༢༠༡༥ ཟླ་ ༣ ཚེས་ ༡༥ རེས་གཟའ་ཟླ་བ།
༄༅། །ཕྱི་ལོ་ ༢༠༡༥ ཟླ་ ༣ ཚེས་ ༡༣ ཉིན་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་ཕ་རན་སིའི་རྒྱལ་ས་པེ་རི་སིར་ Paris ཕེབས་ནས་ཕྱི་ལོ་ ༢༠༡༥ ཟླ་ ༣ ཚེས་ ༡༤ ཉིན་རྒྱལ་ས་པེ་རི་སིར་བོད་དོན་གོམ་འགྲོས་ཀྱི་ལས་འགུལ་གཞི་རྒྱ་ཆེ་བ་ཞིག་སྤེལ་རྒྱུ་དེར་མཉམ་ཞུགས་དང་གོ་སྒྲིག་གནང་མཁན་གྱི་བོད་དོན་རྒྱབ་སྐྱོར་ཚོགས་པ་འདྲ་མིན་གྱི་ཚོགས་མི་དང་རྒྱུན་ལས་སོགས་ལ་ཐེངས་འདིར་ཁོང་རྣམ་པས་ཆོད་སེམས་བརྟན་པོས་བོད་དོན་ལ་གདུང་སེམས་མཉམ་སྐྱེ་དང་། ཁ་ཞེ་གཉིས་མེད་ཀྱིས་བདེན་པའི་རྒྱབ་ལངས་གནང་བར་བོད་མི་ཡོངས་ཀྱི་ཚབ་ཞུས་ནས་ཐུགས་རྗེ་ཆེ་གསུང་པ་དང་སྦྲགས། ཁོང་རྣམ་པས་ཉིན་རེ་བཞིན་བོད་དོན་མ་བརྗེད་པར་རྒྱབ་སྐྱོར་གནང་བ་དེས་བོད་ཀྱི་གནད་དོན་ཤུགས་ཆེ་རུ་གཏོང་བཞིན་ཡོད་པ་མ་ཟད། བཟང་ཕྱོགས་ཀྱི་ནུས་པ་འཐོན་ངེས་ཡིན་སྐོར་གསུངས།
ཕྱོགས་མཚུངས་སྲིད་སྐྱོང་མཆོག་གིས་སྐབས་དེར་གསུང་དོན། ཁྱེད་རྣམ་པའི་བོད་དོན་ལ་རྒྱབ་སྐྱོར་གནང་བ་འདི་ང་ཚོས་ཧ་ཅང་གཙིགས་ཆེར་འཛིན་བཞིན་ཡོད། ང་ཚོ་མཉམ་རུབ་ཐོག་ནས་བོད་མི་ཚོའི་མངོན་འདོད་བསྒྲུབ་ཐུབ་རྒྱུ་རེད། སང་ཉིན་ཡུ་རོབ་བོད་དོན་རྒྱབ་སྐྱོར་གྱི་གོམས་འགྲོས་ལས་འགུལ་སྤེལ་རྒྱུ་རེད། དེར་བརྟེན་ང་ཚོས་རྒྱལ་ས་པེ་རི་སི་ནས་པེ་ཅིང་དང་ལྷ་སར་བརྡ་ལན་ཤུགས་ཆེན་པོ་ཞིག་སྤྲོད་རྒྱུ་རེད། དེར་བརྟེན་བོད་མི་ཚོར་རང་དབང་མ་ཐོབ་བར་ང་ཚོས་རྡོག་རྩ་གཅིག་ལ་སྒྲིལ་ནས་ཕྱར་གྲུ་མཉམ་འདེགས་ཐོག་ལས་འགུལ་སྤེལ་རྒྱུ་ཡིན། ཞེས་གསུངས།
ཕྱེད་ཡོལ་དུ་སྲིད་སྐྱོང་མཆོག་གིས་ཨ་རིའི་གཙུག་ལག་སློབ་གྲྭ་གྲགས་ཅན་སི་ཊན་ཕོ་ཌི་ Stanford University དང་ཧར་ཝ་ཌི། Harvard University ཅས་ཀྱི་སློབ་ཟུར་ Ivy Plus European Leaders & Harvard Club of France གྲངས་ ༡༣༠ ལྷག་ལ་འབྱུང་འགྱུར་ཨ་རི་དང་ཡུ་རོབ། བོད་དབར་གྱི་འབྲེལ་ལམ་སྐོར་གཞི་རྩར་བཞག་ནས་དེང་སྐབས་རྒྱལ་སྤྱིའི་ནང་བོད་ཀྱི་གནས་བབ་སྐོར་གསུང་བཤད་གནང་འདུག སྐབས་དེར་སྲིད་སྐྱོང་མཆོག་གིས་གསུང་དོན། དེང་སྐབས་བོད་ནང་གི་གནས་སྟངས་ཧ་ཅང་ཛ་དྲག་པོ་ཆགས་ཡོད། བོད་ནང་བདེ་འཇགས་ལ་ཁ་གཡར་ནས་པར་ཆས་གང་སར་བཙུགས་པ་དང་བོད་མི་ཚོའི་འགྲོ་འདུག་སྤྱོད་གསུམ་ལ་རྒྱ་ནག་གཞུང་གིས་དམ་བསྒྲགས་ཧ་ཅང་བྱེད་བཞིན་ཡོད་པ་མ་ཟད། རྒྱང་ཐག་མི་ཊར་ ༣༠ རེ་རེའི་མཚམས་སུ་ལུས་བཤེར་བྱེད་མཁན་གྱི་དམག་མིའི་ས་ཚིགས་རེ་བཟོས་ནས་བོད་ཀྱི་གྲོང་ཁྱེར་དང་རྒྱལ་ས་ཆེ་ཁག་ཚང་མའི་ནང་དམ་བསྒྲགས་ཧ་ཅང་བཟོ་བཞིན་ཡོད།
ངོས་ཁ་སང་གསར་འགོད་པ་གཅིག་ཐུག་བྱུང་། ཁོང་བོད་ནང་ཐེངས་འགའ་བསྐྱོད་མྱོང་འདུག ཁོང་གིས་སྐབས་དེར་ངོས་ལ་བརྗོད་རྒྱུར། ཁོང་རང་བོད་ཀྱི་ས་ཁུག་གྲོང་གསེབ་སློབ་གྲྭ་ཞིག་ཏུ་བསྐྱོད་སྐབས་སློབ་གྲྭའི་གནས་སྟངས་ཧ་ཅང་སྐྱོ་པོ་ཡོད་པ་དང་། འོན་ཀྱང་སློབ་གྲྭ་དེའི་ཕྱི་རོལ་རྒྱལ་སྒོའི་གཡས་གཡོན་དུ་བརྙན་པར་ video cameras བཞི་ལྔ་བཙུགས་ཡོད་པ་བརྗོད་བྱུང་། རྒྱ་ནག་གཞུང་གིས་གྲོང་གསེབ་ཁུལ་དུ་ཡོད་པའི་བོད་མིའི་སློབ་གྲྭ་རྣམས་ལ་མཐུན་འགྱུར་རོགས་རམ་ཆེད་འགྲོ་གྲོན་གཏོང་རྒྱུ་ལས་གཞུང་གི་གསོ་བལྟ་བྱ་རྒྱུའི་ལས་གཞིར་འགྲོ་སྒྲོན་མང་བ་གཏོང་བཞིན་ཡོད། དེར་བརྟེན་རྒྱ་ནག་གཞུང་གིས་བོད་ནང་བཙན་འཛུལ་བྱས་པ་ནས་ད་བར་དམ་བསྒྲགས་ཤུགས་ཆེ་ཤོས་བྱེད་བཞིན་པའི་གནས་སྟངས་ཆགས་ཡོད། བོད་ནི་བོད་མི་ས་ཡ་དྲུག་ཙམ་ལ་གལ་གནད་ཆེན་པོ་ཆགས་པ་ཙམ་དུ་མ་ཟད། འཛམ་གླིང་གི་སྣེ་གསུམ་པ་ཞེས་གྲགས་ཤིང་འཛམ་གླིང་ལྷོ་བྱང་གི་སྣེ་གཉིས་ཕུད་པས་འཁྱགས་རོམ་མང་ཤོས་ཡོད་པ་ནི་བོད་དེ་ཆགས་ཡོད། རྒྱུག་ཆུ་ཆེ་ཁག་བཅུ་བོད་ནས་འབྱུང་བཞིན་ཡོད་པ་དང་། རྒྱུག་ཆུ་དེ་དག་ཨེ་ཤི་ཡའི་རྒྱལ་ཁབ་མང་པོ་ཞིག་གི་མི་འབོར་ཐེར་འབུམ་གཅིག་གི་འཚོ་བརྟེན་ཆགས་ཡོད་ འཛམ་གླིང་གི་མི་འབོར་བརྒྱ་ཆ་ ༢༠ རྒྱ་ནག་ནང་ཡོད། འོན་ཀྱང་ཐུང་ཆུ་བརྒྱ་ཆ་བརྒྱད་ལས་མེད། བོད་ནང་ཤིང་ནགས་གང་བྱུང་གཅོད་འབྲེག་བྱས་པ་དང་བོད་ཀྱི་གཏན་ཆགས་ཁྱགས་རོམ་བཞུ་བར་བརྟེན་འཐུང་ཆུའི་དཀའ་ངལ་འཕྲད་ངེས་ཡིན། རྒྱ་ནག་གཞུང་གིས་བོད་ཀྱི་རྒྱུག་ཆུ་དེ་དག་ཐོག་ཆུ་མཛོད་གང་བྱུང་བརྒྱབ་དང་རྒྱག་བཞིན་ཡོད་སྟབས་ཁོར་ཡུག་གཏོར་སྐྱོན་ཚབས་ཆེ་འགྲོ་རྒྱུའི་འཇིགས་སྣང་བྱེད་བཞིན་པ་མ་ཟད། རྒྱ་གར་གིས་རྒྱུག་ཆུ་དེ་དག་རྒྱ་ནག་ཕྱོགས་སུ་ཁ་འགྱུར་བྱེད་མི་ཡོང་ངམ་སྙམ་པའི་སེམས་ཚབ་བྱེད་བཞིན་ཡོད། གཞན་ཡང་མཁས་པ་ཁག་གཅིག་གིས་རིང་མིན་ཆུའི་དོན་དུ་དམག་འཁྲུག་ཤོར་རྒྱུ་ཡིན་པའི་སེམས་ཚབ་བྱེད་བཞིན་ཡོད། ཅེས་སོགས་ཀྱི་གསུང་བཤད་གནང་།
སྐབས་དེར་ཚོགས་བཅར་བ་ཞིག་གིས་སྲིད་སྐྱོང་མཆོག་ལ་ཡུ་རོབ་རྒྱལ་ཁབ་ཚོར་རེ་འདུན་གང་ཞུ་འཆར་ཡོད་སྐོར་གྱི་དྲི་བར་ལན་འདེབས་གནང་དོན། ཁྱེད་ཚོས་ལྟ་གྲུབ་ཇི་འདྲ་ཞིག་གཞི་རྩར་བཞག་ནས་རང་གི་རྒྱལ་ཁབ་དེ་འཛུགས་བསྐྲུན་བྱས་པ་དེ་མ་བརྗེད་པར་ལྟ་གྲུབ་དེ་རྒྱུན་སྐྱོང་གནང་དགོས། དེ་སྔ་ཕ་རན་སིའི་གསར་བརྗེའི་སྐབས་མང་ཚོགས་རྣམས་ཀྱིས་རང་དབང་དང་འདྲ་མཉམ། མཐུན་སྒྲིལ་བཅས་ཀྱི་དོན་དུ་དཔའ་ངར་ཆེན་པོས་འཐབ་རྩོད་གནང་ཡོ། ང་ཚོ་བོད་མི་ཚོས་རང་དབང་དེ་བརྩོད་བཞིན་ཡོད། དེང་སྐབས་རྒྱ་ནག་ནང་དུ་ནང་པ་ཇེ་མང་དུ་འགྲོ་བཞིན་ཡོད་པ་དང་། ཞིབ་འཇུག་བྱས་པའི་སྙན་ཐོ་ལྟར་ན་དེང་སྐབས་རྒྱ་ནག་ནང་རྒྱ་རིགས་ནང་པ་ས་ཡ་ ༣༠༠ ནས་ ༤༠༠ ཡོད་འདུག དེ་ནི་རྒྱ་ནག་དམར་ཤོག་ཚོགས་པའི་ཚོགས་མིའི་གྲངས་འབོར་ལས་མང་བ་ཡོད། ཅེས་ལན་འདེབས་གནང་འདུག
དེ་རྗེས་སྲིད་སྐྱོང་མཆོག་གིས་ཡུ་རོབ་བོད་རིགས་ཚོགས་པའི་ཚོགས་གཙོ་རྣམས་དང་མཇལ་འཕྲད་གནང་ནས་ཐེངས་འདིར་རྒྱལ་ས་པེ་རི་སིར་བོད་དོན་གོམ་འགྲོས་ཀྱི་ལས་འགུལ་གཞི་རྒྱ་ཆེ་བ་ཞིག་གོ་སྒྲིག་གནང་ཐུབ་པར་བསྔགས་བརྗོད་དང་སྦྲགས་གསུང་དོན། ལས་འགུལ་དེས་བོད་དོན་ཐོག་མང་ཚོགས་ཀྱིས་རྒྱབ་སྐྱོར་ཇི་ལྟར་ཡོད་པ་གསལ་སྟོན་བྱེད་ཀྱི་ཡོད། དྲང་བདེན་ལ་དགའ་བའི་འཛམ་གླིང་མང་ཚོ་རྣམས་ཀྱིས་བོད་མིའི་དཀའ་ངལ་ལ་གདུང་སེམས་མཉམ་སྐྱེའི་རྒྱབ་སྐྱོར་ཞུ་བཞིན་ཡོད་པ་བོད་ཞུགས་བོད་མི་ཚོས་མཁྱེན་དགོས་པ་གལ་ཆེན་པོ་ཡིན། ཐེངས་འདིར་ངོས་ཀྱིས་བཀའ་ཤག་གི་ཚབ་ཞུས་ནས་ཁྱེད་ཚོར་ཐུགས་རྗེ་ཆེ་ཞུ་རྒྱུ་ཡིན། ཞེས་གསུངས།
