༢༠༡༥ ཟླ་ ༤ ཚེས་ ༩ རེས་གཟའ་ཕུར་བུ།
༄༅། །ཕྱི་ལོ་ ༢༠༡༥ ཟླ་ ༤ ཚེས་ ༨ ཉིན་༸གོང་ས་མཆོག་གིས་གི་ཕུ་གྲོང་ཁྱེར་ Gifu དུ་རྟེན་གཞི་བྱས་པའི་ཉི་ཧོང་སོ་ཏོ་གཞོན་སྐྱེས་མཐུན་ཚོགས་ All Japan Soto Young Priest Association བཙུགས་ནས་ལོ་ངོ་ ༤༠ འཁོར་བའི་མཛད་སྒོར་ཆོས་འབྲེལ་བཀའ་སློབ་སྩལ་འདུག དེ་ཡང་དེ་ཉིན་ཐོག་མར་མགོན་པོ་གང་ཉིད་མཆོག་གིས་ཉི་ཧོང་གི་གསར་ཤོག་གྲགས་ཅན་ཨ་ས་ཧི་ཤིམ་བྷུན་ Asahi Shimbun ཟེར་བའི་གསར་འགོད་པ་སྐུ་ཞབས་ཏེ་སུ་ཝ་ཀོ་གུ་རེ་ Tetsuo Kogure ལགས་དང་། བརྙན་འཕྲིན་བརྒྱུད་ལམ་ Live Viewing Japan ཞེས་པའི་གསར་འགོད་པ་མཱ་ཀི་ཨོ་ས་ན་ཡི་ལགས་སོགས་ཀྱི་དྲི་བར་བཀའ་ལན་སྩལ་འདུག དེ་ཡང་ཐོག་མར་གསར་འགོད་པས་༸གོང་ས་མཆོག་ལ་ནོ་སྦེལ་ཞི་བདེའི་གཟེངས་རྟགས་འབུལ་ལམ་ཞུས་ནས་མི་ལོ་ ༢༥ སོང་བའི་དུས་རིང་འདིར་འཇིགས་སྐུལ་དྲག་སྤྱོད་པའི་ལས་འགུལ་ཁྱབ་བརྡལ་ཤུགས་ཆེ་ཕྱིན་པའི་གནས་སྟངས་ཐོག་དགོངས་ཚུལ་ཇི་ཡོད་ཀྱི་དྲི་བ་ཞུས་པར་བཀའ་ལན་སྩལ་དོན། ནུབ་འཇར་མན་སྦར་ལིན་རྩིག་གྱང་བསློགས་པ་དང༌། ཨུ་རུ་སུ་ཁ་ཐོར་དུ་ཕྱིན་པ། ཝར་སོ་མཐུན་གྲོས་ནུས་མེད་ཕྱིན་ནས་དེ་སྔ་མཐུན་གྲོས་ནང་ཡོད་པའི་རྒྱལ་ཁབ་འགའ་ཤས་མང་གཙོར་གྱུར་བ། དེ་བཞིན་རྡུལ་ཕྲན་མཚོན་ཆའི་ཉེན་ཁ་ཆུང་དུ་ཕྱིན་ནས་ད་ཆ་འཛམ་གླིང་ཐོར་ཞིག་འགྲོ་རྒྱུའི་ཉེན་ཁ་ལས་གྲོལ་བ་སོགས་འགྱུར་བ་ཆེན་པོ་ཕྱིན་ཡོད། འཇིགས་སྐུལ་དྲག་སྤྱོད་ཀྱི་དཀའ་ངལ་ཕྲན་བུ་ཡོད་པ་དེ་དག་རྡུལ་ཕྲན་མཚོན་ཆའི་དམག་འཁྲུག་དང་བསྡུར་བ་ཡིན་ན་ཆུང་ཆུང་ཞིག་རེད།
འོན་ཀྱང་གནས་ཚུལ་ཐབས་སྐྱོ་བ་ཞིག་ལ་འཇིགས་སྐུལ་དྲག་སྤྱོད་པ་ཆོས་དད་དང་འབྲེལ་བ་ཡོད་པའི་ལོག་རྟོག་འདི་རེད། དེར་བརྟེན་ལོག་རྟོག་འདི་སེལ་ཆེད་ང་ཚོས་འབད་བརྩོན་སྣོལ་མ་ཞིག་བྱེད་དགོས། ད་བར་ཆོས་ལུགས་ཚང་མས་མི་གྲངས་ས་ཡ་མང་པོའི་སེམས་ལ་ཞི་བདེའི་ཚོར་བ་སྦྱིན་ཡོད་པ་མ་ཟད། འབྱུང་འགྱུར་ཡང་དེ་བཞིན་ཕན་ཐོགས་ཡོང་ངེས་ཡིན། ང་ཚོས་ཆོས་ལུགས་འདྲ་མིན་ཡོད་པ་དང་མཐར་ཐུག་གི་བསྒྲུབ་བྱ་ཡང་མི་འདྲ་བ་ཡོད་པའི་དངོས་ཡོད་གནས་ཚུལ་དེ་ངོས་ལེན་བྱེད་དགོས། ཕྱི་ཟླ་ ༩ ཚེས་ ༡༡ དོན་རྐྱེན་བྱུང་རྗེས་ངོས་ཀྱིས་ཨ་རིའི་སྲིད་འཛིན་སྐུ་ཞབས་ཇོར་ཇི་བྷུ་ཤི་མཆོག་ལ་ཡི་གེ་ཞིག་ཕུལ་ནས་གདུང་སེམས་མཉམ་སྐྱེས་ཞུས་པ་དང་སྦྲགས། དོན་རྐྱེན་དེར་འཚེ་མེད་ཞི་བའི་ལམ་ནས་གདོང་ལེན་གནང་དགོས་པའི་འབོད་སྐུལ་ཡང་ཞུས་ཡིན། གང་ཡིན་བརྗོད་ན་གལ་ཏེ་འཚེ་བ་བྱས་ན་སྐབས་དེར་འཇིགས་སྐུལ་དྲག་སྤྱོད་པ་བྷིན་ལ་ཌེན་གཅིག་ལས་མེད་ཀྱང་འཚེ་བའི་བྱ་སྤྱོད་དེ་ལ་བརྟེན་ནས་བྷིན་ལ་ཌེན་བཅུ་དང་། དེ་ནས་བྷིན་ལ་ཌེན་བརྒྱ་ཐོན་ཡོང་རྒྱུ་རེད། གང་ཡིན་བརྗོད་ན་འཚེ་བའི་ལན་ལ་འཚེ་བ་ཡོང་རྒྱུ་འདི་རེད། འཇིགས་སྐུལ་དྲག་སྤྱོད་པ་ཚོ་ཡང་མི་རེད། དེ་ང་ཚོས་མ་བརྗེད་པ་བྱས་ནས་ཁོ་པ་ཚོ་དང་ལྷན་གྲོས་མོལ་ཐོག་སྒྲིག་ཐབས་བྱེད་དགོས། ཞེས་བཀའ་ལན་སྩོལ་སྐབས་གསར་འགོད་པས་གྲོས་མོལ་དེ་འདྲ་ཡོང་རྒྱུ་ཧ་ཅང་དཀའ་ལས་ཁག་པོ་རེད། ཅེས་ཞུ་སྐབས་༸གོང་ས་མཆོག་གིས་འཇིགས་སྐུལ་དྲག་སྤྱོད་པ་མགོ་མཁྲེགས་རེ་ཟུང་གིས་ཉན་འདོག་ཁ་པོ་མ་རེད།
འོན་ཀྱང་ཚང་མ་དེ་འདྲ་རང་མ་རེད། གལ་ཏེ་གྲོས་མོལ་གྱི་ཁོར་ཡུག་བཟང་པོ་ཞིག་དང་། རྣམ་འགྱུར་ཡག་པོ་ཞིག་སྟོན་ཐུབ་ན་འཇིགས་སྐུལ་རིང་ལུགས་པ་ཁག་གཅིག་གིས་ཏན་ཏན་གོ་ཤས་ནན་ཤས་བྱེད་ཀྱི་རེད། ངོས་ཀྱིས་ཇོར་ཌེན་ཡུལ་གྱི་ཁ་ཆེ་བ་རྣམས་དང་ཐུག་སྐབས་ཁོང་ཚོ་སློབ་སྦྱོང་ཧ་ཅང་ཡག་པོ་དང་འཛམ་གླིང་གི་གནས་སྟངས་སྐོར་གོ་རྟོགས་ཧ་ཅང་ཡག་པོ་འདུག ཕྱོགས་མཚུངས་རྒྱ་གར་ཁ་ཆེ་ཚོར་མཚོན་ན། ཁོང་ཚོར་ཆོས་ལུགས་འདྲ་མིན་མཉམ་སྡོད་བྱ་རྒྱུའི་གོམས་གཤིས་ཤིག་འཇག་ཡོད། དེར་བརྟེན་ཁོང་རྣམས་ཀྱིས་ཁ་ཆེ་བ་གཞན་ཚོར་བཟང་བརྒྱུད་སྐུལ་བྱེད་ཐུབ་རྒྱུ་རེད། ཐབས་ལམ་འདི་འདྲ་ཞིག་ལས་གཞན་འབར་རྫས་རྐྱང་རྐྱང་གཡུག་ནས་འཇིགས་སྐུལ་བ་ཚོ་རྩ་མེད་བཟོ་ཐུབ་རྒྱུ་མ་རེད། ཅེས་བཀའ་ལན་སྩལ། དེ་རྗེས་གསར་འགོད་པས་སྨྲ་བརྗོད་དང་ཆོས་དད་རང་དབང་གཉིས་ལྗིད་མཉམ་སྟངས་འཛིན་ཇི་འདྲ་བྱེད་དགོས། ཞེས་པའི་དྲི་བར་༸གོང་ས་མཆོག་གིས་བཀའ་ལན་སྩལ་དོན། མི་གསོད་རྐྱང་བྱ་རྒྱུ་དེ་ནི་རང་དབང་གི་གོ་དོན་མིན། ངོས་ཀྱི་ཁ་ཆེའི་གྲོགས་པོ་ཞིག་གིས་ཁ་ཆེའི་ཆོས་ནང་མི་བསད་པ་ཡིན་ན་ཁ་ཆེའི་ཆོས་པ་ཡང་དག་པ་ཞིག་ནས་བུད་འགྲོ་བ་དང་། ཇི་ཧཱཌ་ Jihad ཟེར་བའི་ཚིགས་དེ་ཡང་རྒྱུན་དུ་གོ་ནོར་ཆེན་པོ་ཐེབས་གཞི་ཞིག་ཆགས་ཡོད་པ་དང་། ཇི་ཧཱཌ་ཟེར་ན་གཞན་ལ་གནོད་འཚེ་བྱ་རྒྱུར་གོ་བ་དེ་ནོར་བ་ཞིག་ཡིན་པ་དང་། དོན་དམ་གྱི་ཇི་ཧཱཌ་ཞིག་བྱེད་དགོས་ན་རང་ཉིད་ཀྱི་རྒྱུད་ལ་ཡོད་པའི་བློ་མ་རུང་པ་དེ་དག་མགོ་གནོན་དགོས་པའི་དོན་རེད། ཅེས་གསུངས་བྱུང་། དེ་འདྲ་ཡིན་ན་ཆོས་ལུགས་ཚང་མས་ཇི་ཧཱཌ་ལག་བསྟར་བྱེད་བཞིན་ཡོད། སྨྲ་བརྗོད་རང་དབང་གལ་ཆེན་པོ་རེད། འོན་ཀྱང་རང་དབང་དེ་ཚུལ་མཐུན་གྱི་ལམ་ནས་སྤྱོད་དགོས། སྤྱིར་རང་དབང་དེ་དག་མིའི་རྣམ་དཔྱོད་དང་གཞི་རྩའི་མིའི་རང་བཞིན་ཞི་འཇམ་ཞིག་ཡིན་པར་གཞི་བཅོལ་ནས་རང་དབང་དེ་མཐུན་ཕྱོགས་སུ་བེད་སྤྱོད་གཏོང་རྒྱུ་ཡིན་པ་གཞིར་བཞག་ཐོག་ནས་གཏན་འབེབས་གནང་བ་ཞིག་རེད། དམག་འཁྲུག་སོགས་འབྱུང་སྐབས་རང་དབང་ཅན་གྱི་ཚོགས་པ་སོགས་ཀྱིས་ཕྱོགས་གཉིས་དབར་བར་ཞུགས་བྱེད་སྟངས་སྐོར་གྱི་དྲི་བར་བཀའ་ལན་སྩལ་དོན།
དེ་སྔ་ཨི་རཱག་དམག་འཁྲུག་བྱུང་སྐབས་ནོ་བེལ་ཞི་བདེའི་གཟེངས་རྟགས་བཞེས་མྱོང་མཁན་རྣམས་ཨི་རཱག་གི་རྒྱལ་ས་བྷག་དག་ཏུ་ཕྱིན་ནས་ས་ཌམ་ཧུ་སེན་དང་ཐུག་ནས་སྐད་ཆ་ཤོད་རྒྱུའི་འཆར་གཞི་ཞིག་བྱུང་བ་རེད། དེ་ནི་གཙོ་བོ་ས་ཌམ་ཧུ་སེན་རང་ཉིད་འཆི་འདོད་མེད་ལ། རྒྱལ་ཁབ་གཞན་གྱིས་ཨི་རཱག་ལ་བཙན་འཛུལ་བྱས་པ་དེ་ཡང་འདོད་ཀྱི་མ་རེད། ཕྱོགས་མཚུངས་སི་རི་ཡ་ལྟ་བུར་མཚོན་ན། ནོ་བེལ་ཞི་བདེའི་གཟེངས་རྟགས་བཞེས་མྱོང་མཁན་ཁག་གཅིག་ཡུལ་དེར་ཕེབས་ནས་ཕྱོགས་གཉིས་ཞི་སྒྲིག་ཡོང་ཐབས་བྱེད་ཐུབ་རྒྱུ་རེད་བསམ་པ་དྲན་གྱི་འདུག ཅེས་བཀའ་ལན་སྩལ། དེ་རྗེས་གསར་འགོད་པས་བོད་རྒྱ་གྲོས་མོལ་གྱི་གནད་དོན་སྐར་གྱི་དྲི་བར་བཀའ་ལན་སྩལ་དོན། རྒྱ་ནག་དང་ཐད་ཀར་འབྲེལ་བ་དེ་ཐོག་མ་ཕྱི་ལོ་ ༡༩༧༩ ལོར་ཡིན། དེ་རྗེས་ཕྱི་ལོ་ ༡༩༩༣ ལོར་སླར་ཡང་འབྲེལ་བ་བསྐྱར་མཐུད་བྱུང་ཡོད་ཀྱང་ད་བར་དོན་ཕན་སོན་པའི་གྲུབ་འབྲས་གང་ཡང་བྱུང་མེད། ཏང་ཡོན་འགོ་ཁྲིད་ཁྲོད་མཁྲེགས་ཟུང་ཅན་ཚོས་བོད་མི་ཚོས་རྒྱ་ནག་དང་ཁ་བྲལ་རྩོད་བཞིན་ཡོད་པའི་འཁྱོག་བཤད་བྱེད་བཞིན་ཡོད། འོན་ཀྱང་བོད་མི་ཚོས་རྒྱ་ནག་དང་ཁ་བྲལ་གྱི་རང་བཙན་རྩོད་ཀྱི་མེད་པ་འཛམ་གླིང་ཡོངས་ཀྱིས་ཤེས་ཀྱི་ཡོད། སྲིད་འཛིན་ཞི་ཅིན་པིང་གིས་ལྐོག་ཟ་རུལ་སུངས་འགོག་ཐབས་བྱ་རྒྱུ་འདི་ནི་ངོས་ཀྱིས་དངོས་ནས་ལྷག་བསམ་རྣམ་དག་གཅིག་ཡིན་པ་དང་དངོས་ཡོད་གནས་ཚུལ་དང་མཐུན་པའི་སྲིད་བྱུས་ཤིག་ཡིན་པར་ངོས་འཛིན་བྱེད་བཞིན་ཡོད། རྒྱ་ནག་མི་མང་ཁྲོད་བོད་དོན་རྒྱབ་སྐྱོར་བྱེད་མཁན་ཇེ་མང་དུ་འགྲོ་བཞིན་ཡོད། ཅེས་བཀའ་ལན་སྩལ།
