༢༠༡༥ ཟླ་ ༤ ཚེས་ ༩ རེས་གཟའ་ཕུར་བུ།
༄༅། །ཕྱི་ལོ་ ༢༠༡༥ ཟླ་ ༤ ཚེས་ ༨ ཉིན་གྱི་ཕྱེད་ཡོལ་༸གོང་ས་༸སྐྱབས་མགོན་ཆེན་པོ་མཆོག་གིས་ཉི་ཧོང་གི་གྲོང་ཁྱེར་གི་ཕུའི་ནང་རྟེན་གཞི་བྱས་པའི་ན་ག་ར་ཀ་ཝ་ཚོགས་ཁང་ཆེན་མོའི་ Nagarakawa Convention Centre Hall ནང་ཉི་ཧོང་སོ་ཏོ་ནང་པའི་དགེ་འདུན་པ་གཞོན་སྐྱེས་མཐུན་ཚོགས་ All Japan Soto Young Priest Association བཙུགས་ནས་ལོ་ངོ་ ༤༠ འཁོར་བའི་མཛད་སྒོར་ཆོས་འབྲེལ་བཀའ་སློབ་སྩལ་འདུག དེ་ཡང་མཛད་སྒོའི་ཐོག་མར་༸གོང་ས་མཆོག་དང་སོ་ཏོ་ཛེན་ཆོས་ལུགས་དབར་མཛའ་འབྲེལ་སྐོར་གྱི་བརྙན་འཕྲིན་ཐུང་ངུ་ཞིག གཟིགས་འབུལ་ཞུས།
དེ་རྗེས་ཕྲུ་གུ་ཆུང་ཆུང་ཁག་གཅིག་གིས་མཉམ་གཞས་འབུལ་ལམ་ཞུས་པ་དང་སྦྲགས། སོ་ཏོའི་དགེ་འདུན་པ་རྣམས་དང་ལྷན་༸གོང་ས་མཆོག་གིས་སྟོན་པའི་སྐུ་བརྙན་ལ་གུས་ཕྱག་ཕུལ། དེ་ནས་༸གོང་ས་མཆོག་གིས་བཀའ་སློབ་སྩལ་དོན། སྟོན་པ་འཇིག་རྟེན་དུ་བྱོན་ནས་མི་ལོ་ ༢༦༠༠ ལྷག་ཕྱིན་ཡོད། ཉི་ཧོང་ལྟ་བུར་མཚོན་ན་སངས་རྒྱས་ཀྱི་བསྟན་པ་སྔ་མོ་ནས་དར་ཁྱབ་བྱུང་ཡོད། དེང་སྐབས་ནང་ཆོས་དེ་སྔ་དར་མྱོང་མེད་པའི་ཡུལ་གྲུའི་ནང་ནང་ཆོས་ནས་གསུང་པའི་བློའི་རྣམ་གཞག་ལ་དོ་སྣང་ཆེན་པོ་བྱེད་བཞིན་ཡོད། ནང་ཆོས་ཀྱིས་གཙོས་ཆོས་ལུགས་ཚང་མས་འགྲོ་བ་མིའི་བདེ་ཐབས་ཆེད་ལམ་སྟོན་གནང་བཞིན་ཡོད་སྟབས་ང་ཚོས་ཆོས་ལུགས་ཚང་མར་གུས་འདུད་ཞུ་དགོས། ནང་པ་སངས་རྒྱས་པའི་ཆོས་ལ་ཆོས་ལུགས་གཞན་ལས་ཐུན་མིན་ཁྱད་ཆོས་ཡོད་པ་ནི་རྟེན་བྱུང་གི་རྣམ་གཞག་ཡིན། འོན་ཀྱང་དེའི་རྒྱུ་མཚན་དུ་བྱས་ནས་ནང་ཆོས་དེ་ཆོས་ལུགས་གཞན་ལས་ཁྱད་དུ་འཕགས་པ་ཞིག་ཡིན་ཞེས་པའི་གོ་དོན་རྩ་བ་ནས་མ་རེད། འདུལ་བྱའི་ཁམས་དང་བསམ་པ་སོགས་ལ་བརྟེན་ནས་ཆོས་ལུགས་མི་འདྲ་བ་ཡོད། སྟོན་པ་རང་ཉིད་ནས་འདུལ་བྱའི་ཁམས་དང་བསམ་པ། དེ་བཞིན་ཡུལ་དུས་གནས་སྐབས་མི་འདྲ་བ་སོགས་ལ་བརྟེན་ནས་བཀའ་མི་འདྲ་བ་དུ་མ་ཡོད།
སྐབས་འགར་སྟོན་པས་གང་ཟག་རང་སྐྱ་ཐུབ་པའི་བདག་མེད་པར་གསུངས། ཡང་སྐབས་རེར་ཕུང་པོ་ལྔ་ནི་ཁུར་རོ། ཁུར་འཁུར་བ་པོ་ནི་གང་ཟག་གོ། ཞེས་གང་ཟག་གི་བདག་ཡོད་པ་ལྟ་བུ་གསུངས་ཡོད། ཆོས་ལུགས་ཚང་མས་བྱམས་པ་དང་བརྩེ་བ། ཆོག་ཤེས་སོགས་ཀྱི་བསླབ་བྱ་གསུང་བཞིན་ཡོད་པ་གཅིག་མཚུངས་ཡིན། ལེགས་སྦྱར་དང་པཱ་ལིའི་སྐད་གཉིས་ཀའི་ནང་བདེན་བཞིའི་རྣམ་གཞག་དང་བྱང་ཕྱོགས་སོ་བདུན་གྱི་རྣམ་གཞག་གཅིག་མཚུངས་ཡོད། ཤེར་ཕྱིན་གྱི་གཞུང་དེ་དག་འཁོར་ལོ་བར་པའི་སྐབས་གསུངས་ཡོད། ཅེས་སོགས་ཀྱི་བཀའ་སློབ་སྩལ་རྗེས་ཤེས་རབ་སྙིང་པོའི་གཟུངས་སྔགས་སྐོར་འགྲེལ་བཤད་མཛད། དེ་རྗེས་དྲི་བ་རྣམས་ལ་༸གོང་ས་མཆོག་གིས་བཀའ་ལན་སྩལ། དེ་རྗེས་བུད་མེད་ཁག་གཅིག་གིས་མ་ཎི་དབྱངས་སུ་གྱེར།མཐར་ཉི་ཧོང་སོ་ཏོ་ནང་པའི་དགེ་འདུན་པ་གཞོན་སྐྱེས་མཐུན་ཚོགས་ཀྱི་ཚོགས་གཙོ་སྐུ་ཞབས་མི་ཡ་ཛ་ཀི་ Ven Miyazaki མཆོག་གིས་༸གོང་ས་མཆོག་ལ་ཉི་ཧོང་གི་ཐུན་མིན་ཉི་གདུགས་ཤིག་ཕྱག་རྟགས་སུ་འབུལ་ལམ་ཞུས་ནས་མཛད་སྒོ་ཡོངས་སུ་ལེགས་གྲུབ་བྱུང་།
