༢༠༡༥ ཟླ་ ༤ ཚེས་ ༢༩ རེས་གཟའ་ལྷག་པ།
༄༅། །ཕྱི་ལོ་ ༢༠༡༥ ཟླ་ ༤ ཚེས་ ༢༨ ཉིན་བལ་ཡུལ་སྤོག་ར་གློ་སྒྲིག་དཔལ་འབྱོར་གླིང་གཞུང་འབྲེལ་དང་གཞུང་འབྲེལ་མ་ཡིན་པ་ཚོགས་པ་མཐུ་མོང་གིས་བཏང་གནས་ནང་འཁོད་དོན།
ད་ལམ་ཕྱི་ཟླ་ ༤ པའི་ཚེས་ ༢༥ ཉིན་བལ་ཡུལ་ས་ཁུལ་དང་ས་འདྲེས་རྒྱ་གར་དང་བོད་ཀྱི་ས་ཁུལ་ཁག་གཅིག་བཅས་ལ་ས་ཡོམ་གྱིས་མི་རྒྱུ་གཉིས་ལ་གནོད་སྐྱོན་ཚབས་ཆེན་ཕོག་པར་འདི་ག་བལ་ཡུལ་སྤོག་ར་གློ་སྒྲིག་དཔལ་འབྱོར་གླིང་གཞིས་ཆགས་སུ་གཞུང་འབྲེལ་དང་གཞུང་འབྲེལ་མ་ཡིན་པའི་ཚོགས་པ་ཁག་ནས་གོ་སྒྲིག་གིས་ཕྱི་ལོ་ ༢༠༡༥ ཟླ་ ༤ ཚེས་ ༢༨ ཉིན་སྔ་དྲོ་ཆུ་ཚོད་ ༨།༠༠ ཐོག་ཚོགས་ཁང་བཀྲ་ཤིས་ཕྱོགས་ལས་རྣམ་རྒྱལ་ནང་སྐུ་མགྲོན་དུ་གྲོང་ཚོ་ས་གནས་ཡར་རྒྱས་ལས་ཁུངས་ཀྱི་ཚོགས་གཙོ་དང་དྲུང་ཆེ། གྲོང་ཚོ་ས་གནས་བདེ་དོན་ལས་ཁུངས་ཀྱི་ ཚོགས་གཙོ། གཞིས་དགོན་མཁན་གྲྭ། ས་གནས་འཐུས་ཚོགས་ཀྱི་ཚོགས་གཙོ། གློ་སྒྲིག་བདེ་དོན་ཚོགས་གཙོ། གསར་འགོད་པ་དང༌། ཡུལ་མི། ས་གནས་ནང་ཡོད་གཞུང་འབྲེལ་དང་གཞུང་འབྲེལ་མིན་པའི་ཚོགས་པ་ཁག ས་གནས་མི་མང་བཅས་འདུ་འཛོམས་ཀྱིས་ས་ཡོམ་འོག་རྐྱེན་འདས་སུ་གྱུར་པ་རྣམས་ལ་མྱ་ངན་ཞུས་པ་དང༌། རྗེས་ཤུལ་ནང་མི་སྤུན་མཆེད་རྣམས་ལ་གདུང་སེམས་མཉམ་སྐྱེ་དང༌། རྨས་སྐྱོན་ཕོག་པ་རྣམས་མགྱོགས་མྱུར་དྲག་སྐྱེད་ཡོང་བ་སོགས་ཀྱི་སླད་སྐུ་མགྲོན་གཙོ་བོ་ནས་མཆོད་མེ་ཞལ་ཕྱེ་གནང་རྗེས་ཚང་མས་སྟོང་མཆོད་ཕུལ་བ་དང༌། གསོལ་འདེབས་སྨོན་ལམ་ཞུས། མཛད་སྒོའི་སྐུ་མགྲོན་གཙོ་བོ་མཆོག་ནས་ལས་འགུལ་འདི་སྤེལ་བར་དགའ་བསུ་དང་བསྔགས་བརྗོད་ཀྱི་གསུང་བཤད་གནང་བ་བཅས་མཆོད་འབུལ་སྨོན་ལམ་ཉིན་ཕྱེད་རིང་ཚོགས་ཡོད།
