ཞུས།
སྐབས་དེར་སློབ་མ་གཅིག་གིས་རང་ཉིད་བྲོས་བྱོལ་སྐོར་གྱི་གནས་ཚུལ་རྣམས་ངུ་འབོད་དང་སྦྲགས་སྙན་སེང་ཞུ་སྐབས་བླ་ཆེན་ཊུ་ཊུ་མཆོག་གི་སྲས་མོས་ཡར་སྐུ་གཞེངས་ནས་སློབ་མ་དེར་སེམས་གསོ་གནང་འདུག
དེ་རྗེས་བོད་ཁྱིམ་གྱི་སིལ་སྤོལ་རྩེད་
ཐང་དུ་༸ཞབས་སོར་འཁོད་སྐབས་དད་ལྡན་སེར་སྐྱ་མང་ཚོགས་སྟོང་ཕྲག་བརྒལ་བའི་དབུས་སློབ་ཕྲུག་ཕོ་མོ་ཡོངས་ནས་ཕེབས་བསུ་གཟབ་རྒྱས་ཐོག་བརྒྱད་བཅུའི་དབྱངས་སྙན་འབུལ་ལམ་ཞུས་པ་དང་སྦྲགས། ཞབས་སྟེགས་ཐོག་འཁོད་མཚམས་སློབ་ཕྲུག་ཚོས་ང་ཚོ་ཚང་མ་སྐྱིད་པོ་ཡོད་ན། ཞེས་པའི་གླུ་དབྱངས་ཕུལ་ཡོད་པར་ནོ་བེལ་ཞི་བདེའི་གཟེངས་རྟགས་བཞེས་མྱོང་མཁན་གྱི་ཞི་བདེའི་དེད་དཔོན་༸གོང་ས་མཆོག་དང་། ཌེ་སི་མོན་ཊུ་ཊུ་མཆོག་ཐུགས་དགྱེས་ཚོར་ཆེན་པོས་ཡར་སྐུ་བཞེངས་ཏེ་སློབ་ཕྲུག་ཡོངས་ལ་ཐུགས་བརྩེའི་སྤྱན་གྱི་གཟིགས་པར་མཛད།
དེ་ནས་༸གོང་ས་༸སྐྱབས་མགོན་ཆེན་པོ་མཆོག་དང་ཡེ་ཤུའི་བླ་ཆེན་ཌེ་སི་མོན་ཊུ་ཊུ་མཆོག
་རྣམ་གཉིས་ཀྱིས་བཀའ་སློབ་དང་སློབ་ཕྲུག་གིས་དྲི་བར་བཀའ་ལན་མ་མཛད་གོང་ཐོག་མར་༸གོང་ས་མཆོག་གིས་ཆོས་དཔོན་ཊུ་ཊུ་མཆོག་ལ་བཀའ་སློབ་ཕེབས་དོན། སྐུ་ཉིད་ཀྱིས་ག་དུས་ཡིན་ཡང་ངོས་ཀྱི་དབྱིན་སྐད་དེ་ཧ་ཅང་སྐྱོ་པོ་འདུག་ཅེས་གསུང་གི་ཡོད་པར་བརྟེན། དེ་རིང་འདིར་ངོས་ནས་བོད་སྐད་ཐོག་གཏམ་བཤད་བྱེད་རྒྱུ་ཡིན། ཞེས་ཞལ་ཤོབ་དང་སྦྲགས་ངོ་སྤྲོད་བཀའ་སློབ་ཕེབས་དོན།
དེ་རིང་འདིར་ཕེབས་པའི་ཌེ་སི་མོན་ཊུ་ཊུ་མཆོག་ནི་དངོས་གནས་འཛམ་གླིང་འདིའི་སྒང་གི་གྲོགས་པོ་ཉེ་ཤོས་ཀྱི་གྲས་ཤིག་ཡིན། མི་དང་མིའི་འབྲེལ་བའི་ཆ་ནས་དངོས་གནས་གྲོགས་པོ་ཉེ་ཤོས་ཤིག་ཡིན་ལ་ཡང་མི་རིགས་ཀྱི་ཐོག་ནས་བཤད་ན་ཁོང་ནི་བོད་མི་རིགས་ཀྱི་བདེན་དོན་ཆེད་དུ་ཐོག་མཐའ་བར་གསུམ་དུ་བདེན་པའི་བདེན་རྒྱབ་བསྒྱུར་བ་མེད་པ་དང་རང་ཟོན་སྤངས་པ་ཞིག་ཁོང་གིས་གནང་བཞིན་ཡོད། ངོས་རང་ནང་པ་ཞིག་ཡིན་པའི་ཐོག་ནས་འཛམ་གླིང་འདིའི་སྟེང་ཆོས་ལུགས་ཚང་མ་མཐུན་པོ་དང་ང་ཚོ་མཐུན་མོང་གི་བསྒྲུབ་བྱ་འགྲོ་བ་མི་སྤྱི་ལ་ཕན་ཐོགས་བསྒྲུབ་ཐུབ་རྒྱུ་ཞིག་བྱེད་རྒྱུའི་ལས་འགན་ཡོད་པ་རེད། དེ་ལྟར་ཡོང་བར་ང་ཚོ་ཆོས་པ་ནང་ཕན་ཚུན་ང་ཚོ་དང་ཁྱོད་ཚོ་ཞེས་བའི་སྐད་ཆ་དེ་མ་བཤད་པར། སོ་སོར་ལྟ་གྲུབ་མི་འདྲ་ཡོད་པ་རེད། འོན་ཀྱང་ཚང་མས་བྱམས་བརྩེའི་ཉམས་ལེན་གཅིག་མཐུན་བྱེད་བཞིན་ཡོད། དེར་བརྟེན་ཚང་མར་བྱམས་བརྩེ་གོང་འཕེལ་གཏོང་རྒྱུའི་ནུས་པ་དང་ཐབས་ཤེས་ཡོད་པ་རེད། དེར་བརྟེན་ང་ཚོས་ཆོས་བརྒྱུད་མི་འདྲ་བ་ཚང་མས་དམ་ཚིག་འོ་ཆུ་གཅིག་འདྲེས་ལྟ་བུ་བྱུང་བ་ཡིན་ན་ནུས་པ་ཐོན་རྒྱུ་རེད།
དེར་བརྟེན་དེའི་ཆ་ནས་ཡིན་ནའང་ཁོང་གིས་རིས་སུ་མ་ཆད་པའི་ཆོས་ལུགས། ངོས་རང་ལ་ཆ་བཞག་ནའང་ཁོང་ལ་རྗེས་སུ་ཡི་རང་དང་ངོ་མཚར་སྐྱེས་མཁན་ཞིག་ཡིན། དེ་ལྟ་བུའི་མི་ཞིག་དེ་རིང་འདིར་ཕེབས་ཡོད། ང་ཚོ་བོད་མི་ན་གཞོན་སློབ་སྦྱོང་བྱེད་བཞིན་པ། སྤྱིར་སོ་སོའི་ཕ་མ་ཉེ་འབྲེལ་དང་དེ་བཞིན་སོ་སོ་རང་ཉིད་ཡིན་ཡང་གང་ལ་གང་ཙམ་གྱི་དཀའ་ངལ་འཕྲད་མྱོང་བ་ཞིག་གི་མི་རབས་ཆགས་ཡོད།
ཁྱེད་རང་ཚོ་འདི་དག་ང་ཚོ་རྒྱ་གར་རང་དབང་ལུང་པའི་ནང་དུ་གཙོ་ཆེ་རྒྱ་གར་གཞུང་གིས་ཐོག་མཐའ་བར་གསུམ་དུ་རོགས་རམ་དང་རྒྱབ་སྐྱོར་ཧ་ཅང་ཤུགས་ཆེ་གནང་ཡོད་པ་དེ་དང་དེས་མཚོན་པའི་འཛམ་གླིང་གི་རོགས་རམ་ཚོགས་པ་དེ་འདྲའི་ཐོག་ནས་རོགས་རམ་མང་པོ་ཡོང་གི་ཡོད་པ་རེད། དེ་ལྟ་བུའི་རོགས་རམ་གྱི་འོག་ནས་མདོར་ན་གཞན་ཕན་གྱི་སྤྱན་གྱི་འོག་ནས་ང་ཚོའི་ཕྲུ་གུ་འདི་དག་འཚར་ལོངས་དང་སློབ་སྦྱོང་བྱེད་རྒྱུའི་གོ་སྐབས་ཡོང་བཞིན་ཡོད།
དེར་བརྟེན་ཁྱེད་རང་ཚོས་ད་ཕན་ཡིན་ཡང་ཧུར་ཐག་འབད་ཐག་བྱས་ཡོད། ད་དུང་སོ་སོའི་སེམས་ནས་རིག་པ་བསྒྲིམས་ཏེ་སློབ་སྦྱོང་བྱེད་རྒྱུ་དེ་དག་ཧུར་ཐག་བྱེད་རོགས་བྱོས། ང་ཚོ་འདི་གར་མི་རིགས་ཤིག་སྐད་ཡིག་ཟུར་གསལ་ཡོད་པ། ཆོས་དང་རིག་གཞུང་ལྟ་གྲུབ་སོགས་ཕྱུག་པོ་ཡོད་པའི་མི་རིགས་ཤིག་ཆགས་ཡོད།
དེ་འདྲའི་མི་རིགས་འདིར་དཀའ་ངལ་འཕྲད་པའི་སྐབས་སུ་ཁྱེད་རང་ཚོ་འདི་དག་གི་བོད་ཀྱི་སྐད་ཡིག་དང་ནང་པ་སངས་རྒྱས་པའི་ལྟ་གྲུབ།
དེ་བཞིན་གཞན་ཕན་བྱང་ཆུབ་ཀྱི་སེམས་ཞེས་པ་དང་ཡང་དག་པའི་ལྟ་བ་ཞེས་པ་དེ་དག་གང་ལྟར་མི་ལ་ཕན་ཐོགས་ཡོད་པ་ཞིག་ཆགས་ཡོད་སྟབས་དེ་དག་ཁྱེད་ཚོས་དུས་རབས་རྙིང་པའི་བསམ་ཚུལ་རེད་ལྟ་བུ་བསམས་ནས་མ་བཞག་པར། ད་ཆ་དུས་རབས་ཉེར་གཅིག་པ་འདིའི་ནང་ལ་དགོས་མཁོ་དང་འབྲེལ་བ་ཡོད་པ་ཞིག་ཆགས་ཡོད། དེ་ལྟར་ཡིན་པ་བར་སྐབས་ལོ་སུམ་ཅུ་སོ་གྲངས་ནང་ངོས་ཀྱི་འཛམ་གླིང་གི་གཙོ་བོ་ནུབ་ཕྱོགས་པའི་ཚན་རིག་པ་དང་ཤེས་ཡོན་ཅན་མཁས་པ་མང་པོ་དང་ངོས་ཀྱི་གཏུག་གི་ཡོད།
ཐོག་མར་ཁོང་ཚོས་གནས་ཚུལ་དེ་དག་མ་ཤེས་པའི་སྐབས་སུ་བོད་པ་ཞེས་བརྗོད་སྐབས་རྗེས་ལུས་བཟོ་ལྟ་བུ་དང་། བོད་པའི་ཆོས་ཞེས་བརྗོད་སྐབས་རྗེས་ལུས་ཀྱི་རྣམ་པ་ལྟ་བུ་མཐོང་མཁན་འདུག བར་སྐབས་ཁོང་རྣམ་པ་དང་བཤིབས་ཏེ་འགྲེལ་བརྗོད་བྱེད་སྐབས་ང་ཚོའི་བོད་ཡིག་ནང་ཡོད་པའི་གཙོ་བོ་ནང་སེམས་ཁམས་རིག་པའི་སྐོར་དེ་དག་གཞན་དང་མི་འདྲ་བར་ཕྱུག་པོ་ཡོད་པ་དང་།
དེ་བཞིན་ཚད་མའི་གཞུང་དེ་དག་གཞན་དང་མི་འདྲ་བའི་ཕྱུག་པོ་ཡོད་པ་ཞིག་མཐོང་རྒྱུ་ཡོད། དམིགས་བསལ་ནང་པ་སངས་རྒྱས་པའི་ཆོས་དང་དེ་བཞིན་ཆོས་ལ་དོ་སྣང་མེད་མཁན་གྱི་མཁས་དེ་འདྲས་ཀྱང་དོ་སྣང་བྱེད་བཞིན་འདུག དེ་ལྟ་བུའི་སྐད་ཡིག་དེའི་ནང་རིག་གཞུང་ཕྱུག་པོ་ཡོད་པ་ཞིག་ཡིན་ཙང་།
དེ་ང་ཚོས་ཉིན་རེ་ཉིན་རེའི་བཟའ་འཐུང་དང་ཁྲོམ་གཞུང་ལ་ཕར་འགྲོ་སྐབས་སྐད་དེ་བེད་སྤྱོད་དང་ཕན་ཐོགས་མེད། 
དེ་བཞིན་དེང་དུས་ཀྱི་ཤེས་ཡོན་དེ་འདྲའི་ནང་དུ་སྐད་དེ་ཕན་ཐོགས་ཅང་མེད་ཀྱང་བསམ་བློ་རྒྱ་ཆེ་ས་ནས་བཏང་ཡོང་སྐབས་དེ་རིང་ཁ་སང་གི་འཛམ་གླིང་འདིའི་སྟེང་སེམས་ཁམས་རིག་པའི་སྐོར་བཤད་མཁན་ཧ་ཅང་ཉུང་ཉུང་རེད། དེར་བརྟེན་འཛམ་གླིང་འདིའི་སྟེང་མི་ཕྲན་བུ་དོ་སྣང་ཡོད་མཁན་དང་། བསམ་བློ་རྒྱ་ཆེན་པོ་གཏོང་མཁན། དཀའ་ངལ་མང་པོ་ཞིག་མིའི་སེམས་ཐོག་ནས་བཟོ་ཡི་ཡོད་པ་མཐོང་མཁན་དེ་ཚོའི་གྲས་ཀྱིས་ང་ཚོའི་སྐད་ཡིག་ནང་ཡོད་པའི་སེམས་ཁམས་རིག་པའི་སྐོར་དེ་དག་ལ་ཆོས་དད་ཡོད་མིན་ལ་མ་ལྟོས་པར་དམིགས་བསལ་གྱི་དོ་སྣང་བྱེད་བཞིན་འདུག བྱས་ཙང་དེ་བདག་པོ་རྒྱག་མཁན་ནི་ཁྱེད་རང་ཚོ་འདི་དག་ཡིན།
དེ་ཡང་སྐྱ་སེར་ཕོ་མོ་དབྱེར་མེད་ཐོག་ཚང་མས་དེ་ཚོའི་ཐོག་དོ་སྣང་བྱས་ཏེ་སློབ་སྦྱོང་ཤུགས་ཆེ་ཙམ་བྱེད་རྒྱུ་ཞིག་བྱུང་ན། དེ་ནི་ང་ཚོ་བོད་མི་རིགས་ཀྱི་རིག་གཞུང་མི་རབས་ནས་མི་རབས་ཉར་ཚགས་རྒྱུན་འཛིན་བྱེད་རྒྱུ་དེ་སློབ་སྦྱོང་བྱས་ནས་རྒྱུན་འཛིན་བྱེད་དགོས་པ་རེད་མ་གཏོགས་འགྲེམས་སྟོན་ནང་འཇོག་རྒྱུ་ཞིག་མ་རེད། འདི་ཞིག་བརྗོད་འདོད་བྱུང་། དེ་རིང་འདིར་རྐང་ཌེ་སི་མོན་ཊུ་ཊུ་སྐུ་ཉིད་ཡིན་འོན་ཀྱང་ངོས་གཉིས་གྲོགས་ཞེ་དྲགས་ཡིན་ཙང་ངོས་ཀྱི་བསམ་བློའི་ནང་ཡོད་པ་དེ་དག་བརྗོད་ཀྱི་ཡོད། ད་གྲོགས་པོས་གསུང་བྱོན་ཤོག ཅེས་བཀའ་སློབ་སྩལ་རྗེས་ཡེ་ཤུའི་ཆོས་དཔོན་མཆོག་གིས་གསུང་བཤད་གནང་དོན།
ཁྱེད་བྱིས་པ་རྣམས་ཧ་ཅང་ཤ་ཚ་པོ་འདུག འགའ་ཤས་ནི་བྱིས་པ་རང་རེད་མིན་འདུག ཅེས་ཞལ་ཤོབ་དང་སྦྲགས་གསུང་བཤད་དབུ་འཛུགས་གནང་། དེ་རིང་ང་ཚོ་ཚང་མ་རྡ་སར་བཅར་ཐུབ་པར་དགའ་སྤོབས་ཧ་ཅང་ཆེན་པོ་བྱུང་། ཁྱེད་ཚོར་འཛམ་གླིང་སྐྱེ་བོ་ཀུན་གྱིས་དགའ་མོས་བྱེད་བཞིན་ཡོད། དམིགས་བསལ་གཞོན་སྐྱེས་ཁྱེད་ཚོར་ཞུ་རྒྱུར། ད་ལྟའི་ཆར་མི་སྲིད་པ་ལྟ་བུར་སྣང་ཡང་ཉིན་གཅིག་ཁྱེད་ཚོ་རང་དབང་ཡོད་པའི་བོད་དུ་ཕྱིར་ལོག་ཐུབ་ངེས་ཡིན། ང་ཚོ་ལྷོ་ཨ་ཕི་རི་ཀ་ལྟ་བུར་མཚོན་ན། ལོ་མང་པོའི་རིང་བཙན་གནོན་དང་དྲང་བདེན་མེད་པའི་སྤྱི་ཚོགས་ནང་དཀའ་སྡུག་མྱངས་ཡོད། ང་ཚོའི་དབུ་ཁྲིད་དང་གཞོན་སྐྱེས་ཧ་ཅང་མང་པོ་བཙན་བྱོལ་དུ་བྲོས་དགོས་བྱུང་ཡོད།
སྐབས་དེར་མནར་གཅོད་འོག་ནས་ང་ཚོ་ནམ་ཡང་གྲོལ་ཐུབ་རྒྱུ་མ་རེད་བསམ་པའི་ཚོར་སྣང་བྱུང་ཡོད། རོ་བྷིན་གླིང་ཕྲན་དུ་བཙོན་འཇུག་བྱས་པའི་ང་ཚོའི་དབུ་ཁྲིད་རྣམས་གསོན་པོར་རང་ཁྱིམ་དུ་ནམ་ཡང་ཕྱིར་ལོག་ཐུབ་རྒྱུ་རེད་བསམ་པ་མེད། འོན་ཀྱང་དེ་ལྟར་ལོག་ཐུབ་པ་བྱུང་ཡོད། ཕྱི་ལོ་ ༡༩༩༠ ལོར་ང་ཚོའི་མཛའ་ཤིང་བརྩེ་བའི་དབུ་ཁྲིད་སྐུ་ཞབས་ནེལ་སོན་མན་ཌེ་ལ་མཆོག་གིས་གཙོས་ཆབ་སྲིད་བཙོན་པ་རྣམས་བཙོན་ཁང་ནས་གློད་བཀྲོལ་ཐོབ་ཡོད་པ་མ་ཟད། བཙན་བྱོལ་དུ་བྲོས་པའི་ཡུལ་མི་རྣམས་ཀྱང་ཕྱིར་ལོག་ཐུབ་པ་བྱུང་ཡོད།
ཉིན་གཅིག་མནར་གཅོད་དང་དཀའ་སྡུག་གི་འཁོར་རྒྱུན་ཆད་ནས་ཁྱེད་ཚོ་ཚང་མ་རང་དབང་ལྡན་པའི་བོད་དུ་ཕྱིར་ལོག་ཐུབ་རྒྱུ་རེད། རྒྱ་ནག་གཞུང་གིས་རང་དབང་དེ་མནར་གཅོད་ལས་འགྲོ་སོང་ཆུང་བ་ཡོད་པ་ཉིན་གཅིག་ངེས་པར་ཤེས་རྒྱུ་རེད། འཛམ་གླིང་གིས་ཁྱེད་ཚོར་རྒྱབ་སྐྱོར་བྱེད་ཀྱི་ཡོད། ཅེས་སོགས་ཀྱི་གསུང་བཤད་གནང་རྗེས་སློབ་ཕྲུག་རྣམས་ཀྱི་དྲི་བར་ཞི་བདེའི་དབུ་ཁྲིད་རྣམ་གཉིས་ཀྱིས་བཀའ་ལན་སྩལ།
དེ་དག་ཡོངས་སུ་ལེགས་པར་གྲུབ་རྗེས་ཡེ་ཤུའི་བླ་ཆེན་མཆོག་གིས་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལུགས་ལྟར་དགུང་གྲངས་ ༨༠ སོན་པའི་རྟེན་འབྲེལ་མཚོན་ཆེད་འཁྲུངས་སྐར་གྱི་མངར་ཟས་ (birthday cake) འདེགས་འབུལ་ཞུས་པ་དང་སྦྲགས། སྐུའི་འཁྲུངས་སྐར་གྱི་གླུ་དབྱངས་འབུལ་ལམ་ཞུས་པར་མགོན་པོ་གང་ཉིད་མཆོག་གིས་ཐུགས་དགྱེས་ཚོར་ཆེན་པོས་མངར་ཟས་ཀྱི་ཕུད་བླ་ཆེན་མཆོག་ལ་སྩལ་བ་མ་ཟད།
མངར་ཟས་དུམ་པུར་བགོས་ནས་བླ་ཆེན་མཆོག་གི་སྲས་མོ་སོགས་ལ་སྩལ་བ་སོགས་དེ་ཉིན་རྡ་སྟེང་བོད་ཁྱིམ་སློབ་གྲྭའི་སིལ་སྤོལ་རྩེད་ཐང་དུ་དགའ་སྤྲོའི་འོད་སྣང་ཕྱོགས་བཅུར་ཁྱབ་པར་མཛད།།
