༸གོང་ས་མཆོག་གིས་སོ་ཇི་དགོན་པར་མང་ཚོགས་ལ་བཀའ་སློབ་སྩལ་བ།

གསར་ལས་ཁང་གི་གསར་འགོད་པས།

༢༠༡༥-༠༤-༡༣

༢༠༡༥ ཟླ་ ༤ ཚེས་ ༡༣ རེས་གཟའ་ཟླ་བ།

༄༅། །༸གོང་ས་༸སྐྱབས་མགོན་ཆེན་པོ་མཆོག་གིས་ཉི་ཧོང་གི་གྲོང་ཁྱེར་ཀ་ན་ཛ་ཝའི་ནང་ཉིན་གཉིས་རིང་མཛད་འཆར་གང་ཡང་མེད་པའི་ཐོག་ཐུགས་ལྷོད་ལྷོད་ངང་སྐུ་ངལ་གསོས་གནང་མཛད་རྗེས། ཕྱི་ལོ་ ༢༠༡༥ ཟླ་ ༤ ཚེས་ ༡༡ ཉིན་ཁུལ་དེ་ནས་རྒྱང་ཐག་ཀི་ལོ་མི་ཊར་ ༥༠༠ ཙམ་གྱི་སར་ཆགས་པའི་རྒྱལ་ས་ཊོཀ་ཁྱོར་མེ་འཁོར་མགྱོགས་ཤོས་དེའི་ནང་ཆིབས་སྒྱུར་བསྐྱངས་ཡོད་པར་སོང་ཆུ་ཚོད་ ༢།༣༠ ཙམ་ལས་མ་འགོར་བར་༸གོང་ས་མཆོག་སྐུ་འཁོར་རྣམས་ཉི་ཧོང་གི་རྒྱལ་སར་༸ཞབས་སོར་འཁོད་ཡོད།
2015-04-11-Tokyo-G07

དེ་རྗེས་སོ་ཇི་དགོན་པར་ཆིབས་སྒྱུར་བསྐྱངས་ནས་ཁུལ་དེར་༸ཞབས་སོར་འཁོད་བསྟུན། མགོན་པའི་མཁན་རིན་པོ་ཆེས་གཙོས་འབྲེལ་ཡོད་རྣམས་ཀྱིས་ཕེབས་བསུའི་སྣེ་ལེན་གཟབ་རྒྱས་ཞུས་པ་དང་སྦྲགས་ཉིན་དགུང་ལྗགས་སྨིན་ཡང་ལྷན་དུ་དགྱེས་བཞེས་མཛད། དེ་རྗེས་མགོན་པའི་འདུ་ཁང་ནང་དུ་མི་མང་ ༡༨༠༠ བརྒལ་བར་བླང་དོར་བཀའ་སློབ་སྩལ་དོན། ང་ཚོ་ཚང་མ་བདེ་བ་འདོད་པ་དང་སྡུག་བསྔལ་མི་འདོད་མཁན་འགྲོ་བ་མི་རིགས་གཅིག་གྱུར་ཡིན། འདིར་ང་ཚོ་མགོན་པའི་ནང་ཞི་བདེ་བབ་ཕེབས་ངང་སྐད་ཆ་ཤོད་པའི་རིང་ལ་ས་ཁུལ་གཞན་དང་གཞན་དུ་མི་མང་རྣམས་དམག་འཁྲུག་སོགས་ནང་དཀའ་ངལ་མྱོང་བཞིན་ཡོད། འཛམ་གླིང་མི་འབོར་ཐེར་འབུམ་བདུན་ཡོད་པ་ཚང་མས་བདེ་བ་འདོད་ཀྱི་ཡོད། འོན་ཀྱང་ཞེ་སྡང་དང་ང་རྒྱལ་སོགས་ཀྱིས་རྒྱུད་རློམ་པའི་དབང་གིས་ང་ཚོ་དང་ཁོ་པ་ཚོ། ཞེས་རང་ཕྱོགས་ལ་ཆགས་པ་དང་གཞན་ཕྱོགས་ལ་སྡང་ཟུག་ཆེན་པོས་རྙོག་གྲ་དང་འཁྲུག་རྩོད། མཐའ་ན་མི་གསོད་མཁྲག་སྦྱོར་གྱི་དཀའ་ངལ་དེ་དག་ཡོང་བཞིན་ཡོད།

2015-04-11-Tokyo-G01 ལྷག་པར་དུ་རྙོག་གྲ་དེ་དག་ཆོས་ཀྱི་མིང་ཐོག་ནས་ཡོང་སྐབས་ཧ་ཅང་བློ་ཕམ་ཡོང་བཞིན་འདུག ཆོས་ལུགས་ཚང་མས་བྱམས་པ་དང་བརྩེ་བ། བཟོད་སྲན། ཆོག་ཤེས་སོགས་བཟང་པོའི་བསླབ་བྱ་དེ་དག་གསུང་བཞིན་ཡོད་སྟབས། ཆོས་ལུགས་དེ་དག་གི་རྗེས་འཇུག་ཏུ་རློམ་པ་འགའ་རེས་ཞེ་སྡང་དང་ཕྲག་དོག་སོགས་ཀྱིས་གཞན་དབང་དུ་གྱུར་ནས་འཚེ་བའི་ལས་འགུལ་སྤེལ་བཞིན་ཡོད།