༢༠༡༥ ཟླ་ ༣ ཚེས་ ༡༩ རེས་གཟའ་ཕུར་བུ།
༄༅། །འདི་གར་ཁུངས་ལྡན་གནས་ཚུལ་འབྱོར་གསལ་ལྟར་ན། ཕྱི་ལོོ་ ༢༠༡༥ ཟླ་ ༣ ཚེས་ ༡༤ དགོང་མོ་སོག་རྫོང་ཙན་དན་དགོན་པའི་དགེ་འདུན་པ་བདུན་རྒྱ་གཞུང་གི་ཉེན་རྟོག་པས་འཛིན་བཟུང་བཀག་ཉར་བྱས་ཡོད་འདུག
དེ་ཡང་འཛིན་བཟུང་བྱས་པའི་སོག་རྫོང་ཙན་དན་དགོན་པའི་གྲྭ་རྣམ་རྒྱལ་ཚུལ་ཁྲིམས་ལགས་དང་། གྲྭ་བློ་གྲོས་བསྟན་འཛིན་ལགས། གྲྭ་ཚུལ་ཁྲིམས་སྒོ་འབྱེད་ལགས། གྲྭ་ཚུལ་ཁྲིམས་རྣམ་རྒྱལ་ལགས། གྲྭ་ཐབས་མཁས་ལྷུན་འགྲུབ་ལགས། གྲྭ་འཇིགས་མེད་ཚུལ་ཁྲིམས་ལགས། གྲྭ་འཇིགས་མེད་གྲགས་པ་ལགས་བཅས་ཡིན་འདུག འཛིན་བཟུང་བྱེད་དགོས་དོན་ཡུལ་མི་དག་གིས་ཚོད་དཔག་ལྟར་ན། བོད་དོན་དང་འབྲེལ་བའི་པར་རིས་དང་གནས་ཚུལ་ཕན་ཚུན་གཏོང་རེས་བྱས་པའི་རྐྱེན་ཡིན་འདུག ཅེས་བརྗོད་ཀྱི་འདུག
རྒྱ་གཞུང་གིས་ཉེན་རྟོག་པས་ཁོང་རྣམ་པ་འཛིན་བཟུང་བྱེད་པའི་རྒྱུ་མཚན་འགྲེལ་བརྗོད་བྱས་མེད་པ་མ་ཟད། ས་ཕྱོགས་གང་དུ་བཙོན་འཇུག་བྱས་མིན་ཡང་ཤེས་རྟོགས་ཐུབ་མེད།
སྤྱིར་ཙན་དན་དགོན་པའི་ཕྱི་ནང་བར་གསུམ་ལ་གསང་བའི་པར་ཆས་གྲངས་ལྔ་བཅུ་ཙམ་བཙུགས་ཡོད་པ་དང་། དེང་སྐབས་དགོན་པའི་ཕྱི་ནང་བར་གསུམ་དུ་ཉེན་རྟོག་མི་སྣ་མང་པོ་འགྲེམས་འཇོག་གིས་ཆུ་ཚོད་ཉེར་བཞིའི་རིང་ལྟ་སྲུང་བྱས་དང་བྱེད་བཞིན་ཡོད་འདུག མཚན་མོར་དགེ་འདུན་པ་རྣམས་ཕྱི་ལ་ཆབ་གསང་དུ་འགྲོ་སྐབས་ཉེན་རྟོག་མི་སྣས་སུན་པོ་བཟོས་པ་དང་། འཇིགས་སྐུལ་བྱེད་པ་སོགས་དེང་སྐབས་དགོན་པའི་བླ་གྲྭ་རྣམས་འཇིགས་སྣང་དང་དངངས་སྐྲག་གི་ཁྲོད་དུ་གནས་ཡོད་འདུག ལོ་ན་བཅོ་བརྒྱད་མ་ཟིན་པར་གྲྭ་པ་བྱེད་མི་ཆོག་པའི་བཙན་བཀའ་ཡང་བཏང་འདུག
གོང་གི་གྲྭ་རྣམ་རྒྱལ་ཚུལ་ཁྲིམས་ལགས་ནི་ཕྱི་ལོ་ ༢༠༡༡ ལོར་ཕྱི་ཕྱོགས་ལ་འབྲེལ་བ་ཡོད་པར་བསྙད་ནས་ཉིན་ ༧ རིང་བཀག་ཉར་བྱེད་མྱོང་འདུག་ལ། ཕྱི་ལོ་ ༢༠༡༢ ཟླ་ ༡༠ ཚེས་ ༦ ཉིན་འཛིན་བཟུང་བྱས་ཏེ། ཐོག་མར་ནག་ཆུའི་བཙོན་ཁང་དང་བཀག་ཉར་ཁང་གཉིས་ཀྱི་ནང་རེ་མོས་ཀྱིས་ཟླ་ ༤ དང་ཉིན་གྲངས་ ༢༨ ཙམ་བཙོན་འཇུག་དང་། དེ་རྗེས་ལྷ་སའི་སྟོད་ལུང་བཙོན་ཁང་དུ་ཟླ་ ༣ དང་ཉིན་ ༡༡ རིང་བཙོན་འཇུག་བྱས་པ་བཅས་ཁྱོན་ཟླ་ ༨ ལྷག་བཙོན་འཇུག་མནར་གཅོད་བཏང་མྱོང་ཡོད་འདུག
འདི་ལོའི་ཕྱི་ཟླ་གསུམ་པའི་ཚེས་ཤར་ནས་བཟུང་བོད་ས་ཁྱོན་ཡོངས་ལ་སྤྱི་ཚོགས་དྲ་འཕྲིན་ཁག་གིས་གཙོས་བརྒྱུད་ལམ་ཡོངས་རྫོགས་ལ་དམ་བསྒྲགས་ནན་པོ་བྱེད་བཞིན་ཡོད་པ་མ་ཟད། ལྷག་པར་ནག་ཆུའི་ཤར་ཕྱོགས་རྫོང་གསུམ་སྟེ། སྦྲ་སོག་འབྲི་གསུམ་གྱི་ཁྱོན་ལ་དམ་བསྒྲགས་ཆེན་པོ་བྱེད་བཞིན་འདུག དེ་སྔོན་ཆབ་སྲིད་ཀྱི་གནད་དོན་འཕྲད་མྱོང་ཡོད་པ་ཚང་མ་ཡུལ་ཚོའི་གཞུང་ལས་ཁང་དུ་འབོད་འགུག་བྱེད་བཞིན་ཡོད་འདུག
