༢༠༡༥ ཟླ་ ༣ ཚེས་ ༣༡ རེས་གཟའ་མིག་དམར།
༄༅། །ཕྱི་ལོ་ ༢༠༡༥ ཟླ་ ༣ ཚེས་ ༢༩ བོད་ཟླ་ ༢ ཚེས་ ༡༠ ཉིན་མོན་རྟ་དབང་དགའ་ལྡན་རྣམ་རྒྱལ་ལྷ་རྩེ་དགོན་གྱི་མཁན་འདུས་མང་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་གཟིམ་ཆུང་དུ་བརྟན་བཞུགས་བསྟར་འབུལ་ཞུས་འདུག
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་དགུ་པ་ཙམ་ལ་༸གོང་ས་མཆོག་ཕོ་བྲང་གཟིམ་ཆུང་ནས་མོན་རྟ་དབང་དགའ་ལྡན་ལྷ་རྩེ་དགོན་གྱི་མཁན་པོ་གུ་རུ་རིན་པོ་ཆེས་སྤོས་སྣེས་སྔོན་བསུས་ཏེ་ཚོམས་ཆེན་དུ་གདན་ཞུ་དང་། བཞུགས་ཁྲི་རིན་པོ་ཆེར་༸ཞབས་སོར་འཁོད་མཚམས་འདུས་མང་ནས་འཁྲུངས་རབས་གསོལ་འདེབས་གསུང་མུར་རྟེན་འབྲེལ་གསོལ་ཇ་དང་འབྲས་སིལ་འདེགས་འབུལ་དང་། དེ་ནས་མོན་རྟ་དབང་དགའ་ལྡན་རྣམ་རྒྱལ་ལྷ་རྩེ་དགོན་པའི་མཁན་རིན་པོ་ཆེས་སྣེ་ཁྲིད་སློབ་དཔོན་དང་དབུ་མཛད། དེ་བཞིན་དགེ་འདུན་པ་བཞི་བཅུ་ཞེ་ལྔ་ཆེད་བཅར་གྱིས་བྱིན་རླབས་གཏེར་ཆེན་བཀའ་གདམས་ཐིག་ལེ་བཅུ་དྲུག་གི་སྒྲུབ་མཆོད་ཉིན་ལྔའི་རིང་སྦྱིན་སྲེག་དང་བཅས་པ་སྒྲུབ་པའི་མཆོད་པའི་ཚུལ་དུ་ཕུལ་ཞིང་། འཕགས་མ་སྒྲོན་དཀར་ཡིད་བཞིན་འཁོར་ལོའི་སྒོ་ནས་སྐུ་ཚེའི་ཚེ་སྒྲུབ་ཉིན་ལྔའི་རིང་ཐུན་རེ་སྒྲུབ་ཏེ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་བརྒྱད་ཅུ་བཞེས་པའི་གྱ་སྟོན་དུ་བཀའ་དྲིན་རྗེས་དྲན་གྱི་བརྟན་བཞུགས་བསྟར་འབུལ་དང་། གཏང་རག་མཎྜལ་སོགས་ཕུལ་རྗེས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་སྩལ་ཡོད།
དེ་ཡང་༸གོང་ས་མཆོག་གིས་བཀའ་སློབ་སྩལ་དོན། ང་ཚོ་བཙན་བྱོལ་བ་ཆགས་ཏེ་ཡར་རྒྱས་ཕྱིན་པ་ལྟ་བུ་རེད། ཧི་མ་ལ་ཡའི་རི་བརྒྱུད་ཀྱི་ས་ཁུལ་ཡོངས་རྫོགས་སུ་དེ་སྔ་ནས་ནང་ཆོས་ལ་དད་པ་ཡོད་མཁན་ཚོ་ནང་ཆོས་སློབ་སྦྱོང་བྱེད་པའི་ཐོག་ལ་དོ་སྣང་གསར་པ་བསླེབས་ཏེ་མུ་མཐུད་ཡར་རྒྱས་ཕྱིན་ཡོད་པ་ཧ་ཅང་ཡག་པོ་རེད། ཁྱོད་རང་ཚོ་རྟ་དབང་དགོན་པའི་ཁུངས་ཀྱི་གྲོང་གསེབ་ཁུལ་འདྲ་མིན་དུ་ལྷ་ཁང་བཅུ་དྲུག་བཅུ་བདུན་ཞིག་ཡོད་པའི་དཀོར་གཉེར་འདྲ་ཞིག་ཡིན་ནའང་ནང་ཆོས་ངོ་སྤྲོད་བྱེད་རྒྱུ་དང་། ཡུལ་མི་ཚོས་ཀྱང་དེ་རིང་དགོན་པར་ནང་ཆོས་ངོ་སྤྲོད་བྱེད་ཀྱི་རེད་ཅེས་དགའ་དགའ་སྤྲོ་སྤྲོ་བྱས་ཏེ་འགྲོ་རྒྱུ་ཡོད་པ་ཞིག་དང་། གང་ལྟར་ལྷ་ཁང་ཆུང་ཆུང་ཞིག་ལས་མེད་ཀྱང་ནང་ཆོས་ངོ་སྤྲོད་བྱེད་པ་དང་། ནང་ཆོས་ཀྱི་དཔྱད་པ་བྱེད་རྒྱུ་ཞིག་ལ་ཁྱོད་རང་ཚོ་སློབ་གཉེར་ཐོན་ཡོང་གི་ཡོད་པས་བསམ་བློ་གཏོང་དགོས་པ་རེད། ཕྱོགས་གཅིག་ནས་རྟ་དབང་དགོན་པ་རང་ཡང་ཡར་རྒྱས་འགྲོ་བཞིན་ཡོད་པ་རེད་ལ། དེ་དང་ཆབས་གཅིག་གྲོང་གསེབ་སོ་སོའི་ནང་ལ་ཡོད་པའི་ལྷ་ཁང་གི་དཀོར་གཉེར་གྱིས་གོ་སྒྲིག་བྱས་ཐོག་ནང་ཆོས་ངོ་སྤྲོད་ཅིག་བྱེད་ཐུབ་པ་ཡིན་ན། ན་ནིང་ངོས་རང་ཤི་ལོང་དུ་འགྲོ་དུས་གདན་ས་ཚོས་རེ་མོས་ཀྱིས་
འཛིན་སྐྱོང་བྱེད་བཞིན་ཡོད་པ་རེད་ཟེར་བའི་ལྷ་ཁང་ཆུང་ཆུང་ཞིག་འདུག དེ་དུས་ཀྱང་བརྗོད་རྒྱུ་བྱུང་། ལྷ་ཁང་ཡིན་ཞེས་དཀོར་གཉེར་གྲྭ་བ་གཅིག་བསྡད་དེ་ཞབས་བརྟན་སྒྲུབ་ས་ལྟ་བུ་བྱེད་དགོས་དོན་ཡོད་པ་མ་རེད། དེ་ངེས་པར་དུ་སློབ་གཉེར་བྱེད་ས་ཡོད་པའི་ནང་ཆོས་ངོ་སྤྲོད་དང་། སྔོན་ལ་དེབ་(ནང་པའི་ཚན་རིག་དང་ལྟ་གྲུབ་ཀུན་བཏུས།)འདི་འཁྱེར་ཏེ་སློབ་སྦྱོང་བྱེད་པ་དང་། ཕྱིན་ཆད་དགེ་འདུན་པ་སློབ་སྦྱོང་ཡོད་མཁན་ཚོས་ལྷ་དང་དགོན་པ་ཚོའི་ནང་ནས་འདིའི་ཐོག་ནས་མར་བསླབ་ཐུབ་པ་ཡིན་ན། མཐའ་གཅིག་ཏུ་ཆོས་སློབ་བཞིན་ཡོད་པའི་སྐད་ཆའང་མིན་པར་ཤེས་ཡོན་ཡར་རྒྱས་གཏོང་བའི་ཐོག་ནས་ཤེས་ཡོན་གྱི་ལྟེ་གནས་ཤིག་བཟོ་ཐུབ་ན་ཞེས་བརྗོད་པ་ཡིན། དེ་དུས་བློ་གསལ་གླིང་གི་མཁན་པོ་ཕེབས་འདུག འདི་ལ་གདན་ས་སོ་སོའི་ཁུངས་ནས་མི་འགྲོ་ཡོད་ཙམ་ཞིག་བཏང་བ་མིན་པར་ནང་ཆོས་ལ་དོ་སྣང་ཡོད་མཁན་དང་འགྲེལ་བཤད་རྒྱག་ཤེས་མཁན་ཞིག སོ་སོའི་ལག་ལེན་གྱི་ཐོག་ནས་ཡིན་ནའང་བཙུན་པའི་ཡོན་ཏན་ཡོད་མཁན་ཞིག་གལ་ཆེན་པོ་བྱས་ནས་གཏོང་དགོས་པ་རེད་ཅེས་བརྗོད་པ་ཡིན།
དེ་བཞིན་ལ་དྭགས་ཡུལ་དུའང་རྟག་ཏུ་བཤད་ཀྱི་ཡོད། གང་ལྟར་ཤེས་ཡོན་ཅན་མང་པོའི་རྣ་ལམ་དུ་ནཱ་ལེནྡྲ་ཞེས་བརྗོད་དུས་ཞབས་བརྟན་སྒྲུབ་ས་ལྟ་བུ་ཞིག་ཕལ་ཆེར་བློ་ལ་འཆར་གྱི་མ་རེད། སློབ་གཉེར་ཁང་དང་མཁས་པའི་འབྱུང་ཁུངས་ཤིག་ལ་རང་བཞིན་གྱིས་མཐོང་གི་རེད། བོད་ལ་མཚོན་ནའང་སེ་འབྲས་དགའ་གསུམ་ཞེས་བརྗོད་དུས་གཞུང་ཆེན་སློབ་གཉེར་དང་དགེ་བཤེས་ཐོན་ས་ཞིག་ཏུ་མཐོང་བཞིན་འདུག དེ་ནང་བཞིན་ཧི་མ་ལ་ཡའི་རི་བརྒྱུད་ཀྱི་དགོན་པ་ཚང་མར་སློབ་གཉེར་ཡོད་པ་དང་། ཡུལ་མི་ཚོར་ནང་ཆོས་ངོ་སྤྲོད་བྱེད་པའི་འགན་འཁྱེར་ཐུབ་པ་ཞིག་བྱེད་ཐུབ་ན་ཕྱོགས་གཅིག་ནས་ཡུལ་སྡེ་ཆུང་ཆུང་ཞིག་ཡོད་པ་ཡིན་ནའང་དེ་རུ་ནང་ཆོས་འགྲེལ་བཤད་རྒྱག་མཁན་བསྡད་ཡོད་བསམས་པའི་ཐོག་ནས་མཐོང་ཡང་ཆེ་རུ་འགྲོ་གི་རེད། གལ་ཆེ་ཤོས་ཡུལ་བ་ཚོ་ཁྱིམ་ནས་ཁྱིམ་མེད་པར་རབ་ཏུ་བྱུང་ནས་དཔེ་ཆར་བལྟ་རྒྱུ་ནི་ཡོང་གི་མེད། སོ་སོའི་ཁྱིམ་ལ་མི་སྐྱ་རང་བྱས་ཏེ་ཡོད་མུས་ཀྱི་ཐོག་ལ་ཚེས་བཟང་དུས་བཟང་ལ་སོ་སོོའི་ལྷ་ཁང་དང་དགོན་པའི་ནང་དུ་ནང་ཆོས་ངོ་སྤྲོད་བྱ་རྒྱུ་བྱུང་བ་ཡིན་ན་ཧ་ཅང་ཡག་པོ་འདུག མི་མང་སྐྱ་བོ་ཕོ་མོ་ཚོའི་ཁྲོད་ནང་ཆོས་ཀྱི་ཤེས་ཚད་དེའང་མཐོ་རུ་འགྲོ་བ་དང་། ནང་ཆོས་ཤེས་ཚད་མཐོ་རུ་ཕྱིན་པ་ཡིན་ན་ཐེ་ཚོམ་ཉུང་རུ་འགྲོ་གི་རེད། ཆོས་ལུགས་ཚང་མར་ངོས་ཀྱིས་གུས་ཞབས་དང་བརྩི་བཀུར་བྱེད་ཀྱི་ཡོད། དེ་ཁ་ཞེ་གཉིས་མེད་ཡིན། ཡིན་ནའང་། ཆོས་ལུགས་གཞན་པ་ཚོར་སློབ་སྦྱོང་ཅུང་ཙམ་མཐོ་རུ་ཕྱིན་ཏེ་བསམ་བློ་གཏོང་བའི་དུས་ལ་སླེབས་སྐབས་ཆོས་ལ་དད་པ་ཆུང་རུ་འགྲོ་རྒྱུ་ཞིག་འདུག སངས་རྒྱས་པའི་ཆོས་དང་ལྷག་པར་དུ་དཔལ་ནཱ་ལེནྡྲའི་ཆོས་བརྒྱུད་དེ་ནི་ཅི་ཙམ་གྱིས་སློབ་སྦྱོང་བྱས་ཏེ་བསམ་བློ་གཏོང་རྒྱུ་མང་ཙམ་བྱུང་བའི་ཚོད་ཀྱིས་ཨོ་འདིར་གནད་འགག་ཆེན་པོ་ཞིག་གསུངས་འདུག་བཅོམ་ལྡན་འདས་ནི་མཁྱེན་པའི་བདག་ཉིད་དང་བརྩེ་བའི་བདག་ཉིད་དངོས་གནས་རེད་བསམ་པ་ཞིག་དྲན་ཐུབ། དེ་ནས་ཀླུ་སྒྲུབ་ཡབ་སྲས་ཀྱི་གསུང་ལ་བལྟས་ཏེ་ཞིབ་འཇུག་བརྟག་དཔྱད་བྱས་ཏེ་དོགས་པ་བཀོད་པ་ཡིན་ན་དད་པ་བརྟན་དུ་འགྲོ་རྒྱུ་ཞིག་འདུག དེ་ང་ཚོ་ནང་པ་སངས་རྒྱས་པའི་ཆོས་ཀྱི་ཞག་རྩི་ཆགས་བསྡད་ཡོད། ང་ཚོར་ཞག་རྩི་ཡོད་པ་དེ་བེད་སྤྱོད་བྱེད་དགོས་པ་རེད། ཅེས་སོགས་བཀའ་སློབ་སྩལ་ཡོད་པ་དང་། དེ་ནས་བསྟན་རྒྱས་སྨོན་ལམ་དང་། མཆོག་གསུམ་ཤིས་བརྗོད། བདེན་ཚིག་སྨོན་ལམ་བཅས་གསུང་སྟེ་བརྟན་བཞུགས་ལེགས་པར་གྲུབ་ཡོད།
མོན་རྟ་དབང་དགོན་པ་ནི་ཕྱི་ལོ་ ༡༦༨༠ ལོར་༸རྒྱལ་དབང་ལྔ་བ་ཆེན་པོའི་རྒྱབ་སྐྱོར་འོག་མེ་རག་བླ་མ་བློ་གྲོས་རྒྱ་མཚོ་མཆོག་གིས་རྨང་གཞི་བཏིང་ཞིང་ཕྱི་ལོ་ ༡༩༨༡ ལོརགསར་བཞེངས་ལེགས་གྲུབ་ཅིང་། ༸གོང་ས་༸རྒྱལ་བའི་དབང་པོ་སྐུ་ཕྲེང་རིམ་བྱོན་གྱིས་བྱིན་གྱིས་རླབས་ཤིང་། དེ་ཡང་༸རྒྱལ་མཆོག་ལྔ་བ་ཆེན་པོས་ལྷ་མོའི་རྟེན་ཐང་བྱིའུ་དྲོད་མ་ཞེས་པའི་དམ་འབྱར་སྩལ་ནས་དགོན་གྱི་སྲུང་མ་གཙོ་བོར་མངལ་གསོལ་མཛད་པ་དང་། ༸རྒྱལ་དབང་དྲུག་པ་དང་བདུན་པ་སོགས་ཀྱི་སྐབས་སུའང་གཟིགས་བཟོས་བཀའ་དྲིན་བསྐྱངས་ཡོད་པ་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལོ་ ༡༩༥༩ ལོར་མོན་སྤང་ཆེན་བརྒྱུད་རྒྱ་གར་དུ་ཆིབས་སྒྱུར་སྐབས་མོན་རྟ་དབང་དགའ་ལྡན་རྣམ་རྒྱལ་ལྷ་རྩེ་དགོན་དུ་༸ཞབས་སོར་འཁོད་དེ་དགའ་ལྡན་ལྷ་བརྒྱ་མ་དང་ཡོན་ཏན་བཞི་གྱུར་མའི་ཆོས་འབྲེལ་སྩལ་ཡོད་པ་དང་། དེ་བཞིན་ཕྱི་ལོ་ ༡༩༨༣ ལོར་དགོན་པའི་འདུས་མང་ཡོངས་ལ་བྱང་ཆུབ་ལམ་རིམ་ཆེན་མོའི་དབུ་ནས་བཤད་པ་ཐུན་གཅིག་སྩལ་བ་དང་སྦྲགས་བླང་དོར་བཀའ་སློབ་སྩལ་བ། ཕྱི་ལོ་ ༡༩༩༸ ལོར་འདུ་ཁང་ཉམས་གསོ་གྲུབ་ནས་རབ་གནས་ཚོགས་མགོན་དུ་༸ཞབས་སོར་འཁོད་ནས་བློ་སྦྱོང་ཚིགས་བརྒྱད་མ་སོགས་ཀྱི་བཀའ་ཆོས་སྩལ། ཕྱི་ལོ་ ༢༠༠༣ ལོར་ལམ་རིམ་འཇམ་དཔལ་ཞལ་ལུང་དང་བཀའ་གདམས་ཐིག་ལེ་བཅུ་དྲུག་གི་སྨིན་བྱེད་བཀའ་དབང་སྨིན་སྩལ། ཕྱི་ལོ་ ༢༠༠༩ ལོར་ཐོག་མཐའ་མ་དང་འདོད་ཁམས་བདག་མོའི་རྗེས་གནང་བཅས་བཀའ་དྲིན་སྩལ་ཡོད།།
